1-2. Ki sekous profet Aze ti predir pou arive dan nou lepok?

KAN ti ena enn tranbleman-de-ter dan Nepal an 2015, get seki sertin dimounn ti dir: “Dan lespas de-trwa minit, bann magazin ek bann vie batiman ti kraze net. . . . Tou dimounn ti pe panike . . . Boukou dimounn ti dir ki sa sekous-la ti dire pandan apepre de minit, me pou mwa sa ti koumadir enn leternite.” Si enn kitsoz terib koumsa ariv twa, kitfwa zame to pa pou bliye sa!

² Me azordi, ena enn lot kalite sekous ki pe arive. Sa sekous-la pa pe zis afekte enn lavil ouswa enn pei, li pe afekte tou bann nasion ek sa pe dire depi plizir dizenn lane. Profet Aze ti predir sa sekous-la. Li ti dir: “Parski ala seki Zeova, Sef bann larme dir: ‘Ankor enn fwa, dan enn tigit letan, mo pou sakouy lesiel ek later ek lamer ek later sek.’”​—Aze 2:6.

3. Ki diferans ena ant sekous ki Aze ti predir ek enn vre tranbleman-de-ter?

³ Sekous ki Aze ti dekrir, li bien diferan ar enn vre tranbleman-de-ter. Enn tranbleman-de-ter li amenn zis destriksion, alor ki sekous ki Aze ti predir, li ena bann bon lefe. Zeova dir nou: “Mo pou sakouy tou bann nasion, ek bann kitsoz ki ena valer dan tou bann nasion pou rant dan sa lakaz-la; ek mo pou ranpli sa lakaz-la ar laglwar.” (Aze 2:7) Ki sa profesi-la ti inplike pou bann dimounn ki ti viv dan lepok Aze? Ek ki sa inplike pou nou azordi? Dan sa lartik-la, nou pou reponn sa bann kestion-la, ek nou pou gete kouma azordi nou kapav partisip dan sa travay ki pe sakouy tou bann nasion la.

4. Kifer Zeova ti avoy profet Aze pou koz ar So pep?

⁴ Zeova ti donn profet Aze enn travay inportan pou fer. Anou gete ki ti arive inpe avan. An 537 Avan Nou Lepok, enn group Zwif ti sorti Babilonn pou retourn Zerizalem, ek kitfwa Aze ti parmi zot. Kan zot ti ariv Zerizalem, deswit zot ti koumans rekonstrir tanp. (Esdr. 3:8, 10) Me bien vit, enn kitsoz bien tris ti arive; zot ti dekouraze ek zot ti aret konstriksion tanp, parski bann dimounn dan sa rezion-la ti pe persekit zot. (Esdr. 4:4; Aze 1:1, 2) Alor, an 520 Avan Nou Lepok, Zeova ti donn lord Aze pou ankouraz bann Zwif pou ki zot terminn konstriksion tanp. *​—Esdr. 6:14, 15.

5. Kifer mesaz Aze ti ankouraz pep Bondie?

⁵ Mesaz Aze ti bizin ankouraz bann Zwif pou ena lafwa an Zeova. Avek kouraz, Aze ti dir bann Zwif: “‘Zot bizin for, zot tou ki res dan sa pei-la, ek travay. Parski mo avek zot,’ ala seki Zeova, Sef bann larme dir.” (Aze 2:4) Lexpresion “Zeova, Sef bann larme” sirman ti bien ankouraz zot. Zeova ena bann larme anz bien pwisan ki obeir Li, alor bann Zwif ti bizin kont lor Zeova pou ki zot reisi.

6. Ki ti pou arive akoz sekous ki Aze ti predir?

⁶ Zeova ti avoy Aze dir bann Zwif ki Li ti pou sakouy tou bann nasion. Sa mesaz-la ti fer zot konpran ki Zeova ti pou sakouy bann Pers, pwisans mondial sa lepok-la, ek sa ti bien ankouraz bann Zwif ki ti dekouraze ek ki ti aret konstriksion tanp. Ki rezilta sa ti pou ena? Premierman, bann serviter Zeova ti pou reisi terminn konstriksion tanp. Ek deziemman, bann non-Zwif ti pou koumans ador Zeova dan tanp ansam ar bann Zwif. Sa mesaz-la ti vremem ankourazan pou bann serviter Bondie!​—Zaka. 8:9.

7. Dan ki travay, ki pe sakouy lemond azordi, nou pe partisipe? Explike.

⁷ Ki profesi Aze inplike pou nou azordi? Ankor enn fwa, Zeova pe sakouy tou bann nasion, ek sann fwa-la, nou pe partisip dan sa travay-la. Reflesi lor la: An 1914, Zeova inn etabli Zezi kouma Lerwa dan So Rwayom. (Ps. 2:6) Kan Zezi ti koumans regne, sa ti enn move nouvel pou bann dirizan sa lemond-la. Kifer? Parski “letan ki finn akord zot” ti fini, savedir ki apartir sa moman-la, enn reprezantan Zeova ti pou koumans dirize. (Lik 21:24) Akoz sa, sirtou depi 1919, bann serviter Zeova inn koumans dir tou dimounn ki sel lespwar pou limanite se Rwayom Bondie. Sa predikasion konsernan “Bonn Nouvel Rwayom Bondie” la, inn sakouy lemond antie.​—Mat. 24:14.

8. Dapre Psom 2:1-3, kouma laplipar dimounn inn reazir kan zot inn tann sa mesaz-la?

⁸ Kouma bann dimounn inn reazir kan zot inn tann sa mesaz-la? Laplipar inn rezet sa mesaz-la. (Lir Psom 2:1-3.) Bann nasion inn koumans ankoler ek zot pa’le aksepte Dirizan ki Zeova inn swazir. Zot pa konsider mesaz ki nou prese kouma enn “Bonn Nouvel.” An realite, sertin gouvernman inn mem interdi nou travay predikasion! Boukou dirizan sa bann nasion-la dir ki zot servi Bondie, me selman zot pa’le abandonn zot pouvwar. Alor, parey kouma dan lepok  Zezi, azordi osi bann dirizan sa lemond-la pe opoz zot ar Lerwa ki Zeova inn etabli kan zot persekit so bann disip.​—Zist. 4:25-28.

9. Kouma Zeova pe esey ed bann dimounn ki pa aksepte mesaz konsernan So Rwayom?

⁹ Kouma Zeova pe esey ed bann dimounn ki pa aksepte mesaz konsernan So Rwayom? Psom 2:10-12 dir: “Alor, zot ki bann lerwa, servi lasazes; zot ki dirizan lor later, fer atansion. Obeyir LESEGNER ar boukou respe; exprim zot lazwa, avek tranbleman. Met zot azenou divan li. Pa bliye so lakoler anflame vit e zot kapav zwenn lamor lor sime. Bienere tou dimoun ki mars ar li e ki gagn so proteksion.” Dan so bonte, Zeova donn bann dimounn letan pou pran enn bon desizion. Zot ankor kapav sanze ek aksepte Rwayom Bondie. Me selman, pa res boukou letan. Nou pe viv dan bann dernie zour sa lemond-la. (2 Tim. 3:1; Iza. 61:2) Alor, sak zour ki pase, li vinn deplizanpli irzan ki bann dimounn konn laverite ek swazir pou servi Zeova.

10. Dapre Aze 2:7-9, ki lefe pozitif sa travay ki pe sakouy tou bann nasion la ena?

¹⁰ Sekous ki Aze ti predir ena enn lefe pozitif lor sertin dimounn. Aze explike ki, gras-a sa sekous-la, “bann kitsoz ki ena valer [bann dimounn ki ena enn leker sinser] dan tou bann nasion” pou koumans ador Zeova. * (Lir Aze 2:7-9. *) Profet Izai ek Mishe osi ti predir ki sa ti pou arive dan bann dernie zour.​—Iza. 2:2-4; Mish. 4:1, 2.

11. Kouma enn frer ti reazir kan li ti tann mesaz lor Rwayom Bondie pou premie fwa?

¹¹ Anou get lexanp Ken, enn frer ki azordi pe servi dan Biro Mondial. Li ankor  rapel kan li ti tann mesaz lor Rwayom Bondie pou premie fwa, inn gagn plis ki 40 an. Ken dir: “Kan mo ti tann laverite pou premie fwa, mo ti bien kontan pou aprann ki nou pe viv dan bann dernie zour sa lemond-la. Mo ti konpran ki, pou mo kapav gagn faver Bondie ek gagn lavi eternel, mo ti bizin nepli fer parti dan sa lemond-la ek servi Zeova avek fidelite. Mo ti priye Zeova ek mo ti fer sa deswit. Mo ti aret soutenir sa lemond-la ek mo ti aksepte proteksion Rwayom Bondie, ki pou dire pou leternite.”

12. Kouma tanp spiritiel Zeova inn ranpli ar laglwar dan bann dernie zour?

¹² Li kler ki Zeova pe beni so pep. Pandan bann dernie zour, boukou dimounn inn koumans ador Li. An 1914, ti ena zis de-trwa milye serviter Zeova. Me asterla, ena plis ki wit milyon serviter Zeova, ek sak lane, ena bann milyon dimounn ki pe asiste Memoryal ansam avek nou. Dan enn sertenn fason, “bann kitsoz ki ena valer dan tou bann nasion” inn ranpli lakour tanp spiritiel Zeova ki lor later, setadir bann milyon dimounn ki ena enn leker sinser pe aksepte bann dispozision ki Zeova inn pran pou so ladorasion. Kan sa bann dimounn-la fer bann sanzman ki bizin ek zot met nouvo personalite lor zot, zot donn laglwar Zeova.​—Efe. 4:22-24, NW.

13. Ki bann lezot profesi inn realize konsernan lakrwasman bann serviter Zeova? (Get zimaz lor kouvertir.)

¹³ Lakrwasman bann serviter Zeova inn realiz bann lezot profesi, kouma profesi ki trouv dan Izai sapit 60. Izai 60:22 dir: “Seki tipti pou vinn enn milye ek seki tigit pou vinn enn nasion for. Mwa, Zeova, mo pou akseler sa dan so ler.” Akoz pli boukou dimounn pe koumans servi Zeova, ena enn kitsoz extraordiner ki pe arive. Sa “bann kitsoz ki ena valer” la, setadir bann dimounn ki ena enn leker sinser, zot ena diferan kapasite ek konpetans, ek zot ena enn gran dezir pou pres “Bonn Nouvel Rwayom Bondie.” Gras-a zot, bann serviter Zeova pe kapav “bwar dile bann nasion,” parey  kouma profet Izai ti anonse. (Iza. 60:5, 16) Avek led sa bann dimounn-la, nou pe pres dan 240 pei ek nou pe prodir bann piblikasion dan plis ki 1,000 lang.

14. Ki desizion bann dimounn bizin pran depi asterla-mem?

¹⁴ Dan lepok lafin, travay ki pe sakouy bann nasion pe obliz bann dimounn pou pran enn desizion. Eski zot pou soutenir Rwayom Bondie, ouswa eski zot pou met zot konfians dan bann dirizan sa lemond-la? Se enn desizion ki nou tou nou bizin pran. Mem si bann serviter Zeova obeir bann lalwa dan pei kot zot reste, zot gard zot netralite dan bann zafer politik sa lemond-la. (Rom. 13:1-7) Zot kone ki sel solision pou tou bann problem ki ena dan lemond se Rwayom Bondie. Ek sa Rwayom-la pa fer parti dan sa lemond-la.​—Zan 18:36, 37.

15. Kouma liv Revelasion montre ki fidelite bann serviter Bondie pou pas par bann test?

¹⁵ Liv Revelasion dir nou ki fidelite bann serviter Bondie pou pas par bann test dan bann dernie zour. Zot pou gagn bann gran persekision ek lopozision. Bann gouvernman sa lemond-la pou atann ki nou soutenir zot ek zot pou persekit tou bann ki pa soutenir zot. (Rev. 13:12, 15) Zot pou “obliz tou dimoun, ki li tipti ou gran, ris ou pov, lib ou esklav, pou resevwar enn mark, swa lor zot lame drwat ou lor zot fron.” (Rev. 13:16) Lontan, bann esklav ti ena mark lor zot, pou ki tou dimounn kone kisannla zot propriyeter. Dan mem fason, bann dimounn azordi pou bizin montre kisannla zot pe soutenir, ek se par zot fason panse ek zot bann aksion ki zot pou montre ki zot pe soutenir bann sistem politik sa lemond-la.

16. Kifer li irzan ki nou ranforsi nou fidelite anver Zeova depi asterla-mem?

¹⁶ Eski nou pou aksepte sa mark-la ek soutenir bann gouvernman sa lemond-la? Bann ki refiz sa mark-la pou gagn bann difikilte ek zot lavi pou an danze. Liv Revelasion explike: “Personn pa ti kapav aste ou vande si li pa ti ena sa mark la.” (Rev. 13:17) Bann serviter Bondie kone seki Bondie pou fer avek bann dimounn ki ena sa mark ki mansione dan Revelasion 14:9, 10 la. Olie ki zot aksepte sa mark-la, zot pou koumadir ekrir “Mo pou Zeova” lor zot lame. (Iza. 44:5) Asterla, inn ler pou nou fer sir ki nou vremem fidel anver Zeova. Si nou vremem fidel anver Li, Zeova pou kontan pou dir ki nou pou Li!

17. Ki nou bizin rapel konsernan pasians Zeova?

¹⁷ Zeova inn montre boukou pasians dan bann dernie zour. Li pa anvi ki personn perdi lavi. (2 Pier 3:9) Li’nn donn tou dimounn lokazion pou repanti ek pou pran enn bon desizion. Me so pasians ena enn limit. Bann dimounn ki refiz soutenir Rwayom Bondie pou konn mem konsekans ki Faraon dan lepok Moiz. Zeova ti dir Faraon: “Mo ti bien kapav fini lev mo lame pou avoy enn lepidemi lor twa ek lor to pep ek to ti pou disparet lor later. Me si mo finn les twa viv, se pou fer twa trouv mo lafors ek pou ki mo nom proklame partou lor later.” (Ex. 9:15, 16) Alafin, tou dimounn pou bizin kone ki Zeova sel vre Bondie. (Eze. 38:23) Kouma sa pou arive?

18. (a) Ki lot kalite sekous Aze 2:6, 20-22 mansione? (b) Kouma nou kone ki bann parol Aze pou realize dan lavenir?

 ¹⁸ Plizir lane apre lamor Aze, lapot Pol ti explike ki bann parol ki trouv dan Aze 2:6, 20-22 ti pou osi akonpli dan lavenir. (Lir. *) Pol ti ekrir: “Asterla li finn promet, ‘Ankor enn fwa, mo pou fer tranble, pa zis later me osi lesiel.’ Sa bann parol la, ‘ankor enn fwa,’ montre klerman, ki tou kiksoz ki finn kre pou tranble ek disparet, pouki seki solid li reste.” (Ebre 12:26, 27) Sa sekous-la diferan ar sekous ki mansione dan Aze 2:7, parski sa sekous-la pou detrir tou bann ki, parey kouma Faraon, refiz aksepte drwa ki Zeova ena pou dirize.

19. Ki kitsoz pa pou detrir, ek kouma nou konn sa?

¹⁹ Ki kitsoz pa pou tranble, setadir pa pou detrir? Lapot Pol dir: “Alor, anou montre nou rekonesans, parski nou resevwar enn rwayom ki pa tranble [“ki pa kapav detrir,” NW]. Anou ador Bondie avek reverans ek lakrint.” (Ebre 12:28) Wi, apre sa dernie sekous-la, zis Rwayom Bondie ki pa pou detrir. Li pou tini ferm dan so plas!​—Ps. 110:5, 6; Dan. 2:44.

20. Ki desizion bann dimounn bizin pran, ek kouma nou kapav ed zot?

²⁰ Fode pa nou perdi letan! Bann dimounn ena enn desizion pou pran: Eski zot pou kontign soutenir sa lemond-la, ki pou detrir biento, ouswa eski zot pou fer volonte Zeova ek gagn lavi eternel? (Ebre 12:25) Gras-a nou travay predikasion, nou kapav ed bann dimounn pou pran sa desizion inportan la. Anou kontign ed bann dimounn pou zot soutenir Rwayom Bondie. Ek anou kontign rapel bann parol ki Zezi ti dir: “Bonn Nouvel Rwayom Bondie pou anonse partou dan lemonn, kouma enn temwagnaz pou tou bann nasion; lerla lafin pou vini.”​—Mat. 24:14.