1-2. Kifer nou bizin etidie zistwar Sanson?

 KI TO mazine kan to tann nom Sanson? Sirman to rapel ki li ti enn zom bien for, pa vre! Selman, Sanson ti pran enn desizion ki ti fer li bien soufer. Kanmem sa, Zeova ti res konsantre lor tou seki Sanson ti fer pou servi Li, ek Li’nn fer ekrir zistwar sa zom fidel la dan Labib pou ki nou kapav tir bann leson.

² Zeova ti servi Sanson pou fer bann kitsoz extraordiner pou ed So pep. Plizir santenn lane apre lamor Sanson, Zeova ti fer lapot Pol met nom Sanson lor lalis bann zom ki ti ena enn gran lafwa. (Ebre 11:​32-34) Lexanp Sanson kapav ankouraz nou, parski li ti kont lor Zeova mem kan li ti gagn bann difikilte. Dan sa lartik-la, nou pou gete seki nou kapav aprann lor Sanson, ek nou pou gete kouma so lexanp kapav ankouraz nou.

3. Ki responsabilite Sanson ti gagne?

³ Kan Sanson ti ne, bann Filistin ti pe diriz Izrael ek zot ti bien dominer. (Ziz 13:1) Bann Izraelit ti bien soufer parski bann Filistin ti bien kriel. Lerla, Zeova ti swazir Sanson “pou sov Izrael dan lame bann Filistin.” (Ziz 13:5) Sa ti enn responsabilite bien difisil! Pou li asim sa responsabilite-la, Sanson ti bizin kont lor Zeova.

4. Kouma Zeova ti ed Sanson? (Ziz 15:​14-16)

⁴ Anou get enn lexanp ki montre kouma Sanson ti ena konfians ki Zeova ti pou ed li ek soutenir li. Enn fwa, bann solda Filistin ti pe rod may Sanson ek zot ti al rod li dan Lei, ki kitfwa ti trouv dan Zida. Bann abitan Zida  ti gagn per, ek zot ti desid pou livre Sanson ar so bann lennmi. So prop pep ti atas li ar de lakord nef ek zot ti livre li ar bann Filistin. (Ziz 15:​9-13) Selman, “lespri Zeova ti fer Sanson vinn for,” ek Sanson ti kas lakord-la. Lerla, Sanson “ti trouv lezo lamaswar enn bourik mal ki ti fek mor.” Li ti ramas li, ek li ti touy 1,000 Filistin ar sa.—Lir Ziz 15:​14-16.

5. Kan Sanson ti servi lezo lamaswar enn bourik, kouma sa montre ki li ti fer Zeova konfians?

⁵ Kifer Sanson ti servi lezo lamaswar enn bourik? Sa pa ti enn zarm! Selman, Sanson ti kone ki se Zeova ki ti pou donn li laviktwar. Alor, ninport ki kitsoz li ti pou servi, Sanson ti kone ki li ti pou reisi. Sa zom fidel la ti servi seki li ti ena dan sa ler-la pou fer volonte Zeova. Li kler ki Sanson ti kont lor Zeova. Gras-a sa, li ti gagn enn gran laviktwar.

6. Ki leson nou kapav aprann ar lexanp Sanson?

⁶ Nou osi nou kapav gagn lafors ar Zeova pou asim nou bann responsabilite, mem bann responsabilite ki bien difisil. Anplis, Zeova kapav ed nou dan bann fason ki nou pa atann. Alor, parey kouma Sanson, kontign fer Zeova konfians. Li pou ed twa pou fer so volonte tanki to kontign kont lor Li.—Prov. 16:3.

7. Sit enn lexanp ki montre linportans pou rod direksion Zeova.

⁷ Boukou frer ek ser ki’nn travay lor bann proze konstriksion inn montre ki zot fer Zeova konfians. Dan lepase, bann frer ti pe fer bann plan ek zot ti pe aranz bann Lasal Renion ek bann lezot batiman. Me parski deplizanpli dimounn ti pe pran batem, ti bizin plis lasal. Alor, lorganizasion ti fer bann sanzman. Bann frer responsab ti rod direksion Zeova ek zot ti esey bann nouvo metod. Par exanp, zot ti aste bann batiman ek zot ti fer renovasion sa bann batiman-la. Robert,  enn frer ki’nn travay lor plizir proze konstriksion dan lemond antie, dir: “O-koumansman, sertin ti trouv sa difisil pou aksepte sa bann sanzman-la. Sa ti bien diferan ar seki nou ti pe fer pandan plizir lane. Me bann frer ti dispoze pou adapte zot, ek zot ti trouve ki Zeova ti pe beni sa bann sanzman-la.” Sa se zis enn lexanp ki montre kouma Zeova pe gid so pep pou ki zot fer so volonte. Detanzantan, li bon ki nou tou nou demann nou-mem, ‘Eski mo pe rod direksion Zeova, ek mo dispoze pou fer bann sanzman pou servi Li dan meyer fason ki ena?’

8. Kan Sanson ti gagn swaf, ki li ti fer?

⁸ Sirman to rapel bann lezot kitsoz extraordiner ki Sanson inn fer! Par exanp, li ti touy enn lion, ek apre sa, li ti touy 30 Filistin dan Askelonn. (Ziz 14:​5, 6, 19) Samson ti kone ki li pa ti pou kapav fer tousala san led Zeova. Nou trouv sa sirtou kan li ti gagn swaf apre ki li ti touy 1,000 Filistin. Ki Sanson ti fer? Olie ki li kont lor limem pou li trouv delo pou bwar, li ti demann Zeova pou ed li.—Ziz 15:18.

9. Kouma Zeova ti reponn Sanson? (Ziz 15:19)

⁹ Zeova ti reponn Sanson kan li ti fer enn mirak pou donn li delo. Kan Sanson ti bwar sa delo-la, “li ti regagn lafors ek kouraz.” (Lir Ziz 15:19) Sa lasours delo la kitfwa ti ankor la kan Zeova ti fer profet Samiel ekrir liv Ziz. Kan bann Izraelit ti trouv sa lasours delo la, sirman sa ti rapel zot ki si zot kont lor Zeova, Li pou ed zot kan zot dan difikilte.

10. Ki nou bizin fer pou ki Zeova ed nou? (Get zimaz osi.)

¹⁰ Nou osi nou bizin rod led Zeova, mem si nou ena bann talan ek bann kapasite, ouswa mem si nou’nn fer boukou kitsoz dan nou servis pou Zeova. Nou bizin ena modesti ek rekonet ki, pou nou kapav fer seki Zeova demann nou, nou bizin kont lor Li. Sanson ti gagn lafors kan li ti bwar delo ki Zeova ti donn li. Dan mem fason, nou osi nou pou gagn lafors lor plan spiritiel kan nou profit tou bann dispozision ki Zeova pran pou nou.—Mat. 11:28.

11. Kouma nou montre ki nou kont lor Zeova? Donn enn lexanp.

¹¹ Anou get lexanp Aleksey, enn parmi nou bann frer ki res Larisi ek ki pe andir persekision. Ki kitsoz ed li pou res for malgre bann difikilte ki li gagne? So madam ek li ena bann bon labitid spiritiel. Aleksey dir: “Mo fer zefor pou lir Labib toulezour ek pou fer mo letid personel regilierman. Toule gramatin, mo madam ek mwa nou examinn text ansam ek nou priye Zeova ansam.” Ki leson nou aprann? Olie ki nou kont lor nou-mem, nou bizin kont lor Zeova. Kouma nou kapav fer sa? Nou kapav fer sa kan nou fer bann kitsoz ki pou ogmant nou lafwa, kouma par exanp etidie Labib, priye Zeova, asiste bann renion, ek sorti predikasion. Kan nou fer sa bann kitsoz-la, Zeova pou beni bann zefor ki nou pe fer pou servi Li. Zeova ti donn Sanson lafors; nou kapav sir ki Li pou donn nou osi lafors.

12. Ki move desizion Sanson ti pran, ek kifer so relasion avek Dalila ti diferan?

¹² Sanson ti inparfe parey kouma nou. Alor, parfwa li ti pran bann move desizion. Me ena enn desizion ki ti fer li gagn boukou maler. Apre ki li ti servi kouma ziz pandan inpe letan, Sanson “ti tom amoure ar enn fam ki res dan vale Sorek. Fam-la ti apel Dalila.” (Ziz 16:4) Avan sa, Sanson ti fianse ar enn fam filistin. Selman, “se Zeova ki ti pous li pou pran sa desizion-la,” parski Li “ti pe rod enn lokazion pou atak bann Filistin.” Apre sa, dan lavil Gaza, Sanson ti res dan lakaz enn prostitie. Sa lanwit-la, Zeova ti donn Sanson lafors pou defons laport sa lavil-la, ek sa ti afebli lavil-la. (Ziz 14:​1-4; 16:​1-3) Selman, relasion ki Sanson ti ena avek Dalila ti bien diferan, parski kitfwa Dalila ti enn Izraelit ek sa pa ti pou donn Sanson lokazion pou lager kont bann Filistin.

13. Ki kitsoz Dalila ti fer?

¹³ Dalila ti aksepte pou trayir Sanson pou enn gro som larzan. Sanson kitfwa ti telman kontan Dalila ki li pa ti trouve ki Dalila ti pe sey anbet li. Dalila plizir fwa ti met presion lor Sanson pou ki li dir li kifer li for koumsa, ek alafin Sanson ti dir li. Malerezman, akoz erer ki Sanson ti fer, li ti perdi so lafors ek faver Zeova pandan enn sertenn letan.—Ziz 16:​16-20.

14. Ki’nn ariv Sanson parski li’nn fer Dalila konfians?

¹⁴ Olie ki li fer Zeova konfians, Sanson ti fer Dalila konfians, ek akoz sa li  ti gagn boukou maler. Bann Filistin ti may li ek zot ti fer li vinn aveg. Zot ti met li dan prizon dan Gaza, landrwa kot Sanson ti defons bann laport lavil. Zot ti fer li vinn enn esklav, ek zot ti fer li kraz bann lagrin sereal. Apre sa, kan bann Filistin ti fer enn fet, zot ti boufonn li. Zot ti fer enn gran sakrifis pou zot fos bondie Dagon, parski zot ti panse ki li ti ed zot pou may Sanson. Zot ti fer Sanson sorti dan prizon, zot ti amenn li dan fet-la, ek zot ti “pran plezir ar li.”—Ziz 16:​21-25.

15. Kouma Sanson ti montre ki li ti rekoumans kont lor Zeova? (Ziz 16:​28-30) (Get zimaz lor kouvertir.)

¹⁵ Samson ti fer enn erer bien grav. Selman, li pa ti aret servi Zeova. Li ti kontign rod enn lokazion pou fer mision ki Zeova ti donn li, setadir pou lager kont bann Filistin. (Lir Ziz 16:​28-30.) Sanson ti sipliy Zeova, ek li ti dir: “Les mo tir vanzans kont bann Filistin.” Lerla, Bondie ti reponn so lapriyer ek ti redonn li enn lafors extraordiner. Gras-a sa, Sanson ti “touy pli boukou dimounn kan li’nn mor, ki kan li ti vivan.”

16. Ki nou kapav aprann ar fason ki Sanson ti reazir mem si li ti fer enn erer?

¹⁶ Mem si Sanson ti bien soufer akoz erer ki li ti fer, li pa ti aret fer volonte Zeova. Nou osi parey, si nou fer enn erer ek ki nou gagn enn disiplinn, ouswa si nou perdi enn privilez, fode pa nou aret servi Zeova. Pa bliye ki Zeova anvi pardonn nou. (Ps. 103:​8-10) Malgre nou bann erer, Zeova kapav donn nou lafors pou fer so volonte, parey kouma li ti fer ar Sanson.

17-18. Ki nou kapav aprann ar lexanp Michael? (Get zimaz osi.)

¹⁷ Anou get lexanp enn zenn frer ki apel Michael. Li ti enn serviter lasanble, li ti enn pionie, ek li ti ena boukou responsabilite dan lasanble. Malerezman, li ti fer enn erer, ek akoz sa, li ti perdi tou so bann privilez. Michael dir: “Mo ti bien okipe dan mo servis pou Zeova. Ek enn sel kout, mo ti ena linpresion ki mo nepli kapav fer nanye  pou servi Li. Mo ti kone ki Zeova zame pa ti pou abandonn mwa. Selman, mo ti pe demann momem si enn zour mo ti pou reisi regagn mem lamitie avek Li, ek si mo ti pou reisi regagn bann responsabilite dan lasanble parey kouma avan.”

¹⁸ Erezman, Michael pa’nn bes lebra. Li dir: “Mo ti fer zefor pou vinn pli pros ar Zeova kan mo ti priye Li regilierman, mo ti etidie, ek mo ti reflesi lor seki mo ti aprann.” Avek letan, Michael ti regagn so bann privilez dan lasanble. Azordi, li enn ansien ek li enn pionie permanan. Li dir: “Soutien ek lankourazman ki mo ti gagne, sirtou ar bann ansien, ti ed mwa pou konpran ki Zeova ti ankor kontan mwa. Azordi, mo pe kapav servi dan lasanble avek enn konsians kler. Seki’nn ariv mwa, inn aprann mwa ki Zeova pardonn ninport kisann-la ki vremem repanti.” Nou osi, nou kapav sir ki, mem si nou fer bann erer, Zeova pou beni nou ek Li pou servi nou si nou koriz nou bann erer ek nou kontign kont lor Li.—Ps. 86:5; Prov. 28:13.

19. Kouma lexanp Sanson inn ankouraz twa?

¹⁹ Dan sa lartik-la, nou’nn get zis de-trwa sitiasion ki ti arive dan lavi Sanson. Li pa ti enn zom parfe; selman li pa ti aret fer zefor pou servi Zeova, mem kan li ti fer enn erer akoz Dalila. Anplis, Zeova ti kontign servi Sanson. Li ti mem servi li pou fer enn kitsoz extraordiner. Zeova ti ankor konsider Sanson kouma enn zom ki ti ena enn gran lafwa, ek Li’nn fer azout li lor lalis bann zom fidel ki trouv dan Ebre sapit 11. Sa bien ankouraz nou kan nou kone ki nou servi enn Bondie ki ena boukou lamour ek ki anvi donn nou lafors, sirtou kan nou feb! Alor, parey kouma Sanson, anou kontign sipliy Zeova kan nou dir Li: “Rapel mwa, silteple. Fer mwa vinn for.”—Ziz 16:28.