1-2. Kifer nou asiste Memoryal sak lane?

 INN gagn plis ki 2,000 an, Zezi inn donn so lavi pou nou, pou ki nou kapav gagn lavi pou touletan. Lanwit avan so lamor, Zezi ti demann so bann disip pou fer enn ti seremoni pou rapel sa sakrifis ki li ti pou fer la. Dan sa seremoni-la ti bizin ena dipin ek divin.​—1 Kor. 11:23-26.

² Nou obeir Zezi so komannman parski nou bien kontan li. (Zan 14:15) Sak lane, pandan lepok Memoryal, nou montre nou rekonesans pou seki li’nn fer kan nou reflesi ek priye lor seki so lamor vedir pou bann imin. Nou bien kontan osi pou fer plis dan predikasion, pou invit bann dimounn pou zwenn ar nou pou asiste sa levennman spesial la. Ek biensir, nou fer tou seki nou kapav pou ki nanye pa anpes nou asiste Memoryal.

3. Ki nou pou gete dan sa lartik-la?

³ Dan sa lartik-la, nou pou get trwa fason kouma bann serviter Zeova inn fer zot maximum pou komemor lamor Zezi: (1) kan zot fer Memoryal dan fason ki Zezi inn ansegne, (2) kan zot invit lezot pou asiste Memoryal, ek (3) kan zot asiste Memoryal malgre bann difikilte.

4. Ki nou aprann sak lane pandan diskour Memoryal, ek kifer sa bann verite-la bizin ena valer pou nou? (Lik 22:19, 20)

⁴ Sak lane pou Memoryal, nou ekout enn diskour ki baze lor Labib. Dan sa diskour-la, nou gagn repons pou  plizir kestion. Nou aprann kifer bann dimounn bizin laranson, ek kouma lamor enn sel zom kapav pey pese boukou dimounn. Nou aprann osi seki dipin ek divin reprezante, ek kisann-la bizin manz dipin ek bwar divin. (Lir Lik 22:19, 20.) Nou reflesi osi lor zoli lavenir ki pe atann bann dimounn ki pou viv pou touletan lor later. (Iza. 35:5, 6; 65:17, 21-23) Sa bann verite-la bizin ena boukou valer pou nou. Plizir milyon dimounn pa konn sa bann kitsoz-la, ek zot pa konpran ki kantite valer sakrifis Zezi ena. Anplis, zot pa fer Memoryal dan fason ki Zezi inn ansegne. Kifer?

5. Apre ki laplipar bann zapot ti mor, kouma bann dimounn ti koumans komemor lamor Zezi?

⁵ Apre ki laplipar bann zapot ti mor, ti koumans ena bann fos Kretien dan lasanble. (Mat. 13:24-27, 37-39) Zot ti “detourn laverite pouki zot kapav ris bann disip pou swiv zot.” (Zist. 20:29, 30) Enn fason ki bann fos Kretien ti “detourn laverite,” se kan zot ti ansegne ki Zezi pa ti “ofer limem enn sel fwa pou efas pese enn kantite dimoun.” Zot ti dir ki ti bizin fer sa sakrifis-la plizir fwa. (Ebre 9:27, 28) Azordi, boukou dimounn krwar dan sa fos lansegnman-la. Zot al legliz sak semenn, parfwa sak zour, pou komemor sakrifis Zezi, ki bann Katolik apel “Lekaristi.” b Lezot relizion komemor lamor Zezi mwin souvan, me boukou pa konpran ki sakrifis Zezi vedir. Sertin demann zotmem, ‘Eski mo kapav vremem gagn pardon mo bann pese gras-a lamor Zezi?’ Kifer zot poz sa kestion-la? Kitfwa se parski zot inn les zot inflianse par bann dimounn ki dir ki lamor Zezi pa kapav pardonn nou bann pese. Kouma bann disip Zezi inn ed bann dimounn pou konpran seki sakrifis Zezi vedir, ek dan ki fason bizin komemor so lamor?

6. An 1872, ki enn group etidian Labib ti konpran?

⁶ Alafin 19^em siek, Frer Russell ek enn group etidian Labib ti koumans etidie Labib an profonder. Zot ti anvi kone seki sakrifis Zezi vedir ek kouma bizin komemor so lamor. An 1872, zot ti konpran ki Zezi ti vremem donn so lavi kouma enn ranson pou tou dimounn. Me zot pa ti gard seki zot ti aprann zis pou zot tousel. Okontrer, zot ti fer lezot konn sa gras-a bann liv, bann lagazet, ek bann magazinn. Apre sa, parey kouma bann Kretien dan premie siek, zot ti koumans fer Memoryal enn fwa toule lane.

7. Ki bienfe nou gagne ar bann resers ki bann etidian Labib ti fer dan lepase?

⁷ Azordi, nou gagn bann bienfe gras-a bann resers ki sa bann Kretien fidel la ti fer inn gagn plizir lane. Kouma? Zeova inn ed nou pou konpran seki sakrifis Zezi vedir, ek seki li pou fer pou nou ek pou tou bann dimounn. (1 Zan 2:1, 2) Nou’nn aprann osi ki Labib koz lor de lesperans pou bann dimounn ki fer Bondie plezir. Enn parti pou al viv dan lesiel ek bann milyon lezot dimounn pou viv pou touletan lor later. Nou vinn pros ar Zeova kan nou kone ki kantite Li kontan nou ek ki bann bienfe nou gagne personelman gras-a sakrifis Zezi.  (1 Pier 3:18; 1 Zan 4:9) Parey kouma sa bann frer fidel dan lepase la, nou invit bann dimounn pou fer Memoryal ansam avek nou, parey kouma Zezi ti ansegne.

8. Ki pep Zeova inn fer pou invit bann dimounn pou asiste Memoryal? (Get zimaz.)

⁸ Sa fer bien lontan ki bann Temwin Zeova pe invit bann dimounn pou asiste Memoryal. An 1881, ti invit bann frer ek ser dan Letazini pou asiste Memoryal an prive dan enn lakaz dan Allegheny, dan Pennsylvanie. Plitar, sak lasanble ti fer so prop Memoryal. An Mars 1940, ti demann bann proklamater pou invit bann dimounn ki interese ar laverite pou asiste Memoryal. An 1960, pou premie fwa, Betel ti donn bann lasanble bann linvitasion inprime. Depi sa zour-la, inn partaz plizir milyar linvitasion Memoryal. Kifer nou fer tou sa zefor-la pou invit bann dimounn pou asiste Memoryal?

9-10. Kisann-la gagn bann bienfe kan nou fer zefor pou invit bann dimounn pou Memoryal? (Zan 3:16)

⁹ Enn rezon kifer nou invit bann dimounn pou asiste Memoryal ansam avek nou, se parski nou anvi ki zot aprann seki Zeova ek Zezi inn fer pou tou dimounn. (Lir Zan 3:16.) Nou espere ki seki zot trouve ek tande pandan Memoryal pous zot pou aprann plis ek pou vinn bann serviter Zeova. Me ena lezot dimounn osi ki gagn bann bienfe gras-a Memoryal.

 ¹⁰ Nou invit osi bann dimounn ki nepli servi Zeova. Nou invit zot pou rapel zot ki Zeova ankor kontan zot. Boukou inn aksepte nou linvitasion, ek nou bien kontan pou trouv zot zour Memoryal. Kan zot asiste Memoryal, sa rapel zot lazwa ki zot ti ena kan zot ti pe servi Zeova dan lepase. Anou get lexanp Monica. c Pandan pandemi COVID-19, li ti re-koumans prese. Apre ki li ti asiste Memoryal an 2021, li ti dir: “Sa Memoryal-la ti bien spesial pou mwa. Premie fwa apre 20 an, mo’nn kapav pres avek bann dimounn ek invit zot pou Memoryal. Mo’nn fer tou seki mo kapav pou invit lezot pou Memoryal, parski mo vremem rekonesan pou seki Zeova ek Zezi inn fer pou mwa.” (Ps. 103:1-4) Mem si bann dimounn aksepte nou linvitasion ouswa non, nou fer nou best pou invit bann dimounn pou Memoryal parski nou kone ki Zeova apresie nou bann zefor.

11. Kouma Zeova inn beni bann zefor ki nou’nn fer pou invit bann dimounn pou asiste Memoryal? (Aze 2:7)

¹¹ Zeova inn bien beni bann zefor ki nou’nn fer pou invit bann dimounn pou Memoryal. An 2021, malgre bann restriksion ki ti ena akoz pandemi COVID-19, ti ena enn nouvo rekor pou lasistans Memoryal. Ti ena 21,367,603 dimounn ki ti asiste Memoryal. Sa fer plis ki de fwa kantite bann Temwin Zeova ki ena dan lemond! Biensir, Zeova pa zis interese ar kantite dimounn ki asiste Memoryal, me ar sak dimounn ki asiste sa levennman-la. (Lik 15:7; 1 Tim. 2:3, 4) Nou kapav sir ki kan nou pe invit bann dimounn, Zeova pe ed nou pou trouv bann dimounn sinser.​—Lir Aze 2:7.

12. Ki kitsoz kapav fer nou gagn difikilte pou asiste Memoryal? (Get zimaz.)

¹² Zezi ti predir ki dan bann dernie zour, nou pou gagn boukou difikilte. Par exanp, ena persekision, lager, bann lepidemi, ek lezot problem ankor. (Mat. 10:36; Mark 13:9; Lik 21:10, 11) Parfwa, akoz sa bann sitiasion-la, sa kapav difisil pou ki nou asiste Memoryal. Kouma nou bann frer ek ser inn sirmont sa bann difikilte-la, ek kouma Zeova inn ed zot?

13. Kouma Zeova ti beni Artem parski li ti ena kouraz ek li ti bien deside pou fer Memoryal mem si li ti dan prizon?

¹³ Dan prizon. Nou bann frer ki dan prizon akoz zot lafwa fer tou seki zot kapav pou komemor lamor Zezi. Anou get lexanp Artem. An 2020, pandan bann semenn avan ek apre Memoryal, li ti dan enn kaso ki ti fer 17 met kare, kot ti kapav met sink dimounn anmemtan. Mem si li ti dan prizon, li’nn kapav gagn sertin kitsoz ki li ti kapav servi kouma bann lanblem Memoryal. Ek li ti plann pou fer diskour Memoryal pou limem. Me bann prizonie ki ti ansam avek li ti fime ek zoure boukou. Ki li ti fer? Li ti demann zot si zot kapav pa zoure ek pa fime zis pou enn-er-tan. Artem ti etone ki bann prizonie-la ti dakor pou pa fime ek pa zoure pandan Memoryal. Artem dir: “Mo ti propoz zot pou koz lor Memoryal avek zot.” Mem si zot ti dir li ki zot pa ti anvi tann nanye lor sa  levennman-la, apre ki zot ti trouv ek tann Artem fer Memoryal, zot ti anvi konn plis lor Memoryal.

14. Ki zefor bann serviter Zeova inn fer pou fer Memoryal pandan pandemi COVID-19?

¹⁴ Pandemi COVID-19. Kan sa pandemi-la ti koumanse, bann serviter Zeova pa ti kapav asiste Memoryal dan zot bann lasal. Me sa pa ti anpes zot pou fer Memoryal. d Bann lasanble ki ti ena Internet ti fer Memoryal par video-konferans. Me kouma bann milyon dimounn ki pena Internet ti asiste Memoryal? Dan sertin pei, bann biro nasional ti fer bann laranzman pou ki bann dimounn kapav get sa diskour-la lor televizion ouswa ekout li lor radio. Anplis, bann biro nasional ti fer anrezistre sa diskour-la dan plis ki 500 lang, pou ki mem bann dimounn ki res dan bann landrwa izole kapav asiste Memoryal. Lerla, bann frer ti fer bann laranzman  pou kit sa bann lanrezistreman-la ar bann frer ki ti bizin sa.

15. Ki to kapav aprann ar lexanp enn etidian Labib ki apel Sue?

¹⁵ Persekision dan lafami. Pou sertin, pli gro difikilte ki zot inn gagne pou asiste Memoryal, se persekision avek zot fami. Anou get lexanp enn etidian Labib ki apel Sue. An 2021, enn zour avan Memoryal, Sue ti dir ser ki fer so letid la ki li pa ti pou kapav asiste Memoryal parski li ti pe gagn persekision avek so fami. Ser ki ti fer so letid la, ti lir Lik 22:44 avek li. Lerla, li ti explik Sue ki kan nou gagn bann difikilte, nou bizin swiv lexanp Zezi kan nou priye Zeova ek fer Li full konfians. Zour Memoryal, Sue ti prepar bann lanblem ek ti get video Ladorasion dan Gramatin pou Memoryal lor jw.org. Sa swar-la, kan li ti tousel dan so lasam, li ti asiste Memoryal par telefonn. Apre sa, Sue ti dir sa ser ki ti fer so letid la: “Yer to’nn bien ankouraz mwa. Mo’nn fer tou seki mo kapav pou asiste Memoryal, ek Zeova inn vremem ed mwa. Mo pa kapav explik twa ki kantite lazwa ek rekonesans mo ena!” Eski to panse Zeova kapav ed twa si to pe fer fas ar mem sitiasion?

16. Kifer nou sir ki Zeova pou beni nou pou bann zefor ki nou fer pou asiste Memoryal? (Romin 8:31, 32)

¹⁶ Bann zefor ki nou fer pou komemor lamor Zezi ena boukou valer pou Zeova. Nou kapav sir ki Li pou beni nou kan nou montre nou rekonesans pou seki Li’nn fer pou nou. (Lir Romin 8:31, 32.) Alor, anou bien deside pou fer tou seki nou kapav pou asiste Memoryal sa lane-la. Ek anou fer plis pou Zeova pandan bann semenn avan ek apre Memoryal.