1. Kouma nou kapav kone si nou kapav fer enn kikenn konfians?

 ENN kikenn ki nou kapav fer konfians, se enn kikenn ki tini so bann promes ek ki koz laverite. (Ps. 15:4) Bann dimounn kone ki zot kapav kont lor li. Nou anvi ki nou bann frer ek ser trouv nou kouma enn dimounn ki zot kapav fer konfians. Alor, ki kitsoz kapav ed nou pou gagn zot konfians?

2. Kouma nou kapav montre lezot ki zot kapav fer nou konfians?

² Nou pa kapav fors lezot pou fer nou konfians. Okontrer, se par nou bann aksion ki nou montre zot ki zot kapav fer nou konfians. Konfians li kouma kas; to bizin fer zefor pou to gagn li, me li fasil to perdi li. Nou kapav touletan ena konfians an Zeova, parski “tou seki li fer, zot parfe dan so fidelite.” (Ps. 33:4) Anplis, Zeova anvi ki nou imit Li. (Efe. 5:1) Anou get lexanp sertin fidel serviter Zeova ki’nn imit Li ek ki’nn montre ki kapav fer zot konfians. Nou pou get osi sink kalite ki pou ed nou pou vinn enn kikenn ki lezot kapav fer konfians.

3-4. Kouma Daniel ti montre ki li enn kikenn ki lezot kapav fer konfians, ek ki kestion nou bizin poz noumem?

³ Profet Daniel ti enn kikenn ki kapav fer konfians. Mem si li ti an kaptivite dan Babilonn, li ti ena enn bon repitasion ek bann dimounn ti fer li konfians. Kan Zeova ti servi li pou interpret rev Lerwa Naboukodonozor, sa ti fer bann dimounn ena plis konfians an li. Enn fwa, Daniel ti bizin dir lerwa ki Zeova ti ankoler ar li. Se enn mesaz ki pa ti pou fer lerwa plezir. Anplis, Naboukodonozor ti ena enn move karakter. Kanmem sa, avek kouraz, Daniel  ti dir lerwa mesaz Zeova. (Dan. 2:12; 4:20-22, 25) Plizir lane apre, enn mesaz ti aparet lor enn miray dan pale Babilonn. Ankor enn fwa, Daniel ti montre ki li ti enn kikenn ki kapav fer konfians parski li ti interpret sa mesaz-la dan enn fason exakt. (Dan. 5:5, 25-29) Plitar, Darius ek so bann fonksioner osi ti trouve ki Daniel ti ena “enn lintelizans extraordiner.” Zot ti dir ki Daniel ti “enn kikenn ki kapav fer konfians, ki pa ti fer neglizans, ek ki pa ti fer okenn magouy.” (Dan. 6:3, 4) Mem bann dirizan ki pa ti servi Zeova ti rekonet ki ti kapav fer Daniel konfians!

⁴ Kan nou reflesi lor lexanp Daniel, li bon ki nou demann noumem: ‘Ki repitasion mo ena pou bann dimounn ki pa servi Zeova? Eski mo enn kikenn ki asim mo bann responsabilite ek ki lezot kapav fer konfians?’ Kifer li inportan ki nou poz noumem sa bann kestion-la? Parski kan lezot fer nou konfians, sa donn laglwar Zeova.

5. Kifer Anania ti enn kikenn ki lezot kapav fer konfians?

⁵ An 455 Avan Nou Lepok, apre ki Gouverner Neemi ti rekonstrir miray Zerizalem, li ti rod bann zom serye pou okip lavil-la. Anania ti parmi bann dimounn ki Neemi ti swazir. Labib dekrir Anania kouma “enn kikenn ki kapav fer konfians ek ki ena lakrint pou Bondie, plis ki boukou lezot dimounn.” (Ne. 7:2)  Anania ti kontan Zeova ek li ti anvi fer Li plezir. Akoz sa, li ti asim bien tou bann responsabilite ki li ti gagne. Kan nou osi nou ena sa bann kalite-la, nou pou serye dan ninport ki responsabilite nou ena dan servis Zeova.

6. Kifer lapot Pol ti fer Tisik konfians?

⁶ Tisik ti enn frer ki lapot Pol ti fer konfians. Kan Pol ti anprizone dan enn lakaz, li ti kapav kont lor Tisik. Li ti dir ki Tisik ti “fidel dan travay Lesegner.” (Efe. 6:21, 22) Pol ti kont lor li, pa zis pou avoy bann let pou lasanble Efez ek Kolos, me osi pou ankouraz ek rekonfort so bann frer ek ser. Lexanp Tisik fer nou rapel bann frer serye ek fidel ki pran swin lasanble azordi.​—Kol. 4:7-9.

7. Ki nou kapav aprann lor konfians ar lexanp bann ansien ek bann asistan ministeryel?

⁷ Azordi, nou vremem rekonesan ki nou ena bann ansien ek bann asistan ministeryel ki nou kapav fer konfians. Parey kouma Daniel, Anania, ek Tisik, zot asim bien zot bann responsabilite. Par exanp, kan nou asiste renion dan lasemenn, nou kone ki renion pou deroul kouma bizin. Kan bann frer ek ser gagn enn size pou fer dan renion, bann ansien bien apresie ki zot prepar zot bien ek ki zot fer zot size. Pou renion wikenn osi, nou pa ezite pou invit nou bann etidian Labib, parski nou kone ki renion pou deroul kouma bizin. Nou kone osi ki nou pou gagn nou bann piblikasion pou nou kapav prese. Sa bann frer fidel la vremem pran nou swin, ek nou remersie Zeova pou sa! Me kouma nou, nou kapav montre ki lezot kapav fer nou konfians?

8. Ki nou bizin fer kan enn kikenn dir nou enn kitsoz ki konfidansiel? (Proverb 11:13)

⁸ Nou kontan nou bann frer ek ser, ek nou anvi gagn zot nouvel. Selman, nou bizin respekte zot lavi prive. Dan premie siek, sertin Kretien ti “fer palab, [ek] koz ninport.” (1 Tim. 5:13) Nou pa anvi vinn parey kouma zot, pa vre! Me fer koumadir enn kikenn dir nou enn kitsoz ki konfidansiel ek li demann nou pou pa repet sa ar personn. Par exanp, enn ser kapav dir nou ki li ena enn problem lasante ouswa enn lot difikilte, ek li demann nou pou gard sa pou noumem. Nou bizin respekte so desizion. b (Lir Proverb 11:13. c) Aster-la, anou get bann lezot sitiasion kot li inportan ki nou gard bann linformasion pou noumem.

9. Kouma sak manb lafami kapav montre ki kapav fer li konfians?

⁹ Ar nou fami. Sak manb lafami bizin gard konfidansiel bann kitsoz ki pase dan lafami. Par exanp, enn ser kapav ena enn mani ki so mari trouv komik. Me eski frer-la pou koz sa ar lezot ek fer so fam gagn onte? Non! Li kontan so madam ek li pa pou anvi fer nanye ki pou bles li. (Efe. 5:33) Bann adolesan anvi ki zot paran tret zot avek respe. Alor, li bon ki bann paran rapel sa. Fode pa zot rakont lezot bann erer ki zot zanfan fer, parski sa kapav rabes zot zanfan. (Kol. 3:21) Bann zanfan osi bizin aprann ki  fode pa zot rakont tou seki pase dan lakaz, parski sa kapav anbaras zot fami. (Det. 5:16) Kan sak manb lafami fer zefor pou gard konfidansiel bann kitsoz ki pase dan lafami, sa fer zot vinn pli pros ar zot kamarad.

10. Ki kitsoz enn vre kamarad zame pa pou fer? (Proverb 17:17)

¹⁰ Ar nou bann kamarad. Parfwa, nou santi ki nou bizin ouver nou leker ar enn bon kamarad. Selman, nou kapav gagn difikilte pou fer sa. Kifer? Parski kitfwa nou pa abitie ouver nou leker ar personn, ek ki sa pou bien bles nou si nou al aprann ki sa dimounn-la inn koz nou koze ar lezot. Parkont, nou bien apresie kan nou ena enn kamarad ki konn gard bann kitsoz konfidansiel! Sa dimounn-la li “enn vre kamarad.”​—Lir Proverb 17:17. d

11. (a) Kouma bann ansien ek zot madam montre ki kapav fer zot konfians? (b) Ki leson nou kapav aprann ar lexanp sa ansien ki, apre ki li’nn fer bann kitsoz ki konfidansiel pou lasanble, li pas letan ar so fami? (Get zimaz.)

¹¹ Dan lasanble. Bann ansien ki konn gard bann kitsoz konfidansiel, zot “enn plas kot kapav al kasiet kont divan, enn refiz” pou zot bann frer ek ser. (Iza. 32:2) Nou kapav dir sa bann ansien-la ninport ki kitsoz, parski nou kone ki zot pou gard sa pou zotmem. Selman, fode pa nou met presion lor zot pou ki zot dir nou bann kitsoz ki konfidansiel. Nou ena respe osi pou madam bann ansien, parski zot pa esey rod bann linformasion ki konfidansiel ar zot mari. An realite, se enn benediksion ki bann ansien zot madam pa konn bann kitsoz ki konfidansiel lor zot bann frer ek ser. Enn ansien so madam dir: “Mo bien kontan ki mo misie pa dir mwa nanye lor bann vizit pastoral ki li fer, ouswa lor led ki li donn  bann frer ek ser. Li pa mem mansionn zot nom ar mwa. Mem si mo ti ena sa bann linformasion-la, apart trakase, mo pa ti pou kapav fer nanye. Parski mo mari konn gard bann kitsoz konfidansiel, mo alez pou koz ar ninport kisannla dan lasanble. Mo ena konfians osi ki, kan mo ouver mo leker ar mo mari, li pa pou al rakont sa personn.” Biensir, nou tou nou ti pou kontan ki lezot fer nou konfians. Ki bann kalite kapav ed nou pou fer sa? Anou get sink kalite.

12. Kifer lamour se kalite pli inportan ki pou ed lezot pou fer nou konfians? Explike.

¹² Kalite pli inportan ki pou ed lezot pou fer nou konfians, se lamour. Zezi ti dir ki de pli gran komannman se kontan Zeova ek kontan nou prosin. (Mat. 22:37-39) Zeova enn Bondie ki nou kapav fer konfians. Alor, kan nou kontan Zeova, nou swiv so lexanp ek nou vinn bann dimounn ki lezot kapav fer konfians. Kan nou kontan nou bann frer ek ser, nou pa pou koz lor zot bann zafer personel ar lezot. Fode zame nou dir bann kitsoz lor zot, ki kapav anbaras zot ouswa fer zot ditor.​—Zan 15:12.

13. Kouma limilite kapav ed nou pou vinn enn kikenn ki lezot fer konfians?

¹³ Enn lot kalite ki pou ed lezot pou fer nou konfians, se limilite. Enn Kretien ki ena limilite, li pa pou esey inpresionn lezot kan limem touletan premie pou donn bann dernie news. (Fil. 2:3) Li pa pou esey fer lezot krwar ki li enn kikenn ki inportan, parski li ena bann linformasion lor ki li pa kapav koze. Enn kikenn ki ena limilite, li pa pou donn so lopinion personel lor bann size Biblik lor ki Labib ek bann piblikasion pa donn okenn detay.

14. Kouma disernman kapav ed nou pou vinn enn kikenn ki lezot fer konfians?

¹⁴ Enn Kretien ki ena disernman, li kone ki ena “enn ler pou res trankil ek enn ler pou koze.” (Ekle. 3:7) Dan boukou kiltir, ena enn koze ki dir ki, vomie ki nou res trankil olie ki nou koze. Ek Proverb 11:12 dir: “Enn zom ki ena boukou disernman, li res trankil.” Anou pran enn lexanp. Souvan, kan ti ena bann gro problem dan bann lasanble, responsab sirkonskripsion ti avoy enn ansien ki ena lexperyans pou ed sa bann lasanble-la. Konsernan sa ansien ki ena lexperyans la, enn frer dir: “Li touletan fer bien atansion pou pa koz lor bann kitsoz konfidansiel ar bann lezot lasanble.” Sa ansien-la ti ena boukou disernman. Akoz sa, bann lezot frer dan komite ansien ti ena boukou respe pou li. Zot ti sir ki li pa pou koz lor bann kitsoz ki konfidansiel ar lezot.

15. Donn enn lexanp pou montre ki, kan nou onet, lezot pou fer nou konfians.

¹⁵ Kan enn Kretien onet, lezot pou fer li konfians. Enn kikenn ki onet li touletan koz laverite. (Efe. 4:25; Ebre 13:18) Par exanp, fer koumadir to anvi amelior to kapasite pou ansegne. Si to ena enn size pou fer, kitfwa to pou demann enn kikenn pou ekout twa ek pou donn twa bann konsey pou to kapav ameliore. Me ar kisannla to pou al rod sa konsey-la? Eski to pou rod konsey ar enn kikenn ki pou dir twa seki to anvi tande, ouswa ar enn kikenn ki pou dir twa laverite? Repons-la lozik, pa vre! Labib dir: “Vomie enn repros ki fran ki enn lamour ki kasiet. Mem si repros enn kamarad li blesan,  sa prouv so fidelite.” (Prov. 27:5, 6) Kan enn kamarad ki onet donn nou enn konsey, kitfwa o-koumansman nou pou gagn difikilte pou aksepte konsey-la. Me si nou fer sa, nou pou gagn bann bienfe.

16. Kouma Proverb 10:19 montre nou ki nou bizin ena metriz?

¹⁶ Si nou anvi ki lezot fer nou konfians, nou bizin kapav metriz noumem. Sa kalite-la pou ed nou pou res trankil si nou anvi dir enn kitsoz ki konfidansiel. (Lir Proverb 10:19. e) Me kitfwa nou gagn difikilte pou metriz noumem kan nou servi bann rezo sosial. Si nou pa fer atansion, nou kapav fann bann linformasion ki konfidansiel ar boukou dimounn. Ek enn fwa ki sa linformasion-la inn fane lor Internet, nou pa kone kouma bann dimounn pou servi li ek komie dega sa pou fer. Kan nou metriz noumem, nou pou res trankil kan nou bann lennmi esey piez nou pou nou dir bann kitsoz ki kapav met lavi nou bann frer ek ser an danze. Sa kapav arive sirtou dan bann pei kot nou laktivite interdi ouswa lor restriksion. Dan sa bann kalite sitiasion-la, li pli bon ki nou swiv sa konsey Biblik la: “Mo pa pou dir nannye.” (Ps. 39:1) Alor, ki li ar nou fami, nou bann kamarad, nou bann frer ek ser, ouswa ar ninport kisannla, nou bizin vinn bann dimounn ki lezot kapav fer konfians. Ek pou lezot fer nou konfians, nou bizin kapav metriz noumem.

17. Kouma nou kapav ede pou ki sakenn fer so kamarad konfians dan lasanble?

¹⁷ Nou vremem rekonesan ki Zeova inn donn nou enn fami internasional ki kontan nou ek ki nou kapav fer konfians! Nou tou nou bizin fer zefor pou gagn konfians nou bann frer ek ser. Kan nou tou nou fer zefor pou kiltiv lamour, limilite, disernman, lonette, ek metriz lor noumem, nou ede pou ki sakenn kapav fer zot kamarad konfians. Alor, anou kontign imit nou Papa Zeova, ek montre ki nou bann dimounn ki lezot kapav fer konfians.