“Fer Zeova Konfians ek Fer Seki Bon”
“Fer Zeova konfians ek fer seki bon . . . ek azir avek fidelite.”
KANTIK: 133, 63
1. Ki kapasite extraordiner Zeova finn donn bann imin?
ZEOVA finn kree bann imin avek bann kapasite extraordiner. Li finn donn nou kapasite pou reflesi. Sa kapasite-la ed nou pou rezoud bann problem ek fer bann proze pou lavenir. (Proverb 2:11) Li finn donn nou lafors, pou ki nou reisi realiz nou bann proze ek nou bann lobzektif. (Filipien 2:13) Li finn osi donn nou enn konsians, enn kapasite ki ed nou fer diferans ant seki bon ek seki move. Nou konsians ed nou pou pa fer pese ek pou koriz nou bann erer.
2. Kouma Zeova anvi ki nou servi nou bann kapasite?
2 Zeova anvi ki nou servi nou bann kapasite dan enn bon fason. Kifer? Se parski Li kontan nou ek Li kone ki nou pou ere kan nou servi bann don ki Li’nn donn nou. Par exanp, enn verse dan Lekritir Ebraik dir: “Bann plan enn kikenn ki travay dir vremem pou reisi,” ek enn lot verse dir: “Tou seki to lame trouv pou fer, fer li avek to lafors.” (Proverb 21:5; Ekleziast 9:10) Ek dan Lekritir Grek, enn verse dir: “Tanki nou gagn lokazion, anou fer dibien anver tou dimounn,” ek enn lot verse dir: “Parey kouma sakenn inn gagn enn don, servi sa pou ed sakenn so kamarad.” (Galat 6:10, NW; 1 Pier 4:10, NW.) Alor, li kler ki Zeova anvi ki nou fer seki nou kapav pou nou prop bienfe ek pou bienfe lezot osi.
3. Ki limit tou dimounn ena?
3 Zeova anvi ki nou servi nou bann kapasite, me Li kone ki nou ena bann limit. Par exanp, nou pa kapav tir linperfeksion, pese, ek lamor. (1 Lerwa 8:46) Nou pa kapav osi kontrol lezot, parski sakenn lib pou pran so prop desizion. Ek ninport ki kantite konesans ouswa lexperyans ki nou ena, zame nou pa pou ena plis ki Zeova.
Kan to dan difikilte, “fer Zeova konfians ek fer seki bon”
4. Ki nou pou examine dan sa lartik-la?
4 Nou bizin touletan les Zeova gid nou, ek ena konfians ki Li pou soutenir nou ek fer seki noumem nou pa kapav fer pou nou. Me selman, Zeova anvi osi ki nou reflesi lor seki nou kapav fer noumem pou rezoud bann problem ek pou ed lezot. (Lir Psom 37:3, NW.) Nou bizin “fer Zeova konfians” ek osi “fer seki bon.” Nou bizin “azir avek fidelite.” Kouma nou kapav fer sa? Anou examinn lexanp Noe, David, ek lezot fidel serviter Bondie ki ti kont lor Zeova. Nou pou trouve ki ti ena bann kitsoz ki zot pa ti kapav fer, me zot ti swazir pou fixe zot latansion lor bann kitsoz ki zot ti kapav fer.
KAN NOU ANTOURE AR LEMAL
5. Dekrir sitiasion Noe.
5 Noe ti viv enn lepok kot later ti “ranpli ar violans” ek limoralite. (Zenez 6:4, 9-13) Mem si Noe ti kone ki Zeova ti pou detrir sa move lemond-la, sirman li ti bien afekte par seki bann dimounn ti pe fer. Dan sa sitiasion-la, Noe ti konpran ki ena bann kitsoz ki li pa ti kapav fer, me li ti osi realize ki ena bann kitsoz ki li ti kapav fer.
Lopozision dan predikasion (Get paragraf 6-9)
6, 7. (a) Ki Noe pa ti kapav fer? (b) Kouma eski nou sitiasion parey kouma Noe?
6 Seki Noe pa ti kapav fer: Noe ti anons mesaz lavertisman Zeova avek fidelite, me li pa ti kapav obliz bann dimounn pou aksepte sa mesaz-la. Ek li pa ti kapav osi fer Deliz vinn pli vit. Noe ti bizin ena konfians ki Zeova ti pou tini So promes pou detrir lemal. Li ti bizin osi ena konfians ki Bondie ti pou fer sa dan ler ki bizin.
7 Nou osi azordi nou pe viv dan enn lemond ki ranpli ar lemal, ek nou kone ki Zeova finn promet pou detrir sa lemond-la. (1 Zan 2:17) Antretan, nou pa kapav fors bann dimounn pou aksepte “bon nouvel lor Rwayom.” Ek nou pa kapav fer “gran detres” vinn pli vit. (Matie 24:14, 21, NW.) Parey kouma Noe, nou bizin ena enn lafwa solid ek ena konfians ki Bondie pou detrir lemal biento. (Psom 37:10, 11) Kan pou ariv ler pou ki sa move lemond-la detrir, pena bare, nou kapav sir ki Zeova pou detrir li.
Parey kouma Noe, nou bizin ena enn lafwa solid ek ena konfians ki Bondie pou detrir lemal biento
8. Lor ki kitsoz Noe ti fixe so latansion? (Get zimaz dan koumansman lartik.)
8 Seki Noe ti kapav fer: Olie ki li ti dekouraze akoz bann kitsoz ki li pa ti kapav fer, Noe ti fixe so latansion lor seki li ti kapav fer. Li ti anons mesaz lavertisman Zeova avek fidelite. (2 Pier 2:5) Sirman sa travay-la finn ed li pou gard so lafwa for. Ek anplis travay predikasion, li ti swiv bann instriksion Zeova ek li ti konstrir enn lars.
9. Kouma eski nou kapav imit lexanp Noe?
9 Parey kouma Noe, nou res bien okipe “dan travay Lesegner.” (1 Korintien 15:58) Par exanp, nou kapav al ede pou konstrir ek netway bann Lasal kot fer renion ek bann Lasal Lasanble. Nou kapav osi travay kouma volonter pou bann lasanble, ouswa al ede dan enn biro nasional ouswa enn biro tradiksion. Me pli inportan, nou bizin res bien okipe dan travay predikasion parski sa pou fer nou lespwar pou lavenir vinn pli for. Enn ser ki fidel dir ki, kan li koz lor bann benediksion ki Rwayom Bondie pou amene, li rann li kont ki bann dimounn pena okenn lespwar ek zot panse ki zot bann problem zame pa pou fini. Parey kouma sa ser-la, nou ena enn lespwar, ek sa lespwar-la vinn pli for kan nou partaz sa ar lezot. Sa lespwar-la ed nou pou res dan “lekours” pou gagn lavi!
KAN NOU FER PESE
10. Dekrir sitiasion David.
10 Lerwa David ti enn zom fidel, ek Zeova ti bien kontan li. (Zistwar Bann Apot 13:22) Me kanmem sa, David ti fer enn pese bien grav kan li ti gagn bann relasion sexiel avek Bat-sheba. Pli pir ankor, li ti esey kasiet so pese kan li ti fer enn plan pou ki Ouriya, mari Bat-sheba, mor dan lager. David ti mem ekrir enn let avek bann instriksion ladan pou touy Ouriya, ek li ti fer Ouriya limem al kit sa let-la ar Yoab! (2 Samiel 11:1-21) Malgre sa, David pa ti reisi kasiet so bann pese. (Mark 4:22) Me lerla, kouma li ti reazir?
Bann pese ki nou ti fer dan lepase (Get paragraf 11-14)
11, 12. (a) Apre ki li ti fer pese, ki David pa ti kapav fer? (b) Ki Zeova pou fer pou nou si nou repanti?
11 Seki David pa ti kapav fer: David pa ti kapav efas seki li ti fer. Ofet, li ti mem bizin pey konsekans so bann pese ziska so lamor. (2 Samiel 12:10-12, 14) Dan sa sitiasion-la, David ti bizin ena lafwa. Li ti bizin ena konfians ki, si li ti repanti sinserman, Zeova ti pou pardonn li ek ed li pou andir konsekans so bann aksion.
12 Akoz nou inparfe, nou tou nou fer pese. Me ena sertin erer ki pli grav ki lezot, ek dan sertin sitiasion, kitfwa nou pa pou kapav efas seki nou’nn fer. Nou osi kitfwa nou pou bizin pey konsekans nou bann aksion parey kouma David. (Galat 6:7) Me nou ena konfians dan promes Bondie ki, si nou repanti, Li pou soutenir nou dan bann moman difisil mem si se noumem ki’nn met nou dan trou.
13. Kouma eski David ti regagn enn bon relasion avek Zeova?
13 Seki David ti kapav fer: David ti anvi regagn enn bon relasion avek Zeova. Ki li ti fer? David ti les Zeova ed li. Par exanp, li ti aksepte koreksion ki Zeova ti donn li atraver profet Natann. (2 Samiel 12:13) David ti osi priye Zeova ek ti konfes so bann pese. Kan li ti fer sa, li ti montre ki li ti anvi regagn faver Zeova. (Psom 51:1-17) Olie ki li ti dekouraze parski li ti santi li koupab, David ti tir bann leson ar so bann erer. Zame li pa ti refer sa bann pese-la ankor. David ti res fidel ziska so lamor. Ek se sa souvenir-la ki Zeova garde lor David.
14. Ki nou kapav aprann ar lexanp David?
14 Ki nou kapav aprann ar lexanp David? Si nou fer enn pese grav, nou bizin repanti sinserman, konfes nou pese ar Zeova, ek rod so pardon. (1 Zan 1:9) Nou bizin osi koz ar bann ansien parski zot kapav ed nou pou regagn enn bon relasion avek Zeova. (Lir Zak 5:14-16, NW.) Zeova promet ki Li pou pardonn nou. Kan nou aksepte so led, nou montre ki nou ena konfians dan sa promes-la. Anplis, nou bizin tir leson ar nou bann erer, met nou konfians an Zeova ek kontign servi Li.
DAN LEZOT SITIASION
Bann problem lasante (Get paragraf 15)
15. Ki nou aprann ar lexanp Ana?
15 To kapav osi reflesi lor lexanp bann lezot fidel serviter Zeova ki ti met zot konfians an Li, ek ki ti fer seki zot ti kapav dan bann sitiasion difisil. Rapel lexanp Ana. Ti ena enn lepok kot Ana pa ti kapav gagn zanfan. Li pa ti kapav sanz so sitiasion. Me li ti ena konfians ki Zeova ti pou rekonfort li. Alor li ti kontign al tabernak pou ador Zeova, ek li ti kontign ouver so leker ar Zeova dan lapriyer. (1 Samiel 1:9-11) Ana finn les nou enn bon lexanp, pa vre? Kan nou ena bann problem lasante ouswa bann lezot difikilte, ek ki nou pa kapav fer nanye pou sanz sa, anou zet tou nou traka lor Zeova ek ena konfians ki Li trakase pou nou. (1 Pier 5:6, 7) Ek anou fer tou seki nou kapav pou tir profi ar nou bann renion ek bann lezot dispozision ki lorganizasion Zeova pran pou nou.
Ana ti ena konfians an Zeova, alor li ti kontign al tabernak pou ador Zeova, ek li ti kontign priye
Bann zanfan ki’nn aret servi Zeova (Get paragraf 16)
16. Ki bann paran kapav aprann ar lexanp Samiel?
16 Paran, si ou zanfan finn aret servi Zeova, ki ou kapav fer? Profet Samiel pa ti kapav fors so bann garson, ki ti adilt, pou res fidel ar Bondie. (1 Samiel 8:1-3) Li ti bizin les sa sitiasion-la dan lame Zeova. Me kanmem sa, Samiel ti fer seki li ti kapav pou res fidel ar so Papa ki dan lesiel ek pou fer Li plezir. (Proverb 27:11) Azordi, boukou paran Kretien dan mem sitiasion ki profet Samiel. Zot ena konfians ki Zeova touletan pre pou akeyir bann peser ki repanti parey kouma dan lexanp garson prodig ki’nn retourne ki Zezi ti mansione. (Lik 15:20) Antretan paran, fer tou seki ou kapav pou res fidel ar Zeova, ek gard lespwar ki ou bon lexanp pou ankouraz ou zanfan pou retourn ar Zeova.
Bann problem finans (Get paragraf 17)
17. Kifer lexanp sa pov vev dan lepok Zezi la li ankourazan?
17 Enn lot bon lexanp se sa pov vev dan lepok Zezi la. (Lir Lik 21:1-4.) Li pa ti kapav fer nanye kont koripsion ki ti ena dan tanp. Anplis, li ti mizer ek li pa ti kapav fer nanye pou sanz so sitiasion. (Matie 21:12, 13) Me so konfians an Zeova ti pous li pou soutenir vre ladorasion. Li ti bien zenere ek li ti donn “de pies larzan,” setadir tou seki li ti ena pou viv. Sa fam fidel la ti ena enn konfians total an Zeova. Li ti kone ki si li met servis Zeova an premie dan so lavi, Zeova ti pou donn li tou seki li bizin. Nou osi parey, nou ena konfians ki, si nou met Rwayom Bondie an premie dan nou lavi, Zeova pou donn nou tou seki nou bizin.
18. Rakont lexanp enn frer ki ti ena enn bon latitid.
18 Boukou frer ek ser azordi montre mem konfians an Zeova, kan zot fixe zot latansion lor seki zot kapav fer olie ki zot fixe zot latansion lor bann kitsoz ki zot pa kapav fer. Anou pran lexanp Malcolm, enn frer ki’nn res fidel ziska so lamor an 2015. Pandan boukou lane, li ek so madam finn servi Zeova ek zot ti konn bann bon moman me osi bann moman difisil dan zot servis. Li ti dir: “Parfwa, ena sertin kitsoz ki arive dan lavi ki nou pa atann, ek nou lavi mem kapav bien difisil. Me Zeova beni bann dimounn ki kont lor Li.” Ki konsey Malcolm ti done? “Priye Zeova pou ki Li ed ou pou vinn efikas ek pou fer tou seki ou kapav dan so servis. Fixe ou latansion lor seki ou kapav fer, pa lor seki ou pa kapav.” *
19. (a) Kifer eski nou text pou lane 2017 bien apropriye? (b) Kouma to pou met an pratik text pou lane 2017 dan to lavi?
19 Sa move lemond-la pe “vinn pli pir,” alor nou bizin atann pou gagn pli boukou difikilte. (2 Timote 3:1, 13, NW.) Se pa enn ler pou nou les nou kraze par nou bann difikilte. Okontrer, nou bizin ena enn konfians total an Zeova ek fixe nou latansion lor seki nou kapav fer. Se pou sa rezon-la ki li bien apropriye ki nou text pou lane 2017 se Psom 37:3 (NW) ki dir: “Fer Zeova konfians ek fer seki bon”!
Nou text pou lane 2017: “Fer Zeova konfians ek fer seki bon.”
^ par. 12 Izai 1:18, 19: “18 Zeova ti dir: ‘Alor vini, ek anou remet bann kitsoz an-ord ant nou. Mem si zot pese rouz vif, sa bann pese-la pou vinn blan kouma lanez; mem si zot rouz kouma enn latwal letof rouz fonse, zot pou vinn blan kouma lalenn.’ 19 Si to ena volonte ek to ekoute, to pou manz bann bon kitsoz ki sorti dan sa pei-la.”
