1-3. (a) Kifer Zeova ti kontan Salomon, ek ki bann benediksion Salomon ti gagne? (b) Ki bann kestion nou pou reponn dan sa lartik-la?

SALOMON ti vinn lerwa Izrael kan li ti ankor zenn. Dan koumansman so regn, Zeova ti aparet ar li dan enn rev ek ti dir: “Demann mwa seki to ti pou kontan mo donn twa.” Salomon ti reponn: “Mo ankor zenn ek mo pena lexperyans. . . . Alor, donn to serviter enn leker obeisan, pou ziz to pep.” (1 Ler. 3:5-10) Salomon ti demann zis “enn leker obeisan.” Seki li ti demande montre bien ki li ti modes, pa vre? Sa pa etonn nou ki Zeova ti kontan Salomon! (2 Sam. 12:24) Repons ki zenn Lerwa Salomon ti done ti telman fer Bondie plezir ki Bondie ti donn li “enn leker saz ek intelizan.”​—1 Ler. 3:12.

² Tanki li ti fidel, Salomon ti gagn boukou benediksion. Li ti gagn loner pou konstrir enn tanp “pou nom Zeova, Bondie Izrael.” (1 Ler. 8:20) Li ti vinn seleb gras-a gran sazes ki Bondie ti donn li. Ek nou trouv bann kitsoz ki Bondie ti inspir li pou ekrir dan trwa liv Labib. Enn sa bann liv-la se liv Proverb.

³ Liv Proverb mansionn leker anviron san fwa. Par exanp, dan Proverb 4:23, nou lir: “Plis ki tou kitsoz ki to bizin proteze, protez to leker.” Dan sa verse-la, mo “leker” pe fer referans ar ki kitsoz? Nou pou reponn sa kestion-la dan sa lartik-la. Nou pou osi get repons de lezot kestion: Kouma eski Satan esey kontaminn nou leker? Ek ki nou kapav fer pou protez nou leker? Pou res fidel anver Bondie, nou bizin konn repons sa bann kestion inportan la.

4-5. (a) Kouma Psom 51:6 ed nou pou konpran ar ki kitsoz sa mo “leker” la pe fer referans? (b) Kouma kan nou konpran linportans pou pran swin nou lasante fizik, sa ed nou pou konpran linportans pou pran swin nou leker sinbolik?

⁴ Proverb 4:23, servi mo “leker” pou fer referans ar dimounn ki nou ete dan pli “profon” noumem. (Lir Psom 51:6.) Alor, nou kapav dir ki leker fer referans ar nou bann panse, santiman, mobil, ek dezir. Li reprezant seki nou ete vremem dan pli profon noumem, pa zis seki nou ete andeor.

⁵ Anou gete kouma kan nou konpran linportans pou pran swin nou lasante fizik, sa ed nou pou konpran linportans pou pran swin nou leker sinbolik. Premierman, pou ki nou res an bonn sante, nou bizin manz bann manze ki bon pou nou lasante ek fer lexersis regilierman. Li parey, pou ki nou ena enn bon relasion avek Zeova, regilierman nou bizin lir Labib ek bann piblikasion ki baze lor Labib ek montre ki nou ena lafwa dan Zeova. Nou montre ki nou ena lafwa dan Zeova kan nou aplik seki nou aprann ek kan nou koz lor nou lafwa. (Rom. 10:8-10; Zak 2:26) Deziemman, kan nou get nou, kitfwa nou paret an bonn sante alor ki an realite nou ena enn maladi. Li parey, kan nou zis get nou bann labitid spiritiel, nou kapav panse ki nou ena enn lafwa for, me kitfwa ena bann move dezir ki pe grandi dan nou leker. (1 Kor. 10:12; Zak 1:14, 15) Nou bizin rapel ki Satan ti pou kontan kontaminn nou avek so fason panse. Kouma eski li esey fer sa? Ek kouma nou kapav protez noumem?

6. Ki lobzektif Satan, ek ki mwayin li servi pou reisi so lobzektif?

⁶ Satan anvi ki nou vinn parey kouma li. Setadir, ki nou rebel kont Zeova, pa pran kont So bann prinsip ek rod nou prop lintere. Satan pa kapav fors nou pou rezonn ek pou fer parey kouma li. Alor, pou reisi so lobzektif, li servi lezot mwayin. Par exanp, li met bann dimounn ki li’nn deza kontamine otour nou. (1 Zan 5:19) So lobzektif se ki nou swazir pou pas letan avek zot, mem si nou kone ki bann move frekantasion pou “gat” ouswa pou “kontaminn” nou fason panse ek azir.  (1 Kor. 15:33, NW, not.) Sa metod-la finn marse avek Lerwa Salomon. Salomon ti marye avek boukou fam payin, ek finalman zot “ti ena enn gran linflians lor li” ek “tigit par tigit so bann fam finn detourn so leker.”​—1 Ler. 11:3; not.

7. Ki lezot mwayin Satan servi pou fann so fason panse, ek kifer nou bizin fer bien atansion?

⁷ Satan servi bann fim ek bann lemision televizion pou fann so fason panse. Li kone ki bann zistwar pa zis diverti nou; zot osi ansegn nou kouma nou bizin panse, ki bann santiman nou bizin ena, ek kouma pou azir. Zezi ti servi sa metod lansegnman la dan enn fason efikas. Par exanp, examinn parabol bon Samariten ek garson ki ti kit so lakaz ek ti gaspiy tou so leritaz. (Mat. 13:34; Lik 10:29-37; 15:11-32) Selman, bann ki’nn kontamine avek fason panse Satan kapav servi sa metod-la pou kontaminn nou. Nou bizin ekilibre. Bann fim ek bann lemision televizion kapav diverti ek ansegn nou san ki zot kontaminn nou fason panse. Me nou bizin fer bien atansion. Kan nou pe swazir nou bann divertisman, li bon nou demann noumem: ‘Eski sa fim-la ouswa sa emision televizion la pe ansegn mwa ki pena nanye demal ki mo satisfer mo bann move dezir?’ (Gal. 5:19-21; Efe. 2:1-3) Ki to bizin fer si to trouve ki enn program pe ankouraz bann dimounn pou ena bann panse satanik? Evit li parey kouma to ti pou evit enn maladi kontazie!

8. Kouma bann paran kapav ed zot zanfan pou protez zot leker?

⁸ Paran, to ena enn gran responsabilite pou protez to bann zanfan kont bann zefor ki Satan pe fer pou kontaminn zot leker. Pena dout ki to pe fer tou seki to kapav pou protez to zanfan kont bann maladi. Par exanp, to gard to lakaz prop ek to zet tou kitsoz ki kapav fer twa ouswa to bann zanfan tom malad. Dan mem fason, to bizin protez to bann zanfan kont bann fim, bann lemision televizion, bann  zwe elektronik, ek bann sit Internet ki kapav kontaminn zot avek bann panse Satan. Zeova inn donn twa responsabilite pou ed to bann zanfan pou vinn pros avek Li. (Prov. 1:8; Efe. 6:1, 4) Alor, pa ezite pou fixe bann reg ki baze lor bann prinsip Labib dan to fami. Dir to bann zanfan ki kitsoz zot kapav gete ek ki kitsoz zot pa kapav gete, ek ed zot pou konpran kifer to’nn pran sa bann desizion-la. (Mat. 5:37) Amezir to bann zanfan grandi, ed zot pou trouve par zotmem ki kitsoz ki bon ek ki kitsoz ki pa bon devan lizie Zeova. (Ebre 5:14) Ek pa bliye ki to bann zanfan pou aprann boukou ar seki to dir me plis ankor ar seki to fer.​—Det. 6:6, 7; Rom. 2:21.

9. Sit enn lide ki Satan pous bann dimounn pou ena. Kifer sa li danzere?

⁹ Enn lot fason ki Satan esey kontaminn nou leker se kan li pous nou pou met nou konfians dan sazes bann dimounn olie ki dan sazes Zeova. (Kol. 2:8, NW) Get enn parmi bann lide ki Satan ankouraz bann dimounn pou ena: vinn ris se samem kitsoz pli inportan ki ena. Bann ki pans koumsa kapav vinn ris, ouswa non. Me dan toulede ka zot an danze. Kifer? Parski kitfwa zot pe telman konsantre lor gagn boukou kas ki zot pa pran kont zot lasante, zot relasion avek zot fami, ek mem zot relasion avek Zeova. (1 Tim. 6:10) Nou ena rekonesans ki nou Papa ki dan lesiel ek ki ena sazes pe ed nou pou ena enn fason panse ekilibre lor larzan.​—Ekle. 7:12; Lik 12:15.

10-11. (a) Ki nou bizin fer pou protez nou leker? (b) Dan lepase, ki bann gardien ti fer, ek kouma nou konsians kapav azir kouma enn gardien?

¹⁰ Pou reisi protez nou leker, nou bizin kapav idantifie bann danze ki kapav kontaminn nou leker ek pa tarde pou protez noumem. Mo ki’nn servi pou tradir “protez” dan Proverb 4:23 fer nou pans travay ki enn gardien ti fer. Dan lepok Lerwa Salomon, bann gardien ti debout lor miray lavil pou veye ek kan zot ti trouv enn danze pe aprose, zot ti averti bann dimounn. Kan nou ena sa zimaz-la dan nou lespri, sa ed nou pou konpran seki nou bizin fer pou pa les Satan kontaminn nou fason panse.

¹¹ Dan lepase, bann gardien ti koorper avek bann portie lavil. (2 Sam. 18:24-26) Ansam, zot ti ferm bann laport lavil kan enn lennmi ti aprose ek koumsa zot ti ede pou protez lavil. (Ne. 7:1-3) Nou konsians * ki finn forme par Labib kapav azir kouma enn gardien ek averti nou kan Satan esey atak nou leker, setadir kan li esey inflians nou fason panse, nou bann santiman, nou bann mobil, ouswa nou bann dezir. Sak fwa ki nou konsians averti nou, nou bizin ekout li ek dan enn fason koze, ferm laport nou leker.

12-13. Ki nou kapav tante pou fer, me kouma nou bizin reazir?

¹² Anou get enn lexanp ki montre nou kouma nou kapav protez noumem pou ki nou pa les Satan inflians nou fason panse. Zeova finn ansegn nou ki nou bizin pa mem “koz lor bann size imoralite sexiel, [ek] inpirte.” (Efe. 5:3) Me ki nou pou fer si nou bann koleg travay ouswa kamarad lekol koumans koz lor bann kitsoz ki ena enn lien avek limoralite sexiel? Nou kone ki nou bizin “rezet seki Bondie  pa kontan ek bann dezir sa lemond-la.” (Tit 2:12, NW) Nou gardien, setadir nou konsians, kitfwa pou averti nou konsernan sa danze-la. (Rom. 2:15) Me eski nou pou ekout li? Olie sa, kitfwa nou kapav tante pou ekout nou bann kamarad ouswa pou get bann zimaz ki zot pe montre. Me se sa moman lamem ki nou bizin ferm laport nou leker, setadir evit sa danze-la kan nou sanz konversasion ouswa nou ale.

¹³ Nou bizin ena kouraz pou reziste kan nou bann kamarad met presion lor nou pou pans ouswa pou fer bann kitsoz ki pa bon. Nou kapav sir ki Zeova trouv bann zefor ki nou pe fer, ek Li pou donn nou lafors ek sazes ki bizin pou reziste kont fason panse Satan. (2 Kro. 16:9; Iza. 40:29; Zak 1:5) Me, ki lezot kitsoz ankor nou kapav fer pou protez nou leker?

14-15. (a) Ar ki kitsoz nou bizin ouver nou leker, ek kouma nou kapav fer sa? (b) Kouma Proverb 4:20-22 ed nou pou tir maximum profi ar nou lektir Labib? (Get osi lankadre “ Kouma To Kapav Medite?”)

¹⁴ Pou protez nou leker, li pa ase ki nou zis rezet bann move linflians, me li inportan osi ki nou aksepte bann bon linflians. Reflesi ankor enn fwa lor lexanp miray lavil. Enn portie ti ferm laport lavil pou anpes bann lennmi rantre, me lezot moman li ti ouver laport-la pou permet bann manze ek lezot marsandiz rant dan lavil. Si li pa ti ouver laport, bann dimounn dan lavil ti pou mor-de-fin. Li parey, regilierman nou bizin ouver nou leker pou les fason panse Zeova inflians nou.

¹⁵ Dan Labib ena panse Zeova, alor sak fwa ki nou lir Labib, nou les fason panse Zeova inflians nou lespri, nou bann santiman, ek nou bann aksion. Kouma nou kapav tir maximum profi ar nou lektir Labib? Li bien inportan ki nou priye. Enn ser dir: “Avan ki mo lir Labib, mo priye Zeova, mo demann Li pou ed mwa ‘dekouver bann laverite merveye’ ki ena dan so Parol. (Ps. 119:18) Nou bizin osi medit lor seki nou lir. Kan nou priye, lir, ek medite, Parol Bondie rant “dan pli profon [nou] leker,” ek sa fer nou kontan fason panse Zeova.​—Lir Proverb 4:20-22; * Ps. 119:97.

16. Kouma boukou inn tir profi gras-a Program Televizion JW?

¹⁶ Enn lot fason ki nou les fason panse Bondie inflians nou se kan nou get bann emision ki disponib lor Program Televizion JW^®. Enn koup dir: “Bann program ki ena sak mwa finn vremem reponn nou bann lapriyer! Zot finn fortifie ek ankouraz nou kan nou ti pe santi nou tris ouswa tousel. Ek souvan kot nou, nou ekout bann sante orizinal ki ena lor Program Televizion JW. Nou zwe sa bann lamizik-la kan nou pe kwi, netwaye, ouswa kan nou pe bwar dite.” Sa bann program-la ed nou pou protez nou leker. Zot ansegn nou pou pans parey kouma Zeova ek anpes nou adopte fason panse Satan.

17-18. (a) Ki arive kan nou met an pratik bann lansegnman Zeova, kouma nou trouve dan 1 Lerwa 8:61? (b) Ki nou aprann ar lexanp Lerwa Ezekias? (c) An-akor avek lapriyer David ki trouv dan Psom 139:23, 24, pou ki kitsoz nou kapav priye?

¹⁷ Sak fwa ki nou trouv bann benediksion ki nou gagne kan nou fer seki drwat, sa fortifie nou lafwa. (Zak 1:2, 3) Nou santi nou bien parski nou kone nou’nn fer Zeova fier pou apel nou so bann zanfan, ek nou anvi fer Li ankor plis plezir. (Prov. 27:11) Sak fwa ki nou pas par enn leprev, sa  donn nou lokazion pou montre ki nou pa pe servi nou Papa ki kontan nou avek enn leker partaze. (Ps. 119:113) Okontrer, nou montre ki nou kontan Zeova avek tou nou leker, ki nou bien deside pou obeir so bann komannman ek pou fer so volonte.​—Lir 1 Lerwa 8:61. *

¹⁸ Eski nou pou fer bann erer? Wi, parski nou inparfe. Si nou fer erer, rapel lexanp Lerwa Ezekias. Li ti fer bann erer. Me li ti repanti, ek li ti kontign servi Zeova “avek tou [so] leker.” (Iza. 38:3-6; 2 Kro. 29:1, 2; 32:25, 26) Alor, anou fer tou pou pa les nou kontamine par bann fason panse Satan. Anou priye pou ki nou devlop “enn leker obeisan.” (1 Ler. 3:9; lir Psom 139:23, 24.) Nou pou kapav res fidel anver Zeova si, avan tou kitsoz, nou protez nou leker.