1. Ki kitsoz montre ki ena bien tigit lamour dan boukou fami azordi?

LABIB ti predir ki dan bann dernie zour bann dimounn pa ti pou ena “okenn lafeksion natirel.” (2 Tim. 3:1, 3, NW) Nou trouv sa profesi-la pe realize azordi. Par exanp, ena boukou fami kot bann paran divorse ek zot ankoler ar zot kamarad, ek zot zanfan panse ki zot bann paran pa kontan zot. Mem bann manb enn fami ki res dan mem lakaz kitfwa pa pros ant zot. Enn exper lor lafami dir: “Mama, papa, ek bann zanfan nepli koz ar zot kamarad. Zot pas laplipar zot letan lor computer, tablet, telefonn, ouswa pou zwe bann game. Mem si zot res dan mem lakaz, zot pa konn bien zot kamarad.”

2-3. (a) Dapre Romin 12:10, pou kisannla nou bizin ena enn gran lafeksion? (b) Ki nou pou examine dan sa lartik-la?

² Nou pa anvi les nou inflianse par sa lemond-la ek vinn kouma bann dimounn ki pena lamour. (Rom. 12:2) Okontrer, nou bizin ena enn gran lafeksion pou bann manb nou fami, me osi pou nou bann frer ek ser dan lasanble. (Lir Romin 12:10.) Lor ki kalite lafeksion nou pe koze? Lafeksion ki ena ant bann manb enn fami ki ena enn lamour bien for ant zot. Se sa kalite lamour-la ki nou bizin devlope pou nou bann frer ek ser dan lasanble. Kan nou montre enn gran lafeksion pou nou bann frer ek ser, nou ede pou ki zot tou kapav servi Zeova ansam ek dan lazwa.​—Mish. 2:12.

³ Anou gete seki nou kapav aprann ar bann lexanp Biblik. Sa pou ed nou pou kiltiv ek montre enn gran lafeksion.

4. Ki Zak 5:11 dir nou konsernan lamour ki Zeova ena?

⁴ Labib koz lor bann zoli kalite ki Zeova ena. Par exanp, li dir ki “Bondie limem lamour.” (1 Zan 4:8) Kan nou konn sa, nou anvi vinn Zeova so kamarad. Me Labib dir osi ki “Li ranpli ar lafeksion.” (Lir Zak 5:11, NW.) Se enn zoli fason pou dekrir ki kantite Zeova kontan nou, pa vre!

5. Dan ki fason Zeova montre mizerikord, ek kouma nou kapav imit Li?

⁵ Zak 5:11 koz lor enn lot kalite bien atiran ki ena enn lien ar lafeksion ki Zeova ena pou nou. Ki sa kalite-la sa? So mizerikord. (Ex. 34:6) Enn fason ki Zeova montre so mizerikord se kan Li pardonn nou pou bann erer ki nou fer. (Ps. 51:1) Dan Labib, mizerikord vedir plis ki zis pardonn enn kikenn. Mizerikord se enn santiman bien for ki enn kikenn ena kan li trouv enn lot dimounn dan problem ek sa santiman-la pous li pou ed sa dimounn-la. Zeova ena enn gran dezir pou ed nou, ek sa santiman-la bien pli for ki santiman ki enn mama ena pou so zanfan. (Iza. 49:15) Kan nou dan problem, mizerikord Zeova motiv Li pou ed nou. (Ps. 37:39; 1 Kor. 10:13) Nou kapav montre mizerikord anver nou bann frer ek ser kan nou pardonn zot ek nou pa res ankoler ar zot kan zot desevwar nou. (Efe. 4:32) Enn lot fason ki nou kapav montre mizerikord se kan nou soutenir nou bann frer ek ser kan zot dan problem. Nou imit Zeova, ki montre plis lafeksion ki ninport kisannla, kan nou ena mizerikord anver lezot.​—Efe. 5:1.

6. Dekrir lamitie ki ti ena ant David ek Zonatan.

⁶ Labib koz lor bann imin inparfe ki ti montre enn gran lafeksion. Anou get  lexanp David ek Zonatan. Labib dir: “Li ti koumans kontan David kouma li kontan limem, ek David ek Zonatan ti devlop enn lamitie bien for.” (1 Sam. 18:1) Zeova ti swazir David pou ki li vinn lerwa apre Sail. Sail ti telman zalou David ki li ti rod touy li. Me Zonatan, garson Sail, pa ti soutenir so papa kan li ti rod touy David. David ek Zonatan ti promet ki zot ti pou res kamarad ek ki zot ti pou touletan soutenir zot kamarad.​—1 Sam. 20:42.

7. Ki kitsoz ti kapav anpes David ek Zonatan pou vinn kamarad?

⁷ Lafeksion ki ti ena ant David ek Zonatan, li ankor pli zoli kan nou get tou bann kitsoz ki ti kapav anpes zot vinn kamarad. Par exanp, Zonatan ti anviron 30 an pli gran ki David. Zonatan ti kapav panse ki li pena nanye an komin avek enn kikenn ki pli zenn ek ki ena mwins lexperyans ki li. Me Zonatan pa ti pans koumsa. Li ti ena enn gran respe pou David.

8. Dapre twa, kifer Zonatan ti enn bon kamarad pou David?

⁸ Zonatan ti kapav zalou David. Zonatan ti garson Lerwa Sail, alor li ti kapav insiste ki li ena drwa pou vinn prosin lerwa. (1 Sam. 20:31) Me Zonatan ti ena limilite, ek li ti fidel ar Zeova. Akoz sa, kan Zeova ti swazir David kouma prosin lerwa, li ti soutenir sa desizion-la. Zonatan ti osi res fidel ar David, mem si sa ti fer Sail bien ankoler.​—1 Sam. 20:32-34.

9. Eski Zonatan ti konsider David kouma so rival? Explike.

⁹ Zonatan ti kontan David. Akoz sa, li pa ti zalou li. Zonatan ti ena boukou kouraz ek li ti partisip dan boukou lager. Li ti bien konn servi bann lark ek bann fles. Li ek so papa ti “pli rapid ki bann leg” ek “pli for ki bann lion,” ek lepep ti konn sa bien. (2 Sam. 1:22, 23) Alor, Zonatan ti kapav fer vantar ar tou seki li ti reisi fer. Selman, li pa ti esey vinn pli bon ki David ek li pa ti zalou bann bon kitsoz ki David ti fer. Okontrer, Zonatan ti admir kouraz ki David ti ena ek fason ki li ti kont lor Zeova. Par exanp, apre ki David ti touy Goliat, Zonatan ti koumans vinn bien pros ar David. Kouma nou kapav kontan nou bann frer ek ser parey kouma Zonatan ti kontan David?

10. Ki savedir “kontan sakenn zot kamarad avek enn gran lamour, avek tou zot leker”?

¹⁰ Labib dir ki nou bizin “kontan sakenn [nou] kamarad avek enn gran lamour, avek tou [nou] leker.” (1 Pier 1:22, NW) Zeova donn nou lexanp dan sa domenn-la. Li telman kontan nou ki, si nou res fidel ar Li, zame Li pa pou aret kontan nou. (Rom. 8:38, 39) Mo Grek ki’nn servi pou “gran,” vedir fer boukou zefor. Parfwa, li pa fasil pou montre lamour anver nou bann frer ek ser. Kan lezot fer nou ankoler, nou bizin kontign ‘soutenir nou kamarad avek amour, fer zefor pou gard linite Lespri par lape ki tini nou ansam.’ (Efe. 4:1-3) Si nou fer boukou zefor pou res anpe avek nou bann frer ek ser, nou pa pou konsantre nou lor zot bann erer. Nou pou fer nou maximum pou trouv nou bann frer ek ser dan mem fason ki Zeova trouv zot.​—1 Sam. 16:7; Ps. 130:3.

11. Kifer parfwa li kapav difisil pou devlop enn gran lafeksion?

 ¹¹ Li pa fasil pou montre enn gran lafeksion anver nou bann frer ek ser, sirtou kan nou konn zot bann defo. Li paret ki sa ti difisil osi pou sertin Kretien dan premie siek. Par exanp, Evodi ek Sintish pa ti ena okenn problem pou travay “ansam avek [Pol] pou propaz Bonn Nouvel.” Me Evodi ek Sintish ti gagn difikilte pou adapte zot ar zot kamarad. Akoz sa, Pol ti ankouraz zot “pou viv anakorite dan Lesegner.”​—Fil. 4:2, 3.

12. Kouma nou kapav devlop enn gran lafeksion pou nou bann frer ek ser?

¹² Kouma azordi nou kapav devlop enn gran lafeksion pou nou bann frer ek ser? Kan nou aprann konn nou bann frer ek ser pli bien, kitfwa li pou pli fasil pou nou konpran zot ek devlop enn gran lafeksion pou zot. Fode pa ki nou les nou laz ouswa nou kiltir anpes nou fer kamarad ar lezot. Rapel ki Zonatan ti apepre 30 an pli gran ki David, me kanmem sa, li ti devlop enn lamitie bien for pou li. Eski twa osi to kapav vinn kamarad ar enn kikenn dan to lasanble ki pli vie ouswa pli zenn ki twa? Kan to fer sa, to montre ki to “kontan [to] bann frer e ser dan lafwa.”​—1 Pier 2:17.

13. Kifer kitfwa nou santi nou pli pros ar sertin dan lasanble?

¹³ Kan nou ena enn gran lafeksion pou nou bann frer ek ser, eski savedir ki nou bizin ena enn lamitie bien for pou zot tou dan lasanble? Non, parski sa li inposib. Li normal ki nou santi nou pli pros ar sertin parski nou ena bann kitsoz an komin avek zot. Zezi ti apel so bann zapot “kamarad,” me li ti pli pros ar Zan. (Zan 13:23; 15:15; 20:2) Selman, Zezi pa ti tret Zan pli bien ki lezot. Par exanp, kan Zan ek so frer Zak ti demann Zezi pou donn zot enn plas inportan dan Rwayom Bondie, Zezi ti dir zot: “Pou kone kisannla pou asiz dan mo  kote drwat ek mo kote gos, sa pa depann lor mwa.” (Mark 10:35-40) Parey kouma Zezi, fode pa ki nou tret nou bann kamarad pli bien ki lezot. (Zak 2:3, 4) Si nou fer sa, nou pou kree divizion, ek divizion pena so plas dan lasanble.​—Zid 17-19.

14. Kouma Filipien 2:3 kapav ed nou pou ki nou pena lespri konpetision?

¹⁴ Kan nou montre enn gran lafeksion anver nou kamarad, nou protez lasanble kont lespri konpetision. Rapel ki Zonatan pa ti zalou David, ek li pa ti esey vinn lerwa dan plas David. Nou tou nou kapav imit lexanp Zonatan. Pa zalou to bann frer ek ser akoz zot bann kapasite, “me avek imilite, konsider lezot meyer ki [tomem].” (Lir Filipien 2:3.) Pa bliye ki tou dimounn ena so plas dan lasanble. Si nou ena limilite, nou pou kapav trouv bann zoli kalite ki nou bann frer ek ser ena, ek nou pou aprann ar zot lexanp.​—1 Kor. 12:21-25.

15. Ki nou kapav aprann ar lexanp Tanya ek so fami?

¹⁵ Kan bann move kitsoz arive dan nou lavi, Zeova rekonfort nou gras-a lafeksion ek led pratik ki nou gagne ar nou bann frer ek ser. Anou get seki ti ariv enn fami ki ti ena trwa zanfan. Zot ti asiste enn parmi nou bann lasanble internasional 2019 “Lamour Pa Pou Disparet Zame!” dan Letazini. Mama-la, ki apel Tanya, rakonte: “Kan nou ti pe sorti lasanble Samdi, ek nou ti pe retourn lotel, enn loto ti tap ar nou. Personn pa ti blese, me nou ti gagn sok.  Nou ti sorti dan loto ek nou ti debout lor sime. Lerla, enn kikenn ti dir nou rant dan so loto pou ki nou an sekirite. Ofet, se enn frer ki ti fek sorti lasanble. Ek pa zis li tousel ki’nn arete, ti ena osi sink delege ki ti sorti Laswed. Bann ser-la ti may mwa ek mo tifi bien for, ek sa ti fer nou boukou dibien! Mo ti dir sa bann frer ek ser la ki nou ti pou korek, ek ki zot ti kapav ale. Me zot ti res avek nou, mem apre ki lanbilans ti vini, ek zot ti fer sir ki nou ti ena tou seki nou bizin. Pandan sa moman difisil la, nou ti resanti lamour Zeova. Seki nou’nn viv, finn ogmant nou lamour pou nou bann frer ek ser, ek ranforsi nou lamour ek nou rekonesans anver Zeova.” Eski twa osi to rapel enn moman kot to ti bizin led ek ki enn parmi to bann konpagnon finn montre twa enn gran lafeksion?

16. Kifer nou bizin montre enn gran lafeksion anver sakenn nou kamarad?

¹⁶ Reflesi lor bann bon kitsoz ki arive kan nou montre enn gran lafeksion anver nou kamarad. Nou rekonfort nou bann frer ek ser kan zot dan problem. Nou ranforsi linite ki ena dan pep Zeova. Nou montre ki nou bann disip Zezi, ek sa atir bann dimounn ki sinser ek fer zot anvi servi Zeova. Me pli inportan, nou donn laglwar Zeova, nou “Papa ki ena mizerikord ek [ki] toultan konsol nou.” (2 Kor. 1:3) Alor, anou kontign devlop ek montre enn gran lafeksion!