1, 2. (a) Explik lexanp ki Zezi ti done konsernan proprieter enn karo rezin. (b) Kouma sa lexanp-la met laksan lor zenerozite ek faver ki personn pa merite?

BONER gramatin, proprieter enn karo rezin al pre kot bazar pou al rod bann zom pou travay pou li. Li propoz zot enn som larzan, ek bannla aksepte. Me parski proprieter-la bizin plis travayer, li re-al dan bazar plizir fwa dan lazourne pou rod plis zom pou travay. Li propoz pou donn tou so bann travayer enn som larzan ki rezonab. Alafin lazourne, proprieter-la rasanble tou so bann travayer pou pey zot. Ek mem si zot inn travay enn zourne ouswa zis enn-er-t-an, proprieter-la inn donn zot mem kantite kas. Me, kan bann zom ki ti travay enn zourne koumans plengne, proprieter-la dir zot: ‘Eski to pa ti dakor ar mwa lor sa lapey la? Eski mo pena drwa fer seki mo anvi ar mo dibien? Oubien eski to zalou parski mo zenere?’​—Matie 20:1-15.

² Lexanp ki Zezi finn mansione ansegn nou enn leson bien inportan lor ‘faver ki Zeova done ek ki personn pa  merite.’ ^[1] (Get not alafin lartik.) (Lir 2 Korintien 6:1, NW.) Kouma? Sertin kapav panse ki bann zom ki’nn travay enn zourne ti bizin gagn pli boukou kas ki lezot. Me proprieter-la ti montre so faver ki personn pa merite anver bann ki pa’nn travay enn zourne. Enn exper fer sa remark-la lor lexpresion “faver ki personn pa merite” ki mansione dan Labib: “Lide prinsipal deryer sa lexpresion-la se enn kado ki personn pa merite, se kan donn enn dimounn enn kitsoz ki li pa’nn fer zefor pou gagne ek ki li pa merite.”

3, 4. Kifer ek kouma Zeova finn montre so faver ki personn pa merite anver tou dimounn?

³ Labib dir nou ki Bondie so faver ki personn pa merite se enn “don gratis.” (Efezien 3:7, NW.) Parski nou pa kapav obeir Bondie dan enn fason parfe, nou pa merit okenn faver ar Bondie. Ofet, nou merit lamor. Lerwa Salomon ti dir: “Lor sa later-la, pena enn zom ki drwat, ki touletan fer seki bon ek ki zame pa fer pese.” (Ekleziast 7:20) Plitar, lapot Pol ti dir: “Tou dimounn inn fer pese ek zot pa reisi ariv ziska laglwar Bondie,” ek “saler pese, li lamor.”​—Romin 3:23, NW; 6:23a.

⁴ Zeova telman kontan bann dimounn ki Li’nn avoy “so Sel Garson” pou mor pou nou. Se samem pli gran aksion ki Zeova finn fer pou donn limanite so faver ki personn pa merite. (Zan 3:16) Pol ti dir ki Zezi “asterla finn gagn kouronn laglwar ek loner parski li’nn soufer ek li’nn mor, pou ki gras-a Bondie so faver ki personn pa merite, li gout lamor pou tou dimounn.” (Ebre 2:9, NW.) Wi, “don Bondie li lavi eternel dan Zezi Kris nou Segner.”​—Romin 6:23b.

5, 6. Ki pou arive si (a) pese kontrol nou? (b) faver ki personn pa merite kontrol nou?

⁵ Kifer nou fer pese ek nou mor? Labib dir ki “akoz fot sa sel zom-la lamor finn regne kouma enn lerwa par li.” Alor, parski nou bann desandan Adan, nou inparfe ek nou mor. (Romin 5:12, 14, 17, NW.) Kanmem sa, nou ankor kapav deside pou pa les pese manifeste so pouvwar lor nou, ouswa kontrol nou. Kouma? Kan nou montre nou lafwa dan sakrifis Zezi Kris, nou gagn Zeova so faver ki personn pa merite. Labib dir ki ‘la kot pese ti ogmante, faver ki personn pa merite dan so abondans ti ogmante ankor plis. Parey kouma pese ti regne avek lamor, dan mem manier faver ki personn pa merite regne par lazistis pou amenn lavi eternel atraver Zezi Kris, nou Segner.’​—Romin 5:20, 21.

⁶ Mem si nou touzour inparfe, nou pa oblize les pese kontrol nou. Alor, kan nou fer seki pa bon, nou demann Zeova pardon. Pol inn donn nou sa lavertisman-la: “Fode pa ki pese dominn zot, parski zot nepli anba lalwa me anba faver ki nou pa merite.” (Romin 6:14, NW.) Alor, kouma eski nou kapav gagn bann bienfe gras-a Bondie so faver ki nou pa merite? Pol ti dir: “Bondie so faver ki personn pa merite . . . ansegn nou pou rezet seki Bondie pa kontan ek bann dezir sa lemond-la, ek pou viv avek bon sans ek lazistis ek res atase ar Bondie, dan sa sistem-la.”​—Tit 2:11, 12, NW.

7, 8. Zeova so faver ki personn pa merite, li “manifeste dan diferan fason.” Ki sa vedir? (Get zimaz dan koumansman lartik.)

⁷ Lapot Pier ti ekrir: “Parey kouma sakenn inn gagn enn don, servi sa pou ed sakenn so kamarad kouma bann bon administrater faver Bondie, faver ki personn pa merite ek ki manifeste dan diferan fason.” (1 Pier 4:10, NW.) Zeova so faver ki personn pa merite, li “manifeste dan diferan fason.” Ki sa vedir? Savedir ki ninport ki difikilte nou pou gagne dan lavi, Zeova pou donn nou seki nou bizin pou andire. (1 Pier 1:6) Touletan Li pou donn nou exakteman seki nou bizin pou ki nou kapav sirmont sak leprev ki nou gagne.

⁸ Lapot Zan ti ekrir: “Nou tou nou finn gagn dan seki li ena an abondans, mem faver ki nou pa merite, enn deryer lot.” (Zan 1:16, NW.) Dan boukou fason, Zeova donn nou so faver ki nou pa merite, ek gras-a sa nou gagn boukou benediksion. Ki sa bann benediksion-la sa? Anou gete.

9. Ki bienfe nou gagne gras-a Zeova so faver ki personn pa merite, ek kouma nou kapav montre nou rekonesans pou sa?

⁹ Zeova pardonn nou bann pese. Gras-a so faver ki nou pa merite, Zeova pardonn nou bann pese. Me Li fer sa zis kan nou repanti ek nou kontign lit kont nou bann dezir pou fer pese. (Lir 1 Zan 1:8, 9.) Pol ti explik bann Kretien ki ena lesperans pou al dan lesiel, kouma Zeova pardonn bann pese. Li ti dir: “[Bondie] finn tir nou dan pouvwar ki nwarte ti ena lor nou, ek Li finn transfer nou dan rwayom so Garson ki Li bien kontan, ek atraver li, nou finn gagn nou delivrans par laranson ek pardon pou nou bann pese.” (Kolosien 1:13, 14, NW.) Nou telman rekonesan anver Bondie pou so mizerikord ki nou anvi loue Li. Ek parski Zeova pardonn nou bann pese, nou kapav osi gagn boukou lezot benediksion extraordiner ankor.

10. Ki bienfe nou gagne ankor gras-a Bondie so faver ki nou pa merite?

¹⁰ Nou kapav anpe avek Bondie ek vinn so kamarad. Nou inparfe, savedir ki depi nou’nn ne, nou bann lennmi Bondie. Pourtan, Pol ti dir: “Nou ti bann ennmi Bondie, me nou finn rekonsilie ar li par lamor so Garson.” (Romin 5:10) Gras-a laranson, nou kapav rekonsilie ar Bondie, setadir, nou kapav anpe avek Li ek vinn so bann kamarad. Pol ti explik sa ek ti dir kouma sa ena enn lien avek Bondie so faver ki nou pa merite. Li ti dir bann ki ti ena lesperans pou al dan lesiel: “Asterla ki finn deklar nou zis gras-a lafwa, anou profit lape avek Bondie atraver nou Segner Zezi Kris, parski gras-a li nou finn osi gagn akse, par lafwa, ar faver ki  personn pa merite ek ki nou pe gagne asterla.” (Romin 5:1, 2, NW.) Nou vremem bien rekonesan ki nou kapav anpe avek Zeova ek vinn so bann kamarad!

11. Kouma bann Kretien ki ena lesperans pou al dan lesiel pe amenn “lezot brebi” ver lazistis?

¹¹ Devan Bondie, nou kapav vinn bann dimounn zis. Profet Daniel ti ekrir ki dan bann dernie zour, “bann ki ena disernman,” setadir, bann Kretien ki ena lesperans pou al dan lesiel, ti pou amenn “enn kantite dimounn ver lazistis.” (Lir Daniel 12:3. *) Kouma sa bann Kretien-la fer sa? Zot pres bonn nouvel ek ansegn bann milyon “lezot brebi” bann lalwa Zeova. (Zan 10:16, NW.) Zot ansegn bann lezot brebi kouma pou vinn bann dimounn ki pratik lazistis devan Bondie, enn kitsoz ki posib zis gras-a Zeova so faver ki personn pa merite. Pol ti explike: “Se kouma enn don gratis ki Bondie deklar zot zis par so faver ki personn pa merite, gras-a liberasion par ranson ki Zezi Kris inn peye.”​—Romin 3:23, 24, NW.

12. Ki lien ena ant lapriyer ek Bondie so faver ki personn pa merite?

¹² Nou kapav vinn pros ar Bondie atraver lapriyer. Si nou kapav priye Zeova, se gras-a so faver ki nou pa merite. Pol apel tronn Zeova “tronn kot nou kapav gagn faver ki personn pa merite,” ek li ankouraz nou pou vinn pre ar sa tronn-la “avek liberte pou koze ar enn konsians kler.” (Ebre 4:16a, NW.) Ninport ki ler nou anvi priye Zeova, nou kapav fer sa gras-a Zezi. Se vremem enn  gran loner! Pol ti dir: “Gras-a [Zezi] nou ena sa liberte pou koze ar enn konsians kler la ek pou apros ar Bondie avek konfians gras-a nou lafwa dan li.”​—Efezien 3:12, NW.

13. Kouma faver ki personn pa merite permet nou “gagn led dan ler ki bizin”?

¹³ Nou kapav gagn led dan ler ki bizin. Pol inn ankouraz nou pou priye Zeova ninport kan nou bizin “pou ki nou kapav gagn mizerikord ek trouv faver ki personn pa merite pou gagn led dan ler ki bizin.” (Ebre 4:16b, NW.) Ninport kan nou pe pas par bann leprev ek bann difikilte dan lavi, nou kapav sipliy Zeova pou gagn so led. Ek Li reponn nou bann lapriyer mem si Li pa oblize fer li. Souvan Li servi nou bann frer ek ser pou ed nou. Zeova reponn nou bann lapriyer pou ki nou “kapav ena gran kouraz ek dir: ‘Se Zeova ki ed mwa, mo pa pou per. Ki dimounn kapav fer mwa?’”​—Ebre 13:6, NW.

14. Kouma Zeova so faver ki personn pa merite fer nou leker dibien?

¹⁴ Nou kapav gagn rekonfor pou nou leker. Se enn gran benediksion ki Zeova rekonfort nou ninport kan nou deprime. (Psom 51:17) Kan bann Kretien dan Tesalonik ti pe soufer akoz persekision, Pol ti ekrir: “Ki nou Segner Zezi Kris limem ek Bondie nou Papa ki kontan nou e finn donn enn rekonfor eternel ek enn bon lesperans par so [faver ki personn pa merite,] li ranpli zot leker avek kouraz e li akord zot lafors.” (2 Tesalonisien 2:16, 17) Sa vremem rekonfort nou kan nou kone ki mem si nou pa merit faver Zeova, Li kontan nou ek gagn nou traka!

15. Ki lesperans nou ena gras-a Bondie so faver ki nou pa merite?

¹⁵ Nou ena lesperans pou viv pou touletan. Antan ki bann dimounn ki fer pese, nou pena okenn lespwar san led Zeova. (Lir Psom 49:7, 8.) Me Zeova finn donn nou enn lesperans extraordiner. Ki sa lesperans-la sa? Zezi ti dir: “Samem volonte mo Papa: tou dimounn ki rekonet So Garson ek ena lafwa an li, bizin gagn lavi pou touletan.” (Zan 6:40, NW.) Alor, se gras-a Zeova so faver ki nou pa merite ki nou ena lesperans pou viv pou touletan. Pol ti dir: “Bondie so faver ki personn pa merite finn manifeste, ek sa fer tou sort kalite dimounn gagn lavi sov.”​—Tit 2:11, NW.

16. Kouma sertin Kretien dan premie siek ti abiz lor Bondie so faver ki personn pa merite?

¹⁶ Nou gagn boukou benediksion gras-a Zeova so faver ki nou pa merite. Selman, fode pa nou abiz lor sa faver-la, setadir, nou servi sa kouma enn exkiz pou fer pese. Sertin Kretien dan premie siek ti esey “servi Bondie so faver ki personn pa merite kouma enn exkiz pou ena enn kondwit devergonde.” (Zid 4, NW.) Li paret ki sa bann Kretien ki pa ti fidel la ti panse ki zot kapav fer pese ek ki Zeova touletan ti pou pardonn zot. Zot ti mem esey antrenn zot bann frer pou fer pese ansam ar zot. Azordi osi, ninport kisannla ki azir koumsa, pe “insilte Lespri [faver ki personn pa merite].”​—Ebre 10:29.

17. Ki konsey bien for Pier ti done?

¹⁷ Zordi, Satan anbet sertin Kretien ek  fer zot krwar ki zot kapav fer pese ek ki otomatikman Zeova pou pardonn zot. Li vre ki Zeova dispoze pardonn bann ki fer pese me ki repanti; selman, Li atann osi ki nou lit kont nou bann dezir pou fer pese. Zeova finn fer Pier ekrir sa bann parol-la: “Me zot, mo bann bieneme, zot deza averti. Fer atansion, pa les zot antrene par lerer bann move dimoun ki rod destabiliz zot. Kontigne progrese dan [faver ki personn pa merite] ek konesans nou Segner ek Sover Zezi Kris.”​—2 Pier 3:17, 18.

18. Gras-a Zeova so faver ki nou pa merite, ki bann responsabilite nou ena?

¹⁸ Nou bien rekonesan ki Zeova finn donn nou so faver ki nou pa merite. Alor, nou bizin servi bann don ki nou ena pou onor Zeova ek pou ed lezot. Nou dwa zot sa. Kouma nou kapav servi sa bann don-la? Pol dir nou: “Alor, lefe ki nou tou nou ena diferan don dapre seki finn donn nou atraver faver ki nou pa merite . . . si nou finn gagn enn minister kouma enn don, anou aplik nou dan sa minister-la; si kikenn ena don pou ansegne, ki li ansegne; ouswa si kikenn ena don pou ankouraz lezot, ki li ankouraze; . . . si kikenn ena don pou montre mizerikord, ki li fer sa avek lazwa.” (Romin 12:6-8, NW.) Alor, gras-a Zeova so faver ki nou pa merite, nou ena responsabilite pou travay dir dan nou minister, pou ansegn lezot bann kitsoz ki ena dan Labib, pou ankouraz nou bann frer ek ser, ek pou pardonn ninport kisannla ki ofans nou.

19. Lor ki responsabilite nou pou koze dan prosin lartik?

¹⁹ Lefe ki nou finn gagn Zeova so faver ki personn pa merite, sa bizin pous nou pou fer tou seki nou kapav pou “rann temwaniaz afon lor bon nouvel konsernan faver Bondie ki personn pa merite.” (Zistwar Bann Apot 20:24, NW.) Nou pou koz plis lor sa responsabilite-la dan prosin lartik.