LARTIK LETID 36
KANTIK 89 Obeir ek Ekoute, To Pou Beni
“Vinn Bann Dimounn Ki Met Laparol an Pratik”
“Vinn bann dimounn ki met laparol an pratik ek pa bann dimounn ki zis tande.”—ZAK 1:22.
PWIN PRINSIPAL
Sa lartik-la pou ed nou pou ogmant nou dezir pou lir Parol Bondie toulezour, pou reflesi lor seki nou lir, ek pou met an pratik seki nou aprann.
1-2. Kifer bann serviter Bondie zot ere? (Zak 1:22-25)
ZEOVA ek so Garson anvi ki nou ere. Ekrivin Psom 119:2 dir: “Ere bann dimounn ki obeir so bann rapel; Zot kontign rod Li avek tou zot leker.” Zezi osi inn montre ki li anvi ki nou ere, kan li ti fer sa promes-la: “Ere bann ki tann parol Bondie ek ki obeir li!”—Lik 11:28.
2 Nou, bann serviter Zeova, nou enn pep ere. Nou ena boukou rezon pou nou ere, me enn parmi bann rezon pli inportan se parski nou lir Parol Bondie toulezour ek nou fer zefor pou met an pratik seki nou aprann.—Lir Zak 1:22-25.
3. Ki benediksion nou gagne kan nou met an pratik seki nou lir dan Parol Bondie?
3 Kan nou “vinn bann dimounn ki met laparol an pratik,” nou gagn bann benediksion dan diferan fason. Par exanp, kan nou met an pratik seki nou aprann dan Parol Bondie, nou fer Zeova plezir ek sa rann nou ere. (Ekle. 12:13) Ek kan nou swiv bann konsey ki ena dan Labib, nou amelior nou lavi fami ek nou relasion avek bann frer ek ser. Kitfwa to’nn deza fer sa lexperyans-la! Nou evit osi boukou problem ki bann dimounn gagne kan zot pa obeir bann komannman Zeova. Kan David ti fini koz lor bann lalwa, bann lord, ek bann zizman Zeova dan enn sante, li ti dir: “Ena enn gran rekonpans kan gard zot.” (Ps. 19:7-11) Sirman nou dakor avek seki li ti dir, pa vre!
4. Kifer li pa touletan fasil pou met an pratik seki nou lir dan Labib?
4 Kitfwa to pou dakor ki li pa touletan fasil pou met an pratik seki nou lir dan Parol Bondie. Mem si nou bien okipe, nou bizin trouv letan pou lir ek etidie Labib, pou ki nou konpran seki Zeova anvi nou fer. Alor, anou get de-trwa sizesion ki kapav ed nou pou lir Labib toulezour. Nou pou gete osi kouma nou kapav reflesi lor seki nou lir ek met an pratik seki nou aprann.
REZERV LETAN POU LIR PAROL BONDIE
5. Ki bann responsabilite pran boukou nou letan?
5 Laplipar bann serviter Zeova bien okipe. Nou pas boukou letan pou asim bien bann diferan responsabilite ki nou ena. Par exanp, laplipar parmi nou bizin travay pou pran nou-mem ek nou fami swin. (1 Tim. 5:8) Ena boukou ki bizin okip enn fami ki malad ouswa ki aze. Nou tou nou bizin pran kont nou lasante, ek sa kapav pran boukou nou letan. Anplis sa bann responsabilite-la, nou ena bann kitsoz inportan pou fer dan lasanble. Enn parmi sa bann kitsoz-la, se fer nou maximum dan predikasion. Avek tou sa bann responsabilite ki nou ena la, kouma nou kapav trouv letan pou lir Labib toulezour, pou reflesi lor la, ek pou met li an pratik?
6. Kouma to kapav fer to lektir Labib vinn enn priorite? (Get zimaz osi.)
6 Pou bann Kretien, lir Labib li enn parmi “bann kitsoz ki pli inportan.” (Fil. 1:10) Alor, nou bizin fer nou lektir Labib vinn enn priorite. Get seki premie verse Psom dir konsernan enn zom ki ere: “Li kontan lalwa Zeova, ek li lir So lalwa dousman lanwit-lizour.” (Ps. 1:1, 2) Li kler ki nou bizin rezerv letan pou lir Labib! Ki pli bon moman pou lir Labib? Sa depan lor sakenn parmi nou. Me seki inportan, se ki nou swazir enn ler ki pou permet nou lir Labib toulezour. Enn frer ki apel Victor, dir: “Mo kontan lir mo Labib dan gramatin. Mem si mo pa enn dimounn ki kontan lev boner, sa ler-la pena boukou kitsoz ki anpes mwa konsantre. Mo lespri pli kler ek li pli fasil pou mwa pou res konsantre.” Eski twa osi to kontan lir to Labib dan gramatin? To kapav demann tomem: ‘Ki pli bon moman pou mo fer mo lektir Labib?’
Ki pli bon moman pou to fer to lektir Labib toulezour? (Get paragraf 6)
REFLESI LOR SEKI TO LIR
7-8. Ki kitsoz kapav anpes nou pou tir maximum profi ar nou lektir Labib? Donn enn lexanp.
7 Kitfwa nou ena labitid pou lir boukou kitsoz, me selman nou pa vremem kapte seki nou pe lir. Eski to’nn deza lir enn kitsoz, ek enn ti moman apre, to’nn bliye seki to’nn lir? Nou tou nou’nn deza pas ladan! Malerezman, sa kapav ariv nou osi kan nou lir Labib. Kitfwa to’nn fixe lobzektif pou lir plizir sapit Labib sak zour. Nou felisit twa pou sa! Nou bizin fixe bann lobzektif ek fer bann gran zefor pou realiz zot. (1 Kor. 9:26) Lir Labib, se enn bon koumansman, me se zis enn koumansman. Si nou anvi tir profi ar nou lektir Labib, li pa ase ki nou zis lir Labib.
8 Anou reflesi lor enn lexanp: Bann plant bizin delo pou viv. Selman, si tro boukou lapli tonbe dan enn tigit letan, kitfwa later-la pou nepli kapav bwar tou sa delo-la. Kan sa arive, lapli-la pa servi nanye pou bann plant-la. Kan lapli-la tonbe tigit-tigit, li pli bon. Kifer? Parski delo-la pou kapav rant dan later ek ed bann plant pou grandi. Dan mem fason, fode pa nou lir Labib vit-vit, setadir nou lir li telman vit ki nou pa gagn letan pou reflesi lor seki nou’nn lir ek pou met li an pratik.—Zak 1:24.
Parey kouma later bizin letan pou bwar delo lapli, pou ki lapli-la itil pou bann pie, nou osi nou bizin pran letan pou reflesi lor seki nou lir dan Labib ek pou met li an pratik (Get paragraf 8)
9. Ki nou bizin fer si nou ena tandans pou lir Labib vit-vit?
9 Eski to’nn remarke ki parfwa to zis lir Labib vit-vit? Ki to bizin fer? Lir mwin vit pou ki to kapav reflesi lor seki to pe lir. Ouswa, apre ki to’nn lir enn kitsoz, pran letan pou reflesi lor la. Li bien inportan ki nou reflesi lor seki nou aprann. Par exanp, to kapav prevwar plis letan pou etidie, koumsa to kapav reflesi lor seki to’nn lir. To kapav osi lir mwins verse, ek servi letan ki reste pou reflesi lor seki to’nn lir. Victor, ki nou ti mansione avan, dir: “Mo pa fer enn long lektir Labib, kitfwa mo lir zis enn sapit. Mo fer mo lektir Labib boner gramatin, ek sa permet mwa pou reflesi lor la toutlong lazourne.” Avredir, seki pli inportan kan to lir Labib, se ki to lir li enn vites ki pou permet twa reflesi lor seki to’nn lir.—Ps. 119:97; get lankadre “ Bann Kestion lor ki To Kapav Reflesi.”
10. Servi enn lexanp pou montre kouma to kapav met an pratik seki to pe aprann. (1 Tesalonisien 5:17, 18)
10 Kan to lir Labib, reflesi kouma to kapav met an pratik seki to pe aprann. Amezir ki to pe fer to lektir Labib, demann tomem, ‘Kouma depi aster-la mem ouswa dan lavenir mo kapav met seki mo pe lir an pratik?’ Anou pran enn lexanp. Fer koumadir dan to lektir Labib, to’nn lir 1 Tesalonisien 5:17, 18. (Lir.) Kan to fini lir sa de verse-la, to kapav arete ek demann tomem: “Eski souvan mo fer lapriyer? Eski mo bann lapriyer zot profon?” To kapav osi reflesi pou ki kitsoz to kapav montre to rekonesans. Kitfwa to kapav deside pou remersie Zeova pou trwa kitsoz presi. Mem si to pas zis de-trwa minit pou reflesi lor bann leson ki to’nn aprann dan Labib, sa pou ed twa pou konpran Parol Bondie ek pou met li an pratik. Reflesi lor bann benediksion ki to pou gagne si toulezour to pran letan pou reflesi lor seki to lir dan Labib! Avek letan, to pou vinn enn pli bon serviter Zeova! Me ki to pou fer si to trouve ki to ena tro boukou kitsoz pou ameliore?
FIXE BANN LOBZEKTIF REZONAB
11. Kifer parfwa to kapav santi twa dekouraze? Donn enn lexanp.
11 Kan to lir Labib, parfwa to kapav santi twa dekouraze parski to rann twa kont ki to ena boukou kitsoz pou ameliore. Anou pran enn lexanp: Fer koumadir zordi to lektir Labib koz lor linportans pou pa fer preferans. (Zak 2:1-8) Ek to trouve ki to kapav amelior fason ki to tret lezot. Alor, to desid pou fer bann sanzman. Bien bon! So landemin, dan to lektir Labib, to trouve ki li inportan ki to fer atansion ar fason ki to koze. (Zak 3:1-12) Ek to rekonet ki parfwa to dir bann kitsoz ki inpe negatif. Akoz sa, to deside ki to pou dir bann kitsoz ki pli pozitif ek ankourazan. Bien bon! Lor trwaziem zour, dan to lektir Labib, to gagn bann konsey pou pa vinn kamarad avek lemond. (Zak 4:4-12) Ek to rann twa kont ki to bizin fer plis atansion ar bann kitsoz ki to lir, to gete, ek to ekoute. Bien bon! Selman, lor katriem zour, kitfwa to pou ena linpresion ki to ena tro boukou kitsoz pou ameliore, pa vre!
12. Kifer fode pa to dekouraze si pandan to lektir Labib to trouve ki to bizin fer bann sanzman? (Get not osi.)
12 Si to ena boukou kitsoz pou sanze ouswa pou ameliore, pa dekouraze. Sa montre ki to ena limilite ek bann bon lintansion. Enn dimounn ki ena limilite ek ki onet avek limem, li pou rod bann fason pou amelior limem kan li lir Labib. a Pa bliye osi ki met “nouvo personalite” lor nou, se pa enn kitsoz ki fer enn sel kout; nou bizin kontign fer sa. (Kol. 3:10) Ki kitsoz kapav ed twa pou kontign met Parol Bondie an pratik?
13. Kouma to kapav fixe bann lobzektif ki rezonab? (Get zimaz osi.)
13 Olie ki to esey met an pratik tou seki to pe aprann enn sel kout, fixe bann lobzektif ki rezonab. (Prov. 11:2) Esey fer sa: Fer enn lalis tou bann kitsoz ki to anvi ameliore. Apre sa, swazir enn ouswa de kitsoz ladan, lor ki to kapav koumans travay an premie. Lerla, to kapav travay lor leres plitar. Alor, lor ki kitsoz to kapav travay an premie?
Olie ki to esey met an pratik seki to pe lir dan Labib enn sel kout, fixe bann lobzektif ki rezonab. Konsantre twa lor enn ouswa de pwin lor ki to bizin travay (Get paragraf 13-14)
14. Par ki lobzektif to kapav koumanse?
14 To kapav koumans par enn lobzektif ki fasil pou realize. Ouswa to kapav desid pou travay lor enn pwin ki to panse to bizin ameliore. Kan to’nn deside lor ki pwin to anvi travay, fer bann resers dan nou bann piblikasion. To kapav servi Index des publications des Témoins de Jéhovah ouswa Liv Resers pou Bann Temwin Zeova. Priye Zeova konsernan to lobzektif, ek demann Li pou donn twa “dezir ek lafors toule-de pou azir.” (Fil. 2:13) Apre sa, met an pratik seki to’nn aprann. Kan to’nn reisi realiz to lobzektif, sa pou motiv twa pou fixe enn lot lobzektif. Avredir, kan to reisi fer enn sanzman ouswa travay plis lor enn kalite, sa pou ankouraz twa pou kontign amelior tomem. Lerla, kitfwa to pou trouv sa pli fasil pou to fer bann lezot sanzman.
LES PAROL BONDIE ‘AZIR DAN TWA’
15. Kifer bann serviter Zeova diferan ar bann lezot dimounn ki lir Labib? (1 Tesalonisien 2:13)
15 Sertin dimounn dir ki zot inn lir Labib plizir fwa. Me eski vremem zot krwar seki Labib dir? Eski zot inn met li an pratik ek les li inflians zot lavi? Malerezman, souvan repons la li non! Me pou bann serviter Zeova, li bien diferan! Parey kouma bann Kretien dan premie siek, nou aksepte Labib “kouma li ete vremem, setadir kouma parol Bondie.” Anplis, nou fer boukou zefor pou met so bann konsey an pratik dan nou lavi.—Lir 1 Tesalonisien 2:13.
16. Ki kitsoz kapav ed nou pou met an pratik Parol Bondie?
16 Li pa touletan fasil pou lir Labib ek pou met an pratik seki ena ladan. Parfwa, nou gagn difikilte pou trouv letan pou lir Labib, ouswa nou kapav ena tandans pou lir li vit-vit ek nou pa pran letan pou reflesi lor seki nou’nn lir. Parfwa, nou kapav osi santi nou dekouraze parski nou ena boukou sanzman pou fer. Me ninport ki difikilte nou gagne, nou kapav sirmont sa. Nou pou kapav fer sa gras-a led Zeova. Alor, olie ki nou vinn enn dimounn ki bliye seki li’nn tande, anou bien deside pou aksepte led Zeova, ek vinn enn dimounn ki met an pratik Parol Bondie. Nou kapav sir ki plis nou lir Labib ek met li an pratik, plis nou pou vinn bann dimounn ki ere.—Zak 1:25.
KANTIK 94 Rekonesans pou Parol Bondie
a Lor jw.org, get video Seki Bann Zenn Panse—Lir Labib.
