1. Dan ki sitiasion difisil David ti ete?

 DAVID ti pe sove parski Sail, lerwa Izrael, ti bien deside pou touy li. Kan li ti bizin kitsoz pou manze, David ti al dan lavil Nob ek li ti gagn sink dipin. (1 Sam. 21:1, 3) Ek apre sa, li ek so bann zom ti al kasiet dan enn lagrot. (1 Sam. 22:1) Kifer David ti dan sa sitiasion-la?

2. Ki kitsoz bien danzere Sail ti fer? (1 Samiel 23:16, 17)

² David ti gagn boukou laviktwar ek lepep ti bien kontan li. Akoz sa, Sail ti zalou li. Sail ti kone osi ki Zeova ti rezet li antan ki lerwa, parski li ti dezobeir Li. Anplis, Zeova ti swazir David pou vinn prosin lerwa lor Izrael. (Lir 1 Samiel 23:16, 17. *) Me Sail ti ankor lerwa Izrael. Li ti ena enn gran larme, ek boukou dimounn ti soutenir li. Ek akoz sa, David ti bizin sove pou sap so lavi. Eski Sail ti panse ki li ti pou kapav anpes David vinn lerwa? (Iza. 55:11) Labib pa dir nanye lor la. Selman, enn kitsoz nou kapav sir, se ki Sail ti fer enn kitsoz bien danzere, parski bann dimounn ki opoz zot ar Bondie, zot touletan perdi.

3. Mem si so sitiasion ti difisil, ki David ti resanti?

³ David ti ena limilite. Li pa ti swazir pou vinn lerwa Izrael. Se Zeova ki ti swazir li pou vinn lerwa. (1 Sam. 16:1, 12, 13) Ek akoz sa, Sail ti deteste li. Me mem si David so  lavi ti an-danze, li pa ti met tor lor Zeova. Li pa ti plengne parski li pa ti ena ase manze ek ki li ti pe res dan enn lagrot. Okontrer, se kitfwa dan sa lagrot-lamem ki David ti ekrir enn zoli sante ki trouv dan Psom 34, ek kot nou trouv bann parol nou text pou sa lane-la: Bann ki obeir Zeova pou toultan gagn seki zot bizin.​—Ps. 34:10.

4. Ki kestion nou pou examine dan sa lartik-la, ek kifer zot inportan?

⁴ Azordi, boukou serviter Zeova parfwa pena ase manze ouswa bann lezot kitsoz ki zot bizin pou viv. * Anplis, avek sa pandemi-la, kitfwa zot sitiasion inn vinn pli difisil ankor. Ek plis nou koste ar “gran detres,” plis nou pou gagn bann difikilte. (Mat. 24:21, NW) Akoz sa, li bon ki nou poz noumem sa kat kestion-la: Dan ki sans David ti ‘toultan gagn seki li bizin’? Kifer nou bizin aprann pou kontant nou ar seki nou ena? Kifer nou bizin ena konfians ki Zeova pou pran nou swin? Ek kouma, depi asterla-mem, nou kapav prepar nou pou lavenir?

5-6. Kouma Psom 23:1-6 ed nou pou konpran ki bann serviter Bondie “pou toultan gagn seki zot bizin”?

⁵ Kan David ti dir ki bann serviter Bondie ti “pou toultan gagn seki zot bizin,” ki li ti pe rod dir? Kan David ti ekrir Psom 23, li ti servi mem lide. Alor, sa Psom-la kapav ed nou pou konpran seki li ti pe rod dir. (Lir Psom 23:1-6.) David koumans sa Psom-la par sa bann parol-la: “LESEGNER limem mo berze; akoz sa mo pa mank nannye.” Dan leres sa Psom-la, David koz lor bann kitsoz ki vremem inportan, bann bon kitsoz ki Zeova ti donn li parski li ti aksepte Li kouma so Berze. Par exanp, Zeova ti diriz li “lor bon sime,” ek avek fidelite, Li ti soutenir David dan bann bon ek bann  move moman. Mem si Zeova ti amenn li dan bann “patiraz lerb tann,” David ti kone ki li ti pou gagn bann difikilte. Li ti konpar bann moman kot li ti dekouraze ar enn “vale bien som,” ek li ti kone osi ki li ti pou ena bann lennmi. Selman, David pa ti “per” parski Zeova ti so Berze.

⁶ Alor, dan ki sans David ti ‘toultan gagn seki li bizin’? David ti ena tou seki li bizin pou res pros ar Zeova. Li pa ti bizin boukou kitsoz pou li ere. David ti kontant li ar seki Zeova ti donn li. Seki ti pli inportan pou li, se gagn benediksion ek proteksion Zeova.

7. Dapre Lik 21:20-24, ki difikilte bann Kretien dan Zide ti gagne?

⁷ Bann parol David montre nou ki li bien inportan ki nou pa donn tro boukou linportans bann kitsoz materyel. Biensir, nou kapav profit bann kitsoz materyel ki nou ena. Selman, fode pa zot vinn bann kitsoz pli inportan dan nou lavi. Dan premie siek, bann Kretien ki ti viv dan Zide ti bizin konpran sa verite bien inportan la. (Lir Lik 21:20-24.) Zezi ti averti zot ki, dan lavenir, ‘bann larme ti pou anserkle Zerizalem.’ Kan sa ti pou arive, zot ti pou bizin “sove al lor montagn.” Si zot ti kit lavil, zot ti pou gagn lavi sov. Selman, zot ti pou bizin abandonn boukou kitsoz materyel. Enn Latour Degard ti dir: “Zot ti kit zot bann karo ek zot bann lakaz, ek zot pa ti retourn kot zot pou pran zot bann kitsoz materyel. Zot ti ena konfians ki Zeova ti pou protez ek soutenir zot, ek zot ti fer zot ladorasion pou Zeova pas avan ninport ki kitsoz.”

8. Ki leson inportan nou kapav aprann ar seki ti ariv bann Kretien ki ti viv dan Zide?

⁸ Ki leson inportan nou kapav aprann ar seki ti ariv bann Kretien ki ti viv dan Zide? Latour Degard ki nou’nn mansione avan, dir: “Dan lavenir, kitfwa nou pou gagn bann leprev ki pou montre nou ki kantite bann kitsoz materyel inportan pou nou. Ki kitsoz pli inportan pou nou, nou bann kitsoz materyel ouswa gagn lavi sov parski nou fidel anver Zeova? Kan lafin pou vini, kitfwa nou pou bizin andir bann difikilte ek fer bann sakrifis. Nou pou bizin pre pou fer ninport ki kitsoz, parey kouma bann Kretien ki ti kit Zide.” *

9. Kouma konsey ki lapot Pol ti donn bann Ebre ankouraz nou?

⁹ Esey mazinn bann difikilte ki sa bann Kretien-la ti gagne! Zot ti bizin kit preske tou seki zot ti ena ek rekoumans zot lavi dan enn nouvo landrwa. Zot ti bizin ena lafwa ek ena konfians ki Zeova ti pou ed zot pou gagn seki zot bizin. Me ti ena enn kitsoz ki kitfwa ti ed zot. Sink-an avan ki bann Romin anserkle Zerizalem, lapot Pol ti donn bann Ebre enn bon konsey. Li ti dir zot: “Ki lamour pou larzan pa determinn zot lavi, kontant zot avek seki zot ena, parski Bondie finn dir ‘Zame mo pa pou kit twa, ni abandonn twa.’ Akoz samem nou kapav dir avek konfians, ‘Lesegner, limem mo sekour, mo pa pou per nanye. Ki dimoun kapav fer kont mwa?’” (Ebre 13:5, 6) Bann Kretien ki ti met sa konsey-la an pratik avan ki bann Romin anserkle Zerizalem, sirman zot ti trouv sa pli fasil pou ena enn lavi sinp dan nouvo landrwa kot zot ti al reste. Zot ti sir ki Zeova ti pou donn zot seki zot bizin. Bann parol lapot Pol donn nou lasirans ki Zeova pou donn nou seki nou bizin.

10. Ki “sekre” Pol inn partaz avek nou?

¹⁰ Pol ti donn mem konsey Timote, ek sa konsey-la aplik ar nou osi. Li ti dir: “Alor, si nou ena manze ek linz, nou pou kontant nou ar sa bann kitsoz-la.” (1 Tim. 6:8, NW) Dan sa verse-la, Pol pa ti pe rod dir ki fode pa nou ena enn zoli lakaz, nou manz enn bon manze, ouswa ki nou aste bann nouvo linz detanzantan. Pol ti dir ki nou bizin kontant nou ar seki nou ena. (Fil. 4:12, NW) Samem ti Pol so “sekre.” Kitsoz ki bizin ena plis valer pou nou se nou lamitie avek Bondie, pa bann kitsoz materyel.​—Abak. 3:17, 18.

11. Ki leson lor kontantman nou kapav aprann ar bann parol ki Moiz ti dir bann Izraelit?

¹¹ Ena enn diferans ant seki nou panse nou bizin ek seki Zeova kone nou bizin. Anou get seki Moiz ti dir bann Izraelit apre ki zot ti pas 40 an dan dezer. Li ti dir: “Parski Zeova to Bondie inn beni twa dan tou seki to lame inn fer. Li konn bien semin ki to’nn fer dan sa gran dezer-la. Pandan sa 40 an-la Zeova to Bondie ti avek twa. To pa finn mank nanye.” (Det. 2:7) Pandan sa 40 an-la, Zeova ti donn bann Izraelit lamann pou zot manze, ek bann linz ki zot ti ena lor zot kan zot ti kit Lezip pa ti ize. (Det. 8:3, 4) Mem si sertin parmi zot ti panse ki sa bann kitsoz-la pa ti ase, Moiz ti rapel zot ki zot ti  ena tou seki zot bizin. Zeova pou bien kontan si nou aprann pou kontant nou ar seki nou ena. Li anvi ki nou rekonesan, mem pou bann ti kitsoz ki Li donn nou, ek ki nou konpran ki sa bann kitsoz-la se bann kado ki Li’nn donn nou.

12. Ki kitsoz montre ki David ti ena konfians an Zeova?

¹² David ti kone ki Zeova fidel ek ki Li pran swin bann dimounn ki kontan Li. Mem si so lavi ti an danze kan li ti ekrir Psom 34, avek lizie lafwa, David ti trouv “anz” Zeova pe “kanp otour” li. (Ps. 34:7) Kitfwa David ti pe konpar anz Zeova ar enn solda ki pe vey bann lennmi. David ti enn solda ki ti ena boukou kouraz, ek Zeova ti promet li ki li ti pou vinn lerwa. David ti konn servi enn frond ek li ti konn servi lepe osi. Me kanmem sa, li pa ti kont lor so bann kapasite. (1 Sam. 16:13; 24:12) David ti ena konfians an Zeova. Li ti kone ki anz Zeova kapav sov bann ki ena lakrint pou Bondie. Biensir, nou pa pou atann ki Zeova fer enn mirak pou protez nou azordi. Me nou kone ki tou bann ki ena konfians an Zeova, mem si arive zot mor, zot pou gagn lavi pou touletan.

13. Kan Gog ki sorti pei Magog pou atak pep Bondie, kifer nou pou paret san defans, ek kifer fode pa nou per? (Get zimaz lor kouvertir.)

¹³ Dan lavenir, nou pou gagn bann leprev ki pou teste nou konfians an Zeova ek so kapasite pou protez nou. Kan Gog ki sorti pei Magog, setadir kan plizir nasion pou zwenn ansam, pou atak pep Bondie, kitfwa nou pou panse ki nou lavi an danze. Dan sa moman-la, nou pou bizin ena konfians ki Zeova ena kapasite pou protez nou, ek ki Li pou fer li. Pou bann nasion, nou pou koumadir bann ti-mouton ki san defans. Zot pou panse ki personn pa pe protez nou. (Eze. 38:10-12) Anplis, nou pa pou ena okenn zarm ek nou pa’nn gagn okenn formasion pou lager. Akoz sa, bann nasion pou panse ki li pou fasil pou atak nou. Selman, zot pa kone ki bann anz Zeova pre pou defann nou. Nou nou konn sa, parski nou ena lafwa an Zeova. Biensir, sa bann nasion-la pa konn sa parski zot pena lafwa dan Bondie. Alor, zot pou bien etone kan bann larme ki ena dan lesiel pou lager pou nou!​—Rev. 19:11, 14, 15.

14. Ki nou kapav fer depi asterla-mem pou prepar nou pou lavenir?

¹⁴ Ki nou kapav fer depi asterla-mem pou nou prepar nou pou lavenir? Premierman, fode pa nou panse ki bann kitsoz materyel zot inportan, parski enn zour nou pou kit tousala lamem. Ek deziemman, nou bizin kontant nou ar seki nou ena, ek nou bizin zwaye parski nou kamarad Zeova. Plis nou aprann konn nou Bondie, plis nou pou sir ki Li pou kapav protez nou kan Gog ki sorti pei Magog pou atak nou.

15. Kouma David ti kone ki Zeova ti pou touletan ed li?

¹⁵ Anou get enn lot kitsoz ki ti ed David, ek anou gete kouma sa kapav prepar nou pou bann leprev ki nou pou gagne dan lavenir. David ti dir: “Goute e gete konbien LESEGNER li bon. Bienere bann ki swazir so proteksion.” (Ps. 34:8) Sa bann parol-la montre nou kifer  David ti kone ki Zeova ti pou soutenir li. David ti kont lor Zeova souvan, ek zame Zeova pa’nn abandonn li. Kan li ti zenn, David ti bizin lager kont Goliat, enn zean Filistin. David ti dir Goliat: “Zordi mem Zeova pou livre twa dan mo lame.” (1 Sam. 17:46) Plitar, kan David ti travay pou Sail, lerwa Izrael, plizir fwa Sail ti rod touy li. Me “Zeova ti avek” David. (1 Sam. 18:12) David ti kone ki Zeova ti pou ed li dan ninport ki difikilte, parski Zeova ti deza ed li dan lepase.

16. Ki kitsoz nou kapav fer pou nou ‘gout’ bonte Zeova?

¹⁶ Plis nou kont lor Zeova pou gid nou, plis nou pou ena konfians ki Li pou kapav sov nou dan lavenir. Nou bizin ena lafwa ek kont lor Zeova kan nou demann nou patron enn konze pou asiste lasanble, ouswa kan nou demann li pou sanz nou program travay pou ki nou kapav asiste tou nou bann renion ek gagn plis letan pou prese. Me si nou patron pa donn nou seki nou’nn demann li ek ki nou perdi nou travay akoz sa, eski nou pou ena lafwa ki Zeova zame pa pou abandonn nou ek ki Li pou touletan donn nou seki nou bizin? (Ebre 13:5) Boukou frer ek ser ki dan servis aplintan kapav rakonte kouma Zeova inn ed zot kan zot ti bizin Li. Wi, Zeova Li vremem fidel!

17. Ki nou text pou lane 2022, ek kifer li bien apropriye?

¹⁷ Nou pena okenn rezon pou per lavenir, parski Zeova avek nou. Tanki nou met so Rwayom an premie dan nou lavi, nou Bondie zame pa pou abandonn nou. Pou nou rapel ki nou bizin prepar nou pou bann difikilte ki nou pou gagne dan lavenir ek pou nou ena konfians ki Zeova zame pa pou abandonn nou, Komite Santral inn swazir Psom 34:10 kouma nou text pou lane 2022: Bann ki obeir Zeova pou toultan gagn seki zot bizin.