1. Kan eski li kapav pli difisil pou servi Zeova?

DAPRE twa, kan eski li pli difisil pou servi Zeova: Kan to pe fer fas ar bann sitiasion difisil ouswa kan tou pe pas bien dan to lavi? Kan nou pe fer fas ar bann sitiasion difisil, deswit nou kont lor Zeova. Me ki nou fer kan tou pe pas bien dan nou lavi? Eski parfwa nou bliye ki kantite li inportan pou servi Zeova? Zeova ti averti bann Izraelit ki enn kitsoz koumsa ti kapav arive.​—Det. 6:10-12.

2. Ki lexanp Lerwa Aza inn done?

² Anou get lexanp Lerwa Aza. Li ti azir avek sazes parski li ti kont lor Zeova. Li ti servi Zeova, pa zis dan bann moman difisil, me osi dan bann moman kot ti ena lape. Aza so “leker ti konple anver Zeova pandan toutlong so lavi.” (1 Ler. 15:14) Aza ti montre ki li ti servi Zeova avek enn leker konple kan li ti tir tou bann fos ladorasion ki ti ena dan Zida. Labib dir ki “li ti tir lotel bann fos bondie ek bann plas dan oter, li ti kraz bann kolonn sakre ek koup bann poto sakre.” (2 Kro. 14:3, 5) Li ti mem tir Maaka, so granmer, dan so pozision antan ki larenn. Kifer? Parski so granmer ti pe ankouraz bann dimounn pou ador enn zidol.​—1 Ler. 15:11-13.

3. Ki nou pou examine dan sa lartik-la?

 ³ Aza pa ti zis tir bann fos ladorasion. Li ti osi ed bann abitan Zida pou rekoumans ador Zeova. Zeova ti beni Aza ek bann abitan Zida kan Li ti donn zot enn peryod lape. * Kan Lerwa Aza ti pe regne, “ti ena lape dan pei-la” pandan di-z-an. (2 Kro. 14:1, 4, 6) Dan sa lartik-la, nou pou trouve kouma Aza ti azir pandan sa peryod lape la. Apre sa, nou pou get lexanp bann Kretien dan premie siek ki, parey kouma Aza, ti azir avek sazes pandan enn peryod kot ti ena lape. Ek apre sa, nou pou reponn sa kestion-la: Si to res dan enn pei kot gouvernman pa anpes bann Temwin pou ador Zeova, kouma to kapav azir avek sazes pandan sa moman lape la?

4. Dapre 2 Kronik 14:2, 6, 7, kouma Aza ti azir pandan sa peryod kot ti ena lape la?

⁴ Lir 2 Kronik 14:2, 6, 7. * Aza ti explik lepep ki se Zeova ki ti fer zot “gagn lape ar bann pei ki otour” zot. Me Aza pa ti panse ki sa peryod lape la ti enn bon moman pou rilax. Okontrer, li ti koumans konstrir bann lavil, bann miray, bann latour, ek bann gran laport. Li ti dir bann abitan Zida: “Pei-la ankor pou nou.” Ki Aza ti pe rod dir? Li ti pe rod dir ki pa ti ena okenn lennmi dan pei ki ti kapav anpes zot al kot zot anvi ek fer sa bann  konstriksion-la. Li ti ankouraz lepep pou profit sa moman lape la.

5. Kifer Aza ti ranforsi so larme?

⁵ Aza ti osi servi sa moman lape la pou ranforsi so larme. (2 Kro. 14:8) Eski savedir ki li pa ti ena konfians an Zeova? Non. Okontrer, Aza ti kone ki, antan ki lerwa, li ti bizin prepar lepep pou fer fas ar bann problem ki ti kapav arive dan lavenir. Aza ti kone ki sa moman lape la pa ti pou dire pou touletan, ek li ti ena rezon.

6. Kouma bann Kretien dan premie siek ti azir kan ti ena lape?

⁶ Dan premie siek, mem si bien souvan bann Kretien ti gagn persekision, zot ti konn osi bann moman kot ti ena lape. Ki zot ti fer dan sa bann moman-la? Sa bann frer ek ser fidel la ti kontign prese avek zel. Zistwar Bann Apot explike ki zot “ti ena lakrint pou Zeova” ek zot ti kontign servi Li. Zot ti kontign pres bonn nouvel, ek gras-a sa, zot ti “kontign miltipliye.” Li kler ki Zeova ti pe beni zot predikasion pandan sa peryod lape la.​—Zist. 9:26-31, NW.

7-8. Lapot Pol ek bann lezot frer ti sezi tou lokazion ki zot ti gagne pou fer ki kitsoz? Explike.

⁷ Sa bann Kretien-la ti sezi tou lokazion ki zot ti gagne pou prese. Par exanp, kan lapot Pol ti trouve ki li ti kapav prese dan lavil Efez, li ti res laba pou prese.​—1 Kor. 16:8, 9.

⁸ Lan 49, kan bann zapot ek bann ansien ti pran desizion konsernan sirkonsizion, Pol ek bann lezot Kretien ti sezi sa lokazion-la pou pres ar boukou dimounn. (Zist. 15:23-29) Apre ki Pol ek bann lezot frer ti fer bann lasanble konn sa desizion-la, zot tou ansam ti fer bann gran zefor pou pres “bon nouvel konsernan parol Zeova.” (Zist. 15:30-35, NW) Ki rezilta sa finn ena? Labib dir ki “bann lasanble ti pe kontign vinn for dan lafwa ek zot ti pe ogmante zour apre zour.”​—Zist. 16:4, 5, NW.

9. Ki nou kapav fer dan boukou pei azordi, ek ki kitsoz nou kapav demann noumem?

⁹ Dan boukou pei azordi, nou lib pou prese. Eski to res dan enn parmi sa bann pei-la? Si wi, demann tomem, ‘Kouma mo pe servi sa liberte-la?’ Bann dernie zour se enn peryod extraordiner pou bann serviter Zeova, parski zot bien okipe dan pli gran travay predikasion ek lansegnman ki finn ena depi ki lemond existe. (Mark 13:10) Ena boukou kitsoz ki nou kapav fer pou partisip dan sa travay-la.

10. Ki kitsoz 2 Timote 4:2 ankouraz nou pou fer?

¹⁰ Kouma nou kapav profit sa moman lape la? (Lir 2 Timote 4:2, NW. *) Eski twa ouswa enn manb to fami kapav fer bann sanzman pou fer plis dan predikasion, ouswa mem servi kouma pionie? Azordi, se pa moman pou nou esey vinn ris, parski seki nou pe ramase, nou pa pou kapav amenn sa ar nou pandan gran detres.​—Prov. 11:4; Mat. 6:31-33; 1 Zan 2:15-17.

11. Ki kitsoz sertin proklamater inn fer pou ed pli boukou dimounn pou tann bonn nouvel?

¹¹ Boukou proklamater inn aprann enn nouvo lang pou ki zot kapav ed lezot pou aprann konn Bondie. Lorganizasion Zeova pe prodir bann piblikasion dan pli boukou lang pou ed sa bann proklamater-la. Par exanp, an 2010, nou bann piblikasion  ti disponib dan apepre 500 lang. Me azordi, nou bann piblikasion disponib dan plis ki 1,000 lang!

12. Ki bann dimounn resanti kan zot tann mesaz Rwayom Bondie dan zot prop lang? Donn enn lexanp.

¹² Ki bann dimounn resanti kan zot tann koz lor Zeova dan zot prop lang? Anou get lexanp enn ser ki ti asiste enn lasanble rezional dan Memphis, Tennessee, dan Letazini. Lasanble-la ti dan lang Kinyarwanda, lang ki boukou dimounn koze dan Rwanda, dan Congo-Kinshasa ek dan Ouganda. Apre sa lasanble-la, nou ser, ki koz Kinyarwanda, ti dir: “Sa fer 17 an ki mo res Letazini, ek se premie fwa ki mo reisi konpran tou seki’nn dir dan enn lasanble.” Nou sir ki sa bann diskour-la ti bien tous leker nou ser, parski zot ti dan so prop lang! Si to sitiasion permet, eski twa osi to kapav aprann enn lot lang pou ed bann dimounn dan to teritwar? Eski ena bann dimounn dan to teritwar ki ti pou kontan tann bonn nouvel si zot tann sa dan zot prop lang? Antouka, si to fer sa zefor-la, sa pou rann twa bien zwaye!

13. Kouma nou bann frer ek ser dan Larisi inn azir kan ti ena lape?

¹³ Dan sertin pei, nou bann frer ek ser pa lib pou prese. Kifer? Parski gouvernman inn met bann restriksion lor nou travay predikasion. Anou pran lexanp nou bann frer ek ser dan Larisi. Pandan boukou lane, zot ti gagn persekision, me an Mars 1991, gouvernman ti donn zot liberte pou pratik zot relizion. Sa lepok-la, ti ena apepre 16,000 proklamater dan Larisi. Dan lespas 20 an, kantite proklamater ti vinn plis ki 160,000! Li kler ki nou bann frer ek ser inn azir avek sazes kan zot ti lib pou prese. Me sa peryod lape la pa ti dire. Mem si sitiasion inn sanze dan Larisi, nou  bann frer ek ser ankor pe fer boukou zefor pou servi Zeova. Zot pe fer tou seki zot kapav pou servi Zeova.

14-15. Kouma Zeova ti servi so pwisans pou ed Lerwa Aza?

¹⁴ Peryod lape ki ti ena dan lepok Aza pa ti dire. Enn gran larme, plis ki enn milyon solda, ti sorti Letiopi. Zot sef, Zera, ti sir ki zot ti pou gagn laviktwar lor bann abitan Zida. Me Lerwa Aza ti ena konfians an Zeova. Li ti priye Zeova: “A Zeova nou Bondie, ed nou, parski nou kont lor twa, ek lor to nom nou’nn al kont sa lafoul-la.”​—2 Kro. 14:11.

¹⁵ Mem si larme bann Etiopien ti de fwa pli gran ki larme Zida, Aza ti kone ki Zeova bien pwisan ek ki Li ti kapav ed So pep. Ek vremem Zeova ti ed so pep. Larme bann Etiopien ti perdi lager.​—2 Kro. 14:8-13.

16. Kouma nou kone ki sa peryod lape la pa pou dire?

¹⁶ Nou pa kone seki pou ariv sakenn parmi nou dan lavenir, me nou kone ki lape ki bann serviter Zeova ena azordi, li pa pou dire. Pa bliye ki Zezi ti predir ki dan bann dernie zour, “tou bann nasion [ti] pou air” so bann disip. (Mat. 24:9) Lapot Pol osi ti dir ki “tou bann ki anvi res atase avek Bondie, antan ki disip Kris Zezi pou gagn persekision zot osi.” (2 Tim. 3:12, NW) Satan bien ankoler, ek nou pou anbet noumem si nou panse ki so koler pa pou ena okenn lefe lor nou.​—Rev. 12:12.

17. Kouma nou lafwa pou teste?

¹⁷ Biento, nou tou nou pou pas par bann leprev ki pou teste nou lafwa. Dan bien tigit letan, pou ena enn “gran detres kouma zame inn ena depi koumansman lemond ziska asterla.” (Mat. 24:21, NW) Dan sa moman-la, kitfwa bann manb nou fami pou vir kont nou ek kitfwa nou laktivite predikasion pou interdi. (Mat. 10:35, 36) Me parey kouma Aza, eski to pou ena konfians ki Zeova pou ed twa ek protez twa?

18. Dapre Ebre 10:38, 39, ki kitsoz pou ed nou pou nou prepar noumem?

¹⁸ Azordi, Zeova pe prepar nou pou  bann levennman ki pou arive biento. Li pe gid “lesklav fidel ek saz,” ki pe donn nou seki nou bizin lor plan spiritiel, “dan ler ki bizin,” pou ki nou res for. (Mat. 24:45, NW) Me nou osi nou bizin fer tou seki nou kapav pou ranforsi nou lafwa an Zeova.​—Lir Ebre 10:38, 39.

19-20. An-akor avek 1 Kronik 28:9, ki kestion nou bizin poz noumem, ek kifer nou bizin fer sa?

¹⁹ Parey kouma Aza, nou bizin “rod Zeova.” (2 Kro. 14:4; 15:1, 2) Pou fer sa, nou bizin aprann konn Zeova ek pran batem. Nou fer tou seki nou kapav pou fer nou lamour pou Zeova vinn pli for. Pou kone si nou lamour pou Zeova li for, nou kapav demann noumem: ‘Eski mo asiste bann renion regilierman?’ Gras-a bann renion, nou gagn lafors pou kontign servi Zeova ek nou gagn lankourazman ar nou bann frer ek ser. (Mat. 11:28) Nou kapav osi demann noumem: ‘Eski mo etidie Labib regilierman? Si to ankor res kot to fami, eski to fer to ladorasion an fami sak semenn? Ouswa si to res tousel, eski to rezerv enn letan pou etidie parey kouma to ti pou fer si to ti res avek to fami? Eski mo fer mo maximum pou prese ek ansegn bann dimounn?’

²⁰ Kifer nou bizin poz noumem sa bann kestion-la? Labib dir nou ki Zeova examinn nou leker ek nou bann panse, alor nou osi nou bizin examinn noumem. (Lir 1 Kronik 28:9. *) Si nou trouve ki nou bizin fer bann sanzman dan nou bann lobzektif, nou latitid, ouswa nou fason panse, nou bizin demann Zeova pou ed nou fer sa bann sanzman-la. Nou bizin prepar nou depi asterla mem pou fer fas ar bann leprev ki pou arive biento. Alor, anou azir avek sazes pandan sa peryod lape la!