Mo’nn ne an 1934 ek mo bann paran ti bann imigran ki sorti Laswis. Zot ti vinn etabli dan Timmins, enn lavil dan Ontario, Kanada, kot bann dimounn ti travay dan bann laminn. Ver 1939, mo mama ti koumans lir magazinn Latour Degard ek li ti koumans asiste bann renion bann Temwin Zeova. Li ti amenn mwa ek mo sis frer ek ser ansam avek li. Bien vit, li ti vinn enn Temwin Zeova.

Mo papa pa ti kontan ki li ti vinn enn Temwin Zeova, me mo mama ti kontan laverite ek li ti bien deside pou res atase ar Zeova. Li ti fer sa, mem dan koumansman bann lane 1940, kan laktivite bann Temwin Zeova ti interdi dan Kanada. Li ti touletan ena respe ek li ti zanti avek mo papa, mem si mo papa ti koz brit avek li. So zoli lexanp inn ed mwa ek mo bann frer ek ser pou aksepte laverite. Erezman, avek letan mo papa so latitid inn sanze, ek li’nn koumans vinn pli zanti anver nou.

An Out 1950, mo ti asiste lasanble « L’accroissement de la théocratie » dan New York. Apre ki mo ti zwenn bann frer ek ser ki sorti partou dan lemond ek ki mo ti ekout interview bann diplome lekol Galaad, mo ti bien motive pou fer plis dan mo servis pou Zeova! Mo ti bien deside pou rant dan servis aplintan. Kouma mo ti retourn lakaz, mo ti ranpli mo form pou vinn enn pionie permanan. Biro nasional Kanada ti reponn mwa ek zot ti konsey mwa pou pran batem avan. Alor, mo ti pran batem le 1^e Oktob 1950. Enn mwa apre, mo ti vinn pionie permanan ek mo ti gagn mo premie lafektasion dan Kapuskasing. Sa lavil-la ti trouv bien lwin ar landrwa kot mo ti pe reste sa lepok-la.

 Pandan printan 1951, biro nasional ti demann bann frer ek ser ki koz Franse pou reflesi si zot kapav al servi dan Québec. Ti bien bizin plis proklamater laba. Depi tipti mo koz Franse ek Angle, alor mo ti aksepte linvitasion-la ek mo ti gagn mo lafektasion dan Rouyn. Mo pa ti konn personn laba. Tou seki mo ti ena, se enn ladres parey kouma mo’nn rakonte dan koumansman. Me finalman, tou inn pas bien. Marcel ek mwa, nou ti vinn bann bon kamarad, ek pandan kat-r-an apre sa, mo’nn bien kontan pou servi kouma pionie spesial dan Québec.

Kan mo ti dan Québec, mo ti extra kontan kan mo ti gagn linvitasion pou asiste 26^em klas Lekol Galaad dan South Lansing, dan New York. Mo ti gagn mo diplom le 12 Fevriye 1956, ek mo ti bizin al servi dan Ghana, b ki trouv dan Lwes Lafrik. Me avan ki mo al dan mo lafektasion, mo ti bizin retourn Kanada pou gagn bann dokiman ki mo ti bizin pou al Ghana. Mo ti panse ki mo pou res dan Kanada zis pou de-trwa semenn.

Finalman, mo’nn atann pandan set mwa dan Toronto pou gagn sa bann dokiman-la. Pandan sa bann mwa-la, lafami Cripps ti akeyir mwa kot zot, ek mo’nn fer konesans zot tifi, Sheila. Nou’nn tom amoure. Zis kan mo ti pe al propoz li pou marye ar mwa, mo’nn gagn mo viza. Lerla, Sheila ek mwa nou’nn priye, ek nou’nn deside ki mo bizin al dan mo lafektasion. Me nou’nn osi desid pou kontign ekrir nou kamarad pou gete si nou pou marye ek kan nou pou marye. Sa pa ti enn desizion fasil, me alafin nou’nn trouve ki sa ti enn bon desizion.

Pandan enn mwa, mo ti vwayaz dan enn trin, enn bato kargo, ek enn avion, pou mo kapav ariv dan Accra, ki trouv dan Ghana. Laba, mo ti gagn enn lafektasion pou servi kouma sirveyan distrik. Alor mo ti bizin vwayaz partou dan Ghana me osi dan bann  pei ki trouv akote, setadir Kotdivwar ek Togo. Bien souvan, mo ti vwayaz tousel dan enn loto ki ti pou biro nasional. Mo ti bien kontan vizit bann frer ek ser.

Pandan bann wikenn, mo ti bizin al ede dan bann lasanble sirkonskripsion. Nou pa ti ena okenn Lasal Lasanble. Alor, bann frer ti servi bann poto banbou ek bann brans palmie pou aranz bann plas kot nou kapav kasiet soley. Dan lakantinn, pa ti ena frizider. Akoz sa, bann frer ti gard bann zanimo pre-pre, pou ki zot kapav touy zot si bizin nouri bann ki ti pe asiste lasanble.

Ti ena bann moman bien komik dan sa bann lasanble-la. Enn fwa, Herb Jennings, c enn misioner, ti pe fer enn diskour kan enn vas ti sove depi lakantinn. Vas-la ti galoup ant lestrad ek lasistans. Frer Herb ti aret koze, ek kat frer bien for ti reisi trap vas-la, ti re-amenn li dan lakantinn, ek lasistans ti aplodi.

Pandan lasemenn, mo ti al dan bann vilaz ki pa tro lwin ek mo ti montre zot fim La Société du Monde Nouveau en action. Pou fer sa, mo ti atas enn latwal blan ant de poto ouswa de pie ek mo ti pas fim-la lor la. Bann vilazwa ti extra kontan. Pou laplipar, sa ti premie fim ki zot ti pe gete. Zot ti aplodi extra for kan zot ti trouv bann dimounn pran batem. Sa fim-la ti vremem ed zot pou realize ki nou enn lorganizasion mondial kot ena linite.

Apre anviron de-z-an dan Lafrik, mo ti extra kontan pou asiste lasanble internasional ki ti fer an 1958 dan New York. Mo ti extra kontan pou retrouv Sheila, ki ti sorti depi Québec. Li ti pe servi kouma pionie spesial laba. Nou ti pe ekrir nou kamarad, me aster-la ki nou ti rezwenn, mo ti demann li pou marye ar mwa ek li ti dir wi. Mo ti ekrir Frer Knorr d ek mo ti demann li si Sheila ti kapav asiste Lekol Galaad ek vinn zwenn mwa dan Lafrik. Li ti dakor. Lerla, Sheila ti vinn dan Ghana. Nou’nn marye dan Accra, le 3 Oktob 1959. Nou’nn santi ki Zeova inn vremem beni nou parski nou’nn met Li an premie dan nou lavi.

An 1961, nou ti gagn enn lafektasion pou al servi dan Kamerounn. Mo ti bien okipe parski bann frer ti ouver enn nouvo biro nasional laba ek zot ti demann mwa pou donn enn koudme. Mo ti gagn responsabilite pou okip travay ki fer dan Kamerounn, alor mo ti ena boukou pou aprann. Me an 1965, nou ti aprann ki Sheila ti ansint. Sa inn pran nou inpe letan pou aksepte ki nou ti pou vinn paran. Me kan nou ti pe koumans kontan sa nouvo responsabilite-la ek nou ti pe organiz nou pou retourn Kanada, nou’nn gagn enn nouvel ki’nn kas nou leker.

Sheila ti fer enn foskous. Dokter-la ti dir nou ki nou ti pou gagn enn garson. 50 an inn pase, ek zame nou pa’nn bliye sa moman-la. Mem si nou ti bien sagrin akoz seki ti arive, nou ti res dan nou lafektasion ki nou ti bien kontan.

Bann frer dan Kamerounn souvan ti gagn persekision, parski zot ti gard zot netralite dan bann zafer politik. Sa ti ankor pli difisil pandan bann eleksion. Seki nou ti pe plis per ti arive le 13 Me 1970, kan ti interdi laktivite bann Temwin Zeova. Gouvernman ti sezi nou nouvo biro nasional. Sa ti fer zis sink mwa ki nou ti al res laba. Dan mwins ki enn semenn, zot ti deport tou bann misioner, ek parmi ti ena mwa ek Sheila. Sa ti bien difisil pou kit nou bann frer ek ser parski nou ti bien kontan zot ek nou ti gagn traka ki pou ariv zot.

Nou ti pas prosin sis mwa dan biro nasional Lafrans. Laba mo ti kontign fer tou seki mo kapav pou pran swin nou bann frer ki dan Kamerounn. An Desam sa lane-la, nou ti gagn lafektasion pou al servi dan biro nasional Nizeria, ki ti pe okip nou laktivite dan Kamerounn. Bann frer ek ser dan Nizeria ti akeyir nou avek boukou lamour, ek nou ti kontan pou servi laba pandan plizir lane.

An 1973, nou ti bizin pran enn desizion bien difisil. Sheila ti ena bann problem lasante bien grav. Kan nou ti al New York pou enn lasanble, li ti plore ek ti dir mwa: “Mo nepli kapav! Mo’nn fatige ek mo touletan malad.” Sa ti fer plis ki 14 an ki li ti pe servi ansam avek mwa dan Lwes Lafrik, ek li ti rann mwa bien fier. Me ti ariv ler pou ki nou fer sertin sanzman. Nou ti koz lor nou sitiasion ek nou ti priye boukou lor la. Lerla, nou ti desid pou retourn Kanada, kot nou ti pou kapav pran swin so lasante pli bien. Kit servis aplintan ek nou lafektasion antan-ki misioner ti desizion pli difisil ki nou’nn bizin pran.

Kan nou ti retourn Kanada, mo ti gagn enn travay avek enn vie kamarad ki ti pe vann bann loto dan enn lavil ki trouv dan Lenor Toronto. Nou ti lwe enn apartman, aste bann meb segonnme, ek nou ti reisi demenaze san fer okenn det. Nou ti anvi gard nou lavi sinp, avek lespwar ki enn zour nou pou kapav retourn dan servis aplintan.  Nou ti etone ki sa ti arive pli vit ki nou ti panse.

Dan Samdi, mo ti pe al servi kouma volonter lor konstriksion enn nouvo Lasal Lasanble dan Norval, Ontario. Avek letan, ti demann mwa pou servi kouma responsab Lasal Lasanble. Lasante Sheila ti pe ameliore, ek nou ti santi ki li ti pou kapav aksepte sa nouvo lafektasion-la. Alor, nou ti al dan lapartman pou Lasal Lasanble an Zin 1974. Nou ti bien kontan pou retourn dan servis aplintan!

Erezman, lasante Sheila ti kontign ameliore. De-z-an plitar, nou ti kapav aksepte pou al servi dan sirkonskripsion. Nou sirkonskripsion ti trouv dan Manitoba, enn distrik dan Kanada kot fer bien fre pandan liver. Me nou ti bien apresie lamour ki bann frer ek ser laba ti montre anver nou. Nou ti aprann ki li pa inportan kotsa nou servi—seki pli inportan se ki nou kontign servi Zeova ninport kotsa nou ete.

Apre ki nou’nn servi pandan plizir lane dan sirkonskripsion, ti invit nou an 1978 pou servi dan Betel Kanada. Pa tro lontan apre, mo ti aprann enn leson inportan me ki ti difisil pou aksepte. Ti demann mwa pou fer enn diskour enn-er-tan edmi an Franse pou enn renion spesial dan Montréal. Malerezman, mo diskour pa ti kapte latansion lasistans, ek enn frer dan Departman Servis ti konsey mwa lor la. Mem si sa lepok-la mo pa ti realize, aster mo konpran ki mo pa vremem enn bon orater. Me mo pa ti pran konsey-la bien. Sa konversasion-la pa ti pas bien, ek mo ti agase parski mo ti panse ki li ti tro kritik mwa ek ki li pa ti felisit mwa. Mo pa ti aksepte konsey-la akoz fason ki mo ti gagn li ek parski mo ti ena enn move lopinion lor sa dimounn ki ti donn mwa konsey-la. Sa ti enn gran erer!

De-trwa zour plitar, enn manb Komite Biro Nasional ti koz avek mwa lor sa sitiasion-la. Mo ti rekonet ki mo pa ti bien reazir ek mo ti dir ki mo ti regrete. Apre, mo ti al koz ar sa frer ki ti donn mwa sa konsey-la. Avek bonte, li ti pardonn mwa. Sa lexperyans-la inn aprann mwa ki li inportan ki nou ena limilite. Zame mo pa pou bliye sa! (Prov. 16:18) Mo ti priye Zeova plizir fwa lor la, ek mo ti determine pou ena enn latitid pozitif kan mo gagn bann konsey.

Aster, sa fer plis ki 40 an ki mo pe servi dan Betel Kanada ek depi 1985, mo ena privilez pou servi kouma manb Komite Biro Nasional. Malerezman, an Fevriye 2021, Sheila inn mor. Mo ankor pe bien soufer akoz sa, ek mo ena osi bann problem lasante. Selman, mo telman okipe ek ere dan servis Zeova, ki mo ‘pa mem trouv bann zour mo lavi pase.’ (Ekle. 5:20) Mem si mo’nn gagn boukou difikilte, mo’nn viv pli boukou moman zwaye dan mo lavi. Met Zeova an premie dan mo lavi ek servi Li pandan 70 an dan servis aplintan finn donn mwa boukou satisfaksion. Mo priye pou ki bann zenn frer ek ser kontign met Zeova an premie dan zot lavi. Mo sir ki zot pou gagn enn lavi ki ranpli ar satisfaksion, ek sa li posib zis kan nou servi Zeova.