LARTIK LETID 2
KANTIK 132 Nou Finn Vinn Enn Sel
Kouma Bann Mari Kapav Montre Lamour ek Respe Anver Zot Fam?
“Zot bann mari, . . . donn [zot fam] loner.”—1 PIER 3:7.
PWIN PRINSIPAL
Dan sa lartik-la, nou pou gete kouma bann mari kapav donn loner zot fam par zot bann parol ek zot bann aksion.
1. Donn enn rezon kifer Zeova inn kree maryaz.
ZEOVA Li enn “Bondie ere,” ek Li anvi ki nou osi nou ere. (1 Tim. 1:11) Anplis, Li’nn donn nou boukou kado ki kapav ed nou pou ena enn zoli lavi. (Zak 1:17) Enn parmi sa bann kado-la se maryaz. Kan enn zom ek enn fam marye, zot fer promes pou kontan ek pou respekte zot kamarad. Kan enn mari ek so fam bien kontan zot kamarad, toule-de pou ere.—Prov. 5:18.
2. Kouma boukou mari tret zot fam azordi?
2 Malerezman, boukou koup azordi bliye sa promes ki zot inn fer zour zot maryaz la. Ek akoz sa, zot malere. Enn rapor l’Organisation mondiale de la santé (OMS) dir ki boukou mari bat zot fam ouswa maltret zot fam. Devan dimounn, kitfwa zot montre ki zot ena respe pou zot fam, me lakaz kot zot, zot bien maltret li. Ek dan boukou maryaz ena bann difikilte parski bann mari get pornografi.
3. Kifer sertin mari tret zot fam dan enn move fason?
3 Kifer sertin mari tret zot fam dan enn move fason? Kitfwa zot papa ti violan, ek akoz sa zot panse ki li normal ki zot maltret zot fam. Ena ki maltret zot fam parski laplipar zom dan zot kiltir fer sa. Zot panse ki zot bizin montre zot fam ki zotmem “bos” dan lakaz. Ena lezot ki pa’nn aprann kontrol zot bann lemosion, kouma par exanp lakoler. Sertin zom inn telman get pornografi ki zot ena enn move fason panse lor bann fam ek lor sex. Anplis, boukou exper dir ki depi pandemi COVID-19, bann mari inn vinn pli violan anver zot fam. Selman, tousala se pa bann rezon pou ki bann mari tret zot fam dan enn move fason.
4. Ar ki kitsoz bann mari bizin fer bien atansion, ek kifer?
4 Bann mari Kretien bizin fer bien atansion ki zot pa les fason panse sa lemond-la inflians fason ki zot konsider bann fam. a Kifer? Parski bien souvan, seki enn dimounn li panse, se samem ki li pou fer. Lapot Pol ti dir bann Kretien lavil Rom ki fode pa zot “rant dan moul sa lemond-la.” (Rom. 12:1, 2) Kan Pol ti dir zot sa bann parol-la, sa ti fer plizir lane depi ki sa lasanble-la ti existe. Selman, li ti dir zot sa parski kitfwa sertin parmi zot ti ankor pe les zot inflianse par bann koutim ek fason panse sa lemond-la. Se akoz sa ki li ti ankouraz zot pou sanz zot fason panse ek zot konportman. Sa konsey-la konsern nou osi azordi. Malerezman, sertin mari Kretien inn les zot inflianse par fason panse sa lemond-la ek zot inn mem maltret zot fam. b Kouma Zeova anvi ki bann mari tret zot fam? Repons pou sa kestion-la se nou text prinsipal pou sa lartik-la.
5. Dapre 1 Pier 3:7, kouma enn mari bizin tret so fam?
5 Lir 1 Pier 3:7. Bann mari bizin donn loner zot fam. Se enn lord ki Zeova inn donn zot. Kan nou donn loner enn kikenn, savedir ki nou tret li avek respe. Enn mari ki donn loner so fam, li tret li avek zantiyes ek amour. Dan sa lartik-la, nou pou gete kouma enn mari kapav donn loner so fam. Me pou koumanse, anou get bann kitsoz ki fode zame enn mari fer.
BANN KITSOZ KI FODE ZAME ENN MARI FER
6. Ki Zeova panse lor bann zom ki bat zot fam? (Kolosien 3:19)
6 Fode pa ki enn mari bat so fam. Zeova deteste bann dimounn violan, me Li sirtou deteste bann mari ki bat zot fam. (Ps. 11:5; Mal. 2:16; lir Kolosien 3:19.) Ek dapre nou text prinsipal pou sa lartik-la, 1 Pier 3:7, si enn mari pa tret so fam bien, sa pou gat so lamitie ar Zeova. Zeova kitfwa pa pou mem ekout so lapriyer.
7. Kan zot koz ar zot fam, kouma bann mari kapav montre ki zot pe swiv konsey ki ena dan Efezien 4:31, 32? (Get osi “Expresion Ki’nn Explike.”)
7 Fode pa ki enn mari maltret so fam. Sertin mari koz ar koler ek zot dir zot fam bann kitsoz ki bien bles zot. Me Zeova deteste ‘koler, laraz, kriye, ek insilt.’ c (Lir Efezien 4:31, 32.) Pa bliye ki Zeova tann tou seki nou dir. Alor, fason ki enn mari koz ar so fam, mem kan zot zis zot de tousel, sa bien inportan pou Li. Kan enn mari koz brit ar so fam, li gat so lamitie ar so fam ek li gat so lamitie ar Zeova osi.—Zak 1:26.
8. Kouma Zeova konsider pornografi, ek kifer?
8 Pornografi. Kouma Zeova konsider pornografi? Li deteste sa. Alor, kan enn mari get bann zimaz porno, sa gat so lamitie ar Zeova ek sa montre ki li pena respe pou so fam. d Zeova anvi ki bann mari res fidel ar zot fam. Enn mari ki fidel zame pa pou fer enn kitsoz imoral ar enn lot fam; li pa pou mem pans pou fer sa. Zezi ti dir ki si enn zom get enn lot “fam ziska ena enn dezir pou li,” se koumadir li’nn fini komet ladilter ar li “dan so leker.” e—Mat. 5:28, 29.
9. Kifer Zeova deteste kan enn mari fors so fam pou fer bann kitsoz ki li pa anvi fer kan zot pe gagn bann relasion sexiel?
9 Fode pa enn mari fors so fam pou fer bann kitsoz ki li pa anvi fer kan zot pe gagn bann relasion sexiel. Kan zot gagn bann relasion sexiel, sertin mari fors zot fam pou fer bann kitsoz ki zot pa anvi fer, ouswa ki pou fatig zot konsians apre. Bann mari ki fer sa, zot egois ek zot pena lamour pou zot fam, ek Zeova deteste sa kalite konportman-la. Zeova anvi ki enn mari kontan so fam, ki li zanti anver li, ek ki li respekte so konsians. (Efe. 5:28, 29) Me fer koumadir enn mari Kretien pe deza fors so fam pou fer bann kitsoz ki li pa anvi fer, ouswa li abitie maltret li, ouswa li get pornografi, kouma li kapav sanz so fason panse ek so kondwit?
KOUMA ENN MARI KAPAV SANZ SO MOVE KONDWIT?
10. Ki kitsoz bann mari kapav aprann ar lexanp Zezi?
10 Si enn mari abitie maltret so fam, ouswa si li fors li pou fer bann kitsoz ki li pa anvi fer kan zot pe gagn bann relasion sexiel, kouma mari-la kapav sanz so move kondwit? Li bizin fer zefor pou imit Zezi. Mem si Zezi pa ti marye, fason ki li ti tret so bann disip se enn zoli lexanp pou tou bann mari. (Efe. 5:25) Anou gete seki bann mari kapav aprann ar fason ki Zezi ti tret so bann zapot ek fason ki li ti koz avek zot.
11. Kouma Zezi ti tret so bann zapot?
11 Zezi ti touletan zanti ar so bann zapot ek li ti tret zot avek boukou respe. Zame li pa ti fer dominer ar zot. Mem si li ti zot Segner ek zot Met, zame li pa ti servi so lotorite pou fer zot gagn per, ouswa pou fer zot santi ki li pli siperyer ki zot. Okontrer, avek limilite li ti servi zot. (Zan 13:12-17) Li ti dir so bann disip: “Aprann ar mwa, parski mo ena enn karakter dou ek mo ena limilite, ek zot pou regagn lafors.” (Mat. 11:28-30) Zezi ti ena boukou douser. Enn kikenn ki ena douser, se pa enn kikenn ki feb. Okontrer, se enn kikenn ki for parski li konn kontrol limem. Kan lezot provok li, li res kalm ek li pa sap lor kal.
12. Kouma bann mari Kretien kapav swiv lexanp Zezi?
12 Kan Zezi ti koz ar lezot, li ti rekonfort zot ek ankouraz zot. Zame li pa ti koz brit ar so bann disip. (Lik 8:47, 48) Kan so bann lennmi ti insilte li ouswa ti provok li, “li pa ti insilte zot li osi.” (1 Pier 2:21-23) Parfwa, Zezi ti mem res trankil olie ki li reponn zot. (Mat. 27:12-14) Zezi, li vremem enn zoli lexanp pou bann mari Kretien!
13. Dapre Matie 19:4-6, kouma enn mari kapav “res [kole] ar so fam”? (Get zimaz osi.)
13 Zezi inn donn lord bann mari pou res fidel ar zot fam. Kan li ti dir sa, Zezi ti pe mazine kouma o-koumansman Zeova ti dir ki enn zom bizin “res ar so fam.” (Lir Matie 19:4-6.) Lexpresion Grek ki’nn servi dan sa verse-la pou “res ar” vedir “kole ar lakol.” Alor, kan de dimounn marye, zot relasion bizin telman for ki se koumadir zot inn kole ansam. Ek si sa relasion kase, toule-de soufer. Kan enn mari ena sa kantite lamour-la pou so fam, sa pou pous li pou rezet pornografi. Deswit li pou “aret get bann kitsoz ki pa vo nanye.” (Ps. 119:37) Se koumadir li’nn fer enn lalians ar so lizie, parey kouma Zob, pou pa get enn lot fam ek ena enn dezir pou li.—Zob 31:1.
Enn mari ki fidel pa pou get pornografi (Get paragraf 13) g
14. Ki kitsoz enn mari bizin fer pou ki li kapav regagn enn bon lamitie ar Zeova ek ar so fam?
14 Enn mari ki bat ouswa ki maltret so fam, bizin fer plizir kitsoz pou ki li kapav regagn enn bon lamitie ar Zeova ek ar so fam. Premierman, li bizin rekonet ki li ena enn gro problem. Fode pa li bliye ki Zeova trouv tou seki li fer ek tann tou seki li dir. (Ps. 44:21; Ekle. 12:14; Ebre 4:13) Deziemman, li bizin aret maltret so fam ek li bizin sanz so bann vilin manier. (Prov. 28:13) Trwaziemman, li bizin demann Zeova ek so fam pardon, ek li bizin fer bann zefor pou ki li gagn zot pardon. (Zist. 3:19) Li bizin osi demann Zeova “dezir ek lafors” pou ki li sanz so fason panse ek so fason koze, ek pou ki li azir parey kouma Zeova anvi. (Ps. 51:10-12; 2 Kor. 10:5; Fil. 2:13) Katriemman, li bizin azir an-akor ar so lapriyer ek fer so maximum pou devlop “laenn pou seki move.” (Ps. 97:10) Sinkiemman, li bizin pa tarde pou rod led bann ansien. (Zak 5:14-16) Ek siziemman, li bon ki li fer enn lalis tou bann move kitsoz ki li bizin aret fer. Koumsa, li pou pli fasil pou li aret fer sa bann move kitsoz-la. Enn mari ki get pornografi bizin swiv sa sis letap-la li osi. Kan li fer sa, Zeova pou beni so bann zefor. (Ps. 37:5) Selman, li pa ase ki enn mari zis sanz so move kondwit. Li bizin osi aprann kouma pou donn loner so fam. Kouma li kapav fer sa?
KOUMA TO KAPAV DONN TO FAM LONER?
15. Kouma enn mari kapav montre ki li kontan so fam?
15 Montre li ki to kontan li. Sertin frer ki ere dan zot maryaz ena labitid pou fer bann ti kitsoz toulezour pou montre zot fam ki kantite zot kontan li. (1 Zan 3:18) Ki bann ti kitsoz enn mari kapav fer pou montre so fam ki li kontan li? Li kapav pran labitid pou may so fam ek pou trap so lame. Li kapav osi avoy li bann ti mesaz kouma par exanp “Mo kontan twa” ouswa “Eski to pe pas enn bon lazourne?” Detanzantan, li kapav osi ekrir so fam enn ti kart pou dir li ki kantite li kontan li. Kan enn mari fer sa bann kitsoz-la, li donn so fam loner ek sa fer zot maryaz vinn pli solid.
16. Kifer enn mari bizin dir so fam pou ki rezon li kontan li?
16 Dir li ki li ena valer pou twa. Kan enn mari dir so fam kifer li ena valer pou li, sa fer so fam dibien ek sa ankouraz li. Enn fason ki enn mari montre so fam ki li ena valer pou li, se kan li remersie li pou tou seki li fer pou li. (Kol. 3:15) Kan enn mari dir so fam pou ki rezon li kontan li, fam-la santi ki so mari kontan li ek respekte li, ek lerla li santi li an sekirite.—Prov. 31:28.
17. Kouma enn mari kapav montre ki li ena respe pou so fam?
17 To bizin zanti ek ena respe pou li. Enn mari ki kontan so fam, li montre li ki li ena valer pou li. Li konsider so fam kouma enn kado ki Zeova inn donn li ek ki ena boukou valer. (Prov. 18:22; 31:10) Ek akoz sa, li pou zanti avek li ek li pou respekte li, mem kan zot gagn bann relasion sexiel. Kan zot gagn bann relasion sexiel, li pa pou fors so fam pou fer bann kitsoz ki li pa anvi fer ouswa ki pou fatig konsians so fam. f Mari-la osi pa pou fer nanye ki kapav fatig so prop konsians kan zot pe gagn bann relasion sexiel.—Zist. 24:16.
18. Ki kitsoz bann mari bizin kontign fer? (Get osi lankadre “ Kat Fason ki enn Mari Montre ki Li Ena Respe pou So Fam.”)
18 Mari, Zeova bien kontan kan Li trouv twa fer zefor pou donn to fam loner par to bann parol ek to bann aksion. Alor, kontign fer tou seki to kapav pou rezet bann move kondwit. Kontign fer zefor pou montre twa zanti ar to fam ek pou respekte li. Ek kontign montre li ki to kontan li. Kan to fer tousala, to montre to fam ki li ena boukou valer pou twa. Anplis, kan to donn to fam loner, sa montre osi ki to anvi res kamarad ar Zeova.—Ps. 25:14.
KANTIK 131 Seki Bondie Inn Ini
a Bann mari Kretien bizin lir lartik “Eski To Ena Mem Fason Panse ki Zeova lor Bann Madam?” dan Latour Degard Zanvie 2024.
b Si to konzwin bat twa ouswa maltret twa, lir lartik « De l’aide pour les victimes de violences conjugales » dan seri lartik ki trouv dan « Divers » lor jw.org ek JW Library®.
c EXPRESION KI’NN EXPLIKE: Bann “insilt” se dir enn kikenn bann kitsoz ki blesan, ki rabes li, ouswa ki ofans li. Se osi fer bann remark lor bann kitsoz ki nou pa kontan ar sa dimounn-la. Alor, ninport ki kitsoz ki enn mari dir so fam pou bles li, se enn insilt.
d Get lartik « La pornographie peut briser votre couple » lor jw.org ek JW Library.
e Si enn fam so mari pe get pornografi, sa lartik-la kapav ed li: “Ki To Kapav Fer Kan To Konzwin Get Pornografi?” dan Latour Degard Out 2023.
f Labib pa dir an detay ki kitsoz bon ouswa ki kitsoz pa bon, kan enn mari ek so fam pe gagn bann relasion sexiel. Se sak koup ki bizin deside. Ek zot desizion bizin montre ki zot respekte zot kamarad, ki zot donn Zeova laglwar, ek ki zot konsians kler. Anplis, fode pa ki zot koz bann kitsoz personel koumsa ar lezot.
g DESKRIPSION ZIMAZ: Enn frer so bann koleg travay pe esey fer li get bann magazinn porno.
