1. Ki difikilte Zoas, Ozias, ek Zozias ti gagne?

 MAZINE ki to ankor zenn ek ki to vinn lerwa pep Bondie! Ki to ti pou resanti? Kouma to ti pou servi to pouvwar ek to lotorite? Labib koz lor plizir zenn ki ti vinn lerwa Zida. Par exanp, Zoas ti ena 7 an, Ozias ti ena 16 an, ek Zozias ti ena 8 an kan zot ti vinn lerwa. Kitfwa sa ti bien difisil pou zot. Selman, mem si sa pa ti fasil, zot ti gagn led pou sirmont zot bann difikilte ek pou fer seki bon.

2. Kifer li bon nou etidie lexanp Zoas, Ozias, ek Zozias?

² Nou pa bann lerwa ek bann larenn. Selman, nou kapav aprann bann leson inportan ar sa trwa personaz Biblik la. Zot ti pran bann bon desizion, me zot ti osi pran bann move desizion. Zot lexanp pou montre nou kifer nou bizin swazir bann bon kamarad, kifer nou bizin kontign ena limilite, ek kifer nou bizin kontign vinn pli pros ar Zeova.

3. Kouma Lerwa Zoas ti reazir kan Gran Pret Zoad ti donn li bann konsey?

³ Pran bann bon desizion kouma Zoas. Kan Zoas ti zenn, so papa ti mor, ek Gran Pret Zoad ti elve li ek ti ansegn li lor Zeova. Zoas ti pran bann bon desizion parski li ti ekout bann konsey ki Zoad ti donn li. Gras-a lexanp Zoad, Zoas ti desid pou servi Zeova ek li ti osi ed lepep pou servi Zeova. Li ti mem donn lord pou fer bann reparasion dan tanp Zeova.—2 Kro. 24:​1, 2, 4, 13, 14.

4. Ki bienfe nou gagne kan nou kontan ek nou swiv bann prinsip Zeova? (Proverb 2:​1, 10-12)

⁴ Zenn, si to bann paran ouswa enn lot dimounn pe ansegn twa pou kontan Zeova ek pou swiv So bann prinsip, se enn zoli kado ki to pe gagne. (Lir Proverb 2:​1, 10-12.) To bann paran kapav form twa dan plizir fason. Anou gete kouma enn papa ti ed so tifi ki apel Katya pou pran bann  bon desizion. Sak zour kan so papa ti al kit li lekol, zot ti koz lor text dizour ansam. Katya dir: “Sa bann konversasion-la ti ed mwa pou sirmont bann difikilte ki mo ti gagne pandan lazourne.” To bann paran kitfwa servi bann prinsip Labib pou etabli bann reg. Me ki to pou fer si to ena linpresion ki sa bann reg-la pe anpes twa fer seki to anvi? Ki kitsoz kapav ed twa pou obeir to bann paran? Enn ser ki apel Anastasia rapel kouma so bann paran ti pran letan pou explik li kifer zot ti etabli sertin reg. Li dir: “Sa ti ed mwa pou konpran ki zot pa ti etabli bann reg pou kontrol mwa. Zot ti fer sa pou protez mwa parski zot kontan mwa.”

5. Ki lefe to bann desizion kapav ena lor Zeova ek lor to bann paran? (Proverb 22:6; 23:​15, 24, 25)

⁵ Kan to bann paran donn twa bann konsey ki sorti dan Labib, ek ki to ekout zot, zot pou ere. Me pli inportan, to pou fer leker Zeova kontan ek to pou ena enn pli bon lamitie avek Li. (Lir Proverb 22:6; 23:​15, 24, 25.) Sa de rezon-la, se bann bon rezon pou imit lexanp Zoas!

6. Konsey kisann-la Zoas ti koumans ekoute, ek ki konsekans sa finn ena? (2 Kronik 24:​17, 18)

⁶ Tir leson ar bann move desizion ki Zoas ti pran. Apre lamor Zoad, Zoas ti koumans ena bann move frekantasion. (Lir 2 Kronik 24:​17, 18.) Li ti desid pou ekout bann prins Zida ki pa ti kontan Zeova. Sirman to pou dakor ki Zoas ti bizin res lwin ar sa bann kalite dimounn-la, pa vre! (Prov. 1:10) Me olie sa, li ti ekout bann move konsey ki so bann kamarad ti donn li. Ek kan so kouzin Zakari ti esey donn li bann konsey, Zoas ti fer touy li. (2 Kro. 24:​20, 21; Mat. 23:35) Zoas so lavi ti bien koumanse, me li ti mal fini. Li ti vinn enn aposta ek enn kriminel. Alafin, so bann serviter mem ti touy li. (2 Kro. 24:​22-25) Sey mazine kouma Zoas so lavi ti pou ete si li ti ekout Zeova ek bann ki kontan Zeova. Ki leson nou kapav aprann ar lexanp Zoas?

7. Ki kalite kamarad nou bizin swazir? (Get zimaz osi.)

⁷ Enn leson ki nou kapav aprann ar move desizion ki Zoas ti pran, se ki nou bizin swazir bann kamarad ki pou ena enn bon linflians lor nou, setadir bann kamarad ki kontan Zeova ek ki anvi fer Li plezir. Fode pa nou rod fer kamarad zis ar bann ki ena mem laz ki nou. Pa bliye ki Zoas ti boukou pli zenn ki so kamarad Zoad. Kan to swazir to bann kamarad, to kapav demann tomem: ‘Eski zot pou ed  mwa pou ena plis lafwa an Zeova? Eski zot pou ankouraz mwa pou swiv bann prinsip Zeova? Eski zot koz lor Zeova ek lor bann verite ki ena dan Labib? Eski zot ena respe pou bann prinsip Zeova? Eski zot pou dir mwa zis bann kitsoz ki mo anvi tande, ouswa eski zot pou ena kouraz pou koriz mwa kan mo fer bann erer?’ (Prov. 27:​5, 6, 17) Avredir, si to bann kamarad pa kontan Zeova, to pa bizin zot. Me si to ena bann kamarad ki kontan Zeova, tas ar zot parski zot pou ena enn bon linflians lor twa.—Prov. 13:20.

8. Ki kitsoz to bizin rapel si to servi bann rezo sosial?

⁸ Bann rezo sosial se enn bon mwayin pou res an kontak avek nou fami ek nou bann kamarad. Selman, boukou dimounn servi bann rezo sosial pou inpresionn lezot. Par exanp, zot poste bann foto ek bann video lor bann kitsoz ki zot inn fer, ouswa bann kitsoz ki zot inn aste. Si to servi bann rezo sosial, to kapav demann tomem: ‘Eski mo servi sa pou inpresionn lezot? Eski mo servi sa pou ed lezot, ouswa pou atir latansion lor mwa? Kan mo servi bann rezo sosial, eski mo les lopinion lezot inflians mo fason panse, fason ki mo koze, ek mo bann aksion?’ Frer Nathan Knorr, ki ti enn manb Komite Santral, ti donn sa zoli konsey-la: “Pa esey fer dimounn plezir. Si to fer sa, to pa pou reisi fer personn plezir. Olie sa, fer plezir Zeova! Ek lerla, to pou reisi fer plezir tou bann ki kontan Zeova.”

9. Kouma Zeova ti ed Ozias? (2 Kronik 26:​1-5)

⁹ Pran bann bon desizion kouma Ozias. Lerwa Ozias ti ena limilite kan li ti zenn. Li ti aprann “pou ena enn gran respe pou vre Bondie.” Li ti viv ziska laz 68 an, ek pandan enn bon parti so lavi, Zeova ti beni li. (Lir 2 Kronik 26:​1-5.) Ozias ti gagn laviktwar lor boukou lennmi, ek li ti ranforsi defans lavil Zerizalem. (2 Kro. 26:​6-15) Sirman Ozias ti bien kontan ki Zeova ti ed li pou fer tousala.—Ekle. 3:​12, 13.

10. Ki ti ariv Ozias?

¹⁰ Tir leson ar bann move desizion ki Ozias ti pran. Lerwa Ozias ti abitie dir lezot seki zot bizin fer. Kitfwa sa ti donn li linpresion ki li ti kapav fer seki li anvi. Enn zour, Ozias ti montre ki li ti ena lorgey kan li ti rant dan tanp ek li ti esey bril lansan lor lotel. Bann lerwa pa ti gagn drwa fer sa. (2 Kro. 26:​16-18) Gran Pret Azarya ti esey aret li, me Ozias ti bien ankoler. Ozias pa ti res fidel ar Zeova, ek Zeova ti pini li kan Li ti fer li gagn lalep. (2 Kro. 26:​19-21) Sey mazine kouma lavi Ozias ti pou ete si li ti kontign ena limilite!

11. Ki kitsoz montre ki nou ena limilite? (Get zimaz osi.)

¹¹ Kan Ozias ti vinn enn zom pwisan, li ti bliye ki se gras-a Zeova ki li ti vinn for ek ki li ti gagn laglwar. Ki leson nou aprann? Fode pa nou bliye ki se gras-a Zeova ki nou ena bann privilez dan lasanble, ek ki se Zeova ki beni nou. Olie ki nou fer gran-nwar kan nou reisi fer enn kitsoz, nou bizin donn Zeova loner pou tou seki nou pe reisi fer. b (1 Kor. 4:7) Avek limilite, nou bizin rekonet ki nou inparfe ek nou bizin aksepte disiplinn. Enn frer ki ena anviron 60 an dir: “Mo’nn aprann pou pa ofanse ek pou pa dekouraze kan lezot remark mo bann erer. Kan mo gagn  disiplinn pou bann erer bet ki parfwa mo fer, mo kontign fer zefor ek mo kontign fer mo best pou Zeova.” Kan nou obeir Zeova ek nou kontign ena limilite, nou lavi pou vremem ere.—Prov. 22:4.

12. Kouma Zozias ti rod Zeova kan li ti zenn? (2 Kronik 34:​1-3)

¹² Pran bann bon desizion kouma Zozias. Zozias ti ena 16 an kan li ti koumans rod Zeova. Li ti anvi aprann konn Zeova ek li ti anvi fer So volonte. Selman, lavi sa zenn lerwa-la pa ti fasil. Kifer? Parski sa lepok-la, laplipar bann dimounn ti pe ador bann fos bondie. Alor, Zozias ti bizin ena kouraz pou ki li fer zot aret ador bann fos bondie. Ek li ti reisi fer sa! Avan laz 20 an, Zozias ti koumans tir bann fos ladorasion ki ti ena dan Zerizalem ek dan Zida.—Lir 2 Kronik 34:​1-3.

13. Kan to donn to lavi Zeova, ki lefe sa bizin ena lor twa?

¹³ Mem si to bien zenn, to kapav swiv lexanp Zozias kan to rod Zeova ek to aprann kontan So bann zoli kalite. Si to fer sa, sa pou motiv twa pou donn to lavi Zeova ek pou pran batem. Kan to donn to lavi Zeova, ki lefe sa bizin ena lor twa? Luke, ki’nn pran batem laz 14 an, dir: “Depi sa zour-la, mo’nn desid pou met Zeova an premie dan mo lavi, ek mo fer mo maximum pou fer Li plezir.” (Mark 12:30) Si twa osi to fer sa, to kapav sir ki to pou gagn boukou benediksion!

14. Sit lexanp sertin zenn ki’nn imit Lerwa Zozias.

¹⁴ Ki difikilte bann zenn serviter Zeova kapav gagne? Johan, ki’nn pran batem laz 12 an, dir ki so bann kamarad lekol ti pe met boukou presion lor li pou ki li fim sigaret elektronik. Pou ki li gagn lafors pou reziste kont presion so bann kamarad, Johan ti mazinn lefe ki sa ti pou ena lor so lasante, me osi lor so lamitie avek Zeova. Rachel, ki’nn pran batem laz 14 an, explike kouma li fer fas ar bann difikilte ki li gagne dan lekol. Li dir: “Kan mo fer bann kitsoz dan lekol, mo esey fer enn lien ant sa bann kitsoz-la ek bann kitsoz spiritiel. Par exanp, kan mo pe etidie lor listwar dan lekol, mo esey mazinn  enn zistwar ki ena dan Labib, ouswa enn profesi, ki ena enn lien ar seki mo pe etidie. Ouswa kan mo pe koz avek enn kikenn, mo esey mazinn enn verse ki mo kapav partaz avek li ek ki kapav ed li.” Kitfwa to kapav gagn bann difikilte ki bien diferan ar seki Lerwa Zozias ti gagne. Selman, parey kouma Zozias, to kapav ena sazes ek res fidel anver Zeova. Kan to fer zefor pou fer fas ar bann difikilte ki to gagne kan to zenn, sa pou prepar twa pou fer fas ar bann lezot difikilte ki to pou gagne plitar dan to lavi.

15. Ki kitsoz ti ed Zozias pou servi Zeova avek fidelite? (2 Kronik 34:​14, 18-21)

¹⁵ Kan li ti ena 26 an, Lerwa Zozias ti donn lord pou fer enn renovasion dan tanp. Pandan sa renovasion-la, zot ti retrouv “liv lalwa Zeova, ki ti done atraver Moiz.” Kan lerwa ti aprann seki ti ena dan sa liv-la, deswit li ti fer bann sanzman pou obeir lalwa Zeova. (Lir 2 Kronik 34:​14, 18-21.) Eski to anvi lir Labib regilierman? Kitfwa to pe deza fer zefor pou lir li toulezour. Eski to kontan seki to pe aprann? Eski to not bann verse ki kapav ed twa? Luke, ki nou’nn mansione taler-la, ti not dan enn kaye bann verse interesan ki li ti trouve. Si twa osi to fer sa, sa kapav ed twa pou rapel bann verse ouswa bann leson ki to’nn aprann dan Labib. Plis to lir Labib, plis to pou kontan li, ek plis to pou anvi servi Zeova. Lerla, parey kouma Parol Bondie ti ed Zozias pou fer Zeova plezir, Labib pou ed twa osi pou fer Zeova plezir.

16. Kifer Zozias ti fer enn gro erer, ek ki leson nou kapav aprann?

¹⁶ Tir leson ar bann move desizion ki Zozias ti pran. Kan li ti ena anviron 39 an, Zozias ti fer enn erer ek li ti mor akoz sa. Olie ki li ti demann Zeova pou gid li, li ti kont lor limem. (2 Kro. 35:​20-25) Ki leson nou aprann? Ninport ki laz nou ena ek  ninport ki kantite letan nou dan laverite, nou bizin kontign vinn pli pros ar Zeova. Pou nou fer sa, nou bizin kontign priye Li regilierman pou rod so direksion, etidie so Parol Labib, ek ekout konsey bann Kretien ki ena lexperyans. Si nou fer sa bann kitsoz-la, nou pou evit fer bann gro erer ek nou pou plis zwaye.—Zak 1:25.

17. Ki leson inportan nou’nn aprann ar lexanp sa trwa lerwa-la?

¹⁷ Kan to zenn, ena boukou kitsoz interesan ki to kapav fer. Lexanp Zoas, Ozias, ek Zozias montre ki bann zenn kapav pran bann bon desizion ek swazir pou fer bann kitsoz ki fer Zeova plezir. Li vre ki sa finn mal fini pou sa trwa lerwa-la. Selman, nou kapav swiv zot lexanp konsernan bann bon kitsoz ki zot inn fer ek evit fer mem erer ki zot. Si nou fer sa, nou kapav sir ki nou pou ena enn zoli lavi.

18. Sit bann lexanp Biblik ki montre ki to kapav ena enn zoli lavi. (Get zimaz osi.)

¹⁸ Dan Labib, ena lexanp plizir zenn ki’nn vinn pros ar Zeova, ki’nn gagn so faver, ek ki’nn gagn enn zoli lavi. Enn parmi sa bann zenn-la se David. Kan li ti zenn, David ti swazir pou vinn kamarad Zeova, ek plitar li ti vinn enn bon lerwa. Li vre ki parfwa li ti fer bann erer, me kanmem sa, li ti ena faver Zeova. (1 Ler. 3:6; 9:​4, 5; 14:8) Kan to etidie listwar David ek kouma li’nn servi Zeova avek fidelite, sa kapav ankouraz twa ek motiv twa. To kapav osi aprann plis lor Mark ek Timote. Zot ti koumans servi Zeova kan zot ti bien zenn ek zot ti kontign servi Li avek fidelite. Desizion ki zot ti pran pou servi Zeova, ti rann Zeova ere, ek zot osi zot ti ere.

19. Kouma to kapav ena enn zoli lavi?

¹⁹ Seki to fer ar to lavi aster-la, pou ena enn lefe lor to lavi dan lavenir. Si to fer Zeova konfians ek ki to pa kont lor tomem, Zeova pou gid twa. (Prov. 20:24) Lerla, Li pou beni twa ek to pou ena enn zoli lavi. Pa bliye ki tou seki to fer pou Zeova azordi, ena valer pou Li. Alor, pli zoli lavi ki to kapav ena, se kan to servi to Papa ki kontan twa, Zeova.