1-2. Ki leprev bann serviter Zeova kapav gagne?

 BANN leprev kapav sanz nou lavi net! Anou get de-trwa lexanp. Enn frer, ki apel Luis a ti aprann ki li ti ena enn kanser. Kan so dokter ti dir li sa, li ti dir Luis ki li ti res zis de-trwa mwa pou viv. Monika ek so mari ti bien okipe dan zot servis pou Zeova. Me enn zour, Monika ti aprann ki so mari, ki ti enn ansien, ti pe amenn doub rol depi plizir lane. Olivia, enn ser ki selibater, ti bizin kit so lakaz parski enn gro siklonn ti pe koste. Kan li ti retourn kot li, li ti trouve ki sa siklonn-la ti kraz so lakaz net. San ki zot atann, lavi sa bann dimounn-la ti sanze net. Eski twa osi to’nn deza gagn enn leprev ki’nn sanz to lavi net?

² Mem si nou fidel anver Zeova, nou gagn bann difikilte ek nou tom malad, parey kouma tou dimounn. Kitfwa osi nou gagn persekision ar bann dimounn ki pa kontan Zeova. Mem si Zeova pa anpes nou gagn sa bann difikilte-la, Li promet ki Li pou ed nou. (Iza. 41:10) Avek so led, nou kapav res zwaye, nou kapav pran bann bon desizion ek res fidel anver Li malgre bann difikilte ki nou gagne. Dan sa lartik-la, nou pou get kat fason kouma Zeova ed nou kan nou gagn bann leprev. Nou pou gete osi seki nou bizin fer pou ki nou kapav gagn so led.

 ZEOVA POU PROTEZ NOU

3. Kan nou gagn enn leprev, ki difikilte nou kapav gagne?

³ Difikilte ki nou kapav gagne. Kan nou gagn enn leprev, nou kapav gagn difikilte pou pran bann bon desizion. Kifer? Parski kitfwa nou pe soufer ek nou latet fatige. Nou kapav ena linpresion ki nou pe marse dan marenwar, san nou kone kotsa nou pe ale. Anou gete seki de ser, ki nou ti mansione taler-la, ti resanti kan zot ti gagn bann leprev. Olivia dir: “Kan sa siklonn-la ti kraz mo lakaz, mo ti abat net ek mo ti nepli kone ki pou fer.” Apre ki li ti aprann ki so mari ti trayir li, Monika ti dir: “Mo ti pe extra soufer; koumadir enn kikenn ti pik enn kouto dan mo leker. Mo pa ti pe kapav fer bann kitsoz sinp ki mo ti abitie fer toulezour. Mo pa ti krwar ki enn kitsoz koumsa ti ariv mwa.” Kouma Zeova ed nou kan nou santi nou boulverse?

4. Dapre Filipien 4:​6, 7, ki kitsoz Zeova promet nou?

⁴ Seki Zeova fer. Zeova promet nou ki Li pou donn nou seki Labib apel “lape Bondie.” (Lir Filipien 4:​6, 7.) Nou kapav gagn sa lape-la parski nou kamarad Zeova, ek sa lape-la ed nou pou res kalm. Sa lape-la “depas tou seki nou kapav konpran”; li pli extraordiner ki seki nou kapav mazine. Eski to’nn deza santi twa anpe apre ki to’nn priye Zeova ar tou to leker? Se samem “lape Bondie.”

5. Kouma lape Bondie protez nou leker ek nou lespri?

⁵ Filipien 4:7 dir osi ki lape Bondie “pou protez [nou] leker ek [nou] lespri.” Mo ki’nn servi pou tradir “protez,” se enn lexpresion ki dekrir bann solda ki pe protez enn lavil pou ki personn pa atak li. Bann dimounn ki res dan sa lavil-la, zot kapav dormi trankil ek zot santi zot an sekirite, parski zot kone ki ena bann solda ki pe protez zot lavil. Dan mem fason, kan lape Bondie protez nou leker ek nou lespri, nou santi nou kalm parski nou kone ki nou an sekirite. (Ps. 4:8) Parey kouma Ann, mem si nou sitiasion pa sanze deswit, nou kapav santi nou anpe. (1 Sam. 1:​16-18) Ek kan nou santi nou anpe, li pli fasil pou nou pran bann bon desizion.

6. Ki nou bizin fer pou ki nou gagn lape Bondie? (Get zimaz osi.)

⁶ Seki nou bizin fer. Kan to boulverse, priye Zeova ziska ki to santi so lape. (Lik 11:9; 1 Tes. 5:17) Luis, ki nou ti mansione taler-la, explike kouma li ek so madam, Ana, ti reisi fer fas ar zot  sitiasion kan zot ti aprann ki li ti pre pou mor. Li dir: “Dan sa moman-la, sa ti bien difisil pou pran bann desizion konsernan mo lasante ek bann lezot kitsoz. Me gras-a lapriyer, nou ti santi nou anpe dan sa moman bien difisil la.” Luis ek so madam ti priye Zeova plizir fwa avek tou zot leker. Zot ti demann Zeova pou donn zot “lape Bondie,” enn leker kalm, ek sazes pou pran bann bon desizion. Ek zot ti santi ki Zeova ti ed zot! Si to pe gagn enn leprev, kontign priye Zeova ar tou to leker ek Li pou donn twa so lape, ki pou protez to leker ek to lespri.—Rom. 12:12.

ZEOVA POU FER TWA REVINN “STAB”

7. Ki nou kapav resanti kan nou gagn enn leprev?

⁷ Difikilte ki nou kapav gagne. Kan nou gagn enn leprev, sa ena enn lefe lor nou lemosion, ek akoz sa, nou kapav pans ek azir dan enn fason ki nou pa abitie. Nou limer osi kapav sanze brit. Lerla, nou koumadir enn bato lor lamer pandan enn siklonn, ki pe tange akoz bann gro-gro vag. Apre lamor Luis, Ana, ki nou ti mansione taler-la, explike kouma so limer ti sanze brit. Li dir: “Parfwa mo ti deprime ek mo ti bien sagrin. Ek parfwa mo ti ankoler parski Luis ti nepli la.” Ana ti osi santi li tousel, ek li ti agase kan li ti bizin fer bann kitsoz ki Luis ti pe fer avan. Ena fwa, Ana ti santi li kouma sa bato ki dan sa siklonn-la. Kouma Zeova ed nou kan nou gagn difikilte pou kontrol nou lemosion?

8. Dapre Izai 33:​6, ki kitsoz Zeova fer?

⁸ Seki Zeova fer. Zeova dir nou ki Li pou fer nou vinn stab. (Lir Izai 33:6.) Kan ena enn siklonn lor lamer, bann bato tange ek zot kapav devir anba-lao. Me anba sertin bato, ena bann stabilizater, ek sa ede pou ki bato-la bouz mwins. Gras-a sa bann stabilizater-la, bann bato res stab ek bann dimounn santi zot an sekirite. Selman, pou ki sa bann stabilizater-la mars bien, bato-la bizin kontign avanse. Dan mem fason, pou ki Zeova fer nou vinn stab, nou osi nou bizin kontign avanse, setadir kontign andir nou bann difikilte ek res fidel anver Li.

9. Kouma lorganizasion Zeova ed nou pou revinn stab? (Get zimaz osi.)

⁹ Seki nou bizin fer. Kan to limer sanze brit, ouswa kan to gagn difikilte pou kontrol to lemosion, fer to maximum pou kontign priye Zeova, pou asiste  bann renion, ek pou sorti predikasion. Kitfwa to pa pou kapav fer otan ki to ti pe fer avan, me Zeova pa demann twa pou fer plis ki seki to kapav fer. (Konpar ar Lik 21:​1-4.) To bizin osi trouv letan pou fer to letid personel ek pou reflesi lor seki to pe aprann. Kifer? Parski gras-a so lorganizasion, Zeova donn nou bann zoli lartik ek bann video ki kapav ed nou pou kontrol nou lemosion. To kapav trouv sa bann konsey-la dan Index des publications des Témoins de Jéhovah, Liv Resers pou Bann Temwin Zeova, ek aplikasion JW Library. Se seki Monika fer sak fwa ki li santi li boulverse. Par exanp, parfwa li fer bann resers lor bann mo kouma “koler,” “trayir” ouswa “fidelite.” Apre sa, li lir bann lartik ki li gagne ziska ki li santi li bien. Li dir: “Kan mo boulverse, mo fer bann resers, ek plis mo lir, plis mo santi Zeova pe pran mwa dan so lebra. Sa bann lartik-la ed mwa pou trouve ki Zeova konpran mo bann santiman ek ki Li anvi ed mwa.” Gras-a so lorganizasion, Zeova kapav ed nou pou nou kontrol nou lemosion ek nou revinn stab.—Ps. 119:​143, 144.

ZEOVA POU SOUTENIR TWA

10. Apre ki nou’nn viv enn sitiasion ki’nn tromatiz nou, kouma nou kapav santi nou?

¹⁰ Difikilte ki nou kapav gagne. Apre ki nou’nn viv enn sitiasion ki’nn tromatiz nou, pandan inpe letan nou kapav santi nou feb fizikman ek emosionelman. Nou kapav santi nou kouma enn atlet ki’nn blese ek ki pe bizin mars ar enn badinn. Nou kapav gagn difikilte pou fer bann kitsoz ki nou ti pe fer fasilman avan, ouswa nou perdi gou pou fer bann kitsoz ki nou ti kontan fer. Parey kouma Eliya, kitfwa nou anvi nek dormi ek nou trouv sa difisil pou leve. (1 Ler. 19:​5-7) Kan nou santi nou feb koumsa, ki kitsoz Zeova promet nou?

11. Dan ki fason ankor Zeova ed nou? (Psom 94:18)

¹¹ Seki Zeova fer. Li promet nou ki Li pou soutenir nou. (Lir Psom 94:18.) Parey kouma enn atlet ki’nn blese ek ki bizin led, nou osi kitfwa nou pou bizin led pou ki nou kapav kontign servi Zeova. Dan sa bann moman-la, Zeova rasir nou kan Li dir: “Mwa, Zeova to Bondie, mo pe trap to lame drwat bien for, sa Kikenn ki pe dir twa: ‘Pa per. Mo  pou ed twa.’” (Iza. 41:13) Kan li ti pe gagn bann difikilte ek ki li ti pe bizin fer fas ar so bann lennmi, Lerwa David ti dir Zeova: “To lame drwat finn soutenir mwa.” (Ps. 18:35) Me kouma Zeova soutenir nou?

12. Kan nou santi nou feb, kisann-la Zeova kapav servi pou ed nou?

¹² Zeova souvan servi lezot pou ed nou. Par exanp, enn fwa kan David ti santi li feb, so kamarad Zonatan ti vinn get li pou soutenir li ek pou ankouraz li. (1 Sam. 23:​16, 17) Ek Zeova ti servi Elize pou ed Eliya. (1 Ler. 19:​16, 21; 2 Ler. 2:2) Azordi, Zeova kapav servi nou fami, nou bann kamarad, ek bann ansien pou soutenir nou. Selman, kan nou bien deprime, kitfwa nou pa pou anvi trouv zot. Kitfwa nou pou anvi res dan nou kwin. Li normal ki nou reazir koumsa. Me ki nou bizin fer pou ki Zeova soutenir nou?

13. Ki nou bizin fer pou ki Zeova soutenir nou? (Get zimaz osi.)

¹³ Seki nou bizin fer. Mem si to anvi res dan to kwin, pa fer sa. Kan nou evit lezot ek nou res dan nou kwin, nou ena tandans pou pans zis nou-mem ek nou bann problem. Ek sa kapav fer nou pran bann move desizion. (Prov. 18:1) Kan nou pas dan enn sitiasion bien difisil, li normal ki nou anvi res inpe tousel. Selman, si nou res dan nou kwin tro lontan, kitfwa nou pe refiz led ki Zeova pe donn nou. Alor, mem si to trouv sa bien difisil, aksepte led ki to fami, to bann kamarad, ek bann ansien pe donn twa. Pa bliye ki Zeova pe servi zot pou soutenir twa.—Prov. 17:17; Iza. 32:​1, 2.

ZEOVA POU REKONFORT TWA

14. Ki sitiasion kapav fer nou gagn per?

¹⁴ Difikilte ki nou kapav gagne. Parfwa, nou kapav viv bann sitiasion ki fer nou gagn per. Labib koz lor bann serviter Zeova ki parfwa ti trakase ek ti gagn per akoz zot bann lennmi ouswa akoz lezot kitsoz. (Ps. 18:4; 55:​1, 5) Eski to pe gagn persekision dan lekol, dan travay, ar to fami, ouswa ar gouvernman? Eski to ena enn maladi grav ek to per tansion to mor? Dan bann sitiasion koumsa, kitfwa nou santi nou kouma enn ti zanfan parski nou pa kapav fer nanye. Kouma Zeova kapav ed nou dan sa bann moman-la?

15. Kouma Psom 94:19 rasir nou?

 ¹⁵ Seki Zeova fer. Li rekonfort nou ek Li soulaz nou. (Lir Psom 94:19.) Sa Psom-la kitfwa fer nou mazinn enn tifi ki gagn per ek ki pa pe reisi dormi parski ena loraz deor. Me kan so papa vini, pran li dan so lebra ek may li, li reisi gagn somey. Mem si ankor ena loraz deor, tifi-la inn santi li an sekirite parski so papa inn rekonfort li. Dan mem fason, kan nou viv bann sitiasion ki fer nou per, kitfwa nou bizin ki Zeova pran nou dan so lebra ek ki Li rekonfort nou ziska ki nou nepli gagn per. Kouma nou kapav gagn sa kalite rekonfor-la ar Zeova?

16. Ki nou bizin fer pou ki Zeova rekonfort nou? (Get zimaz osi.)

¹⁶ Seki nou bizin fer. Pas letan avek Zeova, setadir priye Li ek lir so Parol souvan. (Ps. 77:​1, 12-14) Si to pran sa bon labitid-la, kan enn kitsoz fer twa per, deswit to pou al rod led ar to Papa Zeova. Ouver to leker ar Li ek dir Li ki kitsoz pe fer twa per. Ek les Li koz avek twa ek konsol twa gras-a so Parol Labib. (Ps. 119:28) Kan to gagn per, ena sertin liv dan Labib ki kapav rekonfort twa ek soulaz twa. Par exanp, to kapav lir liv Zob, bann Psom, ek liv Proverb. To kapav osi lir bann parol Zezi ki trouv dan Matie sapit 6. Kan to priye Zeova ek to lir so Parol, to pou santi ki Li pe rekonfort twa.

17. Ki kitsoz nou kapav sir?

¹⁷ Kan nou gagn bann leprev, nou kapav sir ki Zeova pou ed nou. Zame Li pa pou abandonn nou! (Ps. 23:4; 94:14) Zeova promet ki Li pou protez nou, Li pou fer nou revinn stab, Li pou soutenir nou, ek Li pou rekonfort nou. Izai 26:3 dir ki Zeova ‘pou protez bann ki kont lor li net; li pou donn zot lape ki dire pou touletan, parski zot fer li konfians.’ Alor, fer Zeova konfians ek fer to maximum pou ki Li ed twa. Si to fer sa, to pou regagn lafors mem kan to dan bann leprev.