1. Ki enn kikenn resanti kan enn manb so fami exkli?

ESKI ena enn kikenn dan to fami ki’nn exkli? Sirman sa finn fer to leker bien fermal! Enn ser ki apel Hilda, * dir: “Kan mo mari inn mor apre 41 an maryaz, mo ti panse ki sa ti pli pir lexperyans ki mo ti kapav fer. Me kan mo garson inn kit laverite, ek inn kit so madam ek so bann zanfan, samem pli pir lexperyans ki mo finn fer.”

2-3. Dapre Psom 78:40, 41, ki Zeova resanti kan enn parmi so bann serviter abandonn Li?

² Mazine kouma Zeova so leker ti fermal kan sertin anz, ki ti form parti dan so fami, ti rezet Li! (Zid 6) Ek mazine ki kantite Zeova ti tris kan pep Izrael, ki Li ti bien kontan, plizir fwa ti rebel kont Li. (Lir Psom 78:40, 41.) To kapav sir ki Zeova so leker fermal kan enn kikenn ki to kontan kit laverite. Li konpran to lapenn, ek avek lamour, Li pou donn twa lankourazman ek soutien ki to bizin.

³ Dan sa lartik-la, nou pou gete seki nou kapav fer pou nou gagn led Zeova kan enn kikenn ki nou kontan aret servi Li. Nou pou gete osi kouma nou kapav ed bann frer ek ser dan lasanble ki pe fer fas ar sa sitiasion-la. Me pou koumanse, anou examinn sertin santiman negatif ki nou bizin rezete.

4. Ki bann paran resanti kan enn parmi zot zanfan kit Zeova?

⁴ Kan enn zanfan kit laverite, souvan bann paran panse ki zot ti bizin fer plis pou ed zot zanfan pou res dan laverite. Apre ki so garson ti exkli, enn frer, ki apel Lik, dir: “Mo ti santi mwa koupab, ek mo ti fer bann kosmar. Parfwa, mo ti plore ek mo leker ti extra fermal.” Elizabeth, enn ser ki’nn pas par mem sitiasion, dir: “Antan ki mama,  kitfwa mo’nn fer bann erer. Mo ti ena linpresion ki mo pa ti fer ase pou ansegn mo zanfan kouma pou kontan Zeova.”

5. Kisannla ki responsab kan enn kikenn kit Zeova?

⁵ Fode pa nou bliye ki Zeova inn donn tou dimounn liberte pou swazir. Savedir ki nou kapav swazir si nou pou obeir Li ouswa non. Sertin paran pa’nn donn enn bon lexanp zot zanfan. Pourtan, sa bann zanfan-la inn desid pou kontign servi Zeova ek pou res fidel anver Li. Ena sertin paran osi ki’nn fer zot best pou grandi zot zanfan dan laverite, me kan sa bann zanfan-la inn vinn gran, zot inn abandonn Zeova. An realite, sakenn parmi nou bizin deside si li pou servi Zeova. (Zozwe 24:15) Alor, si to enn paran ek to tris parski to zanfan inn kit Zeova, fode pa to panse ki to responsab sa sitiasion-la!

6. Ki enn zenn kapav resanti kan so paran kit laverite?

⁶ Parfwa, sertin paran abandonn laverite ek zot mem abandonn zot fami. (Ps. 27:10) Sa kapav bien difisil pou bann zanfan ki kontan ek respekte zot paran. Kan so papa ti exkli, Esther ti bien afekte. Li dir: “Mo ti plore souvan parski mo ti realize ki mo papa pa ti pe zis elwagn li ar laverite, me li ti osi swazir pou kit Zeova. Mo kontan mo papa, alor kan li ti exkli, mo ti touletan pe trakase pou li. Parfwa, mo ti mem gagn bann kriz panik.”

7. Ki santiman Zeova ena pou enn zenn ki so paran inn exkli?

⁷ Zenn, nou vremem sagrin si enn parmi to bann paran inn exkli! To kapav sir ki Zeova konpran to douler. Zeova, ek bann frer ek ser dan lasanble, bien kontan twa ek zot bien apresie to fidelite. Pa bliye osi ki to pa responsab bann desizion ki to bann paran inn pran. Kouma nou ti trouve dan paragraf avan, Zeova inn donn tou dimounn liberte pou swazir. Ek sak dimounn ki’nn vwe so lavi ar Zeova ek ki’nn pran batem pou bizin pran so prop responsabilite.​—Gal. 6:5.

8. An-atandan ki enn manb lafami ki’nn exkli retourn ar Zeova, ki kitsoz bann lezot manb lafami kapav fer? (Get lankadre “ Retourn ar Zeova.”)

⁸ Kan enn kikenn ki to kontan kit laverite, li normal ki to gard lespwar ki li pou retourn ar Zeova. Me ki to kapav fer an-atandan? Fer tou seki to kapav pou gard to lafwa for. Kan to fer sa, to pou donn enn bon lexanp bann lezot manb to fami ek kitfwa mem sa kikenn ki’nn exkli la. To pou osi gagn lafors ki to bizin pou to sirmont to lapenn. Anou get sertin kitsoz pratik ki to kapav fer.

9. Ki to kapav fer pou gard to lafwa for? (Get lankadre “ Bann Verse Rekonfortan si Enn Kikenn ki To Kontan Kit Zeova.”)

⁹ Fer tou seki to kapav pou gard to lafwa for. Li bien inportan ki to kontign fortifie to lafwa ek lafwa bann lezot manb to fami. Kouma to kapav fer sa? Pou ki to kapav gard to lafwa for an Zeova, to bizin gard bann bon labitid spiritiel. Par exanp, lir Labib toulezour, medit lor la,  ek asiste bann renion. Joanna so papa ek so ser ti kit laverite. Joanna dir: “Kan mo lir lor bann personaz Biblik kouma Abigail, Ester, Zob, Zozef, ek Zezi, mo santi lape lespri Zeova. Sa bann lexanp-la ankouraz mwa ek zot ed mwa pou vinn pli pozitif. Bann sante orizinal osi bien ankouraz mwa.”

10. Kouma Psom 32:6-8 kapav ed nou pou fer fas ar bann sitiasion difisil?

¹⁰ Dir Zeova tou seki pe trakas twa. Kan to santi twa tris, pa aret priye Li. Kontign sipliy Zeova pou ki Li ed twa pou trouv to sitiasion kouma Li Li trouve, ek demann Li “pou ansegn twa e montre twa ki sime bizin pran.” (Lir Psom 32:6-8.) Kitfwa to kapav trouv sa difisil pou dir Zeova seki to vremem resanti. Selman, to kapav sir ki Zeova konpran to lapenn. Li bien kontan twa ek Li ankouraz twa pou devid to leker ar Li.​—Ex. 34:6; Ps. 62:7, 8.

11. Dapre Ebre 12:11, kifer nou bizin ena konfians dan dispozision ki Zeova inn pran pou disiplinn enn kikenn? (Get lankadre “ Dispozision pou Exkli enn Kikenn Montre Lamour Zeova.”)

¹¹ Soutenir desizion ki bann ansien inn pran. Se Zeova ki’nn met an plas dispozision pou exkli enn kikenn. Sa disiplinn ki ranpli ar lamour la, se meyer fason pou ed sa dimounn ki exkli la ek lezot osi. (Lir Ebre 12:11.) Sertin dan lasanble kapav dir ki bann ansien inn pran enn move desizion kan zot inn exkli enn kikenn. Selman, pa bliye ki sa bann dimounn-la, bien souvan zot pa pou anvi dir bann kitsoz negatif lor sa dimounn ki’nn exkli la. An realite, nou pa konn tou bann detay. Alor, fer konfians bann ansien ki ti dan sa komite disiplinn relizie la. To kapav sir ki zot inn fer zefor pou aplik bann prinsip Labib ek ki zot inn ziz “pou Zeova.”​—2 Kro. 19:6.

12. Ki bienfe sertin frer ek ser inn gagne kan zot inn soutenir dispozision ki Zeova inn pran pou disiplinn enn kikenn?

 ¹² Kan nou soutenir desizion ki bann ansien inn pran pou exkli enn kikenn ki nou kontan, kitfwa sa kapav ed li pou retourn ar Zeova. Elizabeth, ki nou ti mansione avan, dir: “Sa ti bien difisil pou koup tou kontak avek nou garson. Me kan li ti retourn ar Zeova, li ti rekonet ki li ti bizin exkli. Avek letan, li dir ki li’nn aprann bann leson bien inportan. Sa finn ed mwa pou konpran ki disiplinn Zeova li touletan bon.” Mark, Elizabeth so misie, dir: “Avek letan, nou garson ti dir mwa ki enn parmi bann rezon pou kifer li ti anvi retourn ar Zeova, se parski nou pa ti frekant li ditou. Mo bien kontan ki Zeova inn ed nou pou res obeisan.”

13. Ki kitsoz kapav ed twa kan to pe soufer?

¹³ Koz avek bann kamarad ki pou konpran to santiman. Frekant bann frer ek ser ki ena lexperyans ek ki kapav ed twa pou gard enn latitid pozitif. (Prov. 12:25; 17:17) Joanna, ki nou ti mansione avan, dir: “Mo ti santi mwa tousel. Me kan mo ti koz avek bann kamarad ki mo ti fer konfians, sa ti ed mwa boukou.” Me ki to kapav fer si sertin dan lasanble dir twa bann kitsoz ki fer twa plis dekouraze?

14. Kifer nou bizin kontign siport ek pardonn nou kamarad ?

¹⁴ To bizin ena pasians avek to bann frer ek ser. Fode pa to atann ki tou dimounn dir twa bann kitsoz dan enn bon fason. (Zak 3:2) Nou tou nou inparfe, alor fode pa to etone si sertin pa kone seki zot bizin dir twa, ouswa ki, san fer par expre, sertin dir twa bann kitsoz ki bles twa. Rapel konsey ki lapot Pol ti done: “Siport zot kamarad, e si zot ena kit repros, donn zot pardon.” (Kol. 3:13) Kan enn manb so fami ti exkli, enn ser ti gagn led ar bann frer. Li dir: “Kan bann frer ti esey ankouraz mwa, san ki zot rann zot kont, zot ti bien bles mwa. Me Zeova inn ed mwa pou pardonn zot.” Kan enn kikenn exkli, kouma bann frer ek ser dan lasanble kapav ed bann lezot manb so fami?

15. Kan enn kikenn fek exkli dan enn fami, ki nou kapav fer pou ed bann lezot manb so fami?

¹⁵ Montre twa amikal ek zanti anver bann dimounn ki ena enn exkli dan zot fami. Enn ser, ki apel Miriam, dir ki li ti bien strese pou al renion apre ki so frer ti exkli. Li dir: “Mo ti per seki bann dimounn ti pou dir. Me boukou frer ek ser ti partaz mo lapenn ek zot pa ti dir nanye negatif lor mo frer. Gras-a zot, mo pa ti santi mwa tousel.” Enn lot ser dir: “Apre ki nou garson ti exkli, nou bann kamarad ti bien rekonfort nou. Sertin ti dir nou ki zot pa ti kone seki zot bizin dir, me zot ti plore ansam avek mwa ouswa zot ti avoy  mwa bann let bien ankourazan. Seki zot ti fer ti bien ed mwa!”

16. Kouma lasanble kapav kontign rekonfort ek ed bann ki ena enn manb lafami ki’nn exkli?

¹⁶ Kontign soutenir bann manb lafami ki’nn res fidel ar Zeova. Se sirtou asterla ki zot bizin to lamour ek to lankourazman. (Ebre 10:24, 25) Kan enn kikenn exkli dan enn fami, parfwa bann lezot manb lafami kapav santi ki zot osi zot exkli, parski sertin frer ek ser dan lasanble inn aret koz ar zot. Nou pa anvi ki zot ena sa santiman-la, pa vre! Nou bizin sirtou ankouraz ek felisit bann zenn ki zot paran nepli dan laverite. Maria so mari ti exkli ek ti abandonn so fami. Maria dir: “Sertin parmi mo bann kamarad ti vinn lakaz, zot ti kwi manze ek zot ti ed mwa pou etidie avek mo bann zanfan. Zot ti konpran mo lapenn ek zot ti plore ansam avek mwa. Zot ti pran mo par kan bann dimounn ti pe fann bann rimer lor mwa. Zot ti vremem remont mo moral!”​—Rom. 12:13, 15.

17. Kouma bann ansien kapav rekonfort bann ki pe soufer?

¹⁷ Ansien, servi tou lokazion ki to gagne pou fortifie bann manb lafami enn kikenn ki’nn exkli. Zeova inn donn twa enn responsabilite spesial, setadir pou rekonfort to bann frer ek ser ki ena enn exkli dan zot fami. (1 Tes. 5:14) Pran linisiativ pou ankouraz zot avan ek apre renion. Al get zot kot zot, ek priye ansam avek zot. To kapav osi pres ansam avek zot, ek invit zot dan to ladorasion an fami. Bann ansien bizin pran swin bann ki pe soufer ek montre lamour ek konpasion anver zot.​—1 Tes. 2:7, 8.

18. Dapre 2 Pier 3:9, ki Bondie anvi pou bann ki exkli?

¹⁸ Zeova “pa anvi ki enn parmi zot tonbe, me ki zot tou repanti.” (Lir 2 Pier 3:9.) Alor, mem si enn kikenn fer enn pese grav, so lavi ankor ena valer devan lizie Zeova. Pa bliye ki Zeova inn pey enn  pri for, Li’nn donn so Garson ki Li bien kontan pou sakenn parmi nou. Avek boukou lamour, Zeova esey ed bann ki’nn kit laverite pou retourn ar Li. Zeova atann ki zot retourn ar Li, parey kouma sa garson ki ti perdi la. (Lik 15:11-32) Boukou dimounn ki’nn kit laverite inn retourn ar Zeova, ek bann frer ek ser dan lasanble inn bien kontan pou akeyir zot. Elizabeth, ki nou ti mansione avan, ti bien kontan kan so garson ti reintegre. Kan li repans lor tou seki’nn arive, Elizabeth dir: “Mo bien kontan ki boukou frer ek ser inn ankouraz nou pou nou pa bes lebra.”

19. Kifer nou bizin kontign ena konfians an Zeova?

¹⁹ Nou kapav ena konfians an Zeova. So bann konsey pou touletan ed nou. Zeova Li zenere ek Li ena boukou konpasion, ek kouma enn Papa, Li ena boukou lamour pou bann ki kontan Li ek ador Li. Alor, to kapav sir ki Zeova pa pou abandonn twa dan to bann moman difisil. (Ebre 13:5, 6) Mark, ki nou ti mansione avan, dir: “Zeova zame pa pou abandonn nou. Li pou touletan la pou ed nou dan nou bann difikilte.” Zeova pou kontign donn nou so “pwisans extraordiner.” (2 Kor. 4:7) Wi, to kapav res fidel ek gard lespwar mem kan enn kikenn ki to kontan abandonn Zeova.