LARTIK LETID 4
Kifer Nou Asiste Memoryal?
“Fer sa, an mo memwar.”—LIK 22:19.
KANTIK 20 To’nn Donn To Sel Garson
REZIME *
1-2. (a) Kan eski nou plis pans enn kikenn ki’nn mor? (b) Ki Zezi ti fer lanwit avan so lamor?
KAN enn kikenn ki nou kontan mor, ninport ki kantite letan pase, nou pou touzour rapel li. Ek nou plis pans li sa zour ki li’nn mor la.
2 Sak lane, bann milyon dimounn dan lemond antie rasanble ansam pou selebre memoryal lamor enn dimounn ki zot bien kontan, Zezi Kris. (1 Pier 1:8) Nou zwenn ansam pou rapel seki Zezi inn fer, setadir li’nn donn so lavi kouma enn ranson pou sap nou ar pese ek lamor. (Mat. 20:28) An realite, Zezi ti anvi ki so bann disip rapel so lamor. Lanwit avan so lamor, Zezi ti etabli enn repa spesial, ek li ti donn sa lord-la: “Fer sa, an mo memwar.”—Lik 22:19.
3. Ki nou pou examine dan sa lartik-la?
3 Parmi bann dimounn ki asiste Memoryal sak lane, ena enn ti group dimounn ki ena lesperans pou al dan lesiel, me ena osi plizir milyon dimounn ki ena lesperans pou viv lor later. Dan sa lartik-la, nou pou get plizir rezon kifer toulede group kontan asiste Memoryal sak lane. Nou pou koz osi lor bann bienfe ki nou gagne kan nou asiste Memoryal. Pou koumanse, anou gete kifer bann Kretien ki ena lesperans pou al dan lesiel asiste Memoryal.
KIFER BANN KRETIEN KI ENA LESPERANS POU AL DAN LESIEL ASISTE MEMORYAL?
4. Kifer bann Kretien ki ena lesperans pou al dan lesiel manz dipin ek bwar divin pandan Memoryal?
4 Sak lane, bann Kretien ki ena lesperans pou al dan lesiel asiste Memoryal kouma bann partisipan, setadir zot manz dipin ek zot bwar divin. Kifer zot fer sa? Pou nou reponn sa kestion-la, anou reflesi lor seki ti arive lanwit avan lamor Zezi. Apre ki li ti fini selebre Pak, Zezi ti etabli seki nou apel Repa Lesegner. Li ti pas dipin ek divin ar so 11 zapot fidel, ek li ti dir zot manze ek bwar. Zezi ti koz lor de lalians avek zot: nouvo lalians ek lalians pou enn Rwayom. * (Lik 22:19, 20, 28-30) Gras-a sa de lalians-la, bann zapot ek enn ti group dimounn ti pou kapav vinn bann lerwa ek bann pret dan lesiel. (Rev. 5:10; 14:1) Azordi, se zis bann Kretien ki ena lesperans pou al dan lesiel me ki ankor lor later, ki manz dipin ek bwar divin pandan Memoryal.
5. Bann Kretien ki ena lesperans pou al dan lesiel, ki zot kone konsernan zot lesperans?
5 Anou get enn lot rezon kifer bann Kretien ki ena lesperans pou al dan lesiel bien kontan asiste Memoryal. Memoryal donn zot lokazion pou reflesi lor zot lesperans. Zeova inn donn zot enn lesperans extraordiner! Zot pou ena enn lavi imortel dan lesiel, ek zot pou regne ansam avek Zezi ek bann 144,000 ki deza dan lesiel. Anplis, zot pou kapav trouv Zeova! (1 Kor. 15:51-53; 1 Zan 3:2) Bann Kretien ki ena lesperans pou al dan lesiel kone ki se enn gran privilez ki zot inn gagne. Me pou zot reisi al dan lesiel, zot bizin res fidel ziska lamor. (2 Tim. 4:7, 8) Sa bann Kretien-la bien zwaye kan zot reflesi lor zot zoli lesperans! (Tit 2:13) Me ki nou kapav dir lor bann “lezot mouton”? (Zan 10:16) Anou gete kifer zot asiste Memoryal?
KIFER BANN LEZOT MOUTON ASISTE MEMORYAL?
6. Kifer bann lezot mouton asiste Memoryal sak lane?
6 Bann lezot mouton asiste Memoryal kouma bann obzervater, setadir zot pa manz dipin ek zot pa bwar divin. Me kanmem sa, zot kontan ki zot la pou sa levennman-la. Se an 1938 ki bann Kretien ki ena lesperans pou viv lor later ti gagn linvitasion pou premie fwa, pou asiste Memoryal. Latour Degard 1e Mars 1938, an Angle, ti dir: “Li pou bien apropriye ki bann [lezot mouton] asiste sa renion-la antan ki bann obzervater. . . . Se enn moman bien zwaye pou zot osi.” Parey kouma bann invite ki bien zwaye parski zot pe asiste enn maryaz, bann lezot mouton bien zwaye parski zot pe kapav asiste Memoryal kouma bann obzervater.
7. Kifer bann lezot mouton asiste diskour Memoryal?
7 Memoryal donn bann lezot mouton osi lokazion pou reflesi lor zot lesperans. Zot asiste diskour Memoryal parski enn bon parti sa diskour-la koz lor seki Zezi ek bann 144,000 pou fer pou bann imin pandan Regn Mil An Zezi Kris. Pandan regn Zezi Kris, bann 144,000 pou ede pou ki later vinn enn paradi ek pou ki bann imin vinn parfe. Bann lezot mouton vremem zwaye kan zot reflesi lor bann profesi ki pou akonpli dan lavenir, bann profesi kouma Izai 35:5, 6; 65:21-23; ek Revelasion 21:3, 4. Kan zot mazinn zotmem, ansam avek bann dimounn ki zot kontan, dan lemond nouvo, sa ranforsi zot lesperans pou lavenir ek zot plis determine pou kontign servi Zeova.—Mat. 24:13; Gal. 6:9.
8. Sit enn lot rezon kifer bann lezot mouton asiste Memoryal.
8 Anou get enn lot rezon kifer bann lezot mouton asiste Memoryal. Zot anvi montre zot lamour pou bann Kretien ki ena lesperans pou al dan lesiel ek soutenir zot. Labib ti predir ki sa de group Kretien la ti pou travay ansam. Anou gete kouma.
9. Dapre Zakari 8:23, ki kitsoz bann lezot mouton pou anvi fer, ek ki sa montre?
9 Lir Zakari 8:23. * Sa profesi-la dekrir relasion ki ena ant bann lezot mouton ek bann Kretien ki ena lesperans pou al dan lesiel. Sa ‘enn Zwif-la’ reprezant bann Kretien ki ena lesperans pou al dan lesiel me ki ankor lor later. (Rom. 2:28, 29) Ek sa “dis zom dan tou lang bann nasion” la reprezant bann lezot mouton. Bann lezot mouton “trap bien for” linz sa Zwif-la, ek sa montre ki zot anvi ador Zeova ansam ar bann-la. Alor, li normal ki, zour Memoryal, bann lezot mouton montre lamour ki zot ena pou bann Kretien ki ena lesperans pou al dan lesiel kan zot asiste Memoryal ansam avek zot.
10. Ki Zeova inn fer pou akonpli profesi ki trouv dan Ezekiel 37:15-19, 24, 25?
10 Lir Ezekiel 37:15-19, 24, 25. * Zeova inn akonpli sa profesi-la kan Li’nn fer bann Kretien ki ena lesperans pou al dan lesiel ek bann lezot mouton travay ansam dan linite. Sa profesi-la koz lor de baton. Bann ki ena lesperans pou al dan lesiel, zot kouma baton “Zida” (tribi kot bann lerwa Izrael ti sorti), ek bann ki ena lesperans pou viv lor later, zot kouma baton “Efraim.” * Zeova ti pou reini sa de group-la ansam pou ki zot vinn “enn sel baton.” Sa montre ki zot ti pou servi zot Lerwa Zezi Kris dan linite. Sak lane, bann Kretien ki ena lesperans pou al dan lesiel ek bann lezot mouton asiste Memoryal ansam, kouma “enn sel troupo” anba direksion “enn sel berze.”—Zan 10:16.
11. Kouma bann “mouton” ki mansione dan Matie 25:31-36, 40 montre ki zot soutenir bann frer Zezi?
11 Lir Matie 25:31-36, 40. Dan sa parabol-la, bann “mouton” reprezant bann Kretien ki pe viv dan lepok lafin ek ki ena lesperans pou viv lor later, setadir bann lezot mouton. Avek fidelite, zot soutenir bann frer Zezi ki ankor lor later kan zot ed bann-la pou asim enn gran responsabilite: prese lor later antie ek ansegn bann dimounn.—Mat. 24:14; 28:19, 20.
12-13. Dan ki lezot fason bann lezot mouton soutenir bann frer Zezi?
12 Sak lane, de-trwa semenn avan Memoryal, bann lezot mouton montre ki zot soutenir bann frer Zezi kan zot partisip afon dan kanpagn linvitasion pou Memoryal. (Get lankadre “ Eski To Pe Prepar Twa pou Lepok Memoryal?”) Zot fer osi bann preparasion pou Memoryal, mem si dan laplipar lasanble pena bann Kretien ki ena lesperans pou al dan lesiel. Bann lezot mouton bien kontan soutenir bann frer Zezi dan sa bann fason-la. Zot kone ki, kan zot pe ed bann frer Zezi, pou Zezi, se koumadir zot pe ed limem.—Mat. 25:37-40.
13 Anou get lezot rezon kifer nou tou, ninport ki lesperans nou ena, nou asiste Memoryal.
KIFER NOU TOU NOU ASISTE MEMORYAL?
14. Kouma Zeova ek Zezi inn montre enn gran lamour pou nou?
14 Nou bien rekonesan anver Zeova ek Zezi pou lamour ki zot inn montre pou nou. Zeova inn montre nou so lamour dan plizir fason. Me fason pli extraordiner ki Li’nn montre so lamour pou nou, se kan Li’nn avoy so Garson lor later pou soufer ek mor pou nou. (Zan 3:16) Zezi osi inn montre ki li bien kontan nou kan li’nn dispoze pou donn so lavi pou nou. (Zan 15:13) Zame nou pa pou kapav rann Zezi ek Zeova lamour ki zot inn montre pou nou. Me nou kapav montre nou rekonesans par fason ki nou viv nou lavi toulezour. (Kol. 3:15) Kan nou asiste Memoryal, nou rapel lamour ki zot inn montre pou nou, ek nou montre lamour ki nou ena pou zot.
15. Kifer laranson ena boukou valer pou bann Kretien ki ena lesperans pou al dan lesiel ek pou bann lezot mouton?
15 Laranson ena boukou valer pou nou. (Mat. 20:28) Laranson ena boukou valer pou bann Kretien ki ena lesperans pou al dan lesiel, parski se gras-a laranson ki zot ena sa zoli lesperans-la. Gras-a zot lafwa dan sakrifis Zezi, Zeova inn deklar zot kouma bann dimounn ki zis, ek Li’nn adopte zot kouma so bann zanfan. (Rom. 5:1; 8:15-17, 23) Laranson ena boukou valer pou bann lezot mouton osi. Gras-a zot lafwa dan sakrifis Zezi, zot kapav vinn sin devan lizie Zeova ek zot kapav servi Li. Anplis, zot ena lespwar pou “travers gran detres.” (Rev. 7:13-15, NW) Enn fason ki bann lezot mouton ek bann Kretien ki ena lesperans pou al dan lesiel montre zot rekonesans pou laranson, se kan zot asiste Memoryal sak lane.
16. Sit enn lot rezon kifer nou asiste Memoryal.
16 Enn lot rezon kifer nou asiste Memoryal se parski nou anvi obeir Zezi. Ninport ki lesperans nou ena, nou anvi obeir lord ki Zezi ti done lanwit ki li ti etabli Memoryal. Li ti dir: “Kontign fer sa an mo memwar.”—1 Kor. 11:23, 24, NW.
KI BIENFE NOU GAGNE KAN NOU ASISTE MEMORYAL?
17. Kouma Memoryal ed nou pou vinn pli pros ar Zeova?
17 Nou vinn pli pros ar Zeova. (Zak 4:8) Kouma nou’nn trouve dan sa lartik-la, Memoryal donn nou lokazion pou reflesi lor lesperans ki Zeova inn donn nou ek pou medit lor gran lamour ki Li’nn montre pou nou. (Zer. 29:11; 1 Zan 4:8-10) Kan nou reflesi lor nou lesperans pou lavenir ek lor lamour ki Bondie ena pou nou, nou lamour pou Li vinn pli for ek nou vinn pli pros avek Li.—Rom. 8:38, 39.
18. Kan nou medit lor lexanp Zezi, ki sa motiv nou pou fer?
18 Nou anvi swiv lexanp Zezi. (1 Pier 2:21) De-trwa zour avan Memoryal, nou lir ek medit lor seki’nn ariv Zezi pandan dernie semenn ki li ti lor later, lor so lamor, ek lor so rezireksion. Lerla, zour Memoryal, diskour Memoryal rapel nou lamour ki Zezi ena pou nou. (Efe. 5:2; 1 Zan 3:16) Kan nou medit lor sakrifis ki Zezi inn fer pou nou, sa ankouraz nou pou kontign “mars parey kouma li.”—1 Zan 2:6.
19. Kouma nou kapav res dan lamour Bondie?
19 Nou plis determine pou res dan lamour Bondie. (Zid 20, 21) Nou res dan lamour Bondie kan nou fer nou maximum pou obeir Li, pou fer Li plezir, ek pou sanktifie so nom. (Prov. 27:11; Mat. 6:9; 1 Zan 5:3) Kan nou asiste Memoryal, sa motiv nou pou viv dan enn fason ki fer Zeova plezir. Lerla, sak zour, nou plis determine pou dir Zeova, ‘Mo anvi res dan to lamour pou touletan!’
20. Ki bann bon rezon nou ena pou asiste Memoryal?
20 Ninport ki lesperans nou ena, nou ena bann bon rezon pou asiste Memoryal. Sak lane, kan nou zwenn ansam sa zour-la, nou rapel lamor enn kikenn ki nou bien kontan, Zezi Kris. Me pli inportan, nou rapel gran lamour ki Zeova inn montre pou nou kan Li’nn donn so Garson kouma enn ranson pou nou. Sa lane-la, nou pou selebre Memoryal Vandredi 15 Avril 2022. Nou kontan Zeova ek so Garson. Alor, zour Memoryal, pa pou ena nanye ki pou pli inportan pou nou ki asiste Memoryal!
KANTIK 16 Loue Jah pou Garson Ki Li’nn Swazire
^ Ninport ki lesperans nou ena, ki li lesperans pou al dan lesiel ouswa pou viv lor later, nou tou nou atann avek inpasians pou selebre Memoryal sak lane. Dan sa lartik-la, nou pou get bann rezon Biblik kifer nou asiste Memoryal, ek nou pou get bann bienfe ki nou gagne kan nou fer sa.
^ Pou gagn plis linformasion lor nouvo lalians ek lalians pou enn Rwayom, get lartik “Zot Pou Vinn ‘enn Rwayom Bann Pret’” dan Latour Degard 15 Oktob 2014, p. 15-17.
^ Zakari 8:23: “Ala seki Zeova Sef bann larme dir: ‘Se dan sa lepok-la ki dis zom dan tou lang bann nasion pou trap, wi, zot pou trap bien for linz enn Zwif, ek zot pou dir: “Nou anvi al avek zot parski nou finn tann dir ki Bondie avek zot.”’”
^ Ezekiel 37:15-19, 24, 25: “15 Zeova ti rekoz ar mwa ek Li ti dir: 16 ‘Ek twa, garson enn zom, pran enn baton ek ekrir lor la: “Pou Zida ek pep Izrael ki avek li.” Apre sa pran enn lot baton ek ekrir lor la: “Pou Zozef, baton Efraim, ek tou lakaz Izrael ki avek li.” 17 Apre, met toulede baton ansam pou ki zot vinn zis enn sel baton dan to lame. 18 Kan to pep pou demann twa: “Explik nou seki sa vedir,” 19 dir zot: “Ala seki Souverin Segner Zeova dir: ‘Mo pou pran baton Zozef, ki dan lame Efraim, ek bann tribi Izrael ki avek li, ek mo pou kol li ar baton Zida. Mo pou fer zot vinn enn sel baton, ek zot pou vinn enn sel baton dan mo lame.’” 24 Mo serviter David pou zot lerwa, ek zot tou pou ena enn sel berze. Zot pou obeir mo bann lalwa ek swiv bien mo bann komannman. 25 Zot pou res dan pei ki mo ti donn mo serviter Zakob, pei kot zot bann anset ti viv. Zot pou res laba pou touletan, zot, zot bann zanfan, ek zot bann ti-zanfan. Ek mo serviter David pou zot sef pou touletan.’”
^ Pou gagn plis linformasion lor profesi ki trouv dan Ezekiel sapit 37 ek ki koz lor sa de baton-la, get liv Le culte pur de Jéhovah enfin rétabli ! p. 130-135, par. 3-17.
