1-2. Ki enn anz dir bann madam ki’nn al kot tom Zezi, ek ki instriksion Zezi donn zot?

NOU le 16 Nizan lane 33 Nou Lepok. Bien boner gramatin, enn ti group madam ki ena lakrint pou Bondie, avek leker gro pe al kot tom kot inn met lekor Zezi plis ki 36 er-d-tan avan. Zot pe al laba pou met bann zepis ek delwil parfime lor lekor Zezi. Me kan zot ariv laba, zot gagn sok parski tom-la vid. Enn anz dir bann madam-la ki Zezi finn resisite, ek li azoute: “Li pe atann zot Galile. Zot pou trouv li laba.”​—Mat. 28:1-7, NW; Lik 23:56; 24:10.

² Apre ki bann madam-la kit sa tom-la, Zezi limem vinn ver zot ek donn zot sa instriksion-la: “Al dir mo bann frer ek mo bann ser, al Galile; laba zot pou trouv mwa.” (Mat. 28:10) Premie kitsoz ki Zezi fer apre so rezireksion se organiz enn renion avek so bann disip. Dan sa renion-la, Zezi donn so bann disip bann instriksion bien inportan.

3-4. Kifer nou kapav dir ki komannman ki trouv dan Matie 28:19, 20 pa ti aplik zis ar bann zapot? (Get zimaz lor kouvertir.)

³ Lir Matie 28:16-20, NW. * Pandan sa renion ki Zezi ti organize la, li ti met laksan lor travay inportan ki so bann  disip ti pou fer sa lepok-la. Se samem travay ki nou pe fer azordi. Zezi ti dir: “Alor, ale ek fer bann disip parmi bann dimounn dan tou bann nasion, . . . ansegn zot pou swiv tou bann komannman ki mo’nn donn zot.”

⁴ Zezi anvi ki tou so bann disip prese. Li pa ti donn sa lord-la zis so 11 zapot fidel. Kouma nou konn sa? Kan Zezi ti donn sa komannman-la lor enn montagn dan Galile, pa ti ena zis bann zapot ki ti la. Rapel seki sa anz-la ti dir bann madam la: “Zot  pou trouv li [dan Galile].” Alor, kitfwa ti ena osi bann fam fidel ki ti la dan sa moman-la. Me pa ti ena zis bannla. Lapot Pol dir ki Zezi “finn paret devan plis ki sink-san dimoun anmemtan.” (1 Kor. 15:6) Kotsa?

5. Ki nou aprann dan 1 Korintien 15:6?

⁵ Nou ena bann bon rezon pou krwar ki dan 1 Korintien 15:6, Pol ti pe koz lor renion ki mansione dan Matie sapit 28. Kifer? Premierman, laplipar bann disip Zezi ti bann Galileen. Alor, li ti pou pli fasil fer enn renion ar tou sa bann dimounn-la lor enn montagn dan Galile, olie ki fer sa kot enn kikenn dan Zerizalem. Deziemman, apre ki Zezi ti resisite, li ti fini zwenn so 11 zapot dan enn lakaz dan Zerizalem. Si Zezi ti anvi donn zis so bann zapot instriksion pou prese ek pou fer bann disip, li ti pou fer sa dan Zerizalem. Li pa ti pou demann zot, ni bann madam ki ti al get li kot tom, ek lezot ankor pou zwenn li dan Galile.​—Lik 24:33, 36.

6. Kouma Matie 28:20 montre ki komannman pou fer bann disip konsern nou azordi, ek kouma bann dimounn pe obeir sa komannman-la?

⁶ Anou get enn trwaziem rezon inportan. Komannman ki Zezi ti done pou fer bann disip pa ti aplik zis ar bann Kretien ki ti viv dan premie siek. Kouma nou konn sa? Apre ki Zezi ti donn bann instriksion, li ti dir so bann disip sa bann parol-la: “Mo avek zot toulezour ziska lafin sa sistem-la.” (Mat. 28:20, NW) Parey kouma Zezi ti dir, boukou dimounn pe fer bann disip azordi. Sak lane, apepre 300,000 dimounn vinn bann disip Zezi, zot pran batem, ek zot vinn bann Temwin Zeova. Se vremem extraordiner, pa vre!

7. Ki nou pou examine asterla, ek kifer?

⁷ Boukou dimounn ki etidie Labib fer bann progre ek pran batem. Me selman, kitfwa sertin ki etidie Labib avek nou per pou vinn bann disip. Zot kontan zot letid, me zot pa pe progrese pou pran batem. Pena dout ki si to ena enn etidian Labib, to anvi ed li pou aplik seki li aprann ek vinn enn disip Zezi Kris. Dan sa lartik-la, nou pou gete kouma nou kapav ed nou etidian pou kontan Zeova ek pou fer bann progre. Kifer nou bizin koz lor sa size-la? Parski parfwa nou bizin deside si nou pou kontign enn letid ouswa non.

8. Kifer parfwa li difisil pou ed nou bann etidian pou kontan Zeova?

⁸ Zeova anvi ki bann dimounn servi Li parski zot kontan Li. Alor, nou lobzektif se pou ed nou bann etidian pou konpran ki Zeova vremem gagn zot traka ek ki Li bien kontan zot. Nou anvi ed zot pou trouv Zeova kouma “enn papa pou bann orfelin ek enn protekter pou bann vev.” (Ps. 68:5, NW) Kan to bann etidian realize ki kantite Zeova kontan zot, zot pou koumans kontan Li. Sertin etidian kitfwa trouv sa difisil pou konsider Zeova kouma enn papa ki ena lamour parski zot  prop papa zame pa finn ena lamour ek lafeksion pou zot. (2 Tim. 3:1, 3) Akoz sa, kan to fer letid, met laksan lor bann zoli kalite ki Zeova ena. Ed to bann etidian pou konpran ki nou Bondie ki ena lamour anvi ki zot gagn lavi eternel, ek Li dispoze ed zot pou gagn sa. Ki nou kapav fer ankor?

9-10. Ki bann piblikasion nou bizin servi kan nou fer letid, ek kifer nou bizin servi sa bann liv-la?

⁹ Servi liv “Ki Labib Ansegn Nou?” ek liv “Reste dan l’amour Bondié.” Finn fer sa de piblikasion-la sirtou pou tous leker nou bann etidian Labib. Par exanp, sapit 1 dan liv Ansegn Nou reponn bann kestion kouma: Eski Bondie gagn nou traka?, Ki Bondie resanti kan bann dimounn soufer?, ek Eski ou kapav vinn kamarad Zeova? Me ki nou kapav dir lor liv Reste dan l’amour Bondié? Sa piblikasion-la pou ed nou etidian konpran kouma li kapav amelior so lavi ek vinn pli pros ar Zeova kan li aplik bann prinsip Labib. Mem si to finn deza etidie sa bann liv-la avek lezot dimounn,  prepar twa bien pou sak letid pou ki to kapav adapte li ar seki etidian-la bizin.

¹⁰ Selman, fer koumadir to etidian anvi konn plis lor enn size ki dan enn piblikasion ki pa dan nou Kes Zouti pou Ansegne. Ki to pou fer? Kitfwa to kapav ankouraz li pou lir piblikasion-la par limem pou ki to kapav kontign so letid dan enn sa bann liv ki’nn fek mansione la.

11. Apartir kan eski nou bizin fer lapriyer dan enn letid Labib, ek kouma nou kapav ed nou etidian pou konpran ki sa li inportan?

¹¹ Koumans letid par enn lapriyer. Normalman, kan nou koumans enn letid Labib, pli vit posib li bon ki nou demann nou etidian si nou kapav koumans ek terminn letid-la par enn lapriyer. Nou bizin ed etidian-la pou trouve ki se zis avek led lespri sin Bondie ki nou kapav konpran So Parol. Pou explike kifer nou priye kan nou fer letid, sertin ansegnan servi text Zak 1:5, ki dir: “Si kikenn parmi zot mank lasazes, ki li demande, Bondie pou donn li.” Apre sa, zot demann zot etidian: “Kouma nou kapav demann Bondie so sazes?” Bien souvan, etidian-la dakor ki bizin priye Bondie.

12. Kouma to ti pou servi Psom 139:2-4 pou ed to etidian amelior kalite so bann lapriyer?

¹² Ansegn to etidian kouma pou priye. Ed li pou konpran ki Zeova anvi ekout so bann lapriyer sinser. Explik li ki dan nou bann lapriyer, nou kapav dir Zeova seki nou resanti ek dir Li bann kitsoz ki kitfwa nou pa pou dir lezot. Apre tou, Zeova deza konn nou bann santiman pli profon. (Lir Psom 139:2-4. *) Nou kapav osi ankouraz nou etidian pou demann Bondie ed li pou sanz enn move fason panse ek pou aret bann move labitid. Par exanp, fer koumadir enn etidian kontan fer enn fet ki ena enn lien avek fos relizion alor ki li pe etidie depi inpe letan. Li kone ki sa fet-la pa bon, me li ankor kontan sertin kitsoz dan sa fet-la. Ankouraz li pou dir Zeova exakteman seki li resanti ek pou sipliy Zeova pou ed li kontan zis bann kitsoz ki Zeova kontan.​—Ps. 97:10.

13. (a) Kifer nou bizin invit nou bann letid pou asiste bann renion pli vit posib? (b) Kouma nou kapav fer enn etidian santi li plis alez dan Lasal?

¹³ Invit to etidian pou asiste bann renion pli vit posib. Seki to etidian trouve ek tande pandan bann renion kapav tous so leker ek ed li pou progrese. Montre li video Ki Pase dan Lasal Bann Temwin Zeova? ek invit li pou akonpagn twa. Si posib, dir li vinn renion ansam avek twa. To kapav osi invit diferan proklamater pou akonpagn twa fer so letid. Dan sa fason-la, to letid pou abitie avek lezot proklamater ek li pou santi li plis alez kan li asiste nou bann renion.

14. Ki kapav motiv enn etidian pou fer bann progre?

¹⁴ Nou lobzektif se ed nou etidian Labib pou fer bann progre. (Efe. 4:13, NW) Kan enn kikenn aksepte pou etidie Labib, kitfwa seki atir li o-koumansman se bann bienfe ki li kapav gagne. Me amezir ki so lamour pou Zeova ogmante, kitfwa li pou koumans reflesi kouma li kapav ed lezot, parmi ena osi bann ki deza form parti lasanble. (Mat. 22:37-39) Kan li apropriye, pa ezite pou dir to etidian ki se enn privilez pou soutenir travay predikasion lor plan finans.

15. Kouma nou kapav ed enn etidian pou azir dan enn bon fason kan ena bann problem?

 ¹⁵ Ansegn to etidian seki li bizin fer kan ena bann problem. Par exanp, fer koumadir to etidian, ki enn proklamater ki pa batize, dir twa ki enn kikenn dan lasanble finn ofans li. Olie ki to pran par enn kikenn, explik li seki li bizin fer dapre Labib. Li kapav pardonn frer-la ek bliye sa kitsoz-la. Si li pa kapav pardone, lerla li bizin koz ar frer-la avek bonte ek lamour avek lobzektif pou ‘regagn so frer.’ (Konpar avek Matie 18:15.) Ed to etidian pou prepar seki li bizin dir. Montre li kouma pou servi aplikasion JW Library^®, Liv Resers pou Bann Temwin Zeova, ek jw.org^® pou trouv bann fason pratik pou regle enn sitiasion. Si li aprann kouma pou regle bann problem avek lezot avan ki li pran batem, li pou plis kapav ena enn bon relasion avek lezot dan lasanble apre so batem.

16. Kifer li bon ki nou invit lezot proklamater pou asiste letid avek nou?

¹⁶ Invit lezot dan lasanble ek osi responsab sirkonskripsion kan li vizit to lasanble pou asiste letid avek twa. Kifer? Anplis bann rezon ki’nn mansione lao, bann lezot proklamater kapav ed to etidian dan bann fason ki twa to pa kapav. Par exanp, fer koumadir etidian-la pe esey aret fime, me li pa pe reisi. To kapav invit enn Temwin ki’nn reisi aret fime apre ki li’nn seye plizir fwa. Li kapav donn to etidian bann konsey pratik ki pou ed li. Si to pa santi twa alez pou fer letid devan enn frer ki ena lexperyans, demann li pou fer letid sa zour-la. Kan to demann lezot pou akonpagn twa, to etidian kapav profit zot lexperyans. Pa bliye ki nou lobzektif se pou ed nou etidian fer bann progre.

17-18. Ki to bizin demann tomem avan to desid pou aret enn letid?

¹⁷ Si to etidian pa pe fer bann progre, ariv enn ler li bon to demann tomem: ‘Eski mo bizin aret letid-la?’ Me avan ki to pran sa desizion-la, reflesi lor kapasite dimounn-la. Sa pran plis letan pou sertin dimounn progrese ki lezot. Alor, demann tomem: ‘Eski mo etidian pe fer bann progre ki adapte ar so sitiasion?’ ‘Eski li pe koumans “swiv” ouswa met an pratik bann kitsoz ki li pe aprann?’ (Mat. 28:20) Sa kapav pran letan pou enn etidian vinn enn disip. Me tigit-tigit li bizin fer bann sanzman dan so lavi.

¹⁸ Me ki nou pou fer si enn kikenn pe etidie depi inpe letan me li pa montre ki letid inportan pou li? Anou pran enn lexanp. Fer koumadir to letid inn fini etidie liv Ansegn Nou ek kitfwa li’nn koumans liv Reste dan l’amour Bondié, me zame li pa finn asiste enn renion ouswa mem Memoryal. Anplis, souvan li kennsel so letid pou bann rezon banal. Dan sa ka-la, to bizin  gagn enn konversasion fran avek etidian-la. *

19. Si to etidian pe montre ki so letid pa inportan pou li, ki to kapav dir li, ek ki kitsoz to bizin demann tomem?

¹⁹ Par exanp, to kapav demann li: ‘Ki kitsoz pe anpes twa progrese pou vinn enn Temwin Zeova?’ Lerla, kitfwa etidian-la pou reponn: ‘Mo kontan etidie Labib, me zame mo pa pou vinn enn Temwin Zeova!’ Si li ena enn latitid koumsa apre ki li’nn etidie depi inpe letan, eski li vo lapenn kontign fer so letid? Ouswa, san ki to atann, kitfwa li kapav dir twa seki pe anpes li progrese. Par exanp, kitfwa li panse ki zame li pa pou kapav prese lakaz-lakaz. Asterla ki to kone seki li resanti, to pou plis kapav ed li.

20. Kouma Zistwar Bann Apot 13:48 ed nou pou deside si nou bizin kontign enn letid ouswa non?

²⁰ Malerezman, sertin etidian parey kouma bann Izraelit dan lepok Ezekiel. Konsernan sa bann Izraelit-la, Zeova ti dir Ezekiel: “Gete! Pou zot, to koumadir enn sante romantik, ki’nn sante avek enn zoli lavwa ek ki akonpagne ar enn linstriman ki ena lakord. Zot pou tann to bann parol, me personn pa pou reazir.” (Eze. 33:32) Kitfwa nou kapav trouv sa difisil pou dir enn dimounn ki nou pou aret etidie avek li. Selman, “letan ki reste bien tigit.” (1 Kor. 7:29) Olie ki nou perdi nou letan pou etidie avek enn kikenn ki pa pe fer okenn progre, nou bizin rod bann ki montre ki zot “ena enn bon kondision leker pou gagn lavi eternel.”​—Lir Zistwar Bann Apot 13:48, NW. *

21. Ki nou text pou lane 2020, ek ki sa pou ed nou pou fer?

²¹ Pandan lane 2020, nou text pou lane pou ed nou reflesi kouma nou kapav amelior fason ki nou fer bann disip. Nou text pou lane sorti dan bann parol ki Zezi ti dir pandan renion inportan ki li ti fer lor enn montagn dan Galile. Li ti dir: “Al dan tou bann pep ki ena e fer zot vinn mo bann disip; batiz zot.”​—Mat. 28:19.