Dan 1 Korintien 15:8, Pol dir: “Me an dernie li ti aparet ar mwa osi parey kouma enn kikenn ki’nn ne avan ler.” Dan lepase, nou ti dir ki Pol kitfwa ti pe koz lor so prop lexperyans kan li ti gagn enn vizion ek ki li ti trouv Zezi dan so laglwar. Se koumadir li ti gagn privilez pou ne, ouswa pou resisite, antan ki enn lespri, bann santenn lane avan ki sa kalite rezireksion-la arive. Me apre ki nou’nn etidie sa verse-la pli bien, nou’nn trouve ki nou bizin sanz fason ki nou ti pe konpran sa verse-la.

Li vre ki Pol ti pe koz lor seki ti ariv li kan li ti konverti. Me kan li ti dir ki li’nn “ne avan ler,” ki li ti pe rod dir? Anou get sertin posibilite.

Kan Pol ti konverti, sa ti enn sok pou boukou dimounn ek personn pa ti atann sa. Kan enn zanfan ne avan ler, se enn kitsoz ki personn pa atann. Sol (ki plitar ti apel Pol) ti pe al Damas pou persekit bann Kretien ek li pa ti atann pou trouv Zezi dan enn vizion. Kan Pol ti konverti, sa ti enn sok, pa zis pou li, me pou tou bann Kretien ki li ti pe al persekite dan Damas. Sa lexperyans-la ti telman tromatiz Pol ki li ti vinn aveg pandan enn sertenn letan.​—Zistwar Bann Apot 9:1-9, 17-19.

Pol inn konverti “enn move ler.” Mo Grek ki’nn servi pou “ne avan ler” vedir osi “ne enn move ler.” Bible de Jérusalem tradir sa verse-la koumsa: “Se koumadir mo’nn ne kan personn pa ti atann.” Kan Pol ti konverti, Zezi ti fini retourn dan lesiel. Konpare ar bann dimounn ki Pol mansione dan bann verse avan, Pol pa ti trouv Zezi avan ki Zezi al dan lesiel. (1 Kor. 15:4-8) Pol ti trouv Zezi apre ki Zezi ti resisite. Se koumadir li ti trouv Zezi “enn move ler.”

Pol ti ena modesti kan li ti koz lor limem. Dapre sertin Biblis, kan Pol dir sa bann parol-la, se koumadir li pe kritik limem. Si Pol ti pans koumsa, sa montre ki li ti panse ki li pa merite pou vinn enn apot Zezi. Pol ti mem dir: “Mo pli tipti parmi bann apot, e mo mem pa merit ki apel mwa apot, parski mo ti persekit legliz Bondie. Me par lagras Bondie mo finn vinn seki mo ete.”​—1 Kor. 15:9, 10.

Alor, kitfwa Pol ti dir sa bann parol-la parski li ti gagn sok ki Zezi ti aparet ar li, parski li ti konverti dan enn fason ki personn pa ti atann, ouswa parski li ti panse ki li pa ti merite vinn enn apot Zezi. Me pou ninport ki rezon Pol ti dir sa bann parol-la, li kler ki sa lexperyans-la ti bien inportan pou li. Sa ti montre li ki Zezi ti resisite. Akoz samem ki souvan li ti mansionn sa lexperyans-la kan li ti koz lor rezireksion Zezi ar lezot.​—Zistwar Bann Apot 22:6-11; 26:13-18.