1. Kouma Pier ti reazir kan Zezi ti fer enn mirak?

 PIER inn lapes enn lanwit, ek li pa’nn nanye. Alor, li etone kan Zezi dir li: “Al kot delo pli fon ek zet zot file.” (Lik 5:4) Pier ti panse ki zot pa ti pou gagn nanye. Selman, li ti fer seki Zezi ti dir li. Kan Pier ek so bann zom ti lev zot file, zot ti gagn telman boukou pwason ki zot file ti koumans desire. Kan zot ti konpran ki Zezi ti fer enn mirak, zot ti “extra etone.” Pier ti dir: “Res lwin ar mwa Segner, parski mo enn zom ki fer pese.” (Lik 5:​6-9) Dan sa ler-la, kitfwa Pier pa ti santi li dign pou li ansam ar Zezi.

2. Kouma lexanp Pier kapav ed nou?

² Pier ti ena rezon; li ti “enn zom ki fer pese.” Labib montre nou ki parfwa li ti dir ek fer bann kitsoz ki li ti regrete apre. Eski parfwa to ena mem santiman ki Pier? Eski ena enn kitsoz dan to personalite ki to pe gagn difikilte pou ameliore, ouswa eski sa fer lontan ki to pe lit kont enn febles? Si to dan sa sitiasion-la, lexanp Pier kapav ankouraz twa. Kouma? Reflesi lor la: Zeova ti kapav pa fer ekrir dan Labib bann erer ki Pier ti fer. Selman, Li’nn fer ekrir zot pou ki nou kapav tir bann leson. (2 Tim. 3:​16, 17) Kan nou reflesi lor bann difikilte ki Pier ti gagne, sa kapav ed nou pou konpran ki Zeova pa atann ki nou parfe. Li anvi ki nou persevere, setadir ki nou kontign fer zefor, malgre nou bann febles.

3. Kifer nou bizin persevere?

 ³ Kifer nou bizin persevere? Nou bizin persevere parski kan nou fer zefor pou fer enn kitsoz, souvan nou vinn pli bon ladan. Anou pran enn lexanp. Sa kapav pran plizir lane pou ki enn kikenn aprann zwe bien lagitar. Kitfwa o-koumansman, plizir fwa li pou fer bann erer. Me si li kontign pratike, li pou ameliore. Ek mem si li zwe bien, enn-de fwa li pou fer bann erer. Kanmem sa, li pa pou bes lebra. Li pou kontign pratike pou ki li vinn pli bon ankor. Dan mem fason, mem si nou panse ki nou’nn reisi sirmont enn febles, li kapav arive ki nou refer mem erer. Selman, nou bizin kontign fer zefor pou amelior nou. Nou tou nou dir ek fer bann kitsoz ki nou regrete apre. Me si nou pa bes lebra, Zeova pou ed nou pou nou amelior nou. (1 Pier 5:10) Anou get lexanp Pier, ki ti kontign persevere. Mem si li ti fer bann erer, Zezi ti montre konpasion anver li, ek sa kapav motiv nou pou kontign servi Zeova.

4. Dapre Lik 5:​5-10, ki kitsoz Pier ti dir lor limem, me kouma Zezi ti rasir li?

⁴ Labib pa dir kifer Pier ti panse ki li “enn zom ki fer pese,” ek li pa dir osi ki pese Pier ti panse li’nn fer. (Lir Lik 5:​5-10.) Me kitfwa li ti fer bann erer bien grav. Zezi ti kone ki Pier ti gagn per. Kitfwa Pier ti panse ki li pa ti ase bon pou vinn enn disip Zezi. Me Zezi ti kone osi ki Pier ti pou kapav res fidel. Akoz sa, avek boukou lamour, Zezi ti dir Pier: “Aret gagn per.” Zezi ti fer Pier konfians, ek sa ti ena enn bon lefe lor Pier. Inpe apre, Pier ek so frer Andre, ti kit zot biznes lapes ek zot ti swiv Zezi aplintan. Sa desizion-la ti fer zot gagn boukou benediksion.—Mark 1:​16-18.

5. Ki bann benediksion Pier ti gagne parski li ti reisi sirmont so bann santiman negatif?

⁵ Pier ti gagn boukou benediksion kan li ti vinn enn disip Zezi. Li ti trouv Zezi geri bann malad, tir demon lor bann dimounn, ek mem resisit bann mor. b (Mat. 8:​14-17; Mark 5:​37, 41, 42) Li ti osi gagn enn vizion, kot li’nn trouv Zezi vinn Lerwa dan Rwayom Bondie. Pier zame pa ti bliye sa vizion-la! (Mark 9:​1-8; 2 Pier 1:​16-18) Wi, Pier ti trouv boukou kitsoz ki li pa ti atann. Sirman li  ti bien kontan ki li ti reisi sirmont so bann santiman negatif ek ki li ti gagn tou sa bann benediksion-la!

6. Eski Pier ti reisi sirmont so bann febles deswit? Explike.

⁶ Malgre bann kitsoz extraordiner ki li ti trouve ek tande, Pier ti bizin kontign lit kont so bann febles. Anou get de-trwa erer ki Pier ti fer. Kan Zezi ti dir ki li ti pou bizin soufer ek mor pou akonpli enn profesi, Pier ti dir Zezi ki sa pa ti pou arive. (Mark 8:​31-33) Pier ek bann lezot zapot plizir fwa ti diskite ant zot pou kone kisann-la ki pli gran. (Mark 9:​33, 34) Ek lanwit avan lamor Zezi, Pier ti koup zorey enn zom. (Zan 18:10) Sa lanwit-la, Pier ti telman per ki trwa fwa li ti dir ki li pa konn Zezi. (Mark 14:​66-72) Pier ti bien plore akoz sa.—Mat. 26:75.

7. Apre so rezireksion, ki lokazion Zezi ti donn Pier?

⁷ Mem si Pier ti bien dekouraze, Zezi pa ti abandonn li. Apre so rezireksion, Zezi ti donn Pier lokazion pou dir li ki kantite li kontan li. Lerla, Zezi ti demann Pier pou okip so bann mouton. (Zan 21:​15-17) Pier ti fer seki Zezi ti demann li. Zour Lapantkot, li ti dan Zerizalem ek li ti parmi bann premie pou gagn lespri sin.

8. Ki erer bien grav Pier ti fer dan Antios?

⁸ Mem apre ki li ti gagn lesperans pou al dan lesiel, Pier ti bizin kontign lit kont so bann febles. Lane 36 Nou Lepok, Pier ti la kan Korney, enn non-Zwif, ti gagn lespri sin. Sa ti montre ki “Bondie pa fer preferans,” ek ki bann non-Zwif ti kapav form parti dan lasanble Kretien. (Zist. 10:​34, 44, 45) Akoz sa, Pier ti santi li alez pou manz ar bann non-Zwif, enn kitsoz ki zame li pa ti pou fer avan. (Gal. 2:12) Selman, sertin Kretien zwif pa ti dakor ki bann Zwif ek bann non-Zwif manz ansam. Kan sertin parmi zot ti ariv Antios, Pier ti aret manz ar so bann frer non-Zwif, kitfwa parski li ti per pou ofans bann Kretien zwif. Lapot Pol ti trouv seki Pier ti fer ek li ti koriz li devan tou dimounn. (Gal. 2:​13, 14) Mem si li ti fer sa erer-la, Pier ti kontign persevere. Ki kitsoz ti ed li?

9. Kouma Zan 6:​68, 69 montre ki Pier ti fidel?

⁹ Pier ti enn kikenn ki fidel; li pa ti les nanye anpes li swiv Zezi. Par exanp, enn fwa li ti montre so fidelite kan Zezi ti dir enn kitsoz ki so bann disip pa ti konpran. (Lir Zan 6:​68, 69.) Sa zour-la, boukou disip ti aret swiv Zezi avan mem ki zot gagn enn explikasion lor seki Zezi ti dir. Me Pier pa ti fer sa. Kifer? Parski li ti kone ki zis Zezi tousel “ena bann parol lavi eternel.”

10. Kouma Zezi ti montre ki li ti fer Pier konfians? (Get zimaz osi.)

¹⁰ Zezi pa ti rezet Pier. Lanwit avan so lamor, Zezi ti kone ki Pier ek bann lezot zapot ti pou abandonn li. Kanmem sa, li ti fer Pier konfians. Li ti sir ki Pier ti pou retourne ek ki li ti pou res fidel. (Lik 22:​31, 32) Zezi ti konpran ki “lespri anvi fer seki bon, me laser li feb.” (Mark 14:38) Alor, mem si Pier ti dir ki li pa ti konn Zezi, Zezi pa ti abandonn li. Apre so rezireksion, Zezi ti aparet ar Pier, kitfwa dan enn moman kot li ti tousel ek dekouraze. (Mark 16:7; Lik 24:34; 1 Kor. 15:5) Sirman sa ti bien ankouraz lapot Pier!

11. Kouma Zezi ti ed Pier pou konpran ki Zeova ti pou pran li swin?

 ¹¹ Zezi ti ed Pier pou konpran ki Zeova ti pou pran li swin. Apre so rezireksion, Zezi ti fer enn mirak ek li ti fer Pier ek bann lezot zapot gagn boukou pwason. (Zan 21:​4-6) Sa mirak-la sirman ti fer Pier konpran ki Zeova ti pou kapav donn li seki li bizin pou viv. Sirman Pier ti rapel osi ki Zezi ti dir ki Zeova pou pran swin bann ki “kontign met Rwayom Bondie . . . an premie.” (Mat. 6:33) Ki lefe sa finn ena lor lapot Pier? Olie ki li met so biznes lapes an premie dan so lavi, li ti fer so servis pou Zeova vinn so priorite. Lapantkot lane 33 Nou Lepok, Pier ti prese avek kouraz, ek gras-a li, plizir milye dimounn ti aksepte bon nouvel. (Zist. 2:​14, 37-41) Apre sa, li ti ed bann Samariten ek bann non-Zwif pou aprann konn Zezi ek pou swiv li. (Zist. 8:​14-17; 10:​44-48) Zeova ti servi Pier dan enn fason extraordiner pou ed boukou dimounn pou vinn dan lasanble Kretien.

12. Kouma lexanp Pier kapav ed nou, sirtou si sa fer lontan ki nou pe lit kont enn febles?

¹² Zeova kapav ed nou pou persevere. Kitfwa sa pa touletan fasil, sirtou si sa fer lontan ki nou pe lit kont enn febles. Parfwa, nou kapav ena bann pli gran difikilte ki seki Pier ti gagne. Selman, Zeova kapav donn nou lafors ki nou bizin pou nou pa bes lebra. (Ps. 94:​17-19) Anou get enn lexanp. Avan ki li vinn dan laverite, enn frer ti omosexiel pandan plizir lane. Li’nn sanz so lavi net, ek azordi li pe swiv bann prinsip Labib. Selman, detanzantan, li bizin lit kont bann move dezir. Ki kitsoz ed nou frer pou pa bes lebra? Li dir: “Zeova donn nou lafors.” Li dir osi: “Avek led lespri sin Zeova . . . , mo’nn trouve ki mo kapav [kontign] mars lor sime laverite . . . Zeova pe servi mwa, ek mem si mo ena bann defo, Li kontign donn mwa lafors.”

13. Dapre Zistwar Bann Zapot 4:​13, 29, 31, kouma nou kapav swiv lexanp lapot Pier? (Get zimaz osi.)

¹³ Lapot Pier plizir fwa inn fer bann erer parski li ti per bann dimounn. Selman, kan li ti priye Zeova pou gagn lafors, Pier ti azir avek kouraz. (Lir Zistwar Bann Zapot 4:​13, 29, 31.) Nou  osi nou kapav sirmont nou bann laper. Anou get lexanp Horst, enn zenn frer ki ti res Lalmagn dan lepok bann Nazi. So bann kamarad lekol plizir fwa ti met presion lor li, ek akoz sa li ti dir “Heil Hitler!” Olie ki so bann paran kriy ar li, zot ti priye Zeova ansam avek li, ek zot ti demann Zeova pou donn li kouraz. Gras-a so bann paran, Horst ti aprann kont lor Zeova, ek sa finn donn li lafors pou li res fidel ar Zeova. Plizir lane apre, li ti dir: “Zeova zame pa’nn abandonn mwa.” c

14. Kouma bann ansien kapav ankouraz bann ki dekouraze?

¹⁴ Zeova ek Zezi zame pa pou abandonn nou. Apre ki Pier ti dir ki li pa konn Zezi, li ti bizin pran enn desizion bien inportan. Eski li ti pou abandonn Zezi, ouswa eski li ti pou persevere pou res enn disip Zezi? Zezi ti sipliy Zeova pou ki Pier kontign ena lafwa. Zezi ti dir Pier ki li ti priye pou li. Li ti osi dir Pier ki li ti ena konfians ki li ti pou kapav fortifie so bann frer. (Lik 22:​31, 32) Kan Pier ti mazinn bann parol ki Zezi ti dir, sirman sa ti donn li lafors pou persevere! Kan nou bizin pran bann desizion inportan, Zeova kapav servi bann ansien pou donn nou bann lankourazman ki nou bizin pou nou kapav res fidel. (Efe. 4:​8, 11) Paul, enn frer ki ansien depi plizir lane, explike kouma li ankouraz so bann frer ek ser. Kan enn kikenn dekouraze, li demann li pou reflesi lor kouma Zeova inn atir li dan laverite. Apre sa, li rasir sa dimounn-la ki Zeova ena lamour fidel ek ki zame Li pa pou abandonn li.  Paul dir: “Avek led Zeova, mo’nn trouv boukou dimounn ki ti dekouraze, kontign persevere!”

15. Kouma lexanp Pier ek Horst montre ki Zeova tini promes ki Li’nn fer dan Matie 6:33?

¹⁵ Parey kouma Zeova ti donn Pier ek bann lezot zapot seki zot ti bizin, Li pou donn nou osi seki nou bizin si nou met so Rwayom an premie dan nou lavi. (Mat. 6:33) Apre Deziem Lager Mondial, Horst, ki nou’nn mansione taler-la, ti anvi fer pionie. Selman, li ti bien mizer, ek li ti panse ki li pa ti pou ena ase kas pou viv si li ti fer pionie. Ki Horst ti fer? Li ti desid pou teste Zeova. Pandan vizit responsab sirkonskripsion, toutlong lasemenn li ti sorti predikasion. Lafin lasemenn, li ti gagn sok kan responsab sirkonskripsion ti donn li enn lanvlop. Horst pa ti kone kisann-la ti fer sa don-la, selman dan lanvlop-la ti ena ase kas pou li fer pionie pandan plizir mwa. Pou Horst, sa lanvlop-la ti enn prev ki Zeova ti pou pran li swin. Depi sa zour-la, Horst inn touletan met Rwayom Bondie an premie dan so lavi.—Mal. 3:10.

16. Kifer nou bizin aprann plis lor lapot Pier ek lor bann let ki li’nn ekrir?

¹⁶ Sirman Pier ti bien kontan ki Zezi pa ti ekout li kan li ti demann Zezi pou res lwin ar li! Zezi ti kontign form Pier pou ki li vinn enn zapot fidel ek enn bon lexanp pou bann Kretien. Nou kapav tir boukou leson ar formasion ki Zezi ti donn Pier. Nou trouv sertin parmi sa bann leson-la dan de let ki Pier ti avoy bann lasanble dan premie siek. Dan prosin lartik, nou pou get sertin parmi sa bann leson-la, ek nou pou gete kouma nou kapav met zot an pratik azordi.