1. Parey kouma Lerwa David, ki kestion sertin kapav poz zotmem?

NOU tou nou anvi ena enn lavi kalm, ek personn pa kontan gagn traka. Me parfwa, li arive ki nou fer fas ar bann sitiasion difisil. Se pou sa rezon-la ki sertin serviter Zeova poz mem kestion ki Lerwa David ti demann Zeova: “Komie letan ankor mo pou kourbe ar traka? Komie letan ankor lapenn pou nway mo leker lanwit-lizour?”​—Ps. 13:2.

2. Ki nou pou examine dan sa lartik-la?

² Mem si nou tou parfwa nou trakase, ena bann kitsoz ki nou kapav fer pou ki nou mwins trakase. Dan sa lartik-la, nou pou examinn bann kitsoz ki kapav fer nou trakase. Apre sa, nou pou examinn sis kitsoz ki pou ed nou gard nou kalm kan nou ena bann problem.

3. Ki bann kitsoz kapav fer nou trakase, ek eski nou kapav anpes sa bann kitsoz-la arive?

³ Ena boukou kitsoz ki kapav fer nou trakase, ek nou pena kontrol lor tou sa bann kitsoz-la. Par exanp, nou pa kapav anpes pri manze, linz, ek lakaz ogmante. Nou pena kontrol osi lor kantite fwa ki nou bann koleg travay ouswa nou bann kamarad lekol pou esey tant nou pou fer enn kitsoz ki malonet ouswa imoral. Nou pa kapav osi anpes bann dimounn fer bann move kitsoz dan nou landrwa.  Nou fer fas ar sa bann sitiasion-la parski nou pe viv dan enn lemond kot laplipar dimounn zot fason panse pa baze lor bann prinsip Labib. Satan, bondie sa lemond-la, kone ki sertin dimounn pou les “bann problem lavi tou lezour” anpes zot servi Zeova. (Mat. 13:22; 1 Zan 5:19) Alor, sa pa etonn nou ki lemond ranpli ar problem ki fer bann dimounn trakase!

4. Ki kapav arive si nou trakase plis ki bizin akoz nou bann problem?

⁴ Parfwa, nou kapav telman trakase akoz nou bann problem, ki nou pa kapav aret pans sa. Par exanp, kitfwa nou trakase tansion nou pena ase kas pou aste seki nou bizin. Ouswa nou trakase tansion nou tom malad ek ki nou pa reisi travay ouswa mem ki nou perdi nou travay. Kitfwa nou trakase osi tansion nou dezobeir bann lalwa Bondie. Biento, Satan pou pous bann dimounn pou atak pep Bondie, ek kitfwa nou trakase parski nou pa kone kouma nou pou reazir kan sa pou arive. Alor, nou kapav demann noumem, ‘Eski li bon ki mo trakase pou sa bann kitsoz-la?’

5. Ki Zezi ti pe rod dir, kan li ti dir: “Aret trakase”?

⁵ Zezi ti dir so bann disip: “Aret trakase.” (Mat. 6:25, NW) Eski li ti pe rod dir ki fode pa nou trakase ditou? Non! Pa bliye ki ena bann serviter Zeova dan lepase ki ti trakase zot osi. Me kanmem sa, zot ti ena faver Zeova. * (1 Ler. 19:4; Ps. 6:3) An realite, Zezi ti pe rasir nou. Li pa ti anvi ki nou telman trakase akoz bann kitsoz ki nou bizin, ki sa ena enn lefe negatif lor nou servis pou Zeova. Me ki nou kapav fer kan nou trakase?​—Get lankadre “ Kouma To Kapav Fer Sa?”

6. Dapre Filipien 4:6, 7, ki kapav ed nou pou gard nou kalm?

⁶ (1) Priye souvan. Kan nou trakase akoz enn problem, nou kapav priye Zeova pou rod so led. (1 Pier 5:7) Zeova pou reponn nou bann lapriyer ek Li kapav donn nou “lape Bondie ki depas tou konesans [imin].” (Lir Filipien 4:6, 7, NW. *) Zeova pou donn nou sa lape-la gras-a so lespri sin.​—Gal. 5:22, NW.

7. Ki nou bizin rapel kan nou priye Bondie?

⁷ Kan to priye Zeova, devid to leker ar Li. To bizin presi dan to bann lapriyer. Dir li seki pe fatig twa, ek explik Li seki to resanti. Si li posib pou regle problem-la, demann Li lasazes pou kone ki to bizin fer ek lafors pou fer seki bizin. Si to pa kapav fer nanye pou rezoud sa problem-la, demann Zeova pou ed twa pou to pa trakase plis ki bizin. Kan to presi dan to bann lapriyer, to pou trouv pli bien kouma Zeova reponn twa. Si Li pa reponn to bann lapriyer deswit, pa aret priye. Zeova pa zis anvi ki to presi dan to bann lapriyer, me Li anvi ki to kontign priye lor la.​—Lik 11:8-10.

8. Ki kitsoz nou bizin mansione dan nou bann lapriyer?

⁸ Kan to zet tou to traka lor Zeova dan lapriyer, pa bliye pou remersie Li. Li bon ki nou reflesi lor tou bann bon kitsoz ki nou ena, mem si nou ena boukou  problem. Me ki to kapav fer si to pa kone kouma to pou dir Zeova seki to pe resanti? Rapel ki Zeova pou reponn to lapriyer mem si to zis kapav dir Li ‘Ed mwa!’​—2 Kro. 18:31; Rom. 8:26, NW.

9. Ki nou bizin fer kan nou gagn per?

⁹ (2) Kont lor sazes Zeova, pa lor to prop sazes. Dan lepok profet Izai, pep Zida ti per ki bann Asirien atak zot. Zot pa ti anvi ki bann Asirien dominn lor zot, akoz sa zot ti demann led bann Ezipsien. (Iza. 30:1, 2) Zeova ti averti zot ki si zot fer konfians bann Ezipsien, sa ti pou mal fini pou zot. (Iza. 30:7, 12, 13) Zeova ti servi profet Izai pou dir so pep kotsa zot kapav gagn vre sekirite. Li ti dir: “Kan zot res kalm ek zot fer [Zeova] konfians, se samem ki pou zot lafors.”​—Iza. 30:15b.

10. Dan ki sitiasion nou kapav montre ki nou fer Zeova konfians?

¹⁰ Kouma nou kapav montre ki nou fer Zeova konfians? Anou get de-trwa lexanp. Fer koumadir to’nn gagn enn travay ki pey plis me ki pou pran plis to letan ek ki pou anpes twa servi Zeova kouma to pe fer asterla. Ouswa enn kikenn dan to travay interese ar twa, me sa dimounn-la li pa enn serviter Zeova. Ouswa mazine ki enn manb to fami dir twa ki li pou rezet twa si to kontign servi Zeova. Dan tou sa bann sitiasion-la, to ena enn desizion difisil pou pran. Me to kapav sir ki Zeova pou gid twa. (Mat. 6:33; 10:37; 1 Kor. 7:39) Eski to pou fer Zeova konfians ek to pou obeir so direksion?

11. Pou ed nou res kalm kan nou fer fas ar lopozision, ki bann lexanp Biblik nou kapav etidie?

¹¹ (3) Aprann ar bann bon ek bann move lexanp. Dan Labib, ena boukou lexanp ki montre nou linportans pou gard nou kalm ek pou met nou konfians an Zeova. Kan to etidie sa bann lexanp-la, remarke seki finn ed bann serviter Zeova pou gard zot kalm kan zot finn fer fas ar lopozision. Par exanp, kan lakour siprem bann Zwif ti demann bann zapot pou aret prese, zot pa ti per. Okontrer, avek kouraz zot ti dir: “Nou bizin obeir Bondie plito ki obeir dimoun.” (Zist. 5:29) Ek mem si zot ti gagn kout fwet, bann zapot pa ti panike. Kifer? Parski zot ti kone ki Zeova ti pe soutenir zot ek ki zot ti ena So faver. Alor, zot ti kontign pres bonn nouvel. (Zist. 5:40-42) Dan mem fason, kan disip Etienn ti pre pou mor, li ti res kalm ek so figir ti “parey kouma figir enn anz.” (Zist. 6:12-15) Kifer? Parski li ti sir ki li ti ena faver Zeova.

12. Dapre 1 Pier 3:14 ek 4:14, kifer nou kapav ere kan nou gagn persekision?

¹² Bann zapot ti ena bann prev bien kler ki Zeova ti avek zot. Zeova ti donn zot pouvwar pou fer bann mirak. (Zist. 5:12-16; 6:8) Se vre ki azordi Zeova pa donn nou pouvwar pou fer bann mirak. Me Zeova, atraver so Parol Labib, rasir nou ki kan nou soufer akoz lazistis, nou kapav ere parski nou ena faver Zeova ek so lespri sin. (Lir 1 Pier 3:14, NW; * 4:14, NW. *) Alor, fode pa nou trakase konsernan fason ki nou pou reazir kan nou pou gagn persekision dan lavenir. Okontrer, nou bizin fer  nou maximum pou ogmant nou konfians dan kapasite ki Zeova ena pou soutenir nou ek sap nou. Parey kouma bann disip dan premie siek, nou bizin ena konfians dan promes ki Zezi ti fer. Li ti dir: “Mo pou donn zot bann parol e enn sazes ki okenn adverser pa pou kapav reponn ek kontredir.” Zezi ti promet nou ki, si nou “tini ferm par [nou] perseverans, [nou] pou gagn lavi.” (Lik 21:12-19) Ek pa bliye ki Zeova rapel sak ti detay lor so bann serviter fidel ki’nn mor. Gras-a tou seki Li kone lor zot, Li pou kapav resisit zot.

13. Ki leson nou kapav aprann ar lexanp bann ki pa’nn reisi gard zot kalm ek met zot konfians dan Zeova?

¹³ Nou kapav osi aprann ar lexanp bann dimounn ki pa finn reisi gard zot kalm ek zot konfians an Zeova. Kan nou etidie sa bann move lexanp-la, sa pou ed nou pou pa fer mem erer ki zot. Anou pran lexanp Lerwa Aza. Kan li ti vinn lerwa Zida ek ki enn gran larme ti atak li, li ti kont lor Zeova. Lerla, Zeova ti beni li ek ti fer li gagn laviktwar lor so bann lennmi. (2 Kro. 14:9-12) Plitar, Lerwa Baasha dan Izrael ti rod atak Aza avek enn pli tipti larme. Me sann fwa-la, Aza pa ti kont lor Zeova pou ed li, parey kouma li ti fer dan lepase. Okontrer, li ti pey bann Sirien pou ed li. (2 Kro. 16:1-3) Ek kan Aza ti gagn enn maladi bien grav ek ki li ti pre pou mor, li pa ti kont lor Zeova pou ed li.​—2 Kro. 16:12.

14. Ki nou kapav aprann ar bann erer ki Aza ti fer?

¹⁴ O-koumansman, Aza ti rod led Zeova kan li ti fer fas ar bann problem. Me plitar, olie ki li ti kont lor Bondie, li ti esey regle so bann problem par limem. Kitfwa sa ti paret enn bon lide ki Aza demann led bann Sirien. Me Zida finn gagn lape pandan enn tigit letan mem. Zeova ti servi enn profet pou dir Aza: “Parski to finn kont lor lerwa Siri ek to pa finn kont lor Zeova to Bondie, larme lerwa Siri finn sap dan to lame.” (2 Kro. 16:7) Alor, fode pa nou panse ki nou kapav regle nou bann problem par noumem san ki nou rod direksion Zeova dan so Parol. Mem si nou ena pou pran enn desizion bien vit, nou bizin kont lor Zeova avek kalm, ek Li pou ed nou pou pran enn bon desizion.

15. Ki nou kapav fer kan nou lir Labib?

¹⁵ (4) Aprann bann verse par-ker. Kan to trouv bann verse Labib ki montre ki li inportan ki nou res kalm ek ki nou fer Zeova konfians, esey rapel zot. Pou ki to reisi rapel sa bann verse-la, to kapav lir zot for ouswa ekrir zot, ek relir zot souvan. Zeova ti demann Zozwe pou lir liv Lalwa dousman lanwit-lizour pou ki li azir avek sazes. Seki li ti pou lir ti pou ed li pou pa per ek pou diriz lepep avek kouraz. (Zozwe 1:8, 9) Ena boukou verse dan Labib ki kapav ed nou pou gard nou kalm dan bann sitiasion ki kapav fer nou strese ouswa per.​—Ps. 27:1-3; Prov. 3:25, 26.

16. Kouma Zeova servi lasanble pou ed nou gard nou kalm ek fer Li konfians?

¹⁶ (5) Pas letan avek bann frer ek ser. Zeova servi nou bann frer ek ser pou ed nou gard nou kalm ek fer Li konfians. Dan nou bann renion, nou profit bann diskour, bann komanter ki lasistans fer, ek bann konversasion bien ankourazan ki nou gagne avek nou bann frer ek ser. (Ebre 10:24, 25) Sa ankouraz nou osi kan nou partaz nou bann santiman ar  bann kamarad ki nou kapav fer konfians dan lasanble. Kan enn kamarad dir nou “enn bon parol,” sa kapav ed nou pou gagn mwins traka.​—Prov. 12:25.

17. Dapre Ebre 6:19, kouma nou lesperans konsernan Rwayom Bondie kapav gard nou stab malgre bann sitiasion difisil?

¹⁷ (6) Gard to lesperans bien for. Nou lesperans konsernan Rwayom Bondie, li koumadir “enn lank” ki gard nou stab malgre bann sitiasion difisil ki nou fer fas ouswa bann kitsoz ki kapav stres nou. (Lir Ebre 6:19.) Kan nou medit lor promes ki Zeova finn fer nou konsernan lavenir, sa bann panse negatif la pou ale. (Iza. 65:17) Esey mazinn twa dan lemond nouvo kot pou ena lape, kot bann sitiasion ki fer nou strese pou nepli existe. (Mish. 4:4) To kapav osi gard to lesperans bien for kan to partaz sa avek lezot. Fer tou seki to kapav pou prese ek pou fer bann disip. Si to fer sa, to kapav sir ‘ki ziska lafin, to pa pou pena okenn dout konsernan to lesperans.’​—Ebre 6:11.

18. Ki bann sitiasion nou kapav atann pou gagne dan lavenir ek kouma nou kapav fer fas ar sa bann sitiasion-la?

¹⁸ Sa lemond-la pre pou fini, alor nou pou viv bann sitiasion bien pli difisil ki pou kapav fer nou trakase. Nou text pou lane 2021 kapav ed nou pou fer fas ar sa bann sitiasion-la, ek pou gard nou kalm, pa par nou prop lafors, me kan nou fer Zeova konfians. Alor, pandan sa lane-la, anou montre par nou bann aksion ki nou fer konfians promes ki Zeova inn fer nou: “Kan zot res kalm ek zot fer mwa konfians, se samem ki pou zot lafors.”​—Iza. 30:15.