Parski sa 70 disip-la pa ti la kan Zezi ti selebre Repa Lesegner, sa pa vedir ki Zezi ti rezet zot ouswa ki zot ti abandonn li. Zezi ti anvi selebre Repa Lesegner zis avek so bann zapot.

O-koumansman, Zezi ti swazir 12 zom parmi so bann disip. Li ti apel zot so “bann zapot.” (Lik 6:12-16) Li ti dan Galile kan “li ti reini bann 12 zapot” ek “ti avoy zot pou pres Rwayom Bondie ek pou geri bann dimounn.” (Lik 9:1-6) Apre sa, kan li ti dan Zide, li “ti swazir 70 lezot disip ek ti avoy zot de par de.” (Lik 9:51; 10:1) Alor, sa 12 zapot-la ek sa 70 disip-la, zot tou ti bann disip Zezi. Sa montre ki Zezi ti ena bann disip dan plizir landrwa.

Bann Zwif ki ti vinn bann disip Zezi ti kontign selebre Pak toule lane, ek kitfwa zot ti fer sa ansam ar zot fami. (Ex. 12:6-11, 17-20) Inpe letan avan so lamor, Zezi ek so bann zapot ti al Zerizalem. Selman, Zezi pa ti demann tou so bann disip ki dan Zide, Galile, ek Pere, pou vinn Zerizalem pou selebre Pak ansam avek li. Li ti anvi selebre Pak zis ar so bann zapot. Li ti dir zot: “Mo ti bien anvi manz sa repa Pak la avek zot avan ki mo soufer.”—Lik 22:15.

Zezi ti ena enn bon rezon pou fer sa. Biento li ti pou mor kouma “Lagno Bondie ki tir pese lemond.” (Zan 1:29) Li ti pou mor dan Zerizalem, landrwa kot bann Zwif ofer bann sakrifis pou Bondie depi bien lontan. Lagno Pak ti rapel bann Izraelit ki Zeova ti liber zot ar lesklavaz dan Lezip. Selman, par so sakrifis, Zezi ti pou fer boukou plis ki sa. Li ti pou liber bann dimounn ar pese ek lamor. (1 Kor. 5:7, 8) Gras-a sakrifis Zezi, bann 12 zapot ti pou form parti “fondasion” lasanble Kretien. (Efe. 2:20-22) Anplis, Zerizalem, “lavil ki sin,” ena “12 ros fondasion” ek lor zot inn ekrir “12 nom bann 12 zapot Lagno.” (Rev. 21:10-14) Sa montre ki bann fidel zapot Zezi ti pou ena enn rol inportan dan realizasion proze Bondie. Se akoz sa ki Zezi ti anvi ki so bann zapot manz sa dernie repa Pak la ansam avek li, ek ki zot avek li pou seki ti pou vini apre, setadir Repa Lesegner.

Sa 70 disip-la, ek bann lezot disip osi, pa ti ansam ar Zezi sa swar-la. Selman, tou bann disip ki ti res fidel ar Zezi ti pou gagn bann bienfe gras-a Repa Lesegner. Sa swar-la, Zezi ti fer enn lalians avek so bann zapot: enn lalians pou enn Rwayom. Ek avek letan, tou bann disip Zezi ki ti pou ena lesperans pou al dan lesiel, ti pou form parti dan sa lalians-la.—Lik 22:29, 30.