LABIB koz boukou lor santiman ki bann zom “parey kouma nou” ti ena. (Zak 5:17) Par exanp, nou kapav konpran fasilman seki Pol ti pe rod dir dan Romin 7:21-24: “Kan mo oule fer kiksoz bien, mo retrouv mwa pe fer lemal. . . . Mo vremem enn dimoun malere!” Kan nou bizin lit kont nou linperfeksion, sa rasir nou pou kone ki enn zom fidel kouma Pol ti osi ena sa bann santiman-la.

Pol ti osi koz lor bann lezot santiman ki li ti ena. Dan Galat 2:20, li ti dir avek lasirans ki Zezi “kontan [li] e finn donn so lavi pou [li]” personelman! Eski to ena mem santiman ki li? Kitfwa pa touletan.

Si nou ankor santi ki nou pa vo nanye akoz bann erer ki nou ti fer dan lepase, kitfwa nou kapav ena bann dout ki Zeova kontan nou ek ki Li’nn pardonn nou. Ek nou kapav trouv sa difisil pou konsider sakrifis Zezi kouma enn kado ki pou nou personelman. Eski Zezi vremem anvi ki nou trouv so sakrifis kouma enn kado? Si wi, ki kapav ed nou pou fer sa? Anou examinn sa de kestion-la.

Wi, Zezi anvi ki nou konsider so sakrifis kouma enn kado personel. Kouma nou kapav sir ki sa vre? Mazinn sitiasion ki ena dan Lik 23:39-43 (NW). Enn misie lor enn poto akote Zezi. Li rekonet ki li koupab parski li’nn fer enn move kitsoz. Seki sa bandi-la inn fer sirman bien grav parski se zis bann dimounn ki fer bann kitsoz bien grav ki gagn sa kalite lamor-la. Sa misie-la pe vremem trakase, alor li sipliy Zezi: “Pa bliye mwa kan to rant dan to Rwayom.”

Ki Zezi fer? Mazine ki kantite Zezi pe soufer kan li tourn so latet pou get sa bandi-la. Malgre so soufrans, Zezi fer li enn sourir ek rekonfort li kan li dir: “Vremem mo dir twa zordi, to pou avek mwa dan Paradi.” Zezi ti kapav zis rapel misie-la ki Garson Limanite inn vini pou “donn so lavi kouma enn ranson pou boukou dimoun.” (Mat. 20:28) Me eski to’nn remarke ki avek bonte Zezi ti aplik so sakrifis ar sa misie-la personelman? Li ti bien amikal ek li ti servi bann mo kouma “twa” ek “mwa.” Ek Zezi ti dir ki bienfe sa bandi-la ti pou gagne gras-a so sakrifis: li ti pou kapav viv dan enn paradi lor later.

Pena dout ki Zezi ti anvi ki sa misie-la konpran ki gras-a sakrifis ki li ti pre pou fer, sa misie-la osi ti pou gagn bann bienfe. Si Zezi ti ena sa santiman-la pou enn bandi ki pa ti mem gagn lokazion pou servi Bondie, eski li pa pou ena sa santiman-la pou enn Kretien batize ki pe servi Bondie? Alor, malgre bann pese ki nou’nn fer dan lepase, ki kitsoz kapav konvink nou ki sakrifis Zezi pou donn nou bann bienfe personelman?

Pol so minister ti inflianse par fason ki li ti konsider sakrifis Zezi. Kouma? Li ti explike:  “Mo rann gras Zezi Kris nou Segner, mo lafors, parski li finn fer mwa konfians, li finn swazir mwa kouma so serviter [“li finn donn mwa enn minister,” NW]. Malgre mo ti pe blasfeme, mo ti enn persekiter e mo ti fer violans.” (1 Tim. 1:12-14) Responsabilite ki Pol ti gagne pou prese ti rasir li ki Zezi ti ena mizerikord pou li, ti kontan li ek ti fer li konfians personelman. Parey kouma Pol, Zezi inn donn sakenn parmi nou responsabilite pou pres bonn nouvel. (Mat. 28:19, 20) Eski sa responsabilite-la kapav ed nou pou konpran ki Zezi inn mor pou nou osi?

Albert, ki ti exkli pandan preske 34 an ek ki fek retourn ver Zeova, explike: “Mo pa kapav bliye bann move kitsoz ki mo’nn fer dan lepase. Me kan mo dan predikasion, parey kouma Pol, mo santi ki Zezi inn konfie mwa enn minister personelman. Sa ankouraz mwa ek fer mwa gard enn lespri pozitif lor momem, lor mo lavi, ek lor mo lavenir.”​—Ps. 51:3.

Allan, ki ti fer boukou move kitsoz ek ki ti bien violan avan ki li konn laverite, dir: “Mo ankor pans tou bann move kitsoz ki mo’nn fer bann dimounn. Parfwa, sa fer mwa deprime. Me mo remersie Zeova ki Li pe permet enn kikenn kouma mwa, ki’nn fer boukou pese, pou anons bonn nouvel ar lezot dimounn. Kan mo trouv reaksion ki bann dimounn ena kan zot tann bonn nouvel, sa rapel mwa ki kantite Zeova bon ek ena lamour. Mo santi ki Li pe servi mwa pou ed lezot dimounn ki’nn fer bann move kitsoz zot osi.”

Nou minister permet nou pou konsantre nou lor bann bon kitsoz ek pou ena bann panse pozitif. Sa rasir nou ki Zezi ena mizerikord pou nou, kontan nou ek fer nou konfians.

Tanki Satan so move lemond pa detrir, kitfwa nou leker pou kontign repros nou akoz bann erer ki nou finn fer dan lepase. Ki kitsoz kapav ed nou pou lit kont sa bann santiman-la?

Jean souvan ena bann remor akoz doub lavi ki li ti amene kan li ti zenn. Li ankor pe lit kont sa bann santiman-la ek li dir: “Mo kontan ki ‘Bondie pli gran ki nou leker.’” (1 Zan 3:19, 20) Parey kouma Jean, sa rekonfort nou kan nou kone ki Zeova ek Zezi konpran ki nou fer pese. Pa bliye ki avek boukou lamour zot inn donn laranson, pa pou bann dimounn ki parfe, me pou bann ki fer pese ek ki repanti.​—1 Tim. 1:15.

Nou pou ena plis konviksion ki laranson aplik ar nou personelman kan dan lapriyer nou medit lor fason ki Zezi ti tret bann imin inparfe ek kan nou fer tou seki nou kapav dan travay predikasion ki li’nn konfie nou. Kan to fer sa, parey kouma Pol, to kapav dir: Zezi “kontan mwa e finn donn so lavi pou mwa.”