1-2. Kan nou donn lezot, sa rann nou zwaye. Kifer Zeova inn kree nou koumsa?

 NOU pli ere kan nou done, ki kan nou gagne. Zeova inn kree nou koumsa! (Zist. 20:35) Me eski savedir ki nou pa gagn okenn lazwa kan nou gagn enn kitsoz? Non. Nou tou nou kontan kan nou gagn enn kado. Selman, nou gagn plis lazwa kan se nou ki done. Avredir, li bon ki Zeova inn kree nou koumsa. Kifer nou dir sa?

² Zeova inn kree nou koumsa, parski Li anvi ki nou lazwa li depann lor nou-mem. Plis nou rod bann lokazion pou donn lezot, plis sa rann nou zwaye. Eski li pa extraordiner ki Zeova inn kree nou dan sa fason-la?—Ps. 139:14.

3. Kifer nou dir ki Zeova Li enn “Bondie ere”?

³ Labib dir ki kan enn kikenn done, sa rann li ere. Alor, nou konpran kifer Zeova Li enn “Bondie ere.” (1 Tim. 1:11) Limem premie ki’nn done, ek pena personn ki donn plis ki Li. Parey kouma lapot Pol ti dir, gras-a Li, “nou ena lavi, nou bouze ek nou existe.” (Zist. 17:28) Avredir, “tou zoli don ek tou kado parfe” sorti kot Zeova.—Zak 1:17.

4. Ki kitsoz pou ed nou pou gagn plis lazwa?

⁴ Sirman nou tou, nou ti pou kontan gagn plis lazwa kan nou done. Nou kapav fer sa kan nou imit nou Bondie ki zenere. (Efe. 5:1) Dan sa lartik-la, nou pou koz lor zenerozite Zeova, ek nou pou gete seki nou kapav fer si nou santi ki lezot pa rekonesan anver nou pou seki nou fer pou zot. Sa bann rapel-la pou ed nou pou gard ek pou ogmant nou lazwa kan nou donn lezot.

 IMIT ZENEROZITE ZEOVA

5. Ki bann kitsoz materyel Zeova donn nou?

⁵ Dan ki fason Zeova montre so zenerozite? Anou get de-trwa lexanp. Zeova donn nou bann kitsoz materyel. Kitfwa nou pena bann gran-gran kitsoz, me gras-a Zeova, nou ena seki nou bizin. Par exanp, gras-a Zeova, nou ena manze, linz, ek enn plas pou reste. (Ps. 4:8; Mat. 6:31-33; 1 Tim. 6:6-8) Eski Zeova donn nou sa bann kitsoz-la zis parski Li oblize? Non! Alor, kifer Zeova donn nou sa bann kitsoz-la?

6. Ki nou aprann dan Matie 6:25, 26?

⁶ Zeova donn nou sa bann kitsoz-la parski Li kontan nou. Anou reflesi lor bann parol ki Zezi ti dir dan Matie 6:25, 26. (Lir.) Zezi servi bann lexanp ki ena dan kreasion. Kan li koz lor bann zwazo, Zezi dir: “Zot pa plant bann lagrin, ni rekolte, ni ramas lagrin dan stor.” Me selman, remarke seki li dir apre: “Zot Papa ki dan lesiel nouri sa bann zwazo-la.” Apre sa, Zezi dir: “Eski zot pena plis valer ki bann zwazo?” Ki sa aprann nou? Pou Zeova, so bann serviter ena boukou plis valer ki bann zanimo. Si Zeova pran swin bann zanimo, nou kapav sir ki Li pou donn nou seki nou bizin! Parey kouma enn papa ki pran swin so fami, Zeova donn so fami seki zot bizin parski Li kontan zot.—Ps. 145:16; Mat. 6:32.

7. Sit enn fason kouma nou kapav imit zenerozite Zeova. (Get zimaz osi.)

⁷ Parey kouma Zeova, nou osi nou kapav donn lezot bann kitsoz materyel parski nou kontan zot. Par exanp, eski to konn enn frer ouswa enn ser ki bizin manze ouswa linz? Zeova kapav servi twa pou donn li enn kitsoz ki pou ed li. Bann serviter Zeova abitie montre zenerozite kan ena bann katastrof. Par exanp, pandan pandemi COVID-19, bann frer ek ser ti ed bann ki ti bizin led. Zot ti donn manze, linz, ek bann lezot kitsoz. Boukou ti osi fer bann kontribision pou soutenir bann laktivite ki nou fer dan lemond antie. Sa bann kontribision-la ti ed bann frer ek ser ki ti fer fas ar bann katastrof. Nou bann frer ek ser ki bien zenere, ti met an pratik bann parol ki ena dan Ebre 13:16, ki dir: “Pa bliye fer dibien ek partaz seki zot ena avek lezot, parski se bann sakrifis koumsa ki Bondie bien kontan.”

8. Kouma sa ed nou kan Zeova donn nou so lafors? (Filipien 2:13)

 ⁸ Zeova donn nou lafors. Zeova Li bien pwisan, ek Li kontan donn lafors so bann serviter ki fidel. (Lir Filipien 2:13.) Eski to’nn deza priye pou gagn lafors pou reziste kont enn tantasion ouswa pou andir enn difikilte? Kitfwa to abitie demann Zeova lafors pou to fer bann kitsoz toulezour. Ek kan to trouve kouma Zeova reponn to lapriyer ek donn twa lafors, sirman to dakor avek lapot Pol, ki ti dir: “Pou tou kitsoz mo ena lafors gras-a sa kikenn ki donn mwa pwisans la.”—Fil. 4:13.

9. Kouma nou kapav imit Zeova ek servi nou lafors pou ed lezot? (Get zimaz osi.)

⁹ Zeova bien zenere kan Li donn nou so lafors. Me mem si nou inparfe, nou kapav imit Zeova. Kitfwa nou pa kapav donn lezot lafors ouswa lenerzi, selman nou kapav servi nou lafors pou ed zot. Par exanp, nou kapav ed bann Kretien ki aze ouswa ki malad kan nou fer zot komision ouswa zot louvraz lakaz. Si nou sitiasion permet nou, nou kapav port nou volonter pou ede kan ena netwayaz ouswa mintenans Lasal Renion. Kan nou servi nou lafors dan sa bann fason-la, sa ed nou bann frer ek ser.

10. Kouma nou bann parol kapav donn lezot lafors?

¹⁰ To bann parol osi kapav donn lezot lafors. Eski to konn enn kikenn ki pou santi li bien si to dir li ki to vremem apresie seki li fer? Eski to konn enn kikenn ki bizin rekonfor? Alor, pran linisiativ pou al koz ar sa dimounn-la. To kapav vizit li, telefonn li, ouswa mem avoy li enn kart, enn e-mail, ouswa enn mesaz. Li pa neseser ki to dir bann gran-gran kitsoz. Si to dir de-trwa parol bien sinp avek tou to leker, sa kapav ankouraz to frer ouswa to ser ek ed li pou kontign res fidel ar Zeova.—Prov. 12:25; Efe. 4:29.

11. Kouma Zeova donn nou so sazes?

¹¹ Zeova donn sazes. Disip Zak ti ekrir: “Si kikenn parmi zot mank sazes, ki li kontign demann Bondie ek Bondie pou donn li, parski Bondie donn tou dimounn avek zenerozite ek san rod fot.” (Zak 1:5; not) Sa verse-la montre ki Zeova pa gard so sazes zis pou Li. Avek zenerozite, Li partaz sa avek lezot. Nou trouve osi ki kan Zeova donn so sazes, Li fer sa “san fer okenn repros,” ouswa “san rod fot.” Li pa anvi ki nou malalez kan nou demann Li so led. Okontrer, Li ankouraz nou pou rod so led.—Prov. 2:1-6.

12. Dan ki lokazion nou kapav partaz nou sazes?

 ¹² Eski nou kapav imit Zeova ek partaz nou sazes? (Ps. 32:8) Bann serviter Zeova ena boukou lokazion pou partaz seki zot inn aprann. Par exanp, souvan nou form bann nouvo dan predikasion. Avek pasians, bann ansien ed bann serviter lasanble ek bann frer ki batize pou asim bann responsabilite dan lasanble. Ek bann ki ena lexperyans dan konstriksion ek mintenans, zot form lezot pou travay lor bann batiman lorganizasion.

13. Kouma nou kapav imit fason ki Zeova partaz so sazes?

¹³ Bann ki donn formasion bizin imit fason ki Zeova partaz so sazes. Pa bliye ki Zeova donn sazes avek zenerozite. Dan mem fason, nou osi nou partaz nou konesans ek nou lexperyans avek bann ki pe aprann. Fode pa nou gard seki nou kone pou nou-mem, parski nou per tansion lezot ranplas nou. Fode pa osi ki nou dir: ‘Personn pa’nn form mwa! Les li aprann par limem.’ Fode zame ki enn serviter Zeova pans koumsa! Okontrer, nou kontan partaz tou seki nou kone, ek fer tou seki nou kapav pou form lezot. (1 Tes. 2:8) Lerla, sa pou rann nou zwaye parski “an-retour, [zot] pou bien kalifie pou ansegn lezot.” (2 Tim. 2:1, 2) Si avek zenerozite tou dimounn partaz so sazes, tou dimounn pou gagn plis sazes ek pou plis zwaye.

KAN NOU PANSE KI LEZOT PA REKONESAN

14. Kouma laplipar dimounn reazir kan nou zenere anver zot?

¹⁴ Kan nou zenere, sirtou anver nou bann frer ek ser, souvan zot montre zot rekonesan. Kitfwa zot pou ekrir enn kart pou dir nou mersi, ouswa zot pou remersie nou dan lezot fason. (Kol. 3:15) Kan zot montre zot rekonesans dan sa bann fason-la, sa donn nou plis lazwa.

15. Ki nou bizin rapel kan sertin pa montre zot rekonesan anver nou?

¹⁵ Me parfwa, bann dimounn pa touletan remersie nou pou seki nou fer pou zot. Parfwa, kan nou donn nou letan, nou lenerzi, ouswa nou bann kitsoz materyel pou ed lezot, nou kapav ena linpresion ki zot pa kas latet ar seki nou’nn fer pou zot. Si sa arive, ki nou kapav fer pou ki nou pa perdi nou lazwa ek ki nou pa dekouraze? Mazinn bann parol ki ena dan Zistwar Bann Zapot 20:35, text prinsipal pou sa lartik-la. Lazwa ki nou gagne kan nou done, pa depann lor fason ki bann dimounn reazir. Nou kapav kontign gagn lazwa kan nou done, mem si parfwa lezot pa rekonesan anver nou. Ki kitsoz kapav ed nou pou fer sa?

16. Ki kitsoz kapav ed nou pou nou kontign donn avek lazwa?

¹⁶ Kan to donn lezot, to pe imit Zeova. Zeova donn tou dimounn bann bon kitsoz, mem si sertin pa rekonesan anver Li. (Mat. 5:43-48) Li promet ki, si nou osi nou done “san atann kitsoz an-retour,” nou “pou gagn enn gran rekonpans.” (Lik 6:35) Alor, fode pa to dekouraze si bann dimounn pa touletan dir twa mersi. Rapel ki Zeova pou touletan rekonpans twa pou tou bann bon kitsoz ki to’nn fer pou lezot. Li rekonpans bann “dimounn ki donn avek lazwa.”—Prov. 19:17; 2 Kor. 9:7.

17. Kan nou donn lezot, ki kitsoz fode pa nou bliye? (Lik 14:12-14)

¹⁷ Enn lot kitsoz ki nou kapav fer pou imit Zeova, se swiv seki Zezi ti dir dan  Lik 14:12-14. (Lir.) Li normal ki nou montre lospitalite ek ki nou zenere anver bann dimounn ki kapav fer parey anver nou. Selman, si nou remarke ki parfwa nou donn lezot akoz nou anvi gagn enn kitsoz an-retour, ki nou bizin fer? Nou kapav esey fer seki Zezi ti dir. Nou kapav montre lospitalite anver bann dimounn ki pa pou kapav fer parey anver nou. Sa pou rann nou ere parski nou pe imit Zeova. Anplis, si nou done san ki nou atann enn kitsoz an-retour, nou pou touletan zwaye, mem si lezot pa rekonesan anver nou.

18. Ki kitsoz pou ed nou pou pa dout lintansion lezot?

¹⁸ Pa dout lintansion lezot. (1 Kor. 13:7) Si lezot pa montre zot rekonesan, nou kapav demann nou-mem: ‘Eski vremem zot pena rekonesans, ouswa eski zot inn zis bliye dir mersi?’ Kitfwa ena bann rezon kifer zot pa’nn reazir dan fason ki nou ti pe atann. Sertin kitfwa ena boukou rekonesans, me zot gagn difikilte pou exprim sa. Kitfwa zot gagn onte kan lezot ed zot, sirtou si dan lepase se zot ki ti pe ed lezot. Mem si nou bann frer ek ser pa’nn reisi montre zot rekonesans, si nou vremem kontan zot, nou pa pou dout zot lintansion ek nou pou kontign done avek lazwa.—Efe. 4:2.

19-20. Kifer li bon ki nou ena pasians kan nou donn lezot? (Get zimaz osi.)

¹⁹ Ena pasians. Lerwa Salomon, ki ti ena boukou sazes, ti dir enn kitsoz bien interesan lor zenerozite. Li ti dir: “Avoy to dipin lor delo, parski apre plizir zour to pou retrouv li.” (Ekle. 11:1) Sa bann parol-la montre ki sertin kapav montre zot rekonesans “apre plizir zour,” setadir bien lontan apre ki nou’nn montre zenerozite anver zot. Anou get enn lexanp ki montre sa.

²⁰ Inn gagn plizir lane, enn responsab sirkonskripsion so madam ti ekrir enn let pou enn ser ki ti fek pran batem, pou  ankouraz li pou res fidel. Anviron wit an apre, ser-la ti ekrir enn let pou reponn li, ek ti dir: “Mo ti anvi ekrir twa pou dir twa ki kantite to’nn ed mwa pandan tou sa bann lane-la, san mem ki to kone.” Li ti dir osi: “[To ti ekrir] bann parol bien zanti, me sa verse ki to ti mansione la, ti tous mo leker ek zame mo pa’nn bliye li.” a Apre ki sa ser-la ti explik sertin difikilte ki li ti gagne, li ti dir: “Parfwa mo ti zis anvi aret tou ek kit laverite. Me sa verse-la ti ed mwa pou res fidel anver Zeova ek pou . . . kontign avanse.” Li ti dir osi: “Pandan sa wit lane la, pena nanye ki’nn plis ankouraz mwa ki sa let to ti ekrir la ek sa verse to ti servi la.” Mazine ki kantite responsab sirkonskripsion la so madam ti kontan kan li ti gagn sa let-la apre tou sa letan-la! Nou osi, li kapav arive ki bann dimounn remersie nou bien apre ki nou’nn fer enn kitsoz pou zot.

21. Kifer to bien deside pou kontign imit zenerozite Zeova?

²¹ Kouma nou’nn trouve dan sa lartik-la, nou pli ere kan nou done, ki kan nou gagne. Zeova inn kree nou koumsa! Nou santi nou bien kan nou kapav ed nou bann frer ek ser. Nou kontan osi kan zot montre nou zot rekonesans. Ek mem si nou’nn ed enn kikenn ek ki li pa’nn montre rekonesans anver nou, nou zwaye parski nou kone ki nou’nn fer enn bon kitsoz. Ninport ki kitsoz ki nou fer, fode zame nou bliye ki “Zeova ena kapasite pou donn [nou] boukou plis.” (2 Kro. 25:9) Zame nou pa pou kapav donn lezot plis ki seki Zeova kapav donn nou! Ek pena pli gran lazwa ki kan Zeova Limem Li rekonpans nou. Alor, anou bien deside pou kontign imit zenerozite nou Papa Zeova.