1-2. (a) Kifer nou pa etone ki nou gagn bann problem? (b) Ki nou pou gete dan sa lartik-la?

 ANTAN ki bann serviter Zeova, nou pa etone ki nou gagn bann difikilte. Labib dir: “Nou bizin pas par boukou difikilte pou nou kapav rant dan Rwayom Bondie.” (Zist. 14:22) Anplis, nou kone ki sertin nou bann difikilte pa pou disparet net avan ki nou rant dan nouvo lemond kot “pa pou ena ni lamor, ni dey, ni lamantasion, ni douler.”​—Rev. 21:4.

² Zeova pa anpes nou gagn bann difikilte. Me selman, Li ed nou pou andir sa bann difikilte-la. Anou gete seki lapot Pol ti dir bann Kretien ki ti res Rom. Li ti koz lor plizir difikilte ki li ek so bann frer ti gagne. Apre sa, li ti ekrir: “Nou plis ki vinker par Sa-Enn ki finn kontan nou la.” (Rom. 8:35-37) Sa montre ki Zeova kapav fer twa reisi mem kan to pe gagn bann problem. Anou gete kouma Zeova ti fer Zozef reisi ek kouma Li kapav fer twa osi reisi.

3. Kouma lavi Zozef ti sanze san ki li atann?

³ Zakob ti montre ki li ti extra kontan so garson Zozef. (Zen. 37:3, 4) Akoz sa, Zakob so bann pli gran garson ti zalou zot frer. Kan zot ti gagn enn lokazion, zot ti vann Zozef ar bann marsan Madianit. Sa bann marsan-la ti amenn Zozef dan Lezip, ki ti bien-bien lwin ar so lakaz. Laba, bann-la ti re-vann li ar Potifar, ki ti sef bann gard Faraon. Zozef so lavi ti sanze bien vit! Avan, li ti res kot so papa, ki ti bien kontan li. Me aster-la, li ti vinn enn esklav dan Lezip.​—Zen. 39:1.

4. Dan ki fason nou kapav gagn mem difikilte ki Zozef ti gagne?

 ⁴ Labib dir ki “bann move kitsoz ariv tou dimounn.” (Ekle. 9:11, Parole de Vie) Parfwa, nou gagn bann difikilte ki “tou dimoun gagne.” (1 Kor. 10:13) Ouswa nou kapav soufer parski nou bann disip Zezi. Par exanp, bann dimounn kapav boufonn nou, opoz zot ar nou, ouswa mem persekit nou akoz nou lafwa. (2 Tim. 3:12) Ninport ki difikilte ki to kapav gagne, Zeova kapav fer twa reisi. Kouma Li ti fer sa avek Zozef?

5. Ki Potifar ti konpran kan li ti trouv Zozef pe reisi dan tou seki li ti fer? (Zenez 39:2-6)

⁵ Lir Zenez 39:2-6. Potifar ti remarke ki Zozef ti enn zenn ki ti bien intelizan ek ki ti travay dir. Li ti osi kone kifer Zozef ti koumsa. Li ti trouve ki “Zeova ti fer Zozef reisi dan tou seki li ti fer.” b Akoz samem, Potifar ti fer Zozef vinn so serviter personel. Li ti osi met Zozef an-sarz so lakaz. Gras-a sa, Potifar ti prospere.

6. Ki Zozef kitfwa ti resanti?

⁶ Esey met twa dan plas Zozef. Ki kitsoz li ti plis anvi? Eski li ti anvi ki Potifar remark li ouswa rekonpans li? Sirman Zozef ti anvi gagn so liberte ek retourn kot so papa. Malgre tou bann privilez ki li ti gagne dan lakaz Potifar, Zozef ti esklav enn met ki pa ti ador Zeova. Ek Zeova pa ti fer Potifar larg Zozef. Anplis, Zozef so sitiasion ti pou vinn boukou pli pir.

7. Dan ki fason Zozef so sitiasion ti vinn boukou pli pir? (Zenez 39:14, 15)

⁷ Dapre Zenez sapit 39, Potifar so madam ti atire ar Zozef, ek plizir fwa, li ti esey sedwir Zozef. Me sak fwa, Zozef ti dir non. Finalman, li ti telman ankoler ar Zozef ki li ti dir ki swadizan Zozef ti esey viol li. (Lir Zenez 39:14, 15.) Kan Potifar ti tann sa, li ti zet Zozef dan prizon, ek Zozef ti res dan  prizon pandan plizir lane. (Zen. 39:19, 20) Kouma prizon-la ti ete? Mo Ebre ki Zozef ti servi pou “prizon” kapav vedir osi “tink,” ouswa “trou.” Sa fer nou konpran ki sa plas-la ti bien som, ek ki Zozef ti santi li dezespere. (Zen. 40:15; not.) Anplis, Labib dir ki pandan enn tan, Zozef so lipie ek so likou ti atase ar lasenn. (Ps. 105:17, 18) Zozef so sitiasion ti vinn boukou pli pir. Avan, li ti enn esklav ki ti kapav fer konfians. Me aster-la, li ti vinn enn prizonie.

8. Mem si enn difikilte vinn boukou pli pir, ki kitsoz to kapav sir?

⁸ Eski to’nn deza pas par enn sitiasion bien stresan ki’nn vinn boukou pli pir malgre to bann lapriyer bien profon? Sa kapav arive. Zeova pa protez nou ar bann difikilte ki nou kapav gagne dan sa lemond ki pe dirize par Satan la. (1 Zan 5:19) Kanmem sa, to kapav sir ki Zeova konn bien par ki sitiasion to pe pase, ek Li gagn to traka. (Mat. 10:29-31; 1 Pier 5:6, 7) Anplis, Li’nn promet: “Zame mo pa pou kit twa, ni abandonn twa.” (Ebre 13:5) Zeova kapav ed twa pou andire mem kan to sitiasion paret pena okenn sime sorti. Anou gete kouma sa ti arive avek Zozef.

9. Ki kitsoz montre ki Zeova ti avek Zozef kan li ti dan prizon? (Zenez 39:21-23)

⁹ Lir Zenez 39:21-23. Mem pandan sa peryod difisil ki Zozef ti dan prizon la, Zeova ti fer Zozef reisi. Dan ki fason? Avek letan, ofisie ki ti an-sarz prizon la ti fer Zozef konfians ek ti respekte li, parey kouma Potifar. Bien vit, ofisie-la ti fer Zozef okip bann lezot prizonie. Ofet, Labib dir ki “ofisie ki ti an-sarz prizon-la pa ti okip okenn travay ki li’nn konfie Zozef.” Aster-la, Zozef ti ena enn travay pou fer. Sa ti enn sanzman ki Zozef pa ti atann! Me kouma enn prizonie, ki ti kondane parski swadizan li ti esey viol fam enn fonksioner dan lakour Faraon, ti kapav gagn enn responsabilite koumsa? Ena zis enn sel explikasion. Zenez 39:23 dir: “Zeova ti avek Zozef ek gras-a Zeova li ti reisi dan tou seki li ti fer.”

10. Kifer Zozef kitfwa pa’nn resanti ki li ti reisi dan tou kitsoz? Explike.

¹⁰ Ankor enn fwa, esey met twa dan plas Zozef. Apre ki ti met enn fos lakizasion lor li ek ki ti met li dan prizon, eski to panse ki Zozef ti resanti ki li ti reisi dan tou kitsoz? Ki kitsoz Zozef ti plis anvi? Eski li ti anvi gagn faver ofisie ki ti an-sarz prizon la? Sirman Zozef ti plis anvi sorti dan prizon. Li ti mem demann enn lot prizonie, ki ti pre pou sorti dan prizon, pou al koz ar Faraon pou fer liber li. (Zen. 40:14) Me selman, sa zom-la pa’nn reisi koz ar Faraon deswit kouma li’nn sorti. Akoz sa, Zozef ti res dan prizon pou ankor de-z-an. (Zen. 40:23; 41:1, 14) Kanmem sa, Zeova ti kontign fer Zozef reisi. Kouma?

11. Ki kapasite spesial Zeova ti donn Zozef, ek kouma sa ti realiz proze Zeova?

¹¹ Alor ki Zozef ti dan prizon, Zeova ti fer lerwa Lezip gagn de rev ki ti fatig li. Faraon ti extra anvi kone ki sa de rev-la vedir. Kan Faraon ti aprann  ki Zozef ti ena kapasite pou interpret bann rev, li ti fer apel li. Avek led Zeova, Zozef ti interpret sa bann rev-la ek Faraon ti inpresione ar bann konsey pratik ki Zozef ti donn li. Kan Faraon ti remarke ki Zeova ti avek Zozef, li ti met Zozef responsab manze dan Lezip. (Zen. 41:38, 41-44) Plitar, ti ena enn gran lafaminn dan Lezip, me osi dan Kanaan, pei kot Zozef so fami ti pe reste. Aster-la, Zozef ti kapav sap so fami ek anmemtan protez desandans ki ti pou amenn ziska Lemesi.

12. Kouma Zeova inn fer Zozef reisi?

¹² Mazinn bann diferan levennman ki’nn arive dan lavi Zozef. Kisann-la ki’nn fer Potifar remark Zozef, ki ti zis enn esklav? Kisann-la ki’nn fer ofisie ki ti an-sarz prizon-la donn Zozef bann responsabilite, alor ki li ti zis enn prizonie? Kisann-la ki’nn fer Faraon gagn bann rev bizar ek inn donn Zozef kapasite pou interpret zot? Kisann-la ki’nn pous Faraon pou met Zozef kouma responsab manze dan Lezip? (Zen. 45:5) Li kler ki se Zeova ki’nn fer Zozef reisi dan tou seki li ti fer. Mem si Zozef so bann frer ti anvi touy li, Zeova ti sanz sa sitiasion-la pou ki Li kapav realiz So volonte.

13. Eski Zeova kontrol sak ti kitsoz ki ariv nou? Explike.

¹³ Ki nou kapav aprann ar zistwar Zozef? Eski Zeova ed nou pou fer fas ar sak difikilte ki nou gagne? Eski Li kontrol sak sitiasion dan nou lavi, ek eski ena enn bon rezon pou sak move kitsoz ki ariv nou? Non, Labib pa dir sa. (Ekle. 8:9; 9:11) Selman, ena enn kitsoz ki nou kapav sir: Kan nou fer fas ar bann difikilte, Zeova kone seki nou pe pase ek Li tann nou kan nou demann Li so led. (Ps. 34:15; 55:22; Iza. 59:1) Anplis, Zeova kapav ed nou pou ki nou reisi andir bann difikilte. Kouma?

14. Kouma Zeova ed nou kan nou gagn bann difikilte?

 ¹⁴ Enn fason ki Zeova ed nou, se kan Li ankouraz nou, ek souvan Li fer sa dan bon moman. (2 Kor. 1:3, 4) Samem ki ti ariv Eziz, enn frer ki res Tirkmenistan. Li ti kondane pou fer de-z-an prizon akoz so lafwa. Li dir: “Gramatin, avan ki mo pas lakour, enn frer ti montre mwa Izai 30:15, kot li dir: ‘Kan zot res kalm ek fer mwa konfians, se samem ki pou zot lafors.’ Sa verse-la inn ed mwa pou res kalm ek pou fer Zeova konfians dan tou kitsoz. Kan mo ti medit lor sa verse-la, sa ti ed mwa pandan tou sa letan ki mo ti dan prizon la.” Eski to kapav pans enn moman dan to lavi kot Zeova inn ed twa, kan Li’nn ankouraz twa dan ler ki to ti plis bizin?

15-16. Ki to’nn aprann ar seki ti ariv Tori?

¹⁵ Bien souvan, se apre ki nou’nn pas par enn difikilte ki nou trouve kouma Zeova inn ed nou pou andir sa. Enn ser ki apel Tori inn viv sa. So garson, Mason, ti lit kont kanser pandan si-z-an ziska ki li mor. Biensir, sa ti fer Tori so leker bien fermal. Li dir: “Pou enn mama, mo pa krwar ki ena enn sitiasion pli difisil ki sa . . . Mo sir ki bann lezot paran pou dakor avek mwa. Kan to trouv to zanfan soufer, sa boukou pli pir ki kan tomem to soufer.”

¹⁶ Mem si sa ti fer Tori bien soufer kan li ti trouv so garson soufer sa kantite-la, plitar, li ti reflesi lor kouma Zeova ti ed li pou andir sa. Li dir: “Kan mo reflesi lor seki mo’nn viv, mo trouve  kouma Zeova inn ed mwa pandan ki mo garson ti malad. Par exanp, mem kan Mason ti bien malad ek ki personn pa ti pou kapav vizit li dan so lasam, kanmem sa bann frer ek ser ti vwayaz pandan de-z-er-tan pou vinn lopital. Ti touletan ena kikenn dan saldatant ki ti pre pou soutenir nou ek ankouraz nou. Anplis, bann frer ek ser ti donn nou seki nou bizin lor plan materyel. Ek mem kan sa ti vinn bien difisil, nou ti touletan gagn seki nou bizin.” Zeova ti donn Tori seki li bizin pou ki li andire, ek Li ti fer parey pou Mason.​—Get lankadre “ Zeova Ti Donn Nou Tou Seki Nou Bizin.”

17-18. Ki kitsoz pou ed nou pou trouv led ki Zeova donn nou pandan bann moman difisil ek pou ena rekonesans pou sa? (Psom 40:5)

¹⁷ Lir Psom 40:5. Enn kikenn ki grinp montagn, so lobzektif se pou ariv lao net. Selman, ena boukou plas lor so sime kot li kapav arete pou get bann zoli peizaz. Dan mem fason, pran letan pou arete regilierman, ek reflesi kouma Zeova inn fer twa reisi, mem pandan ki to ti pe gagn bann difikilte. Alafin sak zourne, demann tomem: ‘Kouma Zeova inn beni mwa azordi? Mem si difikilte-la ankor la, kouma Zeova pe ed mwa pou andir sa?’ Esey trouv omwin enn kitsoz ki Zeova inn fer pou ed twa pou to reisi andir sa difikilte-la.

¹⁸ Li vre ki to pou kontign priye pou ki to difikilte arete. Sa li normal, ek li bon ki to fer sa. (Fil. 4:6) Me li bon osi ki to trouve ki bann benediksion to pe gagne aster-la. Ek pa bliye ki Zeova inn promet ki Li pou donn nou lafors ek ed nou pou andire. Alor, kontign montre to rekonesans pou soutien ki Zeova pe donn twa. Lerla, parey kouma Zozef, to pou trouve kouma Zeova pe ed twa pou ki to reisi, mem pandan bann moman difisil.​—Zen. 41:51, 52.