1. Dapre Malaki 3:16, ki liv Zeova pe ekrir, ek ki ena ladan?

 DEPI plizir milye lane, Zeova pe ekrir enn liv spesial. Dan sa liv-la, ena bann nom. Premie nom ki ena ladan se nom so fidel serviter, Abel. b (Lik 11:50, 51) Zeova pe kontign azout bann nom dan sa liv-la, ek azordi, ena plizir milyon nom ladan. Labib apel sa liv-la, “liv souvenir,” “liv lavi,” ek “roulo lavi.” Dan sa lartik-la, nou pou apel sa liv-la, “liv lavi.”​—Lir Malaki 3:16; Rev. 3:5; 17:8.

2. Kisannla zot nom inn ekrir dan liv lavi, ek kouma nou kapav ena nou nom ladan?

² Dan sa liv spesial la, ena nom tou bann dimounn ki ador Zeova, ek ki ena respe pou Li ek pou so nom. Sa bann dimounn-la pou gagn posibilite pou gagn lavi eternel. Azordi, nou nom kapav ekrir dan sa liv-la si nou ena enn bon lamitie avek Zeova ek si nou ena lafwa dan sakrifis so Garson, Zezi Kris. (Zan 3:16, 36) Mem si nou ena lesperans pou viv dan lesiel ouswa lor later, nou tou nou anvi ki nou nom ekrir dan sa liv-la.

3-4. (a) Si pou linstan nou nom li dan liv lavi, eski savedir ki nou pou gagn lavi eternel? Explike. (b) Ki nou pou examine dan sa lartik-la ek dan prosin lartik?

 ³ Kan nou nom ekrir dan sa liv-la, eski savedir ki nou sir ki nou pou gagn lavi eternel? Nou trouv repons sa kestion-la dan Exod 32:33. Zeova ti dir Moiz: “Seki’nn fer pese kont mwa, mo pou efas li dan mo liv.” Alor, kapav efas bann nom ki dan sa liv-la. Se koumadir Zeova inn ekrir bann nom avek enn kreyon. (Rev. 3:5) Nou bizin fer nou maximum pou ki nou nom res dan sa liv-la ziska ki Zeova ekrir li avek enn plim, setadir dan enn fason permanan.

⁴ Me ena sertin kestion ki nou kapav poz noumem. Par exanp, ki Labib dir lor bann dimounn ki zot nom dan liv lavi, ek lor bann dimounn ki pena zot nom dan sa liv-la? Bann dimounn ki ena zot nom dan sa liv-la, kan eski zot pou gagn lavi eternel? Ki nou kapav dir lor bann dimounn ki’nn mor ek ki pa’nn gagn lokazion pou konn Zeova? Eski kapav ena zot nom dan liv lavi? Dan sa lartik-la ek dan prosin lartik, nou pou reponn sa bann kestion-la.

KISANNLA SO NOM DAN LIV LAVI?

5-6. (a) Dapre Filipien 4:3, kisannla zot nom dan liv lavi? (b) Kan eski zot nom pou ekrir dan enn fason permanan dan liv lavi?

⁵ Kisannla so nom dan liv lavi? Pou reponn sa kestion-la, nou pou koz lor sink diferan group dimounn. Sertin group dan liv lavi, ek lezot pa dan liv lavi.

⁶ Premie group-la se bann ki Zeova inn swazir ek ki pou regn ansam ar Zezi dan lesiel. Eski pou linstan zot nom dan liv lavi? Wi. Dan let ki lapot Pol ti ekrir bann Kretien dan lasanble Filip, li ti dir  ki bann Kretien ki ena lesperans pou al dan lesiel, zot nom dan liv lavi. (Lir Filipien 4:3.) Selman, pou ki zot nom res dan liv lavi, zot bizin res fidel anver Zeova. Lerla, kan zot sele dan enn fason permanan, swa avan zot lamor ouswa inpe avan ki gran detres koumanse, zot nom pou ekrir dan liv lavi dan enn fason permanan.​—Rev. 7:3.

7. Dapre Revelasion 7:16, 17, kan eski nom bann dimounn ki form parti dan gran lafoul, pou ekrir dan enn fason permanan dan liv lavi?

⁷ Deziem group-la se gran lafoul bann lezot mouton. Eski pou linstan zot nom dan liv lavi? Wi. Eski zot nom pou ankor dan liv lavi apre ki zot inn travers Armagedon? Wi. (Rev. 7:14) Zezi dir ki sa bann dimounn-la “pou gagn lavi eternel.” (Mat. 25:46) Me zot pa pou gagn lavi eternel deswit kouma zot travers Armagedon. Mem si zot nom dan liv lavi, li pa pou ankor ekrir dan enn fason permanan. Pandan Regn Mil An Zezi Kris, Zezi “pou gid zot kot lasours delo lavi.” Bann ki aksepte ki Zezi gid zot ek ki res fidel anver Zeova, zot nom pou ekrir dan enn fason permanan dan liv lavi.​—Lir Revelasion 7:16, 17.

8. Kisannla zot nom pa ekrir dan liv lavi, ek ki pou ariv zot?

⁸ Trwaziem group-la se bann kabri, bann dimounn ki pou detrir pandan Armagedon. Zot nom pa dan liv lavi. Zezi dir ki zot “pou pini pou toultan.” (Mat. 25:46) Lapot Pol ti dir ki “sa bann-la zot pou konn enn zizman ek zot pinision, se enn destriksion eternel.” (2 Tes. 1:9, NW; 2 Pier 2:9) Li parey osi pou bann dimounn ki, atraver listwar, inn fer pese kont lespri sin Zeova. Zot pa pou gagn lavi eternel; zot pou gagn enn destriksion eternel. Alor, li kler ki zot pa pou resisite. (Mat. 12:32; Mark 3:28, 29; Ebre 6:4-6) Aster-la, anou koz lor de group dimounn ki pou resisite lor later.

BANN KI POU RESISITE

9. Dapre Zistwar Bann Apot 24:15, ki de group dimounn pou resisite lor later, ek ki diferans ena ant sa de group-la?

⁹ Labib koz lor de group dimounn ki pou resisite, ek ki pou gagn posibilite pou viv pou touletan lor later: “bann bon” ek “bann move.” (Lir Zistwar Bann Apot 24:15.) “Bann bon” se bann dimounn ki’nn servi Zeova ar fidelite kan zot ti ankor vivan. Parkont, “bann move” se bann dimounn ki pa’nn servi Zeova, ek laplipar parmi zot ti ena enn move kondwit. Selman, bann dimounn ki form parti dan toulede group pou resisite. Eski savedir ki zot nom dan liv lavi? Pou reponn sa kestion-la, anou examinn sak group.

10. Kifer “bann bon” pou resisite, ek ki privilez sertin parmi zot pou gagne? (Get “Kestion Bann Lekter” dan sa nimero-la.)

¹⁰ Katriem group-la se “bann bon.” Avan ki zot mor, zot nom ti dan liv lavi. Me eski inn tir zot nom dan liv-la kan zot inn mor? Non, parski zot ankor “vivan” dan memwar Zeova. Zeova “pa Bondie bann mor me Bondie bann vivan. Pou li, tou dimoun vivan.” (Lik 20:38) Savedir ki, kan “bann bon” pou resisite, zot nom pou dan liv lavi, mem si pou linstan li pa dan enn fason permanan. (Lik 14:14) Anplis, sertin parmi sa bann dimounn-la pou gagn privilez pou servi kouma “bann prins lor antie later.”​—Ps. 45:16.

11. Avan ki “bann move” zot nom ekrir dan liv lavi, ki zot pou bizin fer?

 ¹¹ Sinkiem group-la se “bann move.” Sa bann dimounn-la pa ti konn bann lalwa Zeova, ek se kitfwa akoz sa ki zot pa ti ena enn bon kondwit. Akoz sa, pa’nn ekrir zot nom dan liv lavi. Me kan Zeova pou resisit zot, zot pou gagn lokazion pou sanze, ek lerla zot nom pou ekrir dan liv lavi. Me pou zot reisi fer sa, zot pou bizin led. Anplis, kitfwa sertin parmi zot ti pe amenn enn move lavi. Alor, pou bizin ansegn zot pou viv an-akor avek bann prinsip Zeova. Ek pou fer sa, Rwayom Bondie pou diriz pli gran travay lansegnman ki finn ena dan listwar.

12. (a) Kisannla pou ansegn “bann move”? (b) Ki pou ariv bann dimounn ki pa pe met an pratik seki zot pe aprann?

¹² Kisannla pou ansegn “bann move”? Se gran lafoul ek “bann bon” ki pou resisite. Pou ki bann move zot nom ekrir dan liv lavi, zot pou bizin devlop enn bon lamitie avek Zeova ek vwe zot lavi ar Li. Depi lesiel, Zezi ek bann ki pou regn ansam avek li, pou veye ki sa bann move-la pe met an pratik seki zot pe aprann. (Rev. 20:4) Ek si zot pa met an pratik seki zot pe aprann, pou detrir zot mem si zot ena 100 an. (Iza. 65:20) Zeova ek Zezi kapav lir dan leker bann dimounn, ek zot pa pou les personn fer bann move kitsoz dan lemond nouvo.​—Iza. 11:9; 60:18; 65:25; Zan 2:25.

RESISITE POU GAGN LAVI EK POU ENN ZIZMAN

13-14. (a) Dan lepase, kouma eski nou ti konpran Zan 5:29? (b) Kifer nou’nn sanz fason ki nou ti konpran sa verse-la?

¹³ Zezi osi ti koz lor bann dimounn ki pou resisite lor later. Par exanp, li ti dir: “Ler pe vini kot tou seki dan bann tom souvenir pou tann so lavwa ek pou sorti. Bann dimounn ki finn fer bann bon  kitsoz pou resisite pou gagn lavi, bann ki finn fer lemal pou resisite pou enn zizman.” (Zan 5:28, 29, NW) Ki Zezi ti pe rod dir?

¹⁴ Dan lepase, nou ti panse ki sa bann verse-la ti pe koz lor bann aksion ki bann resisite ti pou fer apre zot rezireksion. Nou ti panse ki sertin ti pou resisite ek fer bann bon kitsoz, alor ki lezot ti pou resisite ek fer bann move kitsoz. Me remarke ki Zezi pa dir ki, bann ki sorti dan bann tom souvenir, pou fer bann bon kitsoz ouswa pou fer lemal. Okontrer, li dir ki zot “finn fer bann bon kitsoz” ek ki zot “finn fer lemal.” Savedir ki zot finn fer sa bann aksion-la avan zot lamor. Li lozik, pa vre! An realite, Zeova ek Zezi pa pou les personn fer bann move kitsoz dan lemond nouvo. Alor, nou konpran ki “bann move” inn fer sa bann move kitsoz-la avan zot lamor. Me ki Zezi ti pe rod dir kan li ti koz lor rezireksion “pou gagn lavi” ek lor rezireksion “pou enn zizman”?

15. Kisannla pou “resisite pou gagn lavi,” ek kifer?

¹⁵ “Bann bon,” ki’nn fer bann bon kitsoz avan zot mor, pou “resisite pou gagn lavi” parski zot nom ti deza dan liv lavi. Savedir ki rezireksion bann “ki finn fer bann bon kitsoz,” ki mansione dan Zan 5:29, ek rezireksion “bann bon,” ki mansione dan Zistwar Bann Apot 24:15, se mem rezireksion. Sa li an-akor avek Romin 6:7 (NW), ki dir: “Sa kikenn ki’nn mor-la, finn libere ar so pese.” Alor, kan sa “bann bon” dimounn-la inn mor, Zeova inn pardonn zot bann pese. Selman, Li ankor rapel tou bann bon kitsoz ki zot ti fer kan zot ti ankor vivan. (Ebre 6:10) Biensir, sa bann dimounn-la pou bizin res fidel anver Zeova si zot anvi ki zot nom res dan liv lavi.

16. Ki savedir “resisite pou enn zizman”?

¹⁶ Me ki nou kapav dir lor bann dimounn ki’nn fer lemal avan ki zot mor? Mem si Zeova inn pardonn zot pese kan zot inn mor, kan zot ti vivan, zot pa ti fidel anver Zeova. Akoz sa, zot nom pa ekrir dan liv lavi. Alor, rezireksion “bann ki finn fer lemal” ek rezireksion “bann move,” ki mansione dan Zistwar Bann Apot 24:15, se mem rezireksion. Zot pou “resisite pou enn zizman.” c Savedir ki Zezi pou get bien zot bann aksion ek li pou teste zot. (Lik 22:30) Lerla, apre inpe letan, Zezi pou gete si zot merite ki met zot nom dan liv lavi. Pou ki zot nom ekrir dan liv lavi, zot pou bizin aret fer bann move kitsoz ki zot ti pe fer avan ek vwe zot lavi ar Zeova.

17-18. Ki kitsoz tou bann ki pou resisite lor later pou bizin fer, ek ki aksion mansione dan Revelasion 20:12, 13?

¹⁷ Me mem si sa bann dimounn-la “bon” ouswa “move,” zot tou zot pou bizin obeir bann lalwa ki pou dan bann nouvo roulo ki pou ouver pandan Regn Mil An Zezi Kris. Lapot Zan ti trouv sa dan enn vizion. Li ti dir: “Mo trouv bann mor, bann tipti kouma bann gran pe debout devan tronn e zot ouver enn  bann liv. Enn lot liv ki apel liv lavi ti osi ouver e bann mor ti zize dapre seki zot ti fer, dan manier ki finn ekrir dan bann liv la.”​—Rev. 20:12, 13.

¹⁸ Dapre sa de verse-la, pou ziz bann ki’nn resisite dapre zot bann aksion. Ki sa bann aksion-la sa? Eski se bann aksion ki zot ti fer avan ki zot mor? Non! Pa bliye ki, kan enn kikenn mor, Zeova pardonn so bann pese. Alor, bann aksion ki mansione isi, se pa bann aksion ki zot ti fer avan zot lamor. Plito, se bann aksion ki zot pou fer apre ki’nn ansegn zot bann lalwa ki ena dan bann nouvo roulo. Mem bann fidel serviter Zeova kouma Noe, Samiel, David, ek Daniel pou bizin aprann konn Zezi ek ena lafwa dan so sakrifis. Si pou bizin ansegn sa bann fidel serviter Zeova la, alor “bann move” pou ena pli boukou kitsoz ankor pou aprann!

19. Ki pou ariv bann dimounn ki pa pou swiv bann lalwa ki ena dan bann nouvo roulo?

¹⁹ Ki pou ariv bann dimounn ki pa pou swiv bann lalwa ki ena dan bann nouvo roulo? Revelasion 20:15 dir: “Dimoun ki so nom pa ti ekrir dan liv lavi, ti zet li dan basin dife.” Wi, pou detrir zot net. Alor, li bien inportan ki nou fer tou seki nou kapav pou ki nou nom li ekrir dan liv lavi ek ki li res ladan.

20. Ki travay extraordiner pou ena pandan Regn Mil An Zezi Kris? (Get zimaz lor kouvertir.)

²⁰ Regn Mil An Zezi Kris pou enn lepok extraordiner! Sa lepok-la, pou ena pli gran travay lansegnman ki finn ena dan listwar, ek pou osi examinn kondwit “bann bon” ek “bann move.” (Iza. 26:9; Zist. 17:31) Kouma pou fer sa gran travay lansegnman-la? Nou pou trouv sa dan prosin lartik.