LARTIK LETID 3
KANTIK 35 Verifie Seki Pli Inportan
Kouma To Kapav Pran Bann Desizion ki Fer Zeova Plezir?
“Ena enn gran respe pou Zeova, samem koumansman lasazes, ek konesans lor sa Kikenn ki Pli Sin la, ala seki lintelizans ete.”—PROV. 9:10.
PWIN PRINSIPAL
Dan sa lartik-la, nou pou gete kouma nou kapav servi nou konesans, nou lintelizans, ek nou bon zizman pou pran bann bon desizion.
1. Ki kitsoz nou bizin fer toulezour?
TOULEZOUR nou bizin pran bann desizion. Sertin desizion fasil pou pran, kouma par exanp, ki nou pou manze pou ti-dezene, ouswa ki ler nou pou al dormi. Parkont, ena bann desizion ki pli difisil pou pran. Kifer? Parski sa bann desizion-la kapav ena enn lefe lor nou lasante, lor nou lavi fami, ouswa lor nou servis pou Zeova. Selman, nou tou nou anvi pran bann bon desizion pou nou ek nou fami. Me pli inportan, nou anvi ki nou bann desizion fer Zeova plezir.—Rom. 12:1, 2.
2. Ki kitsoz kapav ed twa pou pran bann bon desizion?
2 To pou kapav pran bann pli bon desizion dan ninport ki sitiasion si to (1) pran bann ransegnman, (2) reflesi lor seki Zeova panse lor sa sitiasion-la, ek (3) reflesi lor bann swa ki to ena. Dan sa lartik-la, nou pou koz lor sa trwa kitsoz-la. Nou pou trouve osi seki nou bizin fer pou ki nou kapav ena bon zizman.—Prov. 2:11.
PRAN BANN RANSEGNMAN
3. Kifer to bizin pran bann ransegnman avan ki to pran enn desizion? Donn enn lexanp.
3 Pou to pran bann bon desizion, premie kitsoz ki to bizin fer se pran bann ransegnman. Kifer sa inportan? Anou pran enn lexanp. Fer koumadir enn kikenn inn al get enn dokter parski li ena enn maladi bien grav. Eski dokter-la pou pran enn desizion lor tretman ki sa dimounn-la bizin swiv san ki li examinn li ouswa san ki li poz li bann kestion? Non. Enn bon dokter pou pran tou bann ransegnman ki bizin ar dimounn-la pou ki li kapav pran enn bon desizion. Dan mem fason, twa osi to pou kapav pran bann pli bon desizion, si avan to pran enn desizion to pran bann ransegnman ki bizin. Anou gete kouma to kapav fer sa.
4. Kouma to kapav gagn bann ransegnman ki to bizin? (Proverb 18:13) (Get zimaz osi.)
4 Bien souvan, pou ki to kapav gagn bann ransegnman, to bizin poz bann kestion. Par exanp, fer koumadir to invite dan enn program. Eski to pou ale ouswa non? Si to anvi pran enn bon desizion, to pou bizin poz bann kestion sa dimounn ki’nn invit twa la. Par exanp, to kapav demann li: “Kan ek kotsa pou fer sa program-la? Komie dimounn pou ena? Kisann-la ki pou veye ki tou pe pas bien? Kisann-la pou ena dan sa program-la ek kouma program-la pou deroule? Eski pou ena lalkol?” Repons pou sa bann kestion-la kapav ed twa pou pran enn bon desizion.—Lir Proverb 18:13.
Kan to poz bann kestion, to pou gagn bann ransegnman (Get paragraf 4) a
5. Apre ki to’nn fini gagn bann ransegnman, ki to bizin fer?
5 Kan to fini gagn tou bann ransegnman, li bon ki to reflesi lor seki kapav arive. Par exanp, fer koumadir to’nn aprann ki pou ena bann dimounn dan sa program-la ki pena okenn respe pou bann prinsip Labib, ouswa ki pou ena lalkol amor dan program-la. Eski to panse li posib ki sa program-la vinn enn “fet kot pena okenn kontrol”? (1 Pier 4:3) Ouswa, ki to pou fer si program-la tom dan ler renion ouswa predikasion? Kan to reflesi lor tou seki kapav arive, sa kapav ed twa pou pran bann bon desizion. Me ena enn lot kitsoz ankor ki to bizin fer. Aster-la ki to’nn konpran sitiasion-la, to bizin demann tomem seki Zeova panse lor la.—Prov. 2:6.
REFLESI LOR SEKI ZEOVA PANSE LOR LA
6. Dapre Zak 1:5, pou ki kitsoz nou bizin priye Zeova?
6 Dan ninport ki sitiasion, priye Zeova ek demann Li pou ed twa pou konpran seki Li panse lor la. Zeova promet ki Li pou donn nou sazes pou nou pran bann desizion ki fer Li plezir. Anplis, Li donn sa sazes-la “tou dimounn avek zenerozite ek san fer okenn repros.”—Lir Zak 1:5.
7. Kouma to kapav kone seki Zeova panse lor enn sitiasion? Donn enn lexanp.
7 Apre ki to’nn fini priye Zeova konsernan enn sitiasion, fer zefor pou rode seki Li panse lor la. Pou nou konpran sa, anou pran enn lexanp. Fer koumadir to’nn perdi ek to pe demann enn kikenn ki sime to bizin pran. Eski to pou ale avan mem ki dimounn-la reponn twa? Non. To pou ekout bien bann lexplikasion ki li pou donn twa, pa vre! Dan mem fason, apre ki to’nn fini priye Zeova pou to gagn so sazes, to bizin ekout bien seki Li dir twa. To fer sa kan to fer zefor pou rod bann lalwa ouswa bann prinsip ki ena dan Labib, ki kapav ed twa pou pran bann bon desizion. Par exanp, pou to kone si to pou al sa program lor ki nou ti koze taler-la la, li bon ki to get seki Labib dir lor bann fet kot pena okenn kontrol, lor bann move frekantasion, ek lor linportans pou fer Rwayom Bondie pas avan to bann dezir personel.—Mat. 6:33; Rom. 13:13; 1 Kor. 15:33.
8. Ki to bizin fer si to bizin led pou kone seki Zeova panse lor enn sitiasion? (Get zimaz osi.)
8 Selman, dan sertin sitiasion, kitfwa to pou bizin led pou to kone seki Zeova panse lor la. To kapav rod konsey ar bann frer ek ser ki ena matirite. Selman, li bon osi ki to aprann fer to prop resers. Par exanp, dan Liv Resers pou Bann Temwin Zeova ek liv Bann Verse pou Nou Lavi Kretien, ena boukou kitsoz ki kapav ed twa. Selman, dan ninport ki sitiasion, pa bliye ki to lobzektif se pou pran bann desizion ki pou fer Zeova plezir.
Reflesi lor seki Zeova panse lor la (Get paragraf 8) b
9. Kouma nou kapav kone si nou desizion pou fer Zeova plezir? (Efezien 5:17)
9 Kouma nou kapav kone si nou desizion pou fer Zeova plezir? Pou koumanse, nou bizin aprann konn Zeova bien. Labib dir: “Konesans lor sa Kikenn ki Pli Sin la, ala seki lintelizans ete.” (Prov. 9:10) Wi, vre lintelizans se aprann konn bann kalite Zeova, so proze, seki Li kontan ek seki Li deteste. Alor, demann tomem, ‘Dapre seki mo kone lor Zeova, eski mo desizion pou fer Li plezir?’—Lir Efezien 5:17.
10. Kifer bann prinsip Labib pli inportan ki bann tradision familial?
10 Pou nou fer Zeova plezir, parfwa nou pou bizin desevwar bann dimounn ki pros ar nou. Par exanp, bann paran ki bien kontan zot zanfan, kapav met presion lor zot tifi pou marye ar enn zom ki ena boukou kas, ouswa ki kapav pey enn dot, mem si sa dimounn-la li pa stab lor plan spiritiel. Kitfwa zot fer sa parski zot pa anvi ki zot tifi pas mizer. Selman, eski sa frer-la pou kapav pran swin zot tifi lor plan spiritiel? Ki Zeova panse lor la? Nou kapav trouv seki Zeova panse lor la dan Matie 6:33. Dan sa verse-la, Labib ankouraz bann Kretien pou “kontign met Rwayom Bondie . . . an premie” dan zot lavi. Alor, mem si nou bien kontan nou bann paran ek ki nou ena boukou respe pou nou bann fami, seki bizin pli inportan pou nou se fer Zeova plezir.
REFLESI LOR BANN DIFERAN SWA KI TO ENA
11. Dapre Filipien 1:9, 10, ki kalite kapav ed twa pou reflesi lor bann diferan swa ki to ena?
11 Apre ki to’nn trouv bann prinsip Labib ki pou ed twa pou pran enn bon desizion, to bizin reflesi bien lor bann swa ki to ena. (Lir Filipien 1:9, 10) Kan to reflesi lor bann diferan swa ki to ena, bon zizman kapav ed twa pou trouve seki kapav arive. Parfwa, li fasil pou pran sertin desizion. Selman, pa tou desizion ki fasil pou pran. Bon zizman kapav ed twa pou pran bann bon desizion mem dan bann sitiasion bien difisil.
12-13. Kan to pe rod enn travay, kouma bon zizman kapav ed twa pou pran enn bon desizion?
12 Anou pran enn lexanp. Fer koumadir to pe rod enn travay pou to kapav pran swin to fami. To reisi trouv de travay, selman to bizin fer enn swa. To’nn gagn tou bann ransegnman ki bizin, kouma par exanp, kouma travay-la ete, ki ler li koumanse, ki ler li fini, ki kantite letan to pou pran pou al travay, ek bann lezot ransegnman ankor. Ek dapre bann prinsip Labib, toule-de travay korek. Selman, kitfwa to plis kontan enn ladan, parski to kontan fer sa travay-la ouswa parski li pey pli bien. Me ena bann lezot kitsoz lor ki to bizin reflesi avan ki to pran to desizion.
13 Par exanp, to kapav demann tomem, ‘Eski mo pou reisi gagn tou mo bann renion ar sa travay-la? Eski mo pou ena ase letan pou okip mo fami bien, ek pou ki mo pran zot swin lor plan spiritiel?’ Bann kestion koumsa kapav ed twa pou res konsantre lor “bann kitsoz ki pli inportan,” setadir lor to servis pou Zeova ek lor to fami. Sa bann kitsoz-la pli inportan ki gagn boukou kas. Kan to reflesi lor bann kestion koumsa, to pou kapav pran bann desizion ki pou fer Zeova plezir ek ki Li pou beni.
14. Kouma bon zizman ek lamour kapav ed nou pou pa ofans lezot?
14 Bon zizman kapav osi ed nou pou reflesi lor lefe ki nou desizion pou ena lor lezot. Koumsa, nou pa pou “ofans” zot. (Fil. 1:10) Sa bien inportan sirtou kan nou pe pran bann desizion konsernan nou labiyman ek nou laparans. Par exanp, nou kapav kontan enn stil abiye. Me ki nou pou fer si nou bann frer ek ser, ouswa bann dimounn ki andeor lasanble, ofanse akoz sa? Bon zizman pou motiv nou pou respekte zot santiman. Lamour pou motiv nou pou “rod lintere lezot” ek pou ena modesti. (1 Kor. 10:23, 24, 32; 1 Tim. 2:9, 10) Lerla, sa pou pous nou pou pran enn desizion ki pou montre nou lamour ek nou respe pou lezot.
15. Avan ki to pran enn desizion inportan, ki to bizin fer?
15 Si to ena enn desizion inportan pou pran, reflesi lor seki to bizin fer pou to reisi met li an pratik. Se seki Zezi inn ansegn nou pou fer. Zezi ti dir ki si enn kikenn ‘anvi aranz enn latour, li bizin kalkile komie sa pou koute.’ (Lik 14:28) Alor, kan to ena enn desizion inportan pou pran, reflesi ki kantite letan, larzan, ek zefor to pou bizin pou ki to reisi asim desizion ki to’nn pran. Pou sertin desizion, kouma par exanp bann desizion ki konsern lafami, li bon ki to koz ar sak manb to fami pou ki sakenn kapav kone seki li pou bizin fer. Kifer sa li inportan? Sa kapav ed twa pou trouve si to ena bann sanzman pou fer, ouswa si to bizin pran enn lot desizion. Ek kan to inplik to fami, ekout bien bann lide ki zot ena, koumsa zot pou plis anvi ed twa pou asim desizion ki to’nn pran.—Prov. 15:22.
PRAN BANN BON DESIZION
16. Ki trwa kitsoz to bizin fer pou ki to kapav pran bann bon desizion? (Get osi lankadre “ Kouma To Kapav Pran Bann Bon Desizion?”)
16 Kan to fer sa trwa kitsoz ki nou’nn examine dan sa lartik-la, to pou kapav pran bann bon desizion. To’nn pran bann ransegnman ki bizin, ek to’nn reflesi lor bann prinsip ki pou ed twa pran bann desizion ki pou fer Zeova plezir. Aster-la, to kapav priye Zeova pou ki Li ed twa pran enn bon desizion.
17. Kan to pran bann desizion, ki kitsoz fode pa to bliye?
17 Mem si dan lepase to’nn pran boukou bon desizion, fode pa to bliye enn kitsoz bien inportan: Se gras-a sazes Zeova ki nou pran bann bon desizion, pa gras-a nou lexperyans ouswa nou lintelizans. Se zis Zeova tousel ki kapav donn twa vre konesans, lintelizans, ek bon zizman—bann kitsoz ki form parti vre sazes. (Prov. 2:1-5) Alor, kontign kont lor Zeova, ek Li pou ed twa pou pran bann desizion ki pou fer Li plezir.—Ps. 23:2, 3.
KANTIK 28 Gagn Lamitie Zeova
