LARTIK LETID 1
KANTIK 2 Zeova Se To Nom
Donn Zeova Laglwar
NOU TEXT POU LANE 2025: “Donn Zeova laglwar ki so nom merite.”—PS. 96:8.
PWIN PRINSIPAL
Nou pou aprann kouma nou kapav donn Zeova laglwar ki Li merite.
1. Ki kitsoz pli inportan pou bann dimounn azordi?
ESKI to’nn remarke ki azordi bann dimounn pans zis zot tousel? Par exanp, lor bann rezo sosio, boukou dimounn flat zotmem ek bann kitsoz ki zot fer. Azordi, bien tigit dimounn donn Zeova laglwar. Dan sa lartik-la, nou pou gete ki savedir donn Zeova laglwar ek kifer nou bizin fer sa. Nou pou aprann osi kouma nou kapav donn Bondie laglwar ki Li merite, ek kouma dan lavenir Zeova pou glorifie so nom.
KI SAVEDIR DONN ZEOVA LAGLWAR?
2. Ki Zeova ti fer kot Montagn Sinai? (Get lor kouvertir.)
2 Labib montre ki Zeova Li enn Bondie extraordiner ki merite gagn laglwar. Par exanp, inpe apre ki Zeova ti liber bann Izraelit depi Lezip, Li ti montre zot so laglwar. Mazinn sa senn-la: Plizir milyon Izraelit inn rasanble pre ar Montagn Sinai pou ekout seki Bondie ena pou dir zot. Enn lafime bien nwar ti koumans antour montagn-la. Ek san ki zot atann, ena enn gran tranbleman-de-ter, bann zekler, loraz ek “son enn korn bien for.” (Ex. 19:16-18; 24:17; Ps. 68:8) Kan Zeova ti fer sa bann kitsoz-la, sirman bann Izraelit ti bien inpresione par Zeova so pwisans!
Kot Montagn Sinai, Zeova ti montre bann Izraelit so pwisans (Get paragraf 2)
3. Ki savedir donn Zeova laglwar?
3 Eski bann dimounn kapav donn Zeova laglwar? Wi. Enn fason nou fer sa se kan nou fer lezot konn so pwisans extraordiner ek so bann zoli kalite. Nou donn Bondie laglwar osi kan nou loue Li pou tou bann kitsoz ki Li fer pou nou. (Iza. 26:12) Lerwa David inn donn nou enn zoli lexanp lor kouma nou kapav donn Zeova laglwar. Dan enn lapriyer ki li ti fer devan pep Izrael, li ti dir Bondie: “A! Zeova, to ena grander, pwisans, bote, laglwar ek dignite, parski tou seki dan lesiel ek lor later pou twa.” Kan David ti terminn so lapriyer, “zot tou ti loue Zeova.”—1 Kro. 29:11, 20.
4. Kouma Zezi ti donn Zeova laglwar?
4 Kan Zezi ti lor later, li ti donn so Papa laglwar kan li ti dir bann dimounn ki se so Papa ki ti donn li pouvwar pou fer bann mirak. (Mark 5:18-20) Zezi ti donn Zeova laglwar osi par fason ki li ti koz lor so Papa ek par fason ki li ti tret lezot. Enn fwa, kan Zezi ti pe ansegne dan enn sinagog, parmi bann ki ti pe ekout li, ti ena enn madam ki ti posede par enn demon depi 18 an. Akoz sa demon-la, madam-la “ti bien kourbe ek li pa ti kapav redres li ditou.” Zezi ti konpran soufrans sa madam-la, ek li ti anvi ed li. Alor, li ti koste ar li, ek avek bonte li ti dir li: “Fam, to’nn libere ar to maladi.” Lerla, li ti poz so lame lor madam-la ek deswit madam-la ti debout drwat ek li “ti koumans donn Bondie laglwar.” Li ti bien rekonesan ki Zeova ti fer li regagn so lasante. (Lik 13:10-13) Sa madam-la ti ena enn bon rezon pou donn Zeova laglwar, pa vre! Ek nou osi nou ena bann bon rezon pou donn Zeova laglwar.
KIFER NOU BIZIN DONN ZEOVA LAGLWAR?
5. Kifer nou respekte Zeova?
5 Nou donn Zeova laglwar parski nou ena enn gran respe pou Li. Nou ena boukou rezon pou respekte Zeova. Li Tou-Pwisan ek zame Li pa fatige. (Ps. 96:4-7) Li ena boukou sazes, ek nou trouv sa dan bann kitsoz ki Li’nn fer. Li’nn donn nou lavi ek tou seki nou bizin pou viv. (Rev. 4:11) Li fidel. (Rev. 15:4) Tou seki Li fer reisi ek Li touletan tini so bann promes. (Zozwe 23:14) Se akoz sa ki, kan Zeremi ti koz lor Zeova, li ti dir: “Parmi tou bann dimounn saz dan bann nasion ek zot bann rwayom, pena personn kouma twa!” (Zer. 10:6, 7) Wi, nou ena boukou rezon pou respekte nou Papa ki dan lesiel! Me Zeova, Li pa zis nou Bondie ki merit nou respe. Li ena osi bann zoli kalite ek akoz sa nou bien kontan Li.
6. Kifer nou kontan Zeova?
6 Nou donn Zeova laglwar parski nou vremem kontan Li. Nou kontan Zeova parski Li ena boukou zoli kalite. Li ena mizerikord ek konpasion. (Ps. 103:13; Iza. 49:15) Kan nou soufer, sa fer so leker fermal. (Zaka. 2:8) Li ed nou pou aprann konn Li pli bien ek pou vinn so kamarad. (Ps. 25:14; Zist. 17:27) Ek Li ena limilite; “Li abes li pou get lesiel ek later. Li relev ti dimounn dan lapousier.” (Ps. 113:6, 7) Pou tou sa bann rezon-la, nou anvi donn laglwar nou Bondie ki extraordiner!—Ps. 86:12.
7. Ki nou bizin fer bann dimounn kone, ek kifer?
7 Nou donn laglwar Zeova parski nou anvi ki lezot konn Li. Boukou dimounn pa konn laverite lor Zeova. Kifer? Parski Satan inn fann bann mansonz lor Li ek boukou dimounn krwar sa bann mansonz-la. (2 Kor. 4:4) Satan inn konvink bann dimounn ki Zeova Li enn Bondie ki ankoler, ki pa gagn nou traka, ek ki responsab bann soufrans ki ena dan lemond. Me nou, nou konn laverite lor Bondie, pa vre! Ek akoz sa, nou bizin fer bann dimounn kone ki kalite Bondie Li ete ek montre zot kouma zot kapav donn Li laglwar. (Iza. 43:10) Psom 96 explike kouma nou kapav donn Zeova laglwar. Anou examinn sa psom-la, ek anou reflesi lor kouma nou kapav donn Zeova laglwar ki Li merite.
KOUMA NOU KAPAV DONN ZEOVA LAGLWAR KI LI MERITE?
8. Kouma nou kapav donn Zeova laglwar? (Psom 96:1-3)
8 Lir Psom 96:1-3. Nou kapav donn Zeova laglwar par seki nou dir lor Li. Sa bann verse-la ankouraz nou pou “sant pou Zeova,” pou “loue so nom,” pou “anons bon nouvel lor delivrans ki Li pou amene,” ek pou “anons so laglwar parmi bann nasion.” Se dan sa fason-la ki nou kapav donn nou Papa laglwar. Dan lepase, bann serviter Zeova pa ti ezite pou koz lor so bann zoli kalite ek lor bann bon kitsoz ki Li ti fer pou zot. (Dan. 3:16-18; Zist. 4:29) Kouma nou kapav imit zot lexanp?
9-10. Ki to’nn aprann ar lexanp Angelena? (Get zimaz osi.)
9 Anou gete seki ti ariv Angelena, a enn ser ki res Letazini. Li ti montre kouraz kan li ti koz lor Zeova dan so travay. Angelena ti fek rant dan sa travay-la, ek bann-la ti invit li pou enn renion kot sakenn ti bizin prezant zotmem. Alor, Angelena ti prepar de-trwa foto pou montre so bann koleg kouma li ere parski li enn Temwin Zeova. Selman, zis avan li, enn lot koleg ti prezant limem. Li ti dir ki li ti grandi dan enn fami Temwin Zeova, ek li ti koumans boufonn nou bann krwayans. Angelena dir: “Mo leker ti pe bat dan mole. Selman, mo ti dir momem: ‘Eski mo pou permet enn kikenn koz manti lor Zeova, ouswa eski mo pou defann Li?’”
10 Kan so koleg ti fini koze, Angelena ti fer enn ti lapriyer dan so leker ek avek zantiyes li dir koleg-la: “Parey kouma twa, mwa osi mo’nn grandi dan enn fami Temwin Zeova, ek mo touzour enn Temwin Zeova.” Mem si sa sitiasion-la ti bien stresan, Angelena ti res kalm. Li ti montre so bann koleg bann foto ki li ti amene. Lor sa bann foto-la, ena li ek so bann kamarad ki bien zwaye parski zot pe servi Zeova. Apre sa, avek respe li ti explik zot so bann krwayans. (1 Pier 3:15) Ki finn arive apre? Kan Angelena ti fini koze, sa koleg ki ti koz avan li la, ti vinn pli kalm. Li ti rekonet ki li ti ena bann bon souvenir so lanfans kan li ti enn Temwin Zeova. Angelena dir: “Zeova merite ki nou defann Li. Se enn loner pou dir laverite lor Li.” Nou osi, nou kapav donn Zeova laglwar kan lezot pa montre respe anver Li. Se vremem enn gran loner pou fer sa!
Nou kapav donn Zeova laglwar par seki nou dir lor Li (Get paragraf 9-10) b
11. Dan lepase, kouma bann serviter Zeova ti swiv prinsip ki ena dan Psom 96:8?
11 Lir Psom 96:8. Nou kapav servi nou bann kitsoz materyel pou donn Zeova laglwar. Bann serviter Zeova inn touletan donn Li loner dan sa fason-la. (Prov. 3:9) Par exanp, bann Izraelit ti fer bann kontribision pou konstriksion ek mintenans tanp. (2 Ler. 12:4, 5; 1 Kro. 29:3-9) Sertin disip Zezi “ti servi zot dibien pou soutenir li ek bann zapot.” (Lik 8:1-3) Labib dir osi ki kan sertin Kretien ti soufer akoz enn lafaminn, zot bann frer ek ser ki ti res dan bann lezot landrwa ti avoy kas pou zot. (Zist. 11:27-29) Azordi, nou osi nou kapav donn Zeova laglwar par nou bann kontribision volonter.
12. Kouma nou bann kontribision kapav donn Zeova laglwar? (Get zimaz osi.)
12 Anou get enn lexanp ki montre kouma nou bann kontribision donn Zeova laglwar. An 2020, ti ena enn gran lasesres dan Zimbabwe ek sa ti dire pandan boukou letan. Akoz sa, plis ki enn milyon dimounn ti pe mor-de-fin, ek parmi zot ti ena enn ser ki apel Prisca. Mem si ti ena lasesres, Prisca ti kontign prese toule merkredi ek toule vandredi kouma li ti abitie fer. Dan lepok kot ti bizin travay dan karo, so bann vwazin ti boufonn li parski li ti pe al prese olie ki li travay dan so karo. Zot ti dir li: “To pou mor-de-fin.” Selman, Prisca ti sir ki Zeova ti pou pran li swin. Akoz sa, touletan li ti dir zot: “Zeova zame pa abandonn so bann serviter.” Inpe letan apre sa, Prisca ti gagn manze ek bann lezot kitsoz ki li ti bizin, gras-a bann kontribision ki bann frer ek ser dan lemond antie fer. Prisca so bann vwazin ti bien inpresione, ek zot ti dir li: “Bondie zame pa’nn abandonn twa, alor nou anvi aprann plis lor Li.” Alafin, set parmi so bann vwazin ti koumans asiste bann renion.
Nou kapav servi nou bann kitsoz materyel pou donn Zeova laglwar (Get paragraf 12) c
13. Kouma nou kondwit kapav donn Zeova laglwar? (Psom 96:9)
13 Lir Psom 96:9. Nou kapav donn Zeova laglwar gras-a nou kondwit. Bann pret ki ti servi dan tanp Zeova ti bizin prop fizikman. (Ex. 40:30-32) Nou osi, nou bizin prop, pa zis fizikman me osi moralman. Nou fer sa kan nou rezet tou bann kitsoz ki Zeova deteste. (Ps. 24:3, 4; 1 Pier 1:15, 16) Labib dir ki nou bizin tir “vie personalite” lor nou ek abiy nou ar “nouvo personalite.” Savedir ki nou bizin fer nou maximum pou rezet bann panse ek bann kondwit ki pa fer plezir Zeova. Okontrer, nou bizin fer zefor pou pans ek pou azir dan enn fason ki montre ki nou pe imit Zeova ek so bann zoli kalite. (Kol. 3:9, 10) Avek led Zeova, mem bann dimounn ki bien imoral ek bien violan kapav sanze ek met nouvo personalite lor zot.
14. Ki to’nn aprann ar lexanp Jack? (Get zimaz osi.)
14 Jack, ti enn zom telman violan ek danzere, ki bann dimounn ti apel li Demon. Anou gete seki ti ariv li. Akoz bann krim ki li ti fer, Jack ti kondane amor. Selman, pandan ki li ti pe atann so exekision, enn frer ti vizit sa prizon-la ek ti propoz li enn letid Labib. Lerla, Jack ti koumans etidie Labib. Mem si li ti fer boukou move kitsoz, Jack ti sanze, ek avek letan li ti pran batem ek li ti vinn enn Temwin Zeova. Jack ti telman sanze ki zour so exekision, sertin gard prizon ti plore kan zot ti vinn dir li orevwar. Enn serzan ki ti travay dan sa prizon-la, ti dir: “Jack ti enn parmi bann pli pir prizonie ki ti ena dan sa prizon-la. Me aster-la, li enn parmi bann meyer.” Enn semenn apre lamor Jack, bann frer ti al dan prizon-la pou fer enn renion, ek zot ti zwenn enn prizonie ki ti vinn asiste renion pou premie fwa. Li ti desid pou fer sa parski li ti inpresione ar sanzman ki Jack ti fer, ek li ti anvi kone seki li bizin fer pou ador Zeova. Lexanp Jack montre nou ki nou kondwit kapav vremem donn nou Papa Zeova laglwar!—1 Pier 2:12.
Nou kapav donn Zeova laglwar gras-a nou kondwit (Get paragraf 14) d
DAN LAVENIR, KOUMA ZEOVA POU FER SO NOM GAGN LAGLWAR?
15. Dan lavenir, kouma Zeova pou fer so nom gagn laglwar? (Psom 96:10-13)
15 Lir Psom 96:10-13. Bann dernie verse Psom 96 dekrir Zeova kouma enn Ziz ek enn Lerwa ki drwat. Dan lavenir, kouma Zeova pou fer so nom gagn laglwar? Li pou fer sa kan Li pou amenn lazistis lor later. Biento, Li pou detrir Gran Babilonn, lanpir mondial bann fos relizion, parski zot inn fer bann kitsoz ki bien move ek zot inn ansegn boukou mansonz lor Li. (Rev. 17:5, 16; 19:1, 2) Kan sertin pou trouv destriksion Gran Babilonn, kitfwa zot pou koumans ador Zeova ansam avek nou. Finalman, kan pou ena lager Armagedon, Zeova pou detrir lemond Satan ek bann ki deteste Li ek ki’nn koz manti lor so nom. Selman, Li pou sap bann dimounn ki kontan Li, ki obeir Li, ek ki anvi donn Li laglwar. (Mark 8:38; 2 Tes. 1:6-10) Apre leprev final ki pou ena apre Regn Mil An Zezi Kris, Zeova pou fini sanktifie so nom. (Rev. 20:7-10) Lerla, “later pou ranpli ar konesans lor laglwar Zeova parey kouma delo kouver lamer.”—Abak. 2:14.
16. Ki to bien deside pou fer? (Get zimaz osi.)
16 Sa pou vremem extraordiner kan tou dimounn pou donn Zeova laglwar ki so nom merite! Me ziska ki sa zour-la arive, nou bizin sezi tou lokazion pou donn Zeova laglwar, setadir pou koz lor nou Bondie ek pou azir dan enn fason ki pou donn Li loner. Ek pou nou rapel pou fer sa, Komite Santral inn swazir Psom 96:8 kouma nou text pou lane 2025. Sa verse-la dir: “Donn Zeova laglwar ki so nom merite.”
Biento, tou dimounn pou donn Zeova laglwar ki Li merite! (Get paragraf 16)
KANTIK 12 Gran Bondie, Zeova
a Finn sanz sertin nom dan sa lartik-la.
