1. Kifer boukou frer ek ser pe strese ouswa soufer?

PARTOU lor later, boukou serviter Zeova pas par bann sitiasion ki stres zot ouswa ki mem fer zot soufer. Eski dan to lasanble ena bann frer ek ser ki dan bann sitiasion koumsa? Kitfwa sertin Kretien pe soufer akoz enn maladi grav ouswa enn kikenn ki zot kontan inn mor. Lezot kitfwa bien tris parski enn manb zot fami ouswa enn bon kamarad inn kit laverite. Ena lezot ankor ki pe soufer akoz bann katastrof natirel. Tou sa bann frer ek ser-la bizin konsolasion. Kouma nou kapav ed zot?

2. Kifer lapot Pol parfwa ti bizin gagn rekonfor?

² Lapot Pol ti pas par plizir sitiasion ki ti met so lavi an danze. (2 Kor. 11:23-28, NW) Anplis, li ti ena “enn pikan dan laser,” kitfwa enn problem lasante. (2 Kor. 12:7, NW) Pol ti osi bien tris kan Demas, enn frer ki ti travay ansam avek li dan servis Zeova, ti abandonn li. Labib dir ki “Demas [ti] prefer lemonn prezan.” (2 Tim. 4:10) Pol ti enn Kretien ki ti ena lesperans pou al dan lesiel, li ti ena kouraz ek li ti kontan ed lezot. Malgre sa, parfwa li ti santi li dekouraze.​—Rom. 9:1, 2.

3. Kouma Zeova ti ed ek rekonfort Pol?

³ Pol ti gagn led ek rekonfor ki li ti bizin. Kouma? Pena dout ki Zeova ti servi so lespri sin pou fortifie Pol. (2 Kor. 4:7; Fil. 4:13, NW) Zeova ti osi servi bann lezot Kretien pou rekonfort li. Pol ti dir ki sertin parmi zot ti donn li boukou “konsolasion.” (Kol. 4:11) Li ti sit nom sertin sa bann Kretien-la. Parmi ti ena Aristark, Tisik, ek Mark. Zot  ti fortifie Pol, ek sa ti ed li pou andir so bann leprev. Ki bann kalite ti ed sa trwa Kretien-la pou rekonfort Pol? Kouma nou kapav imit zot lexanp kan nou pe esey rekonfort ek ankouraz lezot?

4. Kouma Aristark ti montre ki li ti enn kamarad fidel anver Pol?

⁴ Aristark ti enn Kretien ki ti sorti Tesalonik dan Masedwann. Li ti enn kamarad ki ti res fidel anver Pol. Premie fwa ki Labib koz lor Aristark se kan Pol ti al Efez pandan so trwaziem vwayaz misioner. Letan Aristark ti pe akonpagn Pol, enn lafoul dimounn ti pran Aristark par fors. (Zist. 19:29) Kan finalman sa lafoul-la ti liber li, li pa ti esey sove pou protez limem. Okontrer, li ti fidel anver Pol ek li ti res avek li. Plizir mwa apre, dan Lagres, Aristark ti ankor pe akonpagn Pol mem si sertin dimounn ti pe rod touy Pol. (Zist. 20:2-4) Ver 58 Nou Lepok, kan larme Romin ti amenn Pol dan Rom kouma prizonie, Aristark ti akonpagn li pou fer sa long vwayaz-la dan bato. Alor, zot ti ansam kan zot bato ti fer nofraz. (Zist. 27:1, 2, 41) Kan zot ti ariv Rom, li paret ki Aristark ti ansam avek Pol dan prizon pandan enn tan. (Kol. 4:10) Sa pa etonn nou ki enn kamarad koumsa ti bien ankouraz Pol ek rekonfort li!

5. Dapre Proverb 17:17, kouma nou kapav vinn enn kamarad ki fidel?

⁵ Kouma nou kapav montre ki nou enn kamarad fidel parey kouma Aristark? Se kan nou res atase ar nou bann frer ek ser pa zis dan bann bon moman, me osi dan “bann moman difisil.” (Lir Proverb 17:17. *) Mem si enn frer ouswa enn ser nepli pe pas par bann leprev, li posib ki li ankor bizin rekonfor. Par exanp, Frances * so mama ek so papa ti mor ar kanser dan lespas trwa mwa. Li dir: “Mo rann mwa kont ki enn leprev kapav afekte nou pandan enn bon bout letan. Mo  bien apresie ki mo bann kamarad fidel pa finn bliye ki mo ankor pe soufer, mem si sa fer inpe letan depi ki mo bann paran inn mor.”

6. Ki nou pou fer si nou fidel?

⁶ Bann kamarad ki fidel fer bann sakrifis pou ed zot bann frer ek ser. Par exanp, enn frer ki apel Peter ti ena enn maladi bien grav ek li pa ti res boukou letan pou viv. So madam, Kathryn, dir: “Enn koup dan nou lasanble ti amenn nou kot dokter ek sa zour-la nou ti dekouver Peter so maladi. Apartir sa moman-la, zot ti deside ki zot pa ti pou les nou andir sa sitiasion-la tousel, ek zot ti touletan la kan nou ti bizin zot.” Sa vremem rekonfort nou kan nou ena bann bon kamarad ki kapav ed nou pou andir nou bann leprev!

7-8. Dapre Kolosien 4:7-9, kouma Tisik ti montre ki li ti enn kikenn ki lezot kapav fer konfians?

⁷ Tisik, enn Kretien ki ti sorti dan distrik Lazi, ti montre ki li ti enn kamarad ki Pol ti kapav fer konfians. (Zist. 20:4) Ver 55 Nou Lepok, Pol ti demann bann Kretien pou ramas kas pou ed bann Kretien ki ti dan Zide. Li posib ki Tisik ti partisip dan sa mision bien inportan la. (2 Kor. 8:18-20, NW) Plitar, kan Pol ti anprizone dan Rom pou premie fwa, se Tisik ki ti fer mesaze pou li. Li ti al kit bann let ek bann mesaz Pol pou ankouraz bann frer ek ser dan bann lasanble ki ti dan Lazi.​—Kol. 4:7-9.

⁸ Tisik ti enn kamarad ki Pol ti touletan kapav fer konfians. (Tit 3:12) Sa lepok-la, pa tou Kretien ki ti fiab kouma Tisik. Ver 65 Nou Lepok, kan Pol ti anprizone pou deziem fwa, li ti ekrir ki boukou Kretien dan distrik Lazi ti evit frekant li. Kitfwa sa bann frer-la ti per bann dimounn ki ti ena laenn pou bann Kretien. (2 Tim. 1:15) Parkont, Pol ti kapav kont lor Tisik ek li ti mem donn li enn lot mision. (2 Tim. 4:12) Pena dout ki Pol ti bien kontan pou ena enn bon kamarad kouma Tisik!

9. Kouma nou kapav imit Tisik?

 ⁹ Nou kapav imit lexanp Tisik kan nou vinn enn kamarad ki lezot kapav fer konfians. Par exanp, nou pa pou zis promet ki nou pou ed nou bann frer ek ser ki dan difikilte, me nou pou osi fer bann kitsoz pratik pou zot. (Mat. 5:37, NW; Lik 16:10) Kan bann ki bizin led kone ki zot kapav kont lor nou, sa vremem rekonfort zot. Enn ser explike kifer. Li dir: “To ena enn stres an mwins kan to pena pou demann tomem si sa dimounn ki’nn propoz so led la pou vremem respekte so parol kan to bizin li.”

10. Dapre Proverb 18:24, si enn kikenn pe bizin sirmont enn problem ouswa enn desepsion, ar kisannla li kapav gagn rekonfor?

¹⁰ Bann dimounn ki pe soufer akoz enn difikilte ouswa enn desepsion, souvan santi zot bien kan zot ouver zot leker ar enn kamarad ki zot kapav fer konfians. (Lir Proverb 18:24. *) Bijay ti bien tris kan so gran garson ti exkli. Li ti dir: “Mo ti bien bizin exprim mo bann santiman ar enn kikenn ki mo fer konfians.” Carlos ti fer enn pese. Akoz sa, li ti perdi enn privilez servis ki li ti bien kontan. Carlos dir ki li ti bizin enn dimounn pou exprim so santiman san ki sa dimounn-la ziz li. Alor, li ti koz avek bann ansien ek zot ti ed li pou sirmont so problem. Anplis, sa ti rekonfort li parski li ti kone ki bann ansien ti pou gard seki li’nn dir konfidansiel.

11. Kouma nou kapav vinn enn kamarad ki lezot fer konfians?

¹¹ Si nou anvi vinn enn kamarad ki lezot kapav fer konfians, nou bizin ena pasians. Kan Zhanna so mari ti kit li, sa ti rekonfort li kan li ti dir so bann bon kamarad seki li ti resanti. Li dir: “Zot ti ekout mwa avek pasians mem si mo ti dir zot plizir fwa mem kitsoz.” Twa osi to pou vinn enn bon kamarad si to konn ekout lezot.

12. Kisannla Mark ti ete, ek kouma eski li’nn montre ki li ti ena enn lespri volonter?

¹² Mark ti enn Kretien Zwif ki ti sorti Zerizalem. So kouzin, Barnabe, ti enn misioner ki bann dimounn ti bien kone. (Kol. 4:10) Li paret ki Mark so fami ti ase ris. Pourtan, Mark pa ti fer bann kitsoz materyel pas an premie dan so lavi. Toutlong so lavi, Mark ti montre ki li ti ena enn lespri volonter. Li ti kontan servi lezot. Par exanp, plizir fwa li ti akonpagn lapot Pol ek lapot Pier dan zot servis. Kitfwa Mark ti aste manze pou zot, rod enn plas pou zot reste, ek fer lezot kitsoz ankor. (Zist. 13:2-5; 1 Pier 5:13, NW) Pol ti dir ki Mark ti enn kikenn ki ti “travay ek [li] pou Rwayom Bondie” ek ki ti donn li “konsolasion.”​—Kol. 4:10, 11.

13. Kouma 2 Timote 4:11 montre ki Pol ti apresie Mark pou so servis fidel?

¹³ Mark ti enn parmi bann bon kamarad Pol. Par exanp, ver 65 Nou Lepok, kan Pol ti anprizone pou dernie fwa dan Rom, li ti ekrir Timote enn deziem let. Dan sa let-la, Pol ti demann Timote pou vinn Rom ek pou amenn Mark avek li. (2 Tim. 4:11) Pena dout ki Pol ti bien apresie Mark pou so servis fidel, akoz sa li ti anvi pas sa bann dernie moman inportan la ansam avek Mark. Mark ti donn Pol bann led bien pratik, kitfwa li ti al kit manze pou Pol ek ti donn li seki li ti bizin pou ekrir. Gras-a led ek lankourazman ki Pol  ti gagne, pena dout ki sa ti ed li pou andire ziska so exekision.

14-15. Kouma Matie 7:12 ansegn nou pou ed lezot dan enn fason pratik?

¹⁴ Lir Matie 7:12. Kan nou pe pas par bann sitiasion difisil, nou bien kontan kan lezot ed nou dan enn fason pratik. Ryan, ki enn kout koumsa, ti perdi so papa dan enn aksidan bien grav, dir: “Ena boukou kitsoz ki nou abitie fer toulezour me ki paret inposib pou fer kan nou pe soufer. Alor kan nou gagn enn koudme, mem si li pa enn gran kitsoz, sa fer boukou dibien.”

¹⁵ Si nou ekout ek obzerv bien, nou pou trouv bann mwayin pou ed lezot. Par exanp, enn ser ti desid pou ed Peter ek Kathryn, ki nou ti mansione avan, pou al zot bann randevou kot dokter. Peter ek Kathryn toulede ti nepli kapav kondir, alor sa ser-la ti fer enn program pou ki bann frer ek ser dan so lasanble sakenn so tour amenn sa koup-la dan zot randevou. Eski sa dispozision-la ti ed sa koup-la? Kathryn dir: “Koumadir zot ti tir enn fardo lor nou zepol.” Zame pa bliye ki to kapav bien rekonfort lezot mem si to fer bann ti kitsoz pou zot.

16. Kouma lexanp Mark montre nou linportans pou rekonfort lezot?

¹⁶ Pena dout ki disip Mark ti enn Kretien ki ti bien okipe. Li ti ena bann gran responsabilite dan servis Zeova, par exanp li ti ekrir Levanzil ki port so nom. Pourtan, Mark ti trouv letan pou rekonfort Pol, ek Pol ti kone ki li ti kapav demann Mark so led. Angela ti bien rekonesan anver tou bann ki ti rekonfort li kan enn manb so fami ti asasine. Angela dir: “Kan bann kamarad vremem anvi ede, li fasil pou koz ar zot. Mo ti trouve ki zot pa ti ezite pou ed mwa.” Nou kapav demann noumem: ‘Eski lezot konn mwa kouma enn kikenn ki pre pou rekonfort mo bann frer ek ser dan enn fason pratik?’

17. Kan nou medit lor 2 Korintien 1:3, 4, kouma sa motiv nou pou rekonfort lezot?

¹⁷ Li pa difisil pou trouv bann frer ek ser ki bizin rekonfor. Pou ed zot, nou kapav  servi bann mem panse ki lezot inn servi pou rekonfort nou. Nino, enn ser ki’nn perdi so granmer dan lamor, dir: “Zeova kapav servi nou pou rekonfort lezot si nou les Li servi nou.” (Lir 2 Korintien 1:3, 4.) Frances, ki nou ti mansione avan, dir: “Seki 2 Korintien 1:4 dir, li vre. Nou kapav rekonfort lezot gras-a rekonfor ki noumem nou gagne.”

18. (a) Kifer sertin ezite pou rekonfort lezot? (b) Pou ki nou reisi rekonfort lezot, ki nou bizin fer? Donn enn lexanp.

¹⁸ Nou bizin rod bann mwayin pou ed lezot mem si nou pe ezite pou fer sa. Par exanp, kitfwa nou ezite parski nou pa kone ki pou dir ouswa ki pou fer kan enn dimounn bizin rekonfor. Enn ansien ki apel Paul rapel bann zefor ki sertin ti fer pou rekonfort li kan so papa ti mor. Li dir: “Mo ti trouve ki sa ti difisil pou zot pou vinn ver mwa. Zot pa ti kone ki pou dir. Me sa ti bien tous mwa kan mo ti trouve ki zot ti anvi rekonfort ek soutenir mwa.” Enn lot frer ki apel Tajon ti afekte par enn gran tranbleman-de-ter. Li dir: “Mo pa rapel tou bann mesaz ki mo ti gagne zis apre sa tranbleman-de-ter-la. Me seki mo rapel, seki bann frer ek ser ti gagn mo traka, akoz sa zot ti pran mo nouvel.” Si nou interes nou ar lezot, nou pou reisi rekonfort zot.

19. Kifer to bien deside pou donn lezot “konsolasion”?

¹⁹ Amezir ki nou pe apros ar lafin, bann kondision dan lemond pou vinn pli pir ek lavi pou vinn pli difisil. (2 Tim. 3:13, NW) Anplis, touletan nou pou bizin gagn rekonfor parski nou inparfe ek nou kontign fer bann erer. Enn rezon kifer Pol ti reisi andir so bann leprev ek res fidel ziska lamor, se parski bann frer ek ser ti rekonfort li. Alor, anou vinn enn kikenn ki fidel kouma Aristark, enn kikenn ki lezot kapav fer konfians kouma Tisik, ek enn kikenn ki kontan servi lezot kouma Mark. Kan nou fer sa, nou pou kapav ed nou bann frer ek ser pou kontign servi Zeova avek fidelite.​—1 Tes. 3:2, 3, NW.