Anou gete kouma Labib reponn sa bann kestion-la.

Zistwar Bann Apot 24:15 dir nou ki “pou ena rezireksion bann move kouma bann bon.” Bann “bon” se bann dimounn ki’nn obeir Bondie ziska zot lamor, alor zot nom li dan liv lavi. (Mal. 3:16) Bann “move” se bann dimounn ki pa’nn gagn lokazion pou aprann konn Zeova, ek zot nom pa dan liv lavi.

Zan 5:28, 29 (NW) koz lor sa de group ki mansione dan Zistwar Bann Apot 24:15 la. Zezi ti dir: “Bann dimounn ki finn fer bann bon kitsoz pou resisite pou gagn lavi, bann ki finn fer lemal pou resisite pou enn zizman.” Bann “bon” inn fer bann bon kitsoz avan zot mor. Zot pou resisite pou gagn lavi parski zot nom ankor touzour dan liv lavi. Selman, bann “move” inn fer lemal avan zot mor. Zot pou resisite pou enn zizman. Zot nom pankor ekrir dan liv lavi, alor zot pou pas par enn peryod zizman. Se koumadir zot lor probasion. Pandan sa letan-la, zot pou gagn lokazion pou aprann konn Zeova, ek si zot swiv So bann lalwa, zot nom pou ekrir dan liv lavi.

Revelasion 20:12, 13 dir ki tou bann ki’nn resisite pou bizin obeir seki “finn ekrir dan bann liv [“roulo,” NW] la,” setadir bann nouvo lalwa ki Zeova pou donn nou dan lemond nouvo. Bann ki pa obeir sa bann lalwa-la, Zeova pou detrir zot.​—Iza. 65:20.

Daniel 12:2 ti predir ki sertin parmi bann ki’nn mor pou resisite “pou gagn lavi pou touletan ek lezot pou gagn laont ek dezoner pou touletan.” Sa verse-la koz lor dernie zizman ki bann resisite pou gagne. Zot pou swa “viv pou touletan,” swa “gagn laont ek dezoner pou touletan.” Alor, alafin Regn Mil An Zezi Kris, sertin pou gagn lavi pou touletan, ek lezot pou detrir pou touletan.​—Rev. 20:15; 21:3, 4.

Anou pran enn lexanp. Nou kapav konpar sa de group resisite la ar bann etranze ki anvi viv dan enn lot pei. Bann “bon,” zot koumadir bann ki’nn gagn enn work permit ouswa enn resident permit. Sa bann viza-la donn zot enn sertenn liberte dan pei. Parkont, bann “move,” zot koumadir bann ki’nn gagn enn viza touris. Savedir ki, si zot anvi res dan pei-la, zot pou bizin fer bann demars ek montre gouvernman sa pei-la ki zot anvi reste. Dan mem fason, bann move ki pou resisite pou bizin obeir bann lalwa Zeova ek montre Li ki zot inn sanze, pou ki zot kapav res dan Paradi. Selman, ninport ki viza ki sa bann etranze-la inn gagne pou rant dan pei, avek letan, sertin parmi zot pou vinn sitwayen sa pei-la, alor ki lezot, pou deport zot. Sa pou depann lor zot latitid ek lor fason ki zot inn azir dan sa pei-la. Dan mem fason, dernie zizman ki bann resisite pou gagne, pou depann lor zot fidelite ek lor fason ki zot inn azir dan lemond nouvo.

Zeova Li pa zis enn Bondie ki ena konpasion, me Li osi enn Bondie lazistis. (Det. 32:4; Ps. 33:5) Li pou montre so lamour kan Li pou resisit bann “bon” ek bann “move” toulede. Me Li atann ki zot tou obeir so bann lalwa. Zis bann ki pou kontan Li ek ki pou obeir so bann lalwa ki pou kapav kontign viv dan lemond nouvo.