1. Ki linvitasion Zezi ti donn kat peser, ek kouma zot ti reazir?

PIER, Andre, Zak, ek Zan ti travay kouma peser. Sirman zot ti bien etone kan Zezi ti donn zot sa linvitasion-la: “Vini, swiv mwa, mo pou montre zot lapes dimoun.” * Kouma zot ti reazir? Labib dir: “Lor vites, zot kit zot file, zot swiv Zezi.” (Mat. 4:18-22) Sa desizion-la ti sanz zot lavi net. Olie ki zot ti lapes pwason, zot ti “lapes dimoun.” (Lik 5:10) Azordi, Zezi invit bann dimounn ki ena enn leker sinser ek ki kontan laverite pou fer parey. (Mat. 28:19, 20) Eski to’nn aksepte linvitasion Zezi pou “lapes dimoun”?

2. Kifer desizion pou vinn enn proklamater li bien inportan, ek ki kitsoz pou ed nou pou pran sa desizion-la?

² Kitfwa sa fer inpe letan ki to pe etidie Labib ek to finn fer bann sanzman dan to lavi. Asterla, to bizin deside si to anvi vinn enn proklamater bonn nouvel. Si to pe ezite pou aksepte linvitasion Zezi, fode pa to dekouraze. Si to ena sa santiman-la, sirman se parski to kone ki se enn desizion bien inportan. Li vre ki Labib dir ki Pier ek so bann konpagnon ti kit zot file “lor vites.” Selman, Pier ek so frer pa ti pran sa desizion-la san reflesi. Plis ki sis mwa avan, zot ti konpran ki Zezi limem Lemesi ek zot ti aprann konn li. (Zan 1:35-42) Twa osi, sirman to finn aprann boukou kitsoz lor Zeova ek Zezi, ek to anvi vinn pli pros ar Zeova. Me avan ki to desid pou vinn enn proklamater, to bizin pran letan pou reflesi. Ki ti ed Pier, Andre, ek bann lezot disip pou pran zot desizion?

3. Ki bann kalite pou ed twa pou aksepte linvitasion Zezi?

 ³ Bann premie disip Zezi ti motive, zot ti bien konn fer zot travay, zot ti ena kouraz, ek zot ti disiplinn zotmem. Pena dout ki sa bann kalite-la ti ed zot pou vinn bann proklamater efikas. Dan sa lartik-la, to pou trouve kouma to kapav devlop sa bann kalite-la pou to vinn enn proklamater ki efikas.

4. Kifer Pier ti kontan lapes?

⁴ Pier ti lapes pwason pou pran swin so fami, me sa metie-la ti plis ki enn travay pou li. Li paret ki Pier ti bien kontan lapes. (Zan 21:3, 9-15, NW) Li ti osi aprann pou kontan lapes bann dimounn. Ek avek led Zeova, Pier ti vinn efikas dan sa laktivite-la.​—Zist. 2:14, 41.

5. Dapre Lik 5:8-11, kifer Pier ti gagn per, ek kouma nou kapav sirmont sa bann kalite santiman la?

⁵ Rezon prinsipal kifer nou prese se parski nou kontan Zeova. Nou lamour pou Zeova pou motiv nou pou prese mem si nou panse ki nou pena kapasite pou fer sa. Kan Zezi ti invit Pier pou lapes dimounn, li ti dir Pier: “Pa bizin per.” (Lir Lik 5:8-11.) Pier pa ti per seki ti kapav ariv li si li ti vinn enn disip Zezi. An realite, li ti etone ar kantite pwason ki Zezi ti ed zot pou gagne atraver enn mirak, ek li pa ti santi li dign pou travay ansam avek Zezi. Parey kouma Pier, kitfwa twa osi to ena mem santiman. Kitfwa to trakase akoz tou seki to pou bizin fer si to vinn enn disip Zezi. Si to dan sa sitiasion-la, kontign ogmant to lamour pou Zeova, Zezi, ek pou bann dimounn dan to teritwar, ek sa pou motiv twa pou aksepte  linvitasion Zezi pou pres bonn nouvel.​—Mat. 22:37, 39; Zan 14:15.

6. Ki kitsoz ankor bizin motiv nou pou prese?

⁶ Ki kitsoz ankor bizin motiv nou pou prese? Nou anvi obeir komannman Zezi ki dir: “Al . . . fer zot vinn mo bann disip.” (Mat. 28:19, 20) Nou prese osi parski boukou dimounn pe ‘plengne ek zot abat,’ ek zot bien bizin konn laverite lor Rwayom Bondie. (Mat. 9:36) Zeova anvi ki tou sort kalite dimounn gagn enn konesans exakt lor laverite ek ki zot gagn lavi sov.​—1 Tim. 2:4.

7. Kouma Romin 10:13-15 montre ki travay predikasion bien inportan?

⁷ Nou pou motive pou prese si nou reflesi lor kouma predikasion kapav sov lavi bann dimounn. Enn peser manz ouswa vann bann pwason ki li lapes. Me nou, nou “lapes dimoun” pou ki zot gagn lavi sov.​—Lir Romin 10:13-15; 1 Tim. 4:16.

8-9. Ki kitsoz enn peser bizin kone, ek kifer?

⁸ Dan lepok Zezi, enn Izraelit ki ti travay kouma peser ti bizin kone ki kalite pwason li ti kapav gagne. (Lev. 11:9-12) Li ti bizin osi kone kotsa li ti pou gagn pwason. An zeneral, bann pwason res kot ena bann bon kondision pou viv ek kot ena boukou manze. Ler ki enn peser al lapes osi bien inportan. Enn misioner ki res lor enn zil Pasifik ti aprann ki ena enn ler bien presi pou al lapes. Kan enn frer ti invit li pou al lapes, misioner-la ti dir li: “Mo zwenn twa demin, nef-er gramatin.” Me frer-la ti reponn li: “Non, se ler kot ena pwason ki nou bizin al lapes, pa ler ki nou nou anvi.”

⁹ Dan mem fason, bann disip Zezi ti al pres dan bann landrwa ek dan ler kot zot ti pou zwenn bann dimounn. Par exanp, zot ti al pres lakaz-lakaz, dan tanp, dan sinagog, ek dan bazar. (Zist. 5:42; 17:17; 18:4) Nou osi, nou bizin konn labitid bann dimounn ki dan nou teritwar. Nou bizin dispoze pou sanz nou program pou ki nou prese dan bann landrwa ek dan moman kot nou pou zwenn bann dimounn.​—1 Kor. 9:19-23.

10. Ki bann zouti lorganizasion Zeova donn nou?

¹⁰ Enn peser bizin ena bann bon lekipman ek li bizin kone kouma pou servi sa bann lekipman-la. Nou osi, nou bizin ena bann zouti ki bizin pou ki nou fer enn bon travay. Nou bizin kone osi kouma pou servi nou bann zouti. Zezi ti montre so bann disip kouma zot ti bizin prese. Li ti dir zot seki zot ti bizin amene, kotsa zot ti bizin prese, ek ki zot ti bizin dir. (Mat. 10:5-7; Lik 10:1-11) Azordi, lorganizasion Zeova donn nou enn Kes Zouti pou Ansegne kot ena bann zouti ki bien efikas. * Li osi montre nou kouma pou servi sa bann zouti-la. Sa formasion-la ed nou pou ena konfians an noumem kan nou prese ek ed nou pou vinn bann bon ansegnan.​—2 Tim. 2:15.

11. Kifer nou bizin ena kouraz kan nou prese?

¹¹ Bann peser pwason bizin ena boukou kouraz. Kifer? Parski letan kapav sanze enn kout koumsa ek enn siklonn kapav forme san ki zot atann. Anplis, bien souvan zot lapes aswar, dan nwar. Bann ki lapes dimounn osi bizin ena kouraz. Kan nou koumans prese ek nou dir lezot ki nou enn Temwin Zeova, kitfwa nou fami pou opoz ar nou, nou bann kamarad pou boufonn nou, ek sertin dimounn pa pou anvi ekout nou mesaz. Me sa pa etonn nou,  parski Zezi ti averti so bann disip ki zot ti pou pres ar bann dimounn ki ti pou opoz ar zot.​—Mat. 10:16.

12. Dapre Zozwe 1:7-9, ki kitsoz kapav ed nou pou ena plis kouraz?

¹² Kouma to kapav ena plis kouraz? Premierman, to bizin sir ki Zezi pe kontign diriz travay predikasion depi lesiel. (Zan 16:33; Rev. 14:14-16) Deziemman, Zeova inn promet ki Li pou pran twa swin. Alor, ogmant to lafwa dan sa promes-la. (Mat. 6:32-34) Plis to lafwa vinn for, plis to pou ena kouraz. Pier ek so bann lezot konpagnon ti montre enn gran lafwa kan zot ti abandonn zot biznes lapes pou swiv Zezi. Dan mem fason, twa osi to finn montre enn gran lafwa kan to’nn dir to bann fami ek to bann kamarad ki to pe etidie Labib avek bann Temwin Zeova ek ki to pe asiste bann renion. Anplis, sirman to finn fer bann gran sanzman dan to konportman ek to lavi pou to swiv bann prinsip Zeova. To finn bizin ena lafwa ek kouraz pou fer sa. Si to kontign ena kouraz, to kapav sir ki “Zeova to Bondie avek twa partou kot to pou ale.”​—Lir Zozwe 1:7-9. *

13. Ki kitsoz kapav ed twa pou ena plis kouraz?

 ¹³ Ki nou kapav fer ankor pou ena plis kouraz? Priye Zeova pou ki Li donn twa kouraz. (Zist. 4:29, 31) Zeova pou reponn to bann lapriyer ek zame Li pa pou abandonn twa. Li pou touletan soutenir twa. To kapav osi reflesi kouma Zeova ti sov so bann serviter dan lepase. Reflesi osi kouma Li’nn ed twa pou sirmont to bann difikilte ek kouma Li’nn donn twa lafors pou fer bann sanzman dan to lavi. Zeova ti ed so bann serviter pou travers Lamer Rouz, alor to kapav sir ki Li pou ed twa vinn enn disip Zezi. (Ex. 14:13) To kapav ena lafwa an Zeova parey kouma enn ekrivin Psom ki ti dir: “LESEGNER [“Zeova,” NW] li ar mwa mo pa per nannye; kisannla kapav tous mwa?”​—Ps. 118:6.

14. Ki to’nn aprann ar lexanp Masae ek Tomoyo?

¹⁴ To pou kapav ena plis kouraz kan to reflesi lor seki Zeova inn fer pou ed bann dimounn timid pou gagn plis kouraz. Anou pran lexanp enn ser ki apel Masae. Li ti bien timid ek li ti panse ki zame li ti pou kapav prese. Pou li, koz avek enn kikenn ki li pa ti kone ti koumadir grinp enn miray ki bien-bien ot, ek li ti panse ki zame li ti pou kapav fer sa. Masae ti fer boukou zefor pou ogmant so lamour pou Zeova ek pou so prosin. Li ti reflesi lor ki kantite li irzan pou prese azordi ek li ti priye Zeova pou ed li pou ena plis dezir pou prese. Li ti reisi sirmont so laper ek li ti mem pran servis pionie permanan. Zeova kapav ed bann nouvo proklamater osi pou “ena kouraz.” Anou pran lexanp enn ser ki apel Tomoyo. Kan li ti koumans pres lakaz-lakaz, premie dimounn ki li ti zwenn ti kriy ar li ek ti dir: “Mo pa’le koz ar bann Temwin Zeova!” ek li ti ferm laport. Avek kouraz, Tomoyo ti dir sa ser avek ki li ti pe prese la: “To’nn tann sa? Mo pa’nn bizin dir li nanye, li’nn fini kone ki mo enn Temwin Zeova. Mo extra kontan!” Asterla, Tomoyo pe servi kouma pionie permanan.

15. Kouma enn kikenn ki bien disipline ete, ek kifer enn Kretien bizin ena sa kalite-la?

¹⁵ Enn bon peser pwason bizin bien disipline. Enn kikenn ki bien disipline, se enn kikenn ki “ena kapasite pou fors limem pou fer bann kitsoz ki bizin fer.” Bann peser pwason bizin bien disipline, parski zot bizin lev boner, zot bizin kontign fer zot travay ziska ki li fini, ek zot bizin kontign travay mem si letan pa bon. Nou osi, nou bizin bien disiplinn noumem pou ki nou kapav andire ek fini nou travay.​—Mat. 10:22.

16. Kouma nou kapav disiplinn noumem?

¹⁶ Souvan, nou prefer fer bann kitsoz dan fason pli sinp ki ena. Selman, parfwa bann kitsoz ki pli inportan, zot demann boukou zefor. Alor, nou bizin aprann pou disiplinn noumem. Me pou ki nou kapav fer bann kitsoz ki nou trouv difisil, nou bizin led. Zeova donn nou sa led-la gras-a so lespri sin.​—Gal. 5:22, 23, NW.

17. Dapre 1 Korintien 9:25-27, ki kitsoz Pol ti bizin fer pou disiplinn limem?

¹⁷ Lapot Pol ti enn kikenn ki ti bien disipline. Kanmem sa, li ti dir ki li ti bizin “donn [so] lekor bann kou” pou fer seki bon. (Lir 1 Korintien 9:25-27, NW. *) Li ti  ankouraz lezot osi pou disiplinn zotmem ek pou fer tou kitsoz “bien e dan lord.” (1 Kor. 14:40) Nou bizin disiplinn noumem pou ki nou gard bann bon labitid spiritiel, parmi ena osi predikasion.​—Zist. 2:46.

18. Ki nou bizin fer pou ki Zeova konsider nou kouma enn kikenn ki efikas?

¹⁸ Enn peser li efikas si li trap boukou pwason. Me predikasion li diferan. Se pa kantite dimounn ki nou amenn dan laverite ki montre si nou efikas ouswa non. (Lik 8:11-15) Zeova pou konsider nou kouma enn kikenn ki efikas tanki nou kontign prese ek ansegn bann dimounn. Kifer? Parski nou pe obeir Li ek so Garson.​—Mark 13:10; Zist. 5:28, 29.

19-20. Pou ki rezon nou bizin bien determine pou prese azordi?

¹⁹ Dan sertin pei, bann lotorite permet bann peser lapes zis pandan sertin mwa. Dan sa bann pei-la, bann peser pou donn zot afon avan ki sezon lapes fini. Dan mem fason, nou osi nou ena enn rezon pou donn nou afon dan predikasion: Lafin sa lemond-la bien-bien pre! Res bien tigit letan pou prese. Alor, pa atann ki tou kitsoz dan to lavi vinn parfe pou to fer sa travay inportan la.​—Ekle. 11:4.

²⁰ Depi asterla mem, to bizin bien motive pou prese, ogmant to konesans lor Labib, ena plis kouraz, ek disiplinn tomem. Travay ansam avek plis ki wit milyon proklamater ki pe pres bonn nouvel partou lor later, ek to pou gagn lazwa ki Zeova done. (Ne. 8:10) To bizin bien motive pou pres otan ki to kapav ek kontign fer sa ziska ki Zeova dir nou arete. Dan prosin lartik, nou pou trouv trwa kitsoz ki pou fer nou plis determine pou pres bon nouvel Rwayom Bondie.