LARTIK LETID 5
KANTIK 108 Lamour Fidel Bondie
Bann Benediksion ki Nou Gagne Gras-a Lamour Zeova
“Kris Zezi inn vinn dan lemond pou sov bann ki fer pese.”—1 TIM. 1:15.
PWIN PRINSIPAL
Dan sa lartik-la, nou pou trouv bann benediksion ki nou kapav gagne gras-a laranson ek osi kouma nou kapav montre Zeova nou rekonesans.
1. Ki kitsoz Zeova bien kontan?
FER koumadir to donn enn kikenn ki to kontan enn kado ki spesial, ki itil, ek ki bien zoli. To pou bien sagrin si li met to kado dan enn kwin ek ki li pa pran li kont, pa vre! Parkont, si li servi to kado ek li montre twa ki li bien rekonesan pou sa, to pou bien kontan! Ki nou kapav aprann ar sa lexanp-la lor kado ki Zeova inn donn nou, setadir laranson? Parski Li bien kontan nou, Zeova inn aksepte sakrifie so Garson pou nou. Alor, Li bien kontan kan nou montre rekonesans pou sa zoli kado-la ek pou lamour ki Li’nn montre anver nou.—Zan 3:16; Rom. 5:7, 8.
2. Ki nou pou examine dan sa lartik-la?
2 Malerezman, plis letan pase, li kapav arive ki nou rekonesans pou laranson diminie. Si sa arive, sa pou koumadir nou pe pran zoli kado ki Zeova inn donn nou, nou pe met li dan enn kwin, ek nou pa pe pran li kont. Alor, pou ki sa pa arive, nou bizin kontign reflesi lor seki Zeova ek Zezi inn fer pou nou. Sa lartik-la pou ed nou pou fer sa. Nou pou trouve kouma gras-a laranson, nou kapav gagn bann benediksion depi aster-la mem, ek osi kouma nou pou gagn bann benediksion dan lavenir. Nou pou trouve osi kouma dan bann semenn avan ek apre Komemorasion Lamor Zezi, nou kapav montre nou rekonesans pou lamour ki Zeova inn montre anver nou.
BANN BENEDIKSION KI NOU GAGNE ASTER-LA
3. Sit enn benediksion ki nou gagne depi aster-la mem gras-a laranson.
3 Nou pe deza gagn bann benediksion gras-a sakrifis Zezi. Par exanp, gras-a laranson, Zeova pardonn nou bann pese. Li pa oblize pardonn nou. Selman, Li anvi fer li. Dan enn sante, enn ekrivin Psom ti montre so rekonesans anver Zeova parski Li ti pardonn li. Li ti dir: “Parski twa, A Zeova, to bon ek to pre pou pardone.”—Ps. 86:5; 103:3, 10-13.
4. Pou kisann-la Zeova inn donn laranson? (Lik 5:32; 1 Timote 1:15)
4 Sertin panse ki zot pa merite ki Zeova pardonn zot. Me avredir, personn pa merite gagn pardon Zeova. Lapot Pol ti dir ki li “pa merite ki apel [li] enn zapot.” Selman apre sa, li ti dir: “Me gras-a Bondie so bonte extraordiner mo seki mo ete.” (1 Kor. 15:9, 10) Kan nou repanti pou nou bann pese, Zeova pardonn nou. Kifer Li fer sa? Pa parski nou merite, me parski Li kontan nou. Alor, si to panse ki to pa merite ki Zeova pardonn twa, pa bliye ki Zeova pa’nn donn laranson pou bann dimounn parfe; Li’nn donn laranson pou bann dimounn inparfe, ki regret bann pese ki zot inn fer, ek ki fer zefor pou sanze.—Lir Lik 5:32; 1 Timote 1:15.
5. Eski nou kapav dir ki nou merite ki Zeova pardonn nou? Explike.
5 Fode pa nou panse ki akoz nou pe servi Zeova depi plizir lane, Li oblize pardonn nou. Zeova rapel tou bann kitsoz ki nou’nn fer pou Li. (Ebre 6:10) Selman, laranson se pa enn lapey ki nou merite gagne parski nou pe servi Zeova; se enn kado ki Zeova inn fer nou. Alor, fode pa nou panse ki akoz nou’nn fer boukou kitsoz pou Zeova, ki nou merite ki Li pardonn nou. Si nou pans koumsa, se koumadir nou pe dir ki Zezi pa ti bizin mor pou nou.—Konpar ar Galat 2:21.
6. Kifer Pol ti travay dir pou Zeova?
6 Pol ti kone ki ninport ki kantite kitsoz ki li fer pou Zeova, Zeova pa ti oblize pardonn li. Alor, kifer li ti travay otan dir pou Zeova? Li pa ti fer sa pou montre ki li merite ki Zeova pardonn li. Li ti fer sa pou montre ki li ena rekonesans anver Zeova pou bonte ek mizerikord ki Li ti montre anver li. (Efe. 3:7) Parey kouma Pol, nou osi nou kontign servi Zeova ar tou nou leker. Nou fer sa pou montre ki nou rekonesan anver Li, ek pa parski nou merite ki Li pardonn nou.
7. Sit enn lot benediksion ki nou gagne depi aster-la mem gras-a laranson. (Romin 5:1; Zak 2:23)
7 Enn lot benediksion ki nou gagne depi aster-la mem gras-a laranson, se ki nou kapav ena enn bon lamitie ar Zeova. a Kouma nou ti trouve dan lartik avan, kan nou ne, nou pena enn bon lamitie ar Zeova. Me gras-a laranson, nou kapav fer “lape avek Bondie” ek nou kapav vinn pros ar Li.—Lir Romin 5:1; Zak 2:23.
8. Kifer nou bizin rekonesan ki nou kapav priye Zeova?
8 Enn parmi bann privilez extraordiner ki nou ena parski nou ena enn bon lamitie ar Zeova, se lapriyer. Zeova pa zis tann bann lapriyer ki so bann serviter fer kan zot zwenn ansam dan renion, me Li osi tann bann lapriyer ki sakenn fer an prive. Lapriyer kapav kalme nou leker ek fer nou gagn lape lespri. Me lapriyer pa fer zis sa! Li osi ranforsi nou lamitie ar Zeova. (Ps. 65:2; Zak 4:8; 1 Zan 5:14) Kan li ti lor later, Zezi ti priye Zeova souvan parski li ti kone ki Zeova ti pe ekout li ek ki so bann lapriyer ti pe ranforsi so lamitie ar so Papa. (Lik 5:16) Nou bien rekonesan ki gras-a laranson, nou kapav vinn kamarad Zeova ek nou kapav priye Li!
BANN BENEDIKSION KI NOU POU GAGNE DAN LAVENIR
9. Ki benediksion bann fidel serviter Zeova pou gagne dan lavenir gras-a laranson?
9 Ki benediksion bann fidel serviter Zeova pou gagne dan lavenir gras-a laranson? Zot pou kapav gagn lavi pou touletan. Boukou dimounn panse ki sa li inposib, parski bann dimounn inn touletan mor. Selman, dan proze ki Zeova ti ena o-koumansman, bann dimounn ti bizin viv pou touletan. Si Adan pa ti fer pese, personn pa ti pou panse ki li inposib pou viv pou touletan. Kifer? Parski tou dimounn ti pou viv pou touletan. Ek mem si nou gagn difikilte pou mazine kouma sa pou ete kan nou pou viv pou touletan, nou kapav sir ki sa pou vremem arive. Zeova inn fer enn gran sakrifis pou ki sa arive; Li’nn donn lavi so Garson ki Li bien kontan.—Rom. 8:32.
10. Ki benediksion bann Kretien ki ena lesperans pou al dan lesiel ek bann lezot mouton pou gagne dan lavenir?
10 Mem si lavi eternel se enn benediksion ki nou pou gagne dan lavenir, Zeova anvi ki nou reflesi lor la depi aster-la mem. Bann Kretien ki ena lesperans pou al dan lesiel pou ena enn lavi extraordiner dan lesiel kan zot pou regne ansam ar Zezi. (Rev. 20:6) Bann lezot mouton pou kapav viv lor later ki pou vinn enn paradi, kot pa pou ena ‘ni dey, ni douler.’ (Rev. 21:3, 4) Eski to form parti bann lezot mouton ki ena lespwar pou viv pou touletan lor later? Sa rekonpans-la pena mwins valer ki lavi dan lesiel. Apre tou, Zeova inn kree bann dimounn pou ki zot viv lor later. Alor, lavi eternel lor later pou vremem rann nou ere.
11-12. Sit sertin benediksion ki nou pou gagne dan Paradi, lor ki nou kapav koumans reflesi depi aster-la mem. (Get zimaz osi.)
11 Esey mazine kouma to lavi pou ete dan Paradi! To pa pou bizin trakase tansion to malad ouswa to mor. (Iza. 25:8; 33:24) Zeova pou donn twa tou bann bon kitsoz ki to anvi. Ki kitsoz to ti pou kontan aprann? Eski to ti pou kontan aprann plis lor bann zanimo, aprann zwe enn linstriman lamizik, ouswa aprann desine? Dan Paradi, pou bizin bann arsitek, bann sarpantie, ek bann mason. Pou bizin osi bann dimounn pou plante, pou kwi manze, pou aranz bann zouti, ek pou okip bann zardin. (Iza. 35:1; 65:21) Kan to pou viv pou touletan, to pou kapav aprann fer tousala, ek to pou kapav aprann plis ankor!
12 Mazinn lazwa ki to pou gagne kan to pou akeyir bann ki’nn resisite! (Zist. 24:15) Mazine osi kouma atraver kreasion, to pou kapav aprann plis lor bann zoli kalite ki Zeova ena! (Ps. 104:24; Iza. 11:9) Enn lot zoli benediksion ki to pou gagne, se ki to nepli pou fer pese. Savedir ki to pou kapav servi Zeova avek enn leker kler, ek ki to nepli pou bizin demann Li pardon. Eski to pou aksepte perdi tou sa bann zoli benediksion-la zis pou “plezir tanporer ki gagne dan pese” aster-la? (Ebre 11:25) To pa pou fer sa, pa vre! Bann benediksion ki nou pou gagne dan Paradi, li vo plis ki ninport ki sakrifis ki nou kapav fer azordi. Pa bliye sa osi: Paradi, li pa pou touletan enn kitsoz ki nou pe atann. Biento, li pou vinn enn realite, savedir ki li pou vinn plas kot nou viv nou lavi toulezour. Tousala posib parski Zeova telman kontan nou ki Li’nn donn lavi so Garson pou nou!
Ki bann benediksion to anvi gagne dan Paradi? (Get paragraf 11-12)
MONTRE TO REKONESANS POU LAMOUR ZEOVA
13. Kouma nou kapav montre ki nou ena rekonesans pou lamour Zeova? (2 Korintien 6:1)
13 Kouma nou kapav montre nou rekonesans anver Zeova parski Li’nn donn laranson? Nou montre nou rekonesans kan nou fer nou servis pou Zeova vinn kitsoz pli inportan dan nou lavi. (Mat. 6:33) Apre tou, Zezi inn mor “pou ki bann ki viv nepli viv pou zotmem, me pou sa kikenn ki’nn mor pou zot la ek ki’nn resisite.” (2 Kor. 5:15) Zeova inn montre so bonte anver nou ek Li’nn pardonn nou. Alor, kan nou fer tou seki nou kapav pou servi Li, nou montre ki nou rekonesan anver Li pou tou seki Li’nn fer pou nou.—Lir 2 Korintien 6:1.
14. Kouma nou kapav montre ki nou fer Zeova konfians?
14 Enn lot fason ki nou montre ki nou ena rekonesans pou lamour Zeova, se kan nou montre ki nou fer Li konfians ek ki nou swiv so bann prinsip. Kouma nou kapav fer sa? Kan nou bizin pran bann desizion, kouma par exanp kan sa konsern nou ledikasion ouswa nou travay, nou bizin reflesi lor seki Zeova anvi nou fer. (1 Kor. 10:31; 2 Kor. 5:7) Kan nou pran bann desizion ki montre ki nou ena konfians dan Zeova, nou lafwa vinn pli for, nou vinn pli pros ar Li, ek sa ranforsi nou lesperans.—Rom. 5:3-5; Zak 2:21, 22.
15. Kan ena Komemorasion Lamor Zezi, kouma nou kapav montre nou rekonesans pou lamour Zeova?
15 Enn lot fason ankor ki nou montre nou rekonesans pou lamour Zeova, se kan nou fer tou seki nou kapav dan bann semenn avan ek apre Komemorasion Lamor Zezi pou montre Zeova ki kantite nou rekonesan anver Li pou laranson. Enn fason nou fer sa se kan nou invit lezot pou asiste Komemorasion. (1 Tim. 2:4) Kan to invit enn kikenn, explik li seki pou pase pandan Komemorasion. Pou to fer sa, to kapav servi video Kifer Zezi Inn Mor? ek video Rapel Lamor Zezi. Bann ansien bizin fer zefor pou invit bann inaktif. Kan bann ki’nn kit troupo Zeova retourn dan lasanble, ena boukou lazwa dan lesiel ek lor later! (Lik 15:4-7) Zour Komemorasion, anplis ki nou akeyir nou bann frer ek ser, nou bizin fer zefor pou akeyir bann ki nouvo ek bann ki pa’nn vinn renion depi lontan. Nou anvi ki zot santi zot bien ek ki zot santi zot alez.—Rom. 12:13.
16. Kan Komemorasion Lamor Zezi pe koste, kifer li bon nou reflesi si nou kapav fer plis dan predikasion?
16 Eski to kapav fer plis dan predikasion avan ek apre Komemorasion Lamor Zezi? Kan to fer sa, to montre ki to ena rekonesans pou tou seki Zeova ek Zezi inn fer pou twa. Plis to sorti predikasion, plis to pou trouve kouma Zeova pe ed twa, ek plis to pou ena konfians an Li. (1 Kor. 3:9) Pa bliye osi fer to lektir Labib pou Komemorasion Lamor Zezi. To pou trouv sa bann verse-la dan nou brosir Anou Examinn Labib Toulezour ouswa dan program ki ena dan Kaye Renion. To kapav osi fer plis resers lor sa bann verse-la dan to letid personel.
17. Ki kitsoz fer Zeova plezir? (Get osi lankadre “ Kouma To Kapav Montre To Rekonesans Anver Zeova?”)
17 Akoz to sitiasion, kitfwa to pa pou kapav fer plis dan to servis pou Zeova. Selman, pa bliye ki Zeova pa konpar seki to kapav fer ar seki lezot kapav fer. Li trouve seki ena dan to leker, ek sa fer Li plezir kan Li trouve ki to ena rekonesans pou sa zoli kado ki Li’nn donn twa la, setadir laranson.—1 Sam. 16:7; Mark 12:41-44.
18. Kifer nou bizin rekonesan anver Zeova ek Zezi?
18 Se zis gras-a laranson ki nou kapav gagn pardon nou bann pese, vinn kamarad Zeova, ek ena posibilite pou viv pou touletan. Alor, anou touletan montre nou rekonesans pou lamour Zeova, parski se gras-a so lamour ki nou pe kapav gagn tou sa bann benediksion-la. (1 Zan 4:19) Anou montre nou rekonesans anver Zezi osi, parski li’nn telman kontan nou ki li’nn donn so lavi pou nou.—Zan 15:13.
KANTIK 154 Lamour Pa Pou Disparet Zame!
