1-2. (a) Kan lapot Pol ti ekrir so let pou bann Kretien Ebre, dan ki sitiasion bann Kretien dan Zide ti ete? (b) Kifer sa let-la ti ariv dan bon moman?

 APRE ki Zezi inn mor lane 33 Nou Lepok, bann Kretien Ebre ki ti res Zerizalem ek Zide ti konn bann sitiasion bien difisil. Deswit apre ki lasanble Kretien ti forme, zot ti gagn enn gran persekision. (Zist. 8:1) Anviron 20 an apre, bann Kretien ti gagn bann gro problem ekonomik, kitfwa akoz lafaminn ki ti ena avan. (Zist. 11:27-30) Me ver lane 61 Nou Lepok, bann Kretien ti konn enn peryod lape. Selman, zot pa ti kone ki dan lavenir zot ti pou gagn plis persekision ankor! Pandan sa peryod lape la, Zeova ti fer lapot Pol ekrir enn let. Bann konsey ki ena dan sa let-la ti pou ed bann Kretien pou zot prepar zot pou bann kitsoz ki ti pou arive biento.

² Let ki bann Kretien Ebre ti gagne ti ariv dan bon moman, parski lape ki zot ti ena pa ti pou dire. Pol ti donn zot bann konsey ki ti pou ed zot andir bann sitiasion difisil ki zot ti pou gagne biento. Parey kouma Zezi ti predir, Zerizalem ti pou detrir biento. (Lik 21:20) Biensir, ni Pol, ni bann Kretien dan Zide pa ti kone kan exakteman sa destriksion-la ti pou arive. Me kanmem sa, sa bann Kretien-la ti kapav servi sa letan ki reste la, pou zot prepar zot, pou zot ogmant zot lafwa ek zot landirans.—Ebre 10:25; 12:1, 2.

3. Azordi, kifer bann Kretien bizin interes zot ar let ki Pol ti ekrir bann Ebre?

³ Biento, “pou ena enn gran soufrans kouma zame pa  finn ena avan,” ek sa pou bien pli pir ki seki bann Kretien Ebre ti gagne. (Mat. 24:21; Rev. 16:14, 16) Alor, anou get de-trwa konsey ki Zeova ti donn sa bann Kretien-la. Sa bann konsey-la kapav ed nou osi azordi.

“FER ZEFOR POU GAGN MATIRITE”

4. Ki difikilte bann Zwif ki ti vinn Kretien ti gagne? (Get zimaz osi.)

⁴ Bann Zwif ki ti vinn Kretien ti bizin fer bann gran sanzman, ek sa pa ti fasil. Dan lepase, bann Zwif ti pep ki Zeova ti swazir. Pandan plizir lane, Zerizalem ti enn plas ki ti bien inportan, parski se laba ki lerwa ki ti pe reprezant Zeova ti dirize. Lepep osi ti bizin al dan tanp ki trouv dan Zerizalem pou ador Zeova. Tou bann Zwif ki ti fidel ti swiv Lalwa Moiz ek bann lalwa ki bann sef relizie ti ansegn zot. Sa bann lansegnman-la ti ena enn lefe lor zot manze, lor fason ki zot konsider sirkonsizion, ek mem lor zot relasion avek bann non-Zwif. Me selman, apre lamor Zezi, Zeova ti nepli aksepte bann sakrifis ki bann Zwif ti fer dan tanp. Pou bann Zwif ki ti vinn Kretien, sa ti bien difisil parski zot ti abitie swiv Lalwa Moiz. (Ebre 10:1, 4, 10) Mem bann Kretien ki ti ena enn gran lafwa, kouma lapot Pier, ti gagn difikilte pou adapte ar sertin sa bann sanzman-la. (Zist. 10:9-14; Gal. 2:11-14) Ek akoz zot bann nouvo krwayans, bann sef relizie Zwif ti persekit bann Kretien.

5. Ar ki kitsoz bann Kretien ti bizin fer atansion?

⁵ Dan Zide, ti ena de group dimounn ki ti pe persekit bann Kretien Ebre. Ti ena bann sef relizie Zwif ki ti pe tret bann Kretien kouma bann aposta parski zot ti nepli swiv larelizion Zwif. Ek ti ena osi sertin dan lasanble ki ti dir ki bann Kretien bizin kontign swiv Lalwa Moiz. Kitfwa zot ti dir sa parski zot pa ti anvi gagn persekision. (Gal. 6:12) Ki kitsoz ti pou ed bann Kretien pou res fidel ar Zeova?

6. Ki kitsoz Pol ti ankouraz so bann frer ek ser pou fer? (Ebre 5:14–6:1)

 ⁶ Dan let ki Pol ti ekrir bann Ebre, li ti ankouraz so bann frer ek ser pou etidie ek pou reflesi lor Parol Bondie. (Lir Ebre 5:14–6:1.) Pol ti servi bann Lekritir Ebre pou explik zot kifer fason ki bann Kretien ador Zeova, li boukou pli siperyer ki fason ki bann Zwif ador Li. a Pol ti kone ki, si bann Kretien ti ogmant zot konesans lor laverite ek ki zot konpran li pli bien, sa ti pou permet zot rekonet bann fos lansegnman ek pou rezet sa.

7. Ki bann difikilte nou gagne azordi?

⁷ Parey kouma bann Kretien Ebre, azordi nou osi nou tann bann linformasion ek bann rezonnman ki al kont bann prinsip Zeova. Sertin dimounn dir ki bann Temwin Zeova dan lerer parski zot obeir seki Labib dir konsernan bann relasion sexiel. Pli ale, fason panse bann dimounn pe vinn deplizanpli diferan ar fason panse Zeova. (Prov. 17:15) Alor, nou bizin fer zefor pou rekonet sa bann move fason panse la ek pou rezet sa, pou ki sa pa dekouraz nou ouswa fer nou al lwin ar Zeova.—Ebre 13:9.

8. Ki kitsoz pou ed nou pou gagn matirite?

⁸ Pol ti ankouraz bann Kretien Ebre pou fer zefor pou gagn matirite. Sa konsey-la konsern nou osi azordi. Savedir ki nou bizin etidie Labib pou ki nou konn pli bien Zeova ek so fason panse. Se enn kitsoz ki nou bizin kontign fer mem apre ki nou’nn pran batem. (Ps. 1:2) Mem si sa fer lontan ki nou dan laverite ouswa si nou fek vinn dan laverite, nou tou nou bizin lir ek etidie Parol Bondie toulezour. Li inportan ki nou etidie Labib toulezour pou ki nou lafwa vinn pli for. Pol ti ankouraz bann Kretien Ebre pou ena sa kalite-la.—Ebre 11:1, 6.

“LAFWA POU PREZERV NOU LAVI”

9. Kifer bann Kretien Ebre ti bizin ena enn gran lafwa?

⁹ Bann Kretien Ebre ti pou bizin ena enn gran lafwa pou ki zot kapav gagn lavi sov pandan gran persekision ki zot ti pou gagne biento dan Zide. (Ebre 10:37-39) Zezi ti dir so bann disip ki, kan zot trouv Zerizalem antoure ar bann larme, zot bizin sove al dan bann montagn. Sa konsey-la ti konsern tou bann Kretien, mem si zot ti viv dan lavil ouswa dan lakanpagn. (Lik 21:20-24) Sa lepok-la, kan enn larme ti vinn atake, normalman bann dimounn ki ti pe viv dan lakanpagn ti pou al dan lavil parski bann miray lavil ti pou protez zot. Alor, sa pa ti lozik ki zot sove pou al dan bann montagn. Akoz sa, zot ti pou bizin ena enn gran lafwa pou obeir Zezi.

10. Kouma bann Kretien Ebre ti kapav montre ki zot ena enn gran lafwa? (Ebre 13:17)

¹⁰ Bann Kretien Ebre ti bizin osi fer konfians bann dimounn ki Zezi ti pe servi pou diriz lasanble. Bann frer ki ti pe dirize kitfwa ti donn bann instriksion presi lor kan pou sove ek kouma pou fer sa. (Lir Ebre 13:17.) Lapot Pol ti dir so bann frer ek ser “obeir bann ki pe diriz zot.” Pol pa ti pe rod dir ki zot bizin obeir bann ansien parski zot oblize fer  sa, me parski zot ena konfians dan bann ansien. Alor, se avan ki zot koumans gagn persekision ki bann Kretien Ebre ti bizin aprann pou fer bann ansien konfians. Si zot ti pran labitid pou obeir bann ansien kan ti ena lape, li ti pou pli fasil pou zot fer sa dan bann moman difisil.

11. Kifer li inportan ki azordi bann Kretien ena enn gran lafwa?

¹¹ Parey kouma bann Kretien Ebre, nou osi nou bizin ena lafwa. Nou pe viv dan enn lepok kot laplipar dimounn pa krwar ki lafin pou vini, ek zot mem boufonn nou parski nou krwar dan seki Labib dir lor la. (2 Pier 3:3, 4) Anplis, mem si Labib donn nou sertin detay lor seki pou arive pandan gran soufrans, ena boukou kitsoz ki nou pa kone. Alor, nou bizin ena enn gran lafwa; nou bizin sir ki lafin pou vini dan moman ki bizin ek ki Zeova pou pran nou swin.—Abak. 2:3.

12. Ki kitsoz pou ed nou pou gagn lavi sov pandan gran soufrans?

¹² Nou bizin osi ogmant nou lafwa dan mwayin ki Zeova pe servi azordi pou gid nou, setadir “esklav fidel ek saz.” (Mat. 24:45) Kan gran soufrans pou koumanse, kitfwa nou pou gagn bann instriksion presi ki pou permet nou gagn lavi sov, parey kouma bann Kretien Ebre ti gagn lavi sov kan bann Romin ti antour Zerizalem. Aster-la, se moman kot nou bizin ogmant nou konfians dan bann dimounn ki Zeova inn swazir dan so lorganizasion pou diriz nou. Si depi aster-la nou pa pe kapav obeir bann instriksion ki bann-la pe donn nou, fode pa nou panse ki nou pou reisi fer sa pandan gran soufrans.

13. Kifer konsey ki ena dan Ebre 13:5 ti tom dan bon moman?

¹³ Pandan ki zot ti pe atann sign ki ti pou montre zot ki zot bizin sove, bann Kretien Ebre ti bizin osi ena enn lavi sinp ek rezet “lamour pou larzan.” (Lir Ebre 13:5.) Sertin parmi zot ti konn lafaminn ek lamizer. (Ebre 10:32-34) Mem si pandan enn tan, zot ti aksepte gagn bann difikilte akoz bon nouvel, sertin kitfwa ti koumans konsider larzan kouma sel kitsoz ki kapav protez zot. Me larzan pa ti pou kapav sap zot lavi kan Zerizalem ti pou detrir. (Zak 5:3) Avredir, bann ki ti ena lamour pou larzan ti pou trouv sa pli difisil pou sove ek pou kit zot lakaz ek zot bann dibien.

14. Si nou ena enn gran lafwa, kouma sa pou inflians bann desizion ki nou pran azordi konsernan bann kitsoz materyel?

¹⁴ Si nou lafwa for ek si nou sir ki sa lemond-la pou detrir biento, nou pa pou ena lamour pou larzan. Avredir, sa lepok-la bann dimounn pou “zet zot larzan dan bann lari,” parski zot pou konpran ki “ni zot larzan, ni zot lor pa pou kapav sap zot dan zour koler Zeova.” (Eze. 7:19) Olie ki nou konsantre nou lor gagn enn ta kas, nou bizin pran bann desizion ki pou ed nou pou pran nou fami swin ek ki pou permet nou kontign servi Zeova. Li pa pou bon ki nou depans plis ki seki nou ena, ouswa ki nou perdi enn ta letan pou okip nou bann dibien materyel. Nou pou fer atansion osi ki nou bann dibien materyel pa vinn kitsoz ki pli inportan dan nou lavi. (Mat. 6:19, 24) Plis lafin sa lemond-la pe koste, plis nou pou bizin swazir si nou pou met nou konfians dan Zeova ouswa dan nou bann dibien materyel.

 “ZOT BIZIN LANDIRANS”

15. Kifer bann Kretien Ebre ti bizin ena landirans?

¹⁵ Bann Kretien dan Zide ti pou bizin ena landirans dan zot servis pou Zeova parski biento zot ti pou gagn bann gran difikilte. (Ebre 10:36) Mem si sertin parmi zot ti gagn bann gran persekision dan lepase, boukou ti vinn Kretien dan enn peryod kot ti ena lape. Alor, Pol ti rapel zot ki zot ti bizin prepar zot pou gagn plis persekision, ek ki zot ti bizin pare pou res fidel ziska zot lamor parey kouma Zezi. (Ebre 12:4) Boukou dimounn ti pe koumans vinn Kretien. Akoz sa, bann Zwif ti bien ankoler ek ti vinn violan. De-trwa lane avan, enn group dimounn ti atak Pol kan li ti pe prese dan Zerizalem. Plis ki 40 Zwif “ti fer enn serman ki zot pa pou ni manze ni bwar tanki zot pa’nn touy Pol.” (Zist. 22:22; 23:12-14) Mem si bann dimounn ti ena laenn pou zot ek ti persekit zot, bann Kretien ti pou bizin kontign zwenn ansam pou ador Bondie, pres bon nouvel, ek gard zot lafwa for.

16. Kouma Pol montre nou ki, kan nou andir bann persekision, nou gagn bann bienfe? (Ebre 12:7)

¹⁶ Ki kitsoz ti pou ed bann Kretien Ebre pou andir bann persekision ki zot ti pou gagne? Pol ti anvi fer zot konpran ki, si zot andir bann persekision, zot pou gagn bann bienfe. Li ti explik zot ki, kan zot gagn bann leprev, Bondie servi sa pou form zot. (Lir Ebre 12:7.) Sa formasion-la kapav ed enn kikenn pou devlop ek pou amelior so bann kalite. Alor, si bann Kretien Ebre ti res konsantre lor bann bienfe ki zot kapav gagne kan zot andir bann leprev, li ti pou pli fasil pou zot andire.—Ebre 12:11.

17. Ki kitsoz Pol ti aprann konsernan persekision?

¹⁷ Pol ti ankouraz bann Kretien Ebre pou ena kouraz ek pou pa bes lebra kan zot gagn persekision. Lapot Pol ti kapav  donn bann bon konsey lor kouma pou andir bann persekision. Kifer? Parski avan ki li vinn Kretien, limem li ti persekit bann Kretien ek li ti kone par ki zot ti pase. Li ti kone osi kouma pou andir bann persekision, parski apre ki li ti vinn Kretien, li ti gagn enn ta persekision. (2 Kor. 11:23-25) Akoz sa, Pol ti kone seki ti kapav ed zot pou andire. Li ti rapel zot ki kan zot gagn persekision, fode pa ki zot kont lor zotmem; zot bizin kont lor Zeova. Avek kouraz, Pol ti kapav dir: “Se Zeova ki ed mwa; mo pa pou per.”—Ebre 13:6.

18. Kouma sa kapav ed nou pou andire, kan nou kone seki pou arive dan lavenir?

¹⁸ Azordi, sertin parmi nou bann frer ek ser pe gagn persekision. Enn fason ki nou montre ki nou kontan zot, se kan nou priye pou zot ek nou ed zot kan nou kapav. (Ebre 10:33) Labib bien kler lor la: “Tou bann ki anvi res atase ar Bondie ek viv dan linite avek Kris Zezi pou gagn persekision zot osi.” (2 Tim. 3:12) Akoz sa, nou tou nou bizin prepar nou pou bann difikilte ki nou pou gagne dan lavenir. Alor, anou kontign met tou nou konfians dan Zeova. Nou kapav sir ki Li pou ed nou pou andir tou nou bann difikilte. Biento, Li pou soulaz tou so bann serviter ki fidel!—2 Tes. 1:7, 8.

19. Ki nou bizin fer pou prepar nou pou gran soufrans? (Get zimaz osi.)

¹⁹ Let ki Pol ti ekrir bann Ebre ti vremem prepar bann Kretien dan premie siek pou fer fas ar bann sitiasion difisil ki zot ti pou gagne. Pol ti ankouraz so bann frer pou etidie Parol Bondie ek pou konpran li pli bien. Si zot ti fer sa, sa ti pou ed zot pou rekonet ek pou rezet bann lansegnman ki ti kapav diminie zot lafwa. Li ti ankouraz zot pou ogmant zot lafwa, pou ki zot pa tarde pou swiv bann instriksion ki zot gagne ar Zezi ek ar bann ki diriz lasanble. Li ti ed zot pou trouv bann bienfe ki zot gagne kan zot andire; zot ti bizin konsider zot bann leprev kouma enn formasion ki zot Papa ti pe donn zot. Nou osi, nou bizin swiv sa bann konsey Biblik la. Lerla, nou pou kapav andire avek fidelite ziska lafin.—Ebre 3:14.