LARTIK LETID 4
KANTIK 18 Rekonesans pou Laranson
Ki Nou Kapav Aprann ar Laranson?
“Ala kouma finn revel lamour Bondie.”—1 ZAN 4:9.
PWIN PRINSIPAL
Dan sa lartik-la, nou pou trouv bann zoli kalite ki Zeova ek Zezi inn montre gras-a laranson.
1. Ki bienfe nou gagne kan nou asiste Komemorasion Lamor Zezi toule lane?
SIRMAN to pou dakor ki laranson se enn kado ki ena boukou valer, pa vre! (2 Kor. 9:15) Gras-a sakrifis Zezi, to kapav ena enn bon lamitie ar Zeova ek to ena posibilite pou viv pou touletan. Nou bien rekonesan anver Zeova parski Li’nn donn nou laranson! Li’nn fer sa parski Li bien kontan nou. (Rom. 5:8) Zezi inn donn nou lord pou asiste Komemorasion so lamor toule lane. Enn parmi bann rezon li’nn fer sa, se pou ki nou kontign montre nou rekonesans pou laranson ek pou ki nou pa bliye seki Li ek so Papa inn fer pou nou.—Lik 22:19, 20.
2. Ki nou pou examine dan sa lartik-la?
2 Sa lane-la, nou pou selebre Komemorasion Lamor Zezi Samdi le 12 Avril 2025. Sirman nou tou nou pe fini koumans organiz nou pou asiste sa levennman bien inportan la, pa vre! Si avan ek apre Komemorasion nou pran letan pou reflesi lor seki Zeova ek Zezi inn fer pou nou, nou pou vremem gagn bann bienfe. Dan sa lartik-la, nou pou trouve seki nou kapav aprann lor Zeova ek Zezi gras-a laranson. Ek dan prosin lartik, nou pou trouv bann benediksion ki nou gagne gras-a laranson, ek kouma nou kapav montre nou rekonesans anver Zeova ek Zezi pou sa zoli kado-la.
SEKI NOU APRANN LOR ZEOVA GRAS-A LARANSON
3. Kouma lamor enn sel zom kapav liber bann milyon dimounn ar pese ek lamor? (Get zimaz osi.)
3 Gras-a laranson, nou aprann ki Zeova Li enn Bondie ki kontan lazistis. (Det. 32:4) Kan Adan inn dezobeir Bondie, li’nn fer pese ek li’nn mor, ek akoz sa, tou so bann desandan osi fer pese ek zot mor. (Rom. 5:12) Me pou ki nou kapav libere ar pese ek lamor, Zeova inn avoy Zezi lor later pou ki li donn so lavi kouma enn ranson. Kouma sakrifis enn sel zom parfe kapav liber bann milyon dimounn ar pese ek lamor? Lapot Pol ti explik sa, kan li ti dir: “Parey kouma par dezobeisans enn sel zom [Adan], boukou dimounn inn vinn bann dimounn ki fer pese, dan mem fason par lobeisans enn sel dimounn [Zezi], boukou dimounn pou vinn bann dimounn drwat.” (Rom. 5:19; 1 Tim. 2:6) Sa verse-la montre nou ki tou dimounn fer pese ek zot mor parski enn zom parfe inn dezobeir Bondie. Alor, pou ki nou kapav libere ar pese ek lamor, ti bizin ki enn zom parfe obeir Bondie.
Akoz enn zom, Adan, nou fer pese ek nou mor. Me gras-a enn zom, Zezi, nou libere ar pese ek lamor (Get paragraf 3)
4. Kifer Zeova pa’nn zis les bann desandan Adan ki obeisan, viv pou touletan?
4 Eski Zezi ti vremem bizin mor pou ki nou libere ar pese ek lamor? Eski Zeova pa ti kapav zis les bann desandan Adan ki obeisan, viv pou touletan? Bann dimounn inparfe ti kapav trouv sa kouma enn bon solision. Selman, sa li pa an-akor avek lazistis Zeova. Parski Zeova Li enn Bondie lazistis, Li pa kapav ferm so lizie ar dezobeisans Adan ek bann konsekans ki finn ena akoz sa.
5. Kifer nou sir ki Zeova pou touletan fer seki drwat?
5 Ki ti pou arive si Zeova pa ti donn laranson ek ki Li ti les bann desandan Adan ki inparfe, viv pou touletan? Si Li ti fer sa, Li pa ti pou swiv so bann prinsip lor lazistis. Lerla, bann dimounn ti pou kapav demann zotmem si Li pa pou refer sa ankor. Kitfwa zot ti kapav panse osi ki Li pa pou tini so bann promes. Selman, nou pena pou gagn sa bann traka-la, pa vre! Kifer? Parski Zeova inn swiv so bann prinsip lazistis ek Li’nn fer seki drwat, mem si sa finn kout Li bien ser. Li’nn aksepte sakrifie so Garson pou nou. Akoz sa, nou kapav sir ki Zeova pou touletan fer seki drwat.
6. Kouma laranson se enn prev ki Zeova kontan nou? (1 Zan 4:9, 10)
6 Kalite ki’nn plis motiv Zeova pou avoy Zezi lor later pou li donn so lavi pou nou, se so lamour pou nou. (Zan 3:16; lir 1 Zan 4:9, 10.) Zeova inn sakrifie so Garson pou nou, parski Li anvi ki nou viv pou touletan ek ki nou form parti dan so fami. Kan Adan ti fer pese, li ti nepli kapav form parti dan fami Zeova. Ek akoz sa, so bann desandan osi ti nepli form parti dan fami Zeova. Me gras-a laranson, tou bann ki ena lafwa dan Bondie ek ki obeir Li, enn zour pou kapav form parti dan so fami. Ek depi aster-la mem, Zeova pardonn nou bann pese ek nou kapav ena enn bon lamitie ar Li ek ar nou bann frer ek ser. Tousala montre ki Zeova vremem kontan nou!—Rom. 5:10, 11.
7. Zezi inn bien soufer avan ki li donn so lavi an sakrifis. Ki sa ansegn nou lor lamour ki Zeova ena pou nou?
7 Pou nou konpran ki kantite Zeova kontan nou, nou bizin reflesi lor komie sa finn kout Li pou donn laranson. Dapre Satan, si enn serviter Bondie gagn bann gran difikilte, li pa pou res fidel ar Zeova. Alor, pou montre ki Satan ena tor, Zeova inn les Zezi soufer avan ki li mor. (Zob 2:1-5; 1 Pier 2:21) Depi lesiel, Zeova inn trouv bann dimounn boufonn Zezi, fwet li, ek koulout li lor enn poto. Li’nn trouv so Garson ki Li bien kontan, soufer ziska ki li mor. (Mat. 27:28-31, 39) Zeova ti kapav anpes tousala arive ninport kan. Par exanp, kan Zezi ti lor poto ek ki bann dimounn ti dir: “Ki Bondie sap li aster si li ena faver Bondie,” Zeova ti kapav fer li. (Mat. 27:42, 43) Selman, si Li ti fer sa, Zezi pa ti pou donn so lavi an sakrifis, ek nou, nou pa ti pou ena okenn lespwar. Wi, Zeova telman kontan nou ki Li’nn les so Garson soufer ziska ki li mor!
8. Kifer nou kapav sir ki Zeova ti sagrin kan Li ti trouv so Garson soufer? Explike. (Get zimaz osi.)
8 Fode pa nou panse ki, parski Zeova Li Tou-Pwisan, savedir ki Li pena santiman. Zeova inn kree bann dimounn dan so resanblans, setadir avek kapasite pou ena bann santiman. Sa montre nou ki Li ena bann santiman. Anplis, Labib dir ki Li resanti “lapenn.” (Ps. 78:40, 41) Anou reflesi lor lexanp Abraam ek Izaak. Zeova ti donn Abraam lord pou donn so sel garson kouma enn sakrifis. (Zen. 22:9-12; Ebre 11:17-19) Nou kapav sey mazine ki kantite Abraam ti sagrin kan li ti pe prepar li pou sakrifie so garson! Aster-la, mazine ki kantite Zeova ti sagrin kan Li ti trouv bann dimounn tortir ek touy so Garson, Zezi!—Get video Imit Zot Lafwa: Abraam—Parti 2 lor jw.org.
Zeova ti bien sagrin kan Li ti trouv so Garson soufer (Get paragraf 8)
9. Ki to kapav aprann lor Zeova so lamour dan Romin 8:32, 38, 39?
9 Gras-a laranson, nou aprann ki pena personn ki kontan nou plis ki Zeova. Mem nou fami ek nou bann kamarad pa kontan nou sa kantite-la! (Lir Romin 8:32, 38, 39.) Nou kapav sir osi ki Zeova kontan nou plis ki nou kontan nou-mem. Eski to anvi viv pou touletan? Eski to anvi ki Zeova pardonn to bann pese? Zeova anvi sa bann kitsoz-la plis ki twa! Li zis demann nou pou montre rekonesans pou seki Li’nn fer pou nou, pou ena lafwa dan Li, ek pou obeir Li. Laranson se vremem enn zoli kado ki montre nou ki kantite Zeova kontan nou! Dan lemond nouvo, nou pou aprann plis lor bann lezot kitsoz ki Zeova inn fer pou nou parski Li kontan nou.—Ekle. 3:11.
SEKI NOU APRANN LOR ZEZI GRAS-A LARANSON
10. (a) Kifer Zezi ti trakase avan so lamor? (b) Kouma Zezi inn montre ki Satan enn manter? (Get osi lankadre “ Fidelite Zezi Inn Montre ki Satan enn Manter.”)
10 Zezi gagn traka repitasion so Papa. (Zan 14:31) Zezi ti trakase tansion bann dimounn pans bann move kitsoz lor Zeova. Kifer? Parski pou zot, Zezi ti enn kriminel ek li pa ti ena respe pou Bondie. Se akoz sa ki, kan li ti priye Zeova, Zezi ti dir: “Papa, si posib, fer sa koup-la pas lwin ar mwa.” (Mat. 26:39) Selman, Zezi ti res fidel ziska so lamor, ek sa ti montre ki Satan enn manter ek ki tou seki Satan inn dir lor Zeova li fos.
11. Kouma Zezi ti montre ki li ti vremem kontan bann dimounn? (Zan 13:1)
11 Gras-a laranson, nou aprann osi ki Zezi gagn traka bann dimounn, sirtou so bann disip. (Prov. 8:31; lir Zan 13:1.) Kan Zezi ti koumans so servis pou Zeova, li ti kone ki li ti pou bizin fer bann kitsoz ki bien difisil. Par exanp, li ti kone ki li ti pou bizin donn so lavi, ek ki li ti pou bien soufer avan ki li mor. Kanmem sa, Zezi ti fer tou sa bann kitsoz difisil la, pa zis parski Zeova ti demann li fer sa, me sirtou parski li ti kontan bann dimounn. Zezi ti montre ki li ti vremem kontan bann dimounn kan li ti pres avek zot, li ti ansegn zot, ek li ti ed zot. Zour so lamor, li ti mem pran letan pou lav lipie so bann zapot, pou ansegn zot, pou ankouraz zot, ek pou rekonfort zot. (Zan 13:12-15) Kan li ti lor poto ek ki li ti pe bien soufer, Zezi ti donn lespwar enn kriminel ki ti akote ar li. Li ti dir kriminel-la ki li pou dan Paradi. Zezi ti osi montre ki li gagn traka so mama, parski li ti dir Zan okip so mama. (Lik 23:42, 43; Zan 19:26, 27) Zezi inn montre ki li vremem kontan bann dimounn, pa zis parski li’nn donn so lavi pou zot, me osi parski li ti tret zot avek amour ek bonte.
12. Dan ki sans Zezi ankor pe fer bann sakrifis pou nou?
12 Mem si Zezi inn mor “enn fwa pou tou,” li ankor pe fer bann sakrifis pou nou. (Rom. 6:10) Ki li pe fer pou nou? Li pe kontign travay bien dir pou ki nou kapav gagn bann bienfe gras-a laranson. Par exanp, li pe servi kouma nou Lerwa, Gran Pret, ek sef lasanble. (1 Kor. 15:25; Efe. 5:23; Ebre 2:17) Li ena responsabilite pou rasanble bann Kretien ki ena lesperans pou al dan lesiel ek gran lafoul, ek sa travay-la pou fini avan lafin gran soufrans. a (Mat. 25:32; Mark 13:27) Li pe osi servi lesklav fidel ek saz pou donn nou seki nou bizin pou ki nou kapav kontign servi Zeova ar fidelite. (Mat. 24:45) Ek kan li pou dirize pandan Regn Mil An Zezi Kris, li pou kontign travay bien dir pou nou. Alor, kan Zeova inn donn so Garson pou nou, Li pa’nn zis donn li pou ki li mor pou nou; Li’nn donn li pou ki li fer osi bann lezot kitsoz pou nou.
KONTIGN APRANN
13. Kouma to kapav kontign aprann plis lor lamour ki Zeova ek Zezi ena pou bann dimounn?
13 To pou aprann plis lor lamour ki Zeova ek Zezi ena pou bann dimounn si to kontign reflesi lor la. Dan bann semenn avan ek apre Komemorasion Lamor Zezi, to kapav lir ek etidie plis bann Levanzil. Pa lir tro boukou sapit enn sel kout. Olie sa, kan to lir, pran to letan ek rod bann lezot rezon kifer nou bizin kontan Zeova ek Zezi. Me sirtou, partaz seki to pe aprann ar lezot.
14. Kan nou fer bann resers, kouma sa kapav ed nou pou aprann plis lor laranson ek lor bann lezot size? (Psom 119:97) (Get zimaz osi.)
14 Si sa fer lontan ki to batize, eski ankor ena bann nouvo kitsoz ki to kapav aprann lor laranson, lazistis, ek lamour Bondie? Avredir, nou pou touletan ena bann nouvo kitsoz pou aprann lor sa bann size-la ek lor bann lezot size osi. Alor, kouma to kapav fer sa? Lir ek etidie nou bann piblikasion, parski ladan to kapav dekouver bann kitsoz extraordiner lor Zeova ek Zezi. Kan to lir enn verse Labib ki to pa tro konpran, fer bann resers. Apre sa, toutlong lazourne, reflesi lor seki to’nn etidie ek lor seki sa finn aprann twa lor Zeova, Zezi, ek lor lamour ki zot ena pou twa.—Lir Psom 119:97.
Mem si sa fer lontan ki nou batize, nou kapav ogmant nou rekonesans pou laranson (Get paragraf 14)
15. Kifer nou bizin kontign rod bann nouvo kitsoz ki ena dan Labib?
15 Si to pa reisi trouv bann nouvo kitsoz ouswa bann kitsoz interesan sak fwa ki to lir Labib ouswa ki to fer bann resers, fode pa to dekouraze. Dan enn sertenn fason, to kapav konpar tomem ar enn kikenn ki pe rod lor. Enn kikenn ki rod lor, li bizin ena pasians parski li kapav pas plizir lertan ouswa plizir zour zis pou gagn de-trwa bout lor. Me kanmem sa, li pa pou bes lebra parski li kone ki sak bout lor ena boukou valer. Bann nouvo kitsoz ki nou aprann dan Labib, zot ena boukou plis valer ki lor! (Ps. 119:127; Prov. 8:10) Akoz sa, nou bizin ena pasians, nou bizin kontign lir nou Labib ek kontign fer bann resers pou ki nou kapav dekouver bann nouvo kitsoz.—Ps. 1:2.
16. Kouma nou kapav imit Zeova ek Zezi?
16 Kan to pe etidie, reflesi kouma to kapav met an pratik seki to pe aprann. Par exanp, to kapav imit lazistis Zeova kan to tret tou dimounn parey ek ki to pa fer preferans. To kapav imit lamour ki Zezi ena pou so Papa ek pou bann dimounn, kan to fer seki Zeova demann twa ek kan to ed lezot, mem si parfwa sa difisil. To kapav imit Zezi osi kan to pres ar lezot, pou ki zot gagn lokazion pou aprann seki Zeova inn fer pou zot. Lerla, zot pou kapav ena lafwa dan laranson.
17. Ki nou pou examine dan prosin lartik?
17 Kan nou kontign aprann plis lor laranson, nou lamour pou Zeova ek Zezi pou vinn pli for. Ek plis nou kontan zot, plis zot pou kontan nou zot osi. (Zan 14:21; Zak 4:8) Alor, anou profit bien tou bann dispozision ki Zeova pran pou ansegn nou, pou nou aprann plis lor laranson. Dan prosin lartik, nou pou get bann benediksion ki nou gagne gras-a laranson, ek nou pou gete kouma nou kapav montre Zeova nou rekonesans.
KANTIK 107 Lexanp Bondie lor Lamour
a Dan Efezien 1:10, Pol dir ki pou rasanble “bann kitsoz ki dan lesiel,” ek dan Matie 24:31 ek Mark 13:27, Zezi dir ki pou rasanble “bann ki Bondie inn swazir.” Eski Pol ek Zezi ti pe koz lor mem kitsoz? Non. Pol ti pe koz lor lepok kot Zeova swazir bann ki pou regn ansam avek Zezi kan Li avoy So lespri sin lor zot. Parkont, Zezi ti pe koz lor lepok kot pou rasanble dan lesiel bann Kretien ki ena lesperans pou al dan lesiel, me ki ankor lor later. Sa pou arive pandan gran soufrans.
