Dan sertin kiltir, bann zom panse ki bann fam zot inferyer. Par exanp, Hans, enn responsab sirkonskripsion dan Bolivi, dir: “Sertin zom inn grandi dan enn kiltir ki bien macho. Akoz sa, zot panse ki zot pli siperyer ki bann fam.” b Shengxian, enn ansien dan Taywann, dir: “Kot mo reste, boukou zom panse ki bann fam bizin pa mel zot dan zot bann zafer. Si enn zom donn lopinion enn fam lor enn kitsoz, bann lezot zom pa pou ena respe pou li.” Ena bann zom ki fer diskriminasion lor bann fam dan lezot fason osi. Par exanp, zot fer bann badinaz ki rabes bann fam.

Selman, mem si enn zom inn grandi dan sa kalite kiltir-la, li kapav sanze. Li kapav aret panse ki bann zom pli siperyer ki bann fam. (Efe. 4:​22-24) Li pou reisi fer sa kan li swiv lexanp Zeova. Dan sa lartik-la, nou pou gete kouma Zeova tret bann fam, kouma bann frer kapav aprann tret bann fam parey kouma Zeova, ek kouma bann ansien kapav donn lexanp pou montre respe anver bann ser.

KOUMA ZEOVA TRET BANN FAM?

Zeova donn nou enn bon lexanp lor fason ki nou bizin tret bann fam. Li enn Papa ki ena boukou konpasion, ek Li bien kontan bann dimounn. (Zan 3:16) Nou bann ser ki fidel ena boukou valer pou Li, ek Li konsider zot kouma so bann tifi. Anou gete kouma Zeova donn loner bann madam.

Li pa fer diskriminasion. Zeova inn kree bann zom ek bann fam dan so resanblans.  (Zen. 1:27) Li pa’nn fer an-sort ki bann zom zot pli intelizan ouswa zot ena pli boukou kapasite ki bann fam, ek Li pa plis kontan bann zom. (2 Kro. 19:7) Li’nn kree bann zom ek bann fam avek mem kapasite pou konpran bann verite ki ena dan Labib ek pou imit So bann zoli kalite. Pou Zeova, bann zom ek bann fam ki fidel, zot ena mem valer. Li’nn donn toule-de posibilite pou viv pou touletan lor later, ki pou vinn enn paradi, ouswa pou vinn bann pret ek bann lerwa dan lesiel. (2 Pier 1:​1, not.) Li kler ki Zeova pa fer diskriminasion ant zom ek fam.

Li ekout zot. Zeova pran kont santiman bann madam ek bann kitsoz ki pe trakas zot. Par exanp, Li ti ekout lapriyer Rasel ek Ann, ek Li ti reponn zot. (Zen. 30:22; 1 Sam. 1:​10, 11, 19, 20) Dan Labib, Zeova inn fer osi ekrir bann zistwar kot bann zom inn ekout bann madam. Par exanp, Abraam ti obeir Zeova kan Zeova ti demann li pou ekout so madam Sara. (Zen. 21:​12-14) Lerwa David ti ekout Abigail, ek li ti mem dir ki se Zeova ki ti avoy Abigail. (1 Sam. 25:​32-35) Zezi ti ekout so mama, Mari. (Zan 2:​3-10) Dan sa bann lexanp-la, nou trouve kouma Zeova montre respe anver bann madam. Li fer sa kan Li ekout zot.

Li fer zot konfians. Par exanp, Zeova ti fer Ev konfians pou okip Later. (Zen. 1:28) Kan Li ti fer sa, Zeova ti montre ki Li pa ti konsider Ev kouma pli inferyer ki Adan. Okontrer, Ev ti enn led pou so mari. Zeova ti fer profetes Debora ek Oulda konfians. Li ti donn zot responsabilite pou konsey enn ziz, enn lerwa, ek lepep osi. (Ziz 4:​4-9; 2 Ler. 22:​14-20) Azordi, Zeova fer bann ser konfians ek Li donn zot plizir responsabilite. Par exanp, zot kapav servi kouma proklamater, pionie, ouswa misioner. Zot ede osi pou fer bann plan, pou konstrir, ek pou fer mintenans bann Lasal Renion ek bann lezot batiman lorganizasion. Sertin parmi zot servi dan bann Betel ek bann biro tradiksion. Bann ser, zot enn gran larme ki Zeova servi pou fer so volonte. (Ps. 68:11) Li kler ki pou Zeova, bann madam zot pa feb ek initil!

KOUMA BANN FRER KAPAV APRANN TRET BANN FAM PAREY KOUMA ZEOVA?

Frer, pou to kone si to pe tret bann ser parey kouma Zeova, to bizin examinn to bann panse ek to bann aksion. Pou to reisi fer sa, to bizin led. Parey kouma enn masinn X-Ray ed enn kikenn pou kone si ena enn problem ar so leker, enn bon kamarad ek Parol Bondie, Labib, kapav ed twa pou kone si to ena enn problem ar bann madam. Anou gete kouma nou kapav fer sa.

Demann enn bon kamarad. (Prov. 18:17) To kapav demann enn kamarad ki to fer konfians, ki rezonab, ek ki zanti: “Eski to panse ki mo tret bann ser dan enn bon fason? Eski zot panse ki mo ena respe pou zot? Eski mo kapav fer kitsoz pou tret zot pli bien?” Si to kamarad dir twa kouma to kapav fer pou tret bann madam pli bien, fode pa to ofanse. Okontrer, fer zefor pou fer bann sanzman ki bizin.

Etidie Parol Bondie, Labib. Meyer fason pou to kone si to pe tret bann ser bien, se kan to servi Labib pou examinn to bann panse ek to bann aksion. (Ebre 4:12) Dan Labib, nou trouv lexanp bann zom ki ti tret bann fam bien, ek osi bann ki pa ti fer sa. Kan nou etidie Labib, nou kapav servi sa bann lexanp-la pou gete kouma nou nou tret bann madam. Fode pa nou servi zis enn sel verse Labib pou nou kone kouma nou bizin tret bann madam. Nou bizin reflesi lor plizir verse pou nou kapav konn fason panse Zeova lor bann madam. Par exanp, dan 1 Pier 3:​7, Labib dir ki enn madam bizin gagn “loner parey kouma . . . enn resipian ki pli frazil.” c Eski savedir ki enn madam li inferyer,  li mwin intelizan, ek li ena mwins kapasite ki enn zom? Non! Kan nou konpar seki Pier inn dir ar Galat 3:​26-29, nou trouve ki Zeova inn swazir bann madam osi pou al regn ansam ar Zezi dan lesiel. Kan nou etidie Parol Bondie ek nou demann enn bon kamarad seki li panse lor fason ki nou tret bann madam, sa pou ed nou pou ena plis respe pou bann ser.

KOUMA BANN ANSIEN KAPAV MONTRE RESPE ANVER BANN SER?

Bann frer kapav aprann pou tret bann ser avek respe, kan zot swiv lexanp bann ansien. Kouma bann ansien kapav donn lexanp pou montre respe anver bann ser? Anou get de-trwa fason.

Zot felisit bann ser. Lapot Pol, se enn bon lexanp ki bann ansien bizin swiv. Dan let ki li ti ekrir lasanble Rom, Pol ti felisit plizir ser. (Rom. 16:12) Nou kapav sey mazinn lazwa sa bann ser-la kan ti lir sa let-la dan lasanble! Dan mem fason, bann ansien pa ezite pou felisit bann ser pou zot bann zoli kalite ek pou bon travay ki zot fer pou Zeova. Sa ed bann ser pou kone ki lasanble kontan zot ek respekte zot. Bann parol ankourazan enn ansien, parfwa se samem ki enn ser bizin pou ki li kapav kontign servi Zeova avek fidelite.—Prov. 15:23.

Kan zot felisit bann ser, bann ansien bizin presi ek sinser. Kifer? Enn ser ki apel Jessica, dir: “Nou bien kontan kan bann frer dir nou ‘mersi pou to bon travay.’ Selman, nou pli kontan kan bann frer felisit nou pou enn kitsoz presi, kouma par exanp, si pandan renion nou’nn fer nou zanfan asiz trankil, ouswa si nou’nn fer zefor pou al pran nou etidian Labib ek pou amenn li renion.” Kan  bann ansien felisit bann ser pou bann kitsoz presi, bann ser santi zot itil ek zot santi ki zot ena valer dan lasanble.

Zot ekout bann ser. Enn ansien ki ena limilite, li pa pou panse ki zis li tousel ki ena bann bon lide. Bann ansien ki ena limilite, zot invit bann ser pou donn zot lopinion, ek zot ekout bien kan bann-la koze. Kan zot fer sa, bann ansien ankouraz bann ser ek zot mem gagn bann bienfe. Kouma? Enn ansien ki apel Gerardo, ek ki servi dan Betel, dir: “Mo demann bann ser zot lopinion parski sa ed mwa pou fer mo travay pli bien. Sa bann ser-la kitfwa inn fer sa travay-la pli lontan ki laplipar bann frer.” Dan lasanble, boukou ser servi kouma pionie. Alor, zot konn boukou kitsoz lor bann dimounn ki res dan landrwa. Enn ansien ki apel Bryan, dir: “Nou bann ser ena boukou zoli kalite ek kapasite ki lorganizasion bizin. Alor, nou bizin profit zot lexperyans!”

Enn ansien ki ena sazes pa pou inior lopinion bann ser. Kifer? Enn ansien ki apel Edward, dir: “Lexperyans enn ser kapav ed enn frer pou konpran enn sitiasion pli bien, ek so lopinion kapav ed li pou konpran pli bien santiman lezot.” (Prov. 1:5) Mem si enn ansien pa pou swiv sizesion enn ser, li bizin remersie li ki li’nn donn so lopinion.

Zot form bann ser. Bann ansien ki ena sazes, zot rod bann lokazion pou form bann ser. Par exanp, zot kapav form bann ser pou diriz renion predikasion, pou ki bann-la kapav fer li kan pena frer batize. Zot kapav montre bann ser kouma pou servi bann zouti ouswa bann laparey, pou ki bann-la kapav travay lor bann proze konstriksion ouswa mintenans bann batiman lorganizasion. Dan Betel, bann frer responsab form bann ser pou asim diferan responsabilite, kouma dan bann departman mintenans, kontabilite, informatik, ek lezot ankor. Kan bann ansien form bann ser, zot montre ki zot fer bann ser konfians, ek ki zot panse ki bann ser bien itil.

Boukou ser servi formasion ki zot gagne ar bann ansien pou ed lezot. Par exanp, sertin ser ki’nn servi lor konstriksion, inn ed lezot pou aranz zot lakaz apre enn katastrof. Bann ser ki’nn gagn formasion pou pres dan enn fason informel, zot ede pou form bann lezot ser pou ki bann-la kapav zot osi partisip dan sa form predikasion-la. Ki bann ser resanti kan bann ansien form zot? Enn ser ki apel Jennifer, dir: “Kan mo ti travay lor konstriksion enn Lasal Renion, enn frer responsab ti pran letan pou form mwa. Li ti remarke ki mo ti travay bien, ek li ti felisit mwa pou sa. Mo extra kontan travay ar li, parski li fer mwa konfians ek li apresie mo travay.”

NOU GAGN BANN BIENFE KAN NOU KONSIDER BANN SER KOUMA NOU FAMI

Parey kouma Zeova, nou bien kontan nou bann ser ki fidel! Akoz sa, nou konsider zot kouma nou fami. (1 Tim. 5:​1, 2) Se enn loner ek enn privilez pou servi Zeova ansam avek zot! Anplis, kan zot kone ki nou kontan zot ek ki nou pou soutenir zot, sa rann nou ere. Enn ser ki apel Vanessa, dir: “Mo bien kontan ki mo form parti dan Zeova so lorganizasion, parski dan so lorganizasion ena bann frer ki’nn bien ankouraz mwa.” Enn ser ki res Taywann, dir: “Mo bien rekonesan anver Zeova ek so lorganizasion, parski zot kontan bann madam ek zot pran kont nou santiman. Sa fer mo lafwa vinn pli for ek sa fer mwa apresie privilez ki mo ena pou form parti so lorganizasion.”

Zeova bien fier kan Li trouv bann frer tret bann madam parey kouma Li! (Prov. 27:11) Enn ansien ki apel Benjamin ek ki res Lekos, dir: “Dan lemond azordi, boukou zom pena respe pou bann madam. Alor, kan enn madam vinn Lasal, li bizin santi ki nou kontan li ek ki nou respekte li.” Anou fer tou seki nou kapav pou swiv lexanp Zeova kan nou tret nou bann ser avek amour ek respe, parski zot vremem merit sa!—Rom. 12:10.