DAN Musée des pays de la Bible dan Zerizalem, ena enn ros avek bann lekritir lor la. Sa bann lekritir-la ti ekrir ant 700-600 avan Zezi Kris. Ti dekouver sa ros-la dan enn lagrot ki ti servi kouma enn tonbo, pa tro lwin ar Ebron dan Izrael. Bann lekritir-la ti dir: “Ki Yahweh Sabaot modi Hagaf garson Hagav.” Kouma sa bann lekritir-la konfirm seki ena dan Labib? Sa bann lekritir-la montre ki nom Bondie, Zeova, ki ti ekrir YHWH dan ansien Ebre, ti bien popiler dan lepok Biblik ek ki bann dimounn ti pe servi li dan zot lavi toulezour. Dan sa bann lagrot-la, ti ena bann lezot lekritir ki bann dimounn ti ekrir kan zot ti zwenn ansam ouswa kan zot ti kasiet dan sa bann lagrot-la. Souvan, zot ti ekrir nom Bondie lor miray, avek bann lezot nom kot servi nom Bondie.

Konsernan sa bann lekritir-la, Dr. Rachel Nabulsi ki travay dan liniversite Zeorzi, dir: “Ena plizir fwa nom YHWH dan sa bann lekritir-la. Sa ansegn nou enn kitsoz bien inportan. . . . Sa bann lekritir-la montre nou linportans YHWH dan lavi bann abitan Izrael ek Zida.” Sa li an-akor avek Labib, kot ena plizir milye fwa nom Bondie, ki ekrir YHWH an Ebre. Anplis, sa lepok-la, souvan ti servi nom Bondie dan nom bann dimounn.

Bann mo “Yahweh Sabaot” ki ti ekrir lor sa ros-la, vedir “Zeova Sef bann larme.” Sa montre ki bann dimounn dan lepok Biblik pa ti zis servi nom Zeova, me zot ti osi servi lexpresion “Zeova Sef bann larme.” Sa osi li an-akor avek Labib, kot lexpresion “Zeova Sef bann larme” aparet 283 fwa dan bann Lekritir Ebre, sirtou dan bann liv ki Izai, Zeremi, ek Zakari ti ekrir.