LARTIK LETID 30
Tous Leker Bann Dimounn Ki Pa Relizie
“Mo finn vinn tou kitsoz pou tou sort kalite dimounn, pou ki par tou mwayin posib mo kapav sov sertin parmi zot.”—1 KOR. 9:22, NW.
KANTIK 82 “Fer ki Zot Lalimier Briye”
REZIME *
1. Ki bann sanzman finn ena dan sertin pei pandan sa bann dernie lane-la?
PANDAN plizir milye lane, laplipar dimounn lor later ti dan enn relizion. Me pandan sa bann dernie dizenn lane la finn ena enn gran sanzman. Deplizanpli, pli boukou dimounn nepli konsider zotmem kouma bann dimounn relizie. Avredir, dan sertin pei, laplipar dimounn dir ki zot pa dan okenn relizion. *—Mat. 24:12.
2. Sit sertin rezon kifer sa kantite dimounn-la nepli relizie.
2 Kifer deplizanpli, pli boukou dimounn dir ki zot pa relizie? * Sertin kitfwa pans zis pou satisfer zot prop plezir ouswa zot nek pans zot bann problem. (Lik 8:14) Sertin nepli krwar dan Bondie. Lezot krwar dan Bondie, me zot konsider larelizion kouma enn kitsoz ki’nn demode, ki nepli itil, ki pa an-akor avek lasians ek ki pena bann rezonnman lozik. Kitfwa zot finn tann zot bann kamarad, profeser, ouswa bann zournalis dir ki lavi inn evolie, me bien rar zot tann bann bon rezon pou krwar dan Bondie. Lezot inn degoute ar konportman bann sef relizie ki nek rod larzan ek pouvwar. Dan sertin pei, bann gouvernman inn etabli bann lalwa ki anpes bann relizion fer sertin kitsoz.
3. Ki lobzektif sa lartik-la?
3 Zezi inn donn nou lord pou “al dan tou bann pep ki ena e fer zot vinn [so] bann disip.” (Mat. 28:19) Kouma nou kapav ed bann dimounn ki pa relizie pou aprann kontan Bondie ek pou vinn bann disip Kris? Nou bizin rekonet ki fason ki enn dimounn reazir kan li tann nou mesaz kitfwa pou depann lor lanvironnman kot li’nn grandi. Par exanp, bann dimounn ki’nn grandi dan l’Europe kitfwa pa pou reazir parey kouma bann ki’nn grandi dan bann pei l’Asie. Kifer? Dan l’Europe, boukou dimounn konn inpe lor Labib ek zot abitie tande ki Bondie inn kree tou kitsoz. Alor ki dan l’Asie, laplipar dimounn konn bien tigit kitsoz ouswa pa konn nanye ditou lor Labib, ek kitfwa zot pa krwar ki ena enn Kreater. Lobzektif sa lartik-la se pou ed nou tous leker tou bann dimounn ki nou zwenn dan nou minister, ninport kotsa zot sorti ek ninport ki krwayans zot ena.
KONTIGN ENA ENN LATITID POZITIF
4. Kifer nou kapav kontign ena enn latitid pozitif?
4 Res Pozitif. Toule lane ena bann dimounn ki pa ti dan okenn relizion ki vinn Temwin Zeova. Boukou parmi zot ti deza pe viv dapre bann prinsip moral ek ti’nn degoute ar lipokrizi ki ena dan bann relizion. Lezot pa ti ena bann prinsip moral ek boukou ti ena bann vilin manier ki zot ti bizin rezete. Avek led Zeova, nou kapav sir ki nou pou reisi trouv bann ki “ena enn bon kondision leker pou gagn lavi eternel.”—Zist. 13:48, NW; 1 Tim. 2:3, 4.
Kan to pres avek bann dimounn ki pa krwar dan Labib, adapte to prezantasion ar sa bann dimounn-la (Get paragraf 5-6) *
5. Ki kitsoz souvan pous bann dimounn pou ekout nou mesaz?
5 To Bizin Zanti ek Ena Takt. Souvan bann dimounn ekout nou mesaz, pa akoz seki nou dir, me akoz fason ki nou dir li. Zot kontan kan nou zanti, ena takt, ek vremem interese ar zot. Nou pa fors zot pou ekout nou mesaz. Okontrer, nou esey konpran lopinion ki zot ena lor larelizion. Par exanp, nou aprann ki sertin pa kontan koz lor larelizion avek bann etranze. Lezot panse ki li malelve pou demann enn dimounn seki li panse lor Bondie. Ek lezot santi zot malalez kan lezot dimounn trouv zot pe lir Labib, sirtou avek bann Temwin Zeova. Ninport ki rezon zot ena, nou esey konpran zot santiman.—2 Tim. 2:24.
6. Kouma lapot Pol ti montre ki li ti adapte li ar bann dimounn, ek kouma nou kapav imit li?
6 Ki nou pou fer si nou trouv enn kikenn paret malalez kan nou servi bann mo kouma “Labib,” “kreasion,” “Bondie,” ouswa “relizion”? Nou kapav imit lapot Pol ek adapte nou fason prese avek zot. Kan li ti koz avek bann Zwif, Pol ti servi bann Lekritir. Parkont, kan li ti koz avek bann filozof Grek dan Lareopaz, li pa ti dir ki li pe sit bann Lekritir. (Zist. 17:2, 3, 22-31) Kouma nou kapav imit lexanp Pol? Si to pe koz avek enn dimounn ki pa krwar dan Labib, kitfwa li pou pli bon si to pa dir li ki seki to pe dir sorti dan Labib. Si to santi ki enn dimounn pou malalez si lezot trouv li pe lir Labib ansam avek twa, esey montre li bann verse dan enn fason ki lezot pa pou remarke, kouma par exanp lor enn portab ouswa enn tablet.
7. Pou imit lexanp Pol, parey kouma nou trouve dan 1 Korintien 9:20-23, ki kitsoz kitfwa nou bizin fer?
7 Konpran Bann Dimounn ek Ekout Zot. Nou bizin esey konpran ki kitsoz finn inflians fason panse bann dimounn ki nou zwenn. (Prov. 20:5) Anou get ankor enn fwa lexanp Pol. Li ti grandi parmi bann Zwif. Me li ti bizin sanz so fason prese kan li ti koz avek bann Non-Zwif, setadir bann dimounn ki ti konn bien tigit kitsoz ouswa pa ti konn nanye lor Zeova ek lor bann Lekritir. Pou ki nou konpran pli bien seki bann dimounn dan nou teritwar panse ek resanti, kitfwa nou pou bizin fer bann resers ouswa rod led ar bann frer ek ser ki ena lexperyans.—Lir 1 Korintien 9:20-23, NW. *
8. Sit enn fason kouma nou kapav koumans enn konversasion lor Labib.
8 Nou lobzektif se trouv bann dimounn “ki dign.” (Mat. 10:11, NW) Pou fer sa, nou bizin demann bann dimounn pou exprim zot ek apre nou ekout zot bien. Par exanp, enn frer dan l’Angleterre demann bann dimounn kouma dapre zot enn kikenn kapav ena enn lavi maryaz ere, elve bann zanfan, ouswa siport bann linzistis. Li ekout zot repons. Apre sa, li dir: “Ki ou panse lor sa konsey ki finn ekrir depi apepre 2,000 an la?” Lerla, san ki li mansionn “Labib,” li montre zot lor so telefonn bann verse ki adapte.
TOUS LEKER BANN DIMOUNN
9. Kouma nou kapav ed bann dimounn ki an zeneral evit koz lor Bondie?
9 Kouma eski nou kapav tous leker bann dimounn ki an zeneral evit koz lor Bondie? Se kan nou koz lor bann kitsoz ki tous zot. Par exanp, boukou dimounn emerveye par lanatir. Alor, kitfwa nou kapav dir enn kitsoz koumsa: “Kitfwa ou deza kone ki boukou kitsoz ki bann siantis inn invante, zot finn kopie lor lanatir. Par exanp, bann dimounn ki’nn invant mikro inn bien etidie zorey bann zanimo, ek bann ki’nn invant kamera inn bien etidie lizie bann zanimo. Eski ou panse ki ena enn kikenn ki’nn kree zorey ek lizie o-koumansman?” Apre ki nou’nn bien ekout dimounn-la, nou kapav dir osi: “Kan bann inzenier aprann ar fason ki finn fer bann zorey ek bann lizie, eski zot pa pe aprann ar sa Kikenn ki’nn kree lizie ek zorey la? Ena enn kitsoz ki enn ansien poet ti ekrir ki ti pik mo kiryozite. Li ti dir: ‘Sa Kikenn ki’nn fer zorey la, eski li pa kapav tande? Sa Kikenn ki’nn fer lizie la, eski Li pa kapav trouve? . . . Se Limem ki donn bann dimounn konesans!’ Sertin siantis dakor avek sa bann parol-la ek krwar ki ena enn Kreater.” (Ps. 94:9, 10, NW) Lerla nou kapav montre dimounn-la enn video ki trouv dan seri lartik « Points de vue sur l’origine de la vie » lor jw.org®. (Al dan seksion PUBLICATIONS > VIDÉOS > INTERVIEWS ET TÉMOIGNAGES.) Ouswa nou kapav donn li brosir La vie a-t-elle été créée ? ouswa brosir Cinq questions à se poser sur l’origine de la vie.
10. Kouma nou kapav koumans enn konversasion avek enn dimounn ki pa anvi koz lor Bondie?
10 Laplipar dimounn ti pou kontan ki bann kitsoz ameliore dan lavenir. Selman, boukou dimounn per ki enn zour later detrir ouswa ki bann dimounn nepli kapav viv lor later. Enn responsab sirkonskripsion dan Norvège dir ki bann dimounn ki pa anvi koz lor Bondie souvan aksepte pou koz lor seki pe pase dan lemond. Apre ki li fini dir dimounn-la bonzour, frer-la dir: “Eski ou panse ki nou kapav ena enn pli bon lavenir? Kisannla ki pou kapav vremem amelior nou sitiasion? Eski se bann politisien, bann siantis, ouswa enn lot kikenn?” Li ekout dimounn-la bien, apre sa li lir ouswa li sit enn verse ki koz lor enn pli bon lavenir. Sertin etone kan zot trouve ki Labib promet ki later pou res pou touletan ek ki bann bon dimounn pou viv lor la pou touletan.—Ps. 37:29; Ekle. 1:4.
11. Kifer nou bizin servi diferan prezantasion avek bann dimounn ki nou zwenn, ek parey kouma Romin 1:14-16 montre nou, kouma nou kapav imit lexanp Pol?
11 Nou bizin servi diferan prezantasion avek bann dimounn ki nou zwenn. Kifer? Parski sak dimounn diferan. Seki interes enn kikenn kitfwa pa pou interes enn lot. Sertin dispoze pou koz lor Bondie ek Labib, alor ki lezot pou plis anvi koz lor lezot kitsoz. Dan ninport ki sitiasion, nou bizin sezi tou lokazion pou koz avek tou sort kalite dimounn. (Lir Romin 1:14-16.) Biensir, nou bizin rapel ki se Zeova ki fer laverite grandi dan leker bann dimounn ki kontan seki drwat.—1 Kor. 3:6, 7.
KOUMA NOU KAPAV KOZ LOR LAVERITE AR BANN DIMOUNN KI SORTI L’ASIE?
Boukou proklamater Rwayom Bondie interes zot personelman ar bann dimounn ki sorti dan bann pei ki pa Kretien ek zot partaz avek sa bann dimounn-la bann konsey pratik ki ena dan Labib (Get paragraf 12-13)
12. Ki nou kapav fer pou tous leker bann dimounn ki sorti l’Asie ek ki zame pa finn reflesi si ena enn Kreater?
12 Partou lor later, boukou proklamater zwenn bann dimounn ki sorti dan bann pei l’Asie. Parmi ena osi bann ki sorti dan bann pei kot gouvernman inn met bann restriksion lor bann laktivite relizie. Dan plizir pei l’Asie, boukou dimounn zame finn vremem reflesi si ena enn Kreater ouswa non. Sertin anvi konn plis ek aksepte pou etidie Labib, me ena lezot ki o-koumansman ezite pou aprann bann nouvo lide. Kouma nou kapav ed zot? Sertin proklamater ki ena lexperyans gagn bann bon rezilta kan zot koumans enn konversasion amikal avek sa bann dimounn-la ek montre zot enn lintere sinser. Lerla, kan li apropriye, zot explike kouma zotmem zot lavi finn ameliore kan zot finn koumans aplik bann prinsip Labib.
13. Ki kapav ed bann dimounn pou interese ar Labib? (Get zimaz lor kouvertir.)
13 Boukou dimounn, o-koumansman atire sirtou ar bann konsey pratik ki ena dan Labib. (Ekle. 7:12) Dan New York, enn ser ki pres avek bann dimounn ki koz Mandarin dir: “Mo fer zefor pou interes mwa ar sa bann dimounn-la ek pou ekout zot. Si mo aprann ki zot inn fek imigre, mo demann zot: ‘Eski ou pe reisi adapte ar ou nouvo lavi isi? Eski ou’nn reisi gagn travay? Eski bann dimounn dan landrwa pe tret ou bien?’” Parfwa sa ed li pou koumans bann konversasion Biblik. Kan li apropriye, ser-la dir osi: “Dapre ou, ki kitsoz inportan nou bizin fer pou ki nou ena enn bon relasion avek lezot? Eski mo kapav montre ou enn proverb ki ena dan Labib? Proverb-la dir: ‘Koumans enn lager, se koumadir ouver baraz enn rezervwar delo; avan ki lager eklate, ale.’ Eski ou panse ki sa konsey-la kapav ed nou pou ena enn bon relasion avek lezot?” (Prov. 17:14) Bann konversasion koumsa kapav ed nou pou trouv bann dimounn ki pou anvi konn plis.
14. Kouma enn frer dan l’Asie ed bann dimounn ki dir ki zot pa krwar dan Bondie?
14 Ki nou pou dir si enn dimounn dir nou ki li pa krwar dan Bondie? Enn frer ki depi plizir lane pe pres ar bann dimounn ki pa relizie dan enn pei l’Asie, explike: “Normalman isi kan enn dimounn dir: ‘Mo pa krwar dan Bondie,’ an realite, li pe rod dir ki li pa ador bann bondie ki laplipar dimounn dan landrwa adore. Alor, souvan mo dir ki mo dakor ki laplipar bondie se bann dimounn ki’nn fer ek ki sa bann bondie-la zot fos. Lerla mo lir Zeremi 16:20, ki dir: ‘Eski enn zom kapav fer bann bondie pou limem alor ki se pa bann bondie?’ Apre sa, mo demann dimounn-la: ‘Kouma nou kapav fer diferans ant vre Bondie ek enn bondie ki’nn invante par bann dimounn?’ Mo ekout dimounn-la bien, ek apre sa mo lir Izai 41:23, ki dir: ‘Dir nou ki pou arive dan lavenir, koumsa nou pou kone ki zot vremem bann bondie.’ Apre sa mo montre enn lexanp kot Zeova inn predir lavenir.”
15. Ki nou aprann ar lexanp enn frer dan l’Asie?
15 Get ki metod enn frer dan l’Asie servi kan li fer bann vizit. Li dir: “Mo montre bann dimounn kouma Labib ed nou dan nou lavi toulezour, bann profesi Labib ki’nn realize, ek bann lalwa ki kontrol liniver. Apre sa, mo explik zot kouma tousala montre ki bizin ena enn Kreater ki ranpli ar sazes. Kan enn dimounn aksepte posibilite ki Bondie existe, mo montre li seki Labib dir lor Zeova.”
16. Dapre Ebre 11:6, kifer bann etidian Labib bizin ena lafwa dan Bondie ek dan Labib, ek kouma nou kapav ed zot pou devlop sa?
16 Kan nou etidie Labib avek bann dimounn ki pa krwar dan Bondie, nou bizin touletan kontign ed zot pou ena plis lafwa ki Bondie existe. (Lir Ebre 11:6.) Nou bizin osi ed zot pou ena lafwa dan Labib. Pou fer sa, kitfwa nou pou bizin repet sertin lansegnman plizir fwa. Sak fwa ki nou fer letid, kitfwa nou bizin koz lor bann prev ki montre ki Labib se Parol Bondie. Par exanp, nou kapav rezerv enn ti moman pou koz lor bann profesi Labib ki’nn realize, pou montre kouma Labib li exakt kan li koz lor lasians ek listwar, ouswa kouma Labib ed nou dan nou lavi toulezour.
17. Ki lefe nou lamour kapav ena lor bann dimounn?
17 Kouma nou kapav ed bann dimounn pou vinn bann disip Kris, mem si zot krwar dan Bondie ouswa non? Se kan nou manifeste lamour anver zot. (1 Kor. 13:1) Letan nou ansegn zot, nou lobzektif se pou montre zot ki Bondie kontan nou ek ki Li anvi ki nou kontan Li. Toule lane, plizir milye dimounn, ki avan pa ti tro interese ouswa pa ti interese ditou ar larelizion pe pran batem parski zot finn aprann pou kontan Bondie. Alor, res pozitif ek interes twa sinserman ar tou sort kalite dimounn. Ekout zot. Esey konpran zot. Par to lexanp, ansegn zot pou vinn bann disip Kris.
KANTIK 76 Ki To Pe Resanti?
^ par. 5 Azordi, kitfwa nou zwenn bann dimounn ki pa relizie pli souvan ki avan. Sa lartik-la explike kouma nou kapav partaz bann verite ki ena dan Labib avek zot ek kouma nou kapav ed zot pou ena konfians dan Labib ek ena lafwa dan Zeova.
^ par. 1 Dapre bann sondaz, parmi sa bann pei-la ena: l’Albanie, l’Allemagne, l’Australie, l’Autriche, Azerbaïdjan, Canada, la Chine, Corée du Sud, Danemark, l’Espagne, la France, Hong Kong, l’Irlande, Israël, Japon, Norvège, Pays-Bas, République tchèque, Royaume-Uni, la Suède, la Suisse ek Vietnam.
^ par. 2 EXPRESION KI’NN EXPLIKE: Dan sa lartik-la, lexpresion pa relizie fer referans ar bann dimounn ki pa dan okenn relizion ouswa ki pa krwar dan Bondie.
^ par. 7 1 Korintien 9:20-23: “20 Pou bann Zwif, mo ti vinn kouma enn Zwif, pou mo kapav sov bann Zwif; pou bann ki swiv lalwa, mo ti vinn kouma enn kikenn ki swiv lalwa, mem si mwa mo pa swiv lalwa, pou mo kapav sov bann ki swiv lalwa. 21 Pou bann ki pena lalwa, mo ti vinn kouma enn kikenn ki pena lalwa, mem si mwa mo swiv lalwa Bondie ek mo obeir lalwa Kris, pou ki mo kapav sov bann ki pena lalwa. 22 Pou bann feb, mo ti vinn feb, pou mo kapav sov bann feb. Mo finn vinn tou kitsoz pou tou sort kalite dimounn, pou ki par tou mwayin posib mo kapav sov sertin parmi zot. 23 Mo fer tou kitsoz akoz bonn nouvel, pou ki mo kapav partaz sa avek lezot.”
^ par. 55 DESKRIPSION ZIMAZ: Enn frer ki travay dan lopital pe pres avek enn koleg travay. Plitar koleg-la al lor sit jw.org.
