1-2. (a) Ki nou resanti kan nou reflesi lor lavi Zezi ek seki li ti fer kan li ti lor later? (b) Ki nou pou examine dan sa lartik-la?

 KAN enn kikenn ki nou kontan mor, nou bien mank sa dimounn-la! O-koumansman, nou bien soufer kan nou mazinn bann zour avan so lamor, sirtou si sa dimounn-la inn bien soufer avan li mor. Me apre inpe letan, nou rekoumans ena lazwa kan nou reflesi lor enn kitsoz ki sa dimounn-la inn aprann nou, ouswa lor seki li’nn dir ek fer pou ankouraz nou ouswa pou fer nou riye.

² Dan mem fason, nou tris kan nou lir kouma Zezi inn soufer ek inn mor. Pandan lepok Memoryal, nou pran letan pou reflesi lor ki kantite valer sakrifis Zezi ena. (1 Kor. 11:24, 25) Selman, nou gagn lazwa kan nou reflesi lor tou seki Zezi ti dir ek fer kan li ti lor later. Sa ankouraz nou kan nou reflesi lor seki li pe fer aster-la ek seki li pou fer pou nou dan lavenir. Kan nou medit lor sa bann kitsoz-la ek lor lamour ki li ena pou nou, sa pou pous nou pou montre nou rekonesans. Se seki nou pou gete dan sa lartik-la.

3. Kifer nou bizin ena rekonesans pou laranson?

³ Kan nou reflesi lor lavi ek lamor Zezi, sa pous nou pou ena rekonesans. Kan Zezi ti lor later, li’nn ansegn bann dimounn lor bann benediksion ki Rwayom Bondie  pou amene. Nou bien apresie seki Labib ansegne lor laranson ek bann bon kitsoz ki nou kapav profite gras-a sa. Nou rekonesan pou laranson parski gras-a sa, nou kapav ena enn bon lamitie avek Zeova ek Zezi. Bann ki ena lafwa dan Zezi Kris ena osi lespwar pou viv pou touletan ek pou retrouv bann dimounn ki zot kontan me ki’nn mor. (Zan 5:28, 29; Rom. 6:23) Nou pa’nn fer nanye pou merit sa bann benediksion-la, ek zame nou pa pou kapav retourn Bondie ek Zezi seki zot inn fer pou nou. (Rom. 5:8, 20, 21) Me nou kapav montre zot ki kantite rekonesans nou ena. Kouma?

4. Kouma Mari-Madlenn ti montre rekonesans pou seki Zezi ti fer pou li? (Get zimaz.)

⁴ Anou get lexanp enn fam Zwif ki ti apel Mari-Madlenn. Li ti bien soufer parski set demon ti pe fatig li. Kitfwa li ti panse ki personn pa ti pou kapav ed li. Alor, sey mazine ki kantite li ti rekonesan kan Zezi ti liber li ar sa bann demon-la! So rekonesans ti pous li pou vinn enn disip Zezi ek pou servi so letan, so lenerzi, ek so bann kitsoz materyel pou soutenir Zezi dan so minister. (Lik 8:1-3) Mem si Mari ti ena rekonesans pou seki Zezi ti fer pou li personelman, kitfwa li pa ti ankor kone ki Zezi ti pou fer enn pli gran kitsoz pou li dan lavenir. Zezi ti pou donn so lavi pou limanite, “pouki tou dimoun ki krwar dan Li” kapav viv pou touletan. (Zan 3:16) Kanmem sa, Mari ti montre so rekonesans pou Zezi kan li ti res fidel ar li. Kan Zezi ti pe soufer lor poto, Mari ti res la parski li ti gagn traka Zezi ek li ti anvi rekonfort bann ki ti la. (Zan 19:25) Apre lamor Zezi, Mari ek de lezot madam ti amenn bann zepis dan tom Zezi pou so lanterman. (Mark 16:1, 2) Zeova ti rekonpans Mari parski li ti res fidel ar Zezi. Mari ti gagn lazwa pou zwenn Zezi ek pou koz ar li apre so rezireksion. Sa ti  enn privilez ki bien tigit disip ti gagne.​—Zan 20:11-18.

5. Kouma nou kapav montre nou rekonesans pou tou seki Zeova ek Zezi inn fer pou nou?

⁵ Nou osi nou kapav montre nou rekonesans pou tou seki Zeova ek Zezi inn fer pou nou, kan nou servi nou letan, nou lenerzi, ek nou bann kitsoz materyel pou servi Zeova. Par exanp, nou kapav ede pou ranz ouswa fer mintenans bann lasal ki nou servi pou ador Zeova.

6. Kifer nou kapav dir ki laranson se enn kado ki Zeova inn donn sakenn parmi nou?

⁶ Kan nou reflesi ki kantite Zeova ek Zezi kontan nou, sa pous nou pou kontan zot nou osi. (1 Zan 4:10, 19) Nou kontan zot ankor plis kan nou aprann ki Zezi inn mor pou nou personelman. Lapot Pol ti konn sa, ek li ti montre so rekonesans kan li ti ekrir bann Kretien dan Galat. Li ti dir: “Garson Bondie . . . kontan mwa e finn donn so lavi pou mwa.” (Gal. 2:20) Gras-a laranson, Zeova kapav atir nou ar Li pou ki nou vinn so kamarad. (Zan 6:44) Eski sa pa tous to leker kan to kone ki Zeova inn trouv bann bon kitsoz dan twa ek Li’nn pey enn pri bien ser pou ki to kapav vinn so kamarad? Eski sa pa ogmant to lamour pou Zeova ek Zezi? Li bon ki nou demann noumem: ‘Ki sa lamour-la bizin pous mwa pou fer?’

7. Dapre zimaz, kouma nou kapav montre ki nou kontan Zeova ek Zezi? (2 Korintien 5:14, 15; 6:1, 2)

⁷ Nou lamour pou Zeova ek Zezi pous nou pou kontan lezot. (Lir 2 Korintien 5:14, 15; 6:1, 2.) Enn fason ki nou montre nou lamour, se kan nou fer nou maximum dan travay predikasion ek nou koz ar tou dimounn ki nou zwenn. Nou  pa pou evit koz avek enn kikenn parski li sorti dan enn lot ras, ouswa dan enn lot kominote. Nou pou koz ar tou dimounn, ki zot ris ek zot ena ledikasion, ouswa ki zot pov ek zot pann al lekol. Kan nou koz ar tou dimounn ki nou zwenn, nou pe fer volonte Zeova parski Li “oule sov tou dimoun pouki zot arive konn laverite.”​—1 Tim. 2:4.

8. Kouma nou kapav montre nou lamour pou nou bann frer ek ser?

⁸ Enn lot fason nou montre nou lamour pou Zeova ek Zezi, se kan nou kontan nou bann frer ek ser. (1 Zan 4:21) Nou vremem interes nou ar zot, ek nou ed zot kan zot pas par bann difikilte. Nou rekonfort zot kan enn kikenn ki zot kontan inn mor. Nou vizit zot kan zot malad, ek nou fer tou seki nou kapav pou ankouraz zot kan zot dekouraze. (2 Kor. 1:3-7; 1 Tes. 5:11, 14) Nou kontign priye pou zot parski nou kone ki “lapriyer enn dimoun ki zis, li ena enn pwisans e li efikas.”​—Zak 5:16.

9. Sit enn lot fason kouma nou kapav montre ki nou kontan nou bann frer ek ser.

⁹ Nou montre osi ki nou kontan nou bann frer ek ser kan nou fer zefor pou fer lape ar zot. Nou anvi fer zefor pou imit Zeova dan fason ki nou pardonn lezot. Si Zeova inn sakrifie so Garson pou nou bann pese, eski nou pa bizin pre pou pardonn nou bann frer ek ser kan zot ofans nou? Nou pa anvi resanble sa move esklav ki Zezi ti site dan enn so bann lexanp. Mem si so met ti kennsel gro det ki li ti ena, sa esklav-la pa ti pardonn so kamarad ki ti dwa li pli tigit kas. (Mat. 18:23-35) Si tonn gagn enn ti problem dan lasanble, eski to kapav pran linisiativ pou fer lape avan ki to asiste Memoryal? (Mat. 5:23, 24) Kan to fer sa, sa pou montre to lamour pou Zeova ek Zezi.

10-11. Kouma bann ansien kapav montre ki zot kontan Zeova ek Zezi? (1 Pier 5:1, 2)

¹⁰ Kouma bann ansien kapav montre ki zot kontan Zeova ek Zezi? Enn fason ki zot kapav fer sa, se kan zot pran swin bann mouton Zezi. (Lir 1 Pier 5:1, 2.) Zezi ti fer lapot Pier konpran sa bien. Apre ki li ti renie Zezi trwa fwa, Pier ti bien anvi montre Zezi ki li ti kontan li. Apre so rezireksion, Zezi ti demann Pier: “Simon garson Zan, eski to kontan mwa?” Nou kapav sir ki Pier ti fer tou seki li kapav pou montre so met ki li kontan li. Zezi ti dir Pier: “Pran swin mo bann brebi.” (Zan 21:15-17) Toutlong so lavi, Pier ti pran swin bann mouton Zezi ek sa ti montre ki li ti kontan Zezi.

¹¹ Ansien, pandan bann semenn avan ek apre Memoryal, kouma to kapav montre ki seki Zezi ti dir Pier inportan pou twa? To kapav montre ki kantite to kontan Zeova kan regilierman to pran letan pou ankouraz to bann frer ek ser, ek kan to fer plis zefor pou ed bann inaktif pou retourn ar Zeova. (Eze. 34:11, 12) To kapav osi ankouraz bann etidian Labib ek bann dimounn ki interese pou asiste Memoryal. Nou anvi akeyir zot bien, parski nou espere ki zot pou vinn bann disip Zezi.

12. Kifer sa donn nou kouraz kan nou reflesi lor bann parol ki Zezi ti dir lanwit avan so lamor? (Zan 16:32, 33)

¹² Lanwit avan so lamor, Zezi ti dir so bann disip: “Lemonn pou fer zot soufer;  me gard kouraz, mo finn sorti vinker lor lemonn.” (Lir Zan 16:32, 33.) Kan so bann lennmi ti menas li, ki kitsoz ti ed Zezi pou ena kouraz ek pou res fidel ziska so lamor? Li ti kont lor Zeova. Li ti kone ki so bann disip osi ti pou pas par bann mem leprev. Akoz sa, li ti demann Zeova pou vey lor zot. (Zan 17:11) Kifer sa donn nou kouraz? Parski Zeova pli for ki tou nou bann lennmi. (1 Zan 4:4) Zeova trouv tou kitsoz. Alor, nou kapav sir ki si nou kont lor Zeova, Li pou ed nou pou sirmont nou bann laper ek pou ena kouraz.

13. Kouma Zozef ki sorti Arimate ti montre ki li ena kouraz?

¹³ Anou get lexanp Zozef ki sorti Arimate. Bann Zwif ti bien respekte li. Li ti enn manb Sanedrin, setadir lakour siprem Zwif. Me kan Zezi ti lor later, Zozef pa ti ena kouraz. Zan dir ki li ti “swiv Zezi me san ki personn kone, parski li ti gagn per bann Zwif.” (Zan 19:38) Mem si Zozef ti interese ar mesaz Rwayom Bondie, li pa ti montre lezot ki li ti ena lafwa dan Zezi. Kitfwa li ti per ki bann dimounn pou nepli respekte li si zot ti kone ki li enn disip Zezi. Me Labib dir nou ki apre lamor Zezi, Zozef ti “pran so kouraz, al get Pilat e dimann li lekor Zezi.” (Mark 15:42, 43) Zozef ti nepli kasiet ki li enn disip Zezi.

14. Ki to bizin fer si to per bann dimounn?

¹⁴ Eski twa osi to per bann dimounn, parey kouma Zozef? Dan lekol ouswa dan travay, eski to onte pou dir ki to enn Temwin Zeova? Eski to pe ezite pou koumans prese ouswa pou pran batem, parski to per seki lezot pou panse lor twa? Fode pa ki to les sa bann santiman-la anpes twa fer seki bon. Priye Zeova avek tou to leker, ek demann Li kouraz pou fer so volonte. Kan to trouve kouma Zeova reponn to bann lapriyer, to pou vinn pli for ek to pou ena plis kouraz.​—Iza. 41:10, 13.

15. Apre ki Zezi ti aparet ar so bann disip, ki zot lazwa ti pous zot pou fer? (Lik 24:52, 53)

¹⁵ Bann disip ti bien sagrin kan Zezi ti mor. Sey met twa dan zot plas: Zot pann zis perdi zot bon kamarad, me se koumadir tou zot lespwar inn tom dan delo. (Lik 24:17-21) Selman, kan Zezi ti aparet ar zot, li’nn pran letan pou explik zot  kouma li’nn realiz enn profesi ki ena dan Labib. Li’nn osi donn zot enn travay inportan pou fer. (Lik 24:26, 27, 45-48) Kan Zezi ti remont dan lesiel 40 zour apre, bann disip ti nepli sagrin. Zot ti zwaye parski zot ti kone ki Zezi vivan ek ki li pou ed zot pou fer travay ki li’nn donn zot. Zot lazwa ti pous zot pou servi Zeova san ki zot bes lebra.​—Lir Lik 24:52, 53; Zist. 5:42.

16. Kouma nou kapav imit bann disip Zezi?

¹⁶ Kouma nou kapav imit bann disip Zezi? Nou kapav gagn lazwa pou servi Zeova, pa zis pandan lepok Memoryal, me toutlong lane. Savedir ki nou bizin met Rwayom Bondie an premie dan nou lavi. Sertin finn reorganiz zot travay pou ki zot kapav prese, asiste bann renion, ek fer zot ladorasion an fami regilierman. Pou zot fer plis pou Zeova, sertin finn mem desid pou pa gagn bann kitsoz materyel ki kitfwa neseser pou lezot. Par exanp, zot pe kapav fer plis dan lasanble, ouswa zot pe al servi kot bizin plis proklamater. Mem si nou bizin ena landirans pou kontign servi Zeova, Zeova promet nou ki Li pou beni nou si nou met so Rwayom an premie dan nou lavi.​—Prov. 10:22; Mat. 6:32, 33.

17. Ki to bien deside pou fer pou sa Memoryal-la? (Get zimaz.)

¹⁷ Nou pe atann avek inpasians pou asiste Memoryal Mardi le 4 Avril. Selman, nou pa pou atann zis zour Memoryal pou reflesi lor lavi ek lamor Zezi, ek lor lamour ki Zezi ek Zeova inn montre pou nou. Reflesi lor sa bann kitsoz-la otan ki to kapav pandan lepok Memoryal. Par exanp, rezerv letan pou lir ek medit lor bann levennman ki mansione dan tablo ki trouv dan Kaye Renion Lavi Kretien ek Minister Avril 2019 paz 4. Kan to fer sa, rod bann verse Labib ki pou ogmant to rekonesans, to lamour, to kouraz, ek to lazwa. Apre sa, reflesi lor bann fason kouma to kapav montre to rekonesans. To kapav sir ki tou bann zefor ki to fer pou rapel Zezi pandan lepok Memoryal ena boukou valer pou li.​—Rev. 2:19.