1. Kouma nou kapav konsider Zeova?

DAN fami Zeova ena Zezi, “Premie-ne parmi tou bann kreatir,” ek enn kantite anz. (Kol. 1:15; Ps. 103:20) Kan Zezi ti lor later, li ti ed bann dimounn pou konpran ki zot kapav konsider Zeova kouma zot Papa. Kan li ti koz avek so bann disip, Zezi ti dir zot ki Zeova Li “[so] Papa ek zot Papa.” (Zan 20:17) Ek kan nou vwe nou lavi ar Zeova ek nou pran batem, nou form parti dan enn fami bann frer ek ser ki ena boukou lamour.​—Mark 10:29, 30.

2. Ki nou pou examine dan sa lartik-la?

² Sertin kapav trouv sa difisil pou konsider Zeova kouma enn Papa ki kontan zot. Ena lezot ki kitfwa pa kone kouma zot bizin montre zot lamour pou zot bann frer ek ser. Dan sa lartik-la, nou pou gete kouma Zezi kapav ed nou pou trouv Zeova kouma enn Papa ki kontan nou, enn Kikenn avek ki nou kapav vinn pros. Nou pou aprann osi kouma nou kapav imit Zeova dan fason ki nou montre lamour anver nou bann frer ek ser.

3. Kouma lapriyer model fer nou vinn pli pros ar Zeova?

³ Zeova enn Papa ki bien kontan nou. Zezi anvi ki nou trouv Zeova dan mem fason ki li, setadir kouma enn Papa ki bon ek ki ena boukou lamour, enn kikenn avek ki nou kapav koze ninport ki ler. Li pa anvi ki nou trouv Zeova kouma enn kikenn ki dir ek ki otoriter. Nou trouv sa dan fason ki Zezi ti ansegn so bann disip kouma pou priye. Li ti koumans lapriyer model par, “Nou Papa.” (Mat. 6:9) Zezi ti kapav dir nou apel Zeova “Tou-Pwisan,” “Kreater,” ouswa “Lerwa leternite.” Li ti kapav fer sa, parski  Labib servi sa bann tit-la pou dekrir Zeova. (Zen. 49:25; Iza. 40:28; 1 Tim. 1:17) Olie sa, Zezi inn dir nou apel Zeova, “Papa.”

4. Kouma nou kone ki Zeova anvi ki nou vinn pros ar Li?

⁴ Eski nou trouv sa difisil pou konsider Zeova kouma enn Papa ki kontan nou? Sertin parmi nou kitfwa ena sa difikilte-la parski zot inn gagn enn lanfans difisil. Me li bien rekonfortan pou kone ki Zeova konpran nou santiman ek Li kone kifer nou ena sa santiman-la! Li anvi vinn pros ar nou. Se pou sa rezon-la ki Labib ankouraz nou: “Apros zot ar Bondie e li pou vinn pros ar zot.” (Zak 4:8) Zeova kontan nou, ek Li promet ki Li pou meyer Papa ki nou kapav ena.

5. Dapre Lik 10:22, kouma Zezi kapav ed nou pou vinn pli pros ar Zeova?

⁵ Zezi kapav ed nou pou vinn pli pros ar Zeova. Zezi konn bien Zeova ek li imit So bann kalite dan enn fason parfe. Akoz sa, li ti kapav dir: “Seki finn trouv mwa finn trouv mo Papa.” (Zan 14:9) Kouma enn gran frer, Zezi ansegn nou kouma pou respekte ek obeir nou Papa, ek seki nou bizin fer pou fer Li plezir ek gagn So faver. Me Zezi sirtou ed nou pou konpran ki Zeova Li enn Papa ki bon ek ki kontan nou. (Lir Lik 10:22.) Anou get sertin lexanp.

6. Donn bann lexanp ki montre ki Zeova ti ekout Zezi.

⁶ Zeova ekout so bann zanfan. Anou gete kouma Zeova ti ekout so Garson, Zezi. Nou sir ki Zeova ti tann bann lapriyer ki Zezi ti fer kan li ti lor later. (Lik 5:16) Li ti tann bann lapriyer ki Zezi ti fer kan li ti bizin pran bann desizion inportan, kouma par exanp, kan Zezi ti swazir so 12 zapot. (Lik 6:12, 13) Zeova ti osi tann bann lapriyer ki Zezi ti fer kan li ti angwase. Zis avan ki Zida trayir li, Zezi ti priye so Papa konsernan bann kitsoz ki ti pou ariv li biento. Zeova pa  ti zis tann lapriyer Zezi, me Li ti osi avoy enn anz pou fortifie So Garson.​—Lik 22:41-44.

7. Ki to resanti kan to kone ki Zeova ekout lapriyer so bann serviter?

⁷ Azordi, Zeova kontign ekout lapriyer so bann serviter, ek Li reponn zot dan pli bon moman ek dan meyer fason ki ena. (Ps. 116:1, 2) Anou get lexanp enn ser dan Lenn, ki finn fer sa lexperyans-la. Li ti bien soufer parski li ti ena bann problem emosionel, ek li ti sipliy Zeova pou ed li. Li dir: “Program Televizion JW Me 2019 ti koz lor seki nou kapav fer kan nou angwase, ek samem ki mo ti bizin. Sa ti enn repons pou mo bann lapriyer.”

8. Kouma Zeova ti montre ki Li kontan Zezi?

⁸ Parey kouma Zeova ti kontan Zezi, kan Zezi ti lor later, Zeova kontan nou dan mem fason. (Zan 5:20) Li ti ed Zezi pou gard so lafwa for, Li ti ankouraz li kan li ti angwase, ek Li ti fer sir ki Zezi ena tou seki li bizin pou viv. Ek Zeova ti dir so Garson ki Li kontan li ek ki li ti ena So faver. (Mat. 3:16, 17) Zezi ti kone ki so Papa ti pou touletan avek li ek ed li, alor zame li pa ti santi li tousel.​—Zan 8:16, NW.

9. Kouma nou kone ki Zeova kontan nou?

⁹ Parey kouma Zezi, nou tou nou’nn resanti lamour Zeova dan plizir fason. Reflesi lor la: Zeova inn atir nou ver Li, ek Li’nn donn nou bann frer ek ser ki rann nou zwaye ek ki ankouraz nou kan nou trakase. (Zan 6:44) Zeova donn nou osi tou seki nou bizin pou nou gard nou lafwa for. Ek Li mem ed nou pou gagn seki nou bizin pou viv. (Mat. 6:31, 32) Kan nou reflesi lor lamour ki Zeova ena pou nou, nou lamour pou Li ogmante.

10. Ki nou kapav aprann ar fason ki Zeova tret nou bann frer ek ser?

¹⁰ Zeova kontan nou bann frer ek ser. Me li pa touletan fasil pou kontan nou bann frer ek ser ek pou montre zot ki nou kontan zot. Kifer? Parski nou sorti dan diferan kiltir ek lanvironnman. Anplis, nou tou nou fer bann erer ek sa kapav agas lezot. Me kanmem sa, nou kapav fer zefor pou ranforsi nou lamour pou nou fami spiritiel. Kouma? Kan nou imit nou Papa ek nou montre ki nou kontan nou bann frer ek ser. (Efe. 5:1, 2; 1 Zan 4:19) Anou gete seki nou kapav aprann ar lexanp Zeova.

11. Kouma Zezi ti imit “konpasion” Zeova?

¹¹ Zeova ena boukou “konpasion.” (Lik 1:78, NW) Enn kikenn ki ena konpasion li tris kan li trouv lezot soufer, ek li gete kouma li kapav ed zot ek rekonfort zot. Zezi ti imit konpasion Zeova dan fason ki li ti tret bann dimounn. (Zan 5:19) Enn fwa, kan li ti trouv enn lafoul dimounn, Zezi “ti ranpli ar konpasion pou zot, parski zot ti pe plegne e zot ti abat kouma bann mouton ki pena berze.” (Mat. 9:36) Zezi pa ti zis resanti lamour pou zot, me li ti ed zot dan enn fason pratik. Li ti geri bann malad, ek li ti ed bann ki “fatige, ki pe sarye enn fardo bien lour.”​—Mat. 11:28-30; 14:14.

12. Kouma nou kapav montre konpasion anver nou bann frer ek ser?

¹² Si nou reflesi lor bann problem ki nou bann frer ek ser ena, nou pou kapav montre konpasion anver zot. Par exanp, enn ser kapav ena enn maladi bien grav. Zame li pa koz lor so problem, me sirman  li ti pou bien kontan ki enn kikenn ed li. Eski li pe kapav donn so fami tou seki zot bizin? Eski nou kapav prepar enn manze pou li ouswa ed li pou netway so lakaz? Kitfwa enn frer inn perdi so travay. Eski nou kapav donn li enn ti kas? Sa kapav ed li ziska ki li gagn enn lot travay. Ek li pa mem bizin kone ki se nou ki’nn fer sa don-la.

13-14. Kouma nou kapav zenere parey kouma Zeova?

¹³ Zeova bien zenere. (Mat. 5:45) Fode pa nou atann ki nou bann frer ek ser demann nou nou led pou ki nou montre konpasion anver zot. Parey kouma Zeova, nou kapav ed zot avan mem ki zot demann nou. Zeova fer soley leve toulezour san ki nou demann Li! Anplis, tou dimounn profit soley, pa zis bann dimounn ki rekonesan anver Li. Zeova montre nou ki Li kontan nou kan Li donn nou bann kitsoz ki nou bizin. Nou bien kontan Zeova parski Li bon ek zenere!

¹⁴ Nou bann frer ek ser imit lexanp Zeova kan zot montre zot zenere anver lezot. Par exanp, an 2013, siklonn Haiyan ti fer boukou dega dan Filipinn. Boukou frer ek ser ti perdi zot bann dibien materyel ek zot lakaz ti kraze. Me bann frer ek ser dan lemond antie deswit ti ed zot. Boukou frer ek ser ti donn larzan ek zot ti ede pou rekonstrir apepre 750 lakaz dan mwins ki enn-an! Pandan pandemi COVID-19, bann Temwin inn fer boukou zefor pou soutenir zot bann frer ek ser. Nou montre ki nou kontan nou bann frer ek ser kan nou pa tarde pou ed zot kan zot bizin led.

15-16. Dapre Lik 6:36, ki nou bizin fer pou nou imit Zeova?

¹⁵ Zeova ena mizerikord ek Li dispoze pou pardone. (Lir Lik 6:36.) Nou Papa Zeova pardonn nou toulezour. (Ps. 103:10-14) Mem si bann disip Zezi ti inparfe, Zezi ti ena mizerikord ek li ti pardonn zot. Zezi inn mem donn so lavi pou nou gagn pardon nou bann pese. (1 Zan  2:1, 2) Gras-a pardon ek mizerikord ki Zeova ek Zezi inn montre anver nou, nou santi nou atire ver zot.

¹⁶ Nou lamour pou nou bann frer ek ser vinn pli for kan nou “pardonn” zot avek tou nou leker. (Efe. 4:32) Nou bizin fer zefor pou pardonn lezot, parski li pa touletan fasil pou fer sa. Enn ser rakonte ki lartik Latour Degard “Pardonne sakenn nou camarade avek tou nou leker” ti bien ed li. * Li dir: “Gras-a sa lartik-la, mo’nn konpran bann bienfe ki mo kapav gagne kan mo pardonn lezot. Sa lartik-la montre ki, kan nou pardonn enn kikenn, sa pa vedir ki nou aksepte ditor ki li’nn fer nou ouswa ki nou aksepte bann konsekans ki sa ena. Kan nou pardonn enn kikenn, savedir ki nou nepli ankoler ar sa dimounn-la ek ki nou santi nou anpe.” Kan nou pardonn nou bann frer ek ser avek tou nou leker, nou montre ki nou kontan zot ek ki nou pe imit nou Papa Zeova.

17. Dapre Matie 5:16, kouma nou kapav donn laglwar nou Papa Zeova?

¹⁷ Se enn gran privilez pou form parti dan enn gran fami spiritiel kot sakenn kontan so kamarad. Nou anvi ki enn maximum dimounn zwenn ansam avek nou pou ador nou Papa Zeova. Alor, fode zame nou fer enn kitsoz ki kapav fer bann dimounn koz an mal lor Zeova ouswa lor so bann serviter. Okontrer, nou bizin azir dan enn fason ki pou atir bann dimounn ver laverite.​—Lir Matie 5:16, NW. *

18. Ki kitsoz kapav ed nou pou prese avek kouraz?

¹⁸ Parfwa, bann dimounn kapav kritik nou ouswa persekit nou parski nou pe obeir Zeova. Ki nou kapav fer si nou per pou koz lor nou bann krwayans ar lezot? Nou kapav sir ki Zeova ek Zezi pou ed nou. Zezi ti dir so bann disip ki zot pa bizin  trakase pou seki zot bizin dir ouswa kouma zot bizin koze. Li ti dir zot: “Parol la pou vinn par limem dan zot labous; pa zot ki pou koze, me Lespri Bondie ki pou koz atraver zot.”​—Mat. 10:19, 20.

19. Donn lexanp enn kikenn ki ti prese avek kouraz.

¹⁹ Anou pran lexanp Robert. Kan li ti fek konn laverite ek ki li pa ti ena enn gran konesans lor Labib, li ti bizin pas devan lakour Lafrik Disid pou explik enn ziz kifer li pa ti pou fer servis militer. Avek kouraz, li ti explike ki li ti anvi gard so netralite parski li ti kontan so bann frer Kretien. Li ti kontan ki li ti form parti dan nou fami spiritiel. Selman, san ki li atann, ziz-la ti demann li: “Kisannla to bann frer?” Robert pa ti atann sa kestion-la, me deswit li ti rapel text pou sa zour-la. Text-la ti Matie 12:50, ki dir: “Dimoun ki fer dapre volonte mo Papa ki dan lesiel, limem mo frer, mo ser ek mo mama.” Mem si Robert ti fek vinn dan laverite, lespri sin Zeova ti ed li pou reponn sa kestion-la ek bann lezot kestion ankor ki li pa ti pe atann. Nou kapav sir ki Zeova ti bien fier! Kan nou kont lor Zeova ek nou prese avek kouraz dan bann sitiasion difisil, sa rann Zeova bien fier.

20. Ki kitsoz nou bizin bien determine pou fer? (Zan 17:11, 15)

²⁰ Anou kontign apresie privilez ki nou ena pou form parti dan enn fami spiritiel kot sakenn kontan so kamarad. Nou ena meyer Papa ki kapav ena, ek nou ena bann frer ek ser ki bien kontan nou. Alor, anou touletan montre nou rekonesan. Satan ek tou bann dimounn ki soutenir li, anvi fer nou dout lamour ki Zeova ena pou nou, ek zot anvi kas linite ki ena parmi bann serviter Zeova. Selman, Zezi ti priye pou nou, ek li ti demann so Papa pou vey lor nou ek pou protez nou linite. (Lir Zan 17:11, 15.) Zeova pe reponn sa lapriyer-la. Parey kouma Zezi, fode zame ki nou dout lamour ki nou Papa ena pou nou. Li pou touletan soutenir nou. Alor, anou bien determine pou kontign vinn pli pros ar nou bann frer ek ser.