1. Ki kitsoz lapot Pol ti rekonet?

LAPOT Pol ti rekonet ki parfwa li ti santi li “feb.” Li ti rann li kont ki so lasante ti “pe deteryore,” ki li ti bizin lite pou kontign fer seki bon, ek ki Zeova pa ti touletan reponn so bann lapriyer dan fason ki li li ti anvi. (2 Kor. 4:16; 12:7-9; Rom. 7:21-23) Pol ti kone osi ki so bann opozan ti konsider li kouma enn kikenn ki feb. * Me li pa ti les so bann febles ouswa bann move kitsoz ki lezot panse lor li, fer li panse ki li initil.​—2 Kor. 10:10-12, 17, 18.

2. Dapre 2 Korintien 12:9, 10, ki leson bien inportan Pol ti aprann?

² Pol ti aprann enn leson bien inportan: Enn kikenn kapav vinn for mem si li santi li feb. (Lir 2 Korintien 12:9, 10.) Zeova ti dir Pol ki So ‘pwisans ti pou manifeste dan so febles,’ setadir ki Zeova ti pou donn Pol lafors ki li ti bizin. Pou koumanse, anou gete kifer fode pa nou abat kan bann dimounn insilte nou.

3. Kifer nou kapav kontan kan nou gagn bann insilt?

³ Personn pa kontan kan insilte li. Selman, si nou bann lennmi insilte nou ek ki nou trakase plis ki bizin ar seki zot dir, sa kapav dekouraz nou. (Prov. 24:10) Kouma nou bizin reazir kan nou gagn bann insilt? Parey kouma Pol, nou kapav kontan kan nou gagn bann “insilt.”  (2 Kor. 12:10) Kifer? Parski kan nou gagn bann insilt ouswa kan nou gagn lopozision, sa montre ki nou bann disip Zezi. (1 Pier 4:14) Zezi ti dir ki so bann disip ti pou gagn persekision. (Zan 15:18-20) Se seki ti ariv bann Kretien dan premie siek. Sa lepok-la, bann ki ti inflianse par kiltir Grek ti konsider bann Kretien kouma bann dimounn ki bet ek ki feb. Ek bann Zwif ti konsider bann Kretien, kouma lapot Pier ek Zan, kouma “bann dimounn sinp e san ledikasion.” (Zist. 4:13) Boukou dimounn ti panse ki bann Kretien ti feb ek san defans. Kifer? Zot pa ti ena okenn backing politik ouswa militer, ek bann dimounn ti rezet zot.

4. Kouma bann Kretien ti reazir kan bann dimounn ti dir bann move kitsoz lor zot?

⁴ Dan premie siek, eski bann Kretien ti dekouraze akoz seki bann opozan ti dir lor zot? Non. Par exanp, lapot Pier ek lapot Zan ti konsider sa kouma enn privilez pou gagn persekision parski zot ti bann disip Zezi ek zot ti pe koz lor so bann lansegnman. (Zist. 4:18-21; 5:27-29, 40-42) Bann disip pa ti ena okenn rezon pou gagn onte. Mem si bann dimounn pa ti ena respe pou bann Kretien dan premie siek, konpare ar zot bann opozan, sa bann Kretien-la ti fer boukou kitsoz pou ed bann dimounn. Par exanp, bann liv Labib ki finn ekrir par sa bann Kretien-la kontign donn lespwar ek ed bann milye dimounn. Ek sa Rwayom ki zot ti pe prese la, azordi pe regne dan lesiel ek biento li pou regne lor later antie. (Mat. 24:14) Anplis, sa gouvernman Romin ki ti pe persekit bann Kretien la, nepli existe depi bien-bien lontan. Parkont azordi, sa bann Kretien fidel la pe regne dan lesiel. Zot bann opozan inn fini mor, ek si arive zot resisite, zot pou bann sitwayen sa Rwayom ki bann Kretien ti pe prese la.​—Rev. 5:10.

5. Dapre Zan 15:19, kifer bann dimounn pena respe pou bann Temwin Zeova?

⁵ Azordi, ena bann dimounn ki pena respe pou bann Temwin Zeova ek zot boufonn nou parski zot panse ki nou bet ek feb. Kifer? Parski nou pena mem latitid ki laplipar dimounn. Nou fer zefor pou obeir, pou ena limilite ek douser. Me azordi, bann dimounn admir bann ki orgeye, arogan, ek rebel. Anplis, nou pa pran par dan bann zafer politik, ek nou pa fer servis militer. Nou pa rant dan moul sa lemond-la, alor lezot panse ki nou inferyer.​—Lir Zan 15:19; Rom. 12:2.

6. Ki bann kitsoz extraordiner Zeova pe ed so bann serviter pou fer?

⁶ Mem si bann dimounn panse ki nou feb, Zeova pe servi nou pou fer bann kitsoz extraordiner. Par exanp, Li pe servi nou pou fer pli gran travay predikasion ki finn ena dan listwar. Azordi, nou prodir ek tradir bann magazinn ki plis distribie dan lemond. Nou osi servi Labib pou ed bann milyon dimounn amelior zot lavi. Tousala se gras-a Zeova. Nou kapav paret feb devan bann dimounn, me Zeova servi nou pou fer bann gran travay. Me ki nou kapav dir lor sakenn parmi nou? Eski Zeova kapav fer twa vinn for? Si wi, ki to bizin fer pou ki Li ed twa? Anou get trwa kitsoz ki nou kapav aprann ar lexanp lapot Pol.

7. Ki leson nou aprann ar lexanp Pol?

⁷ Enn leson ki nou aprann ar lexanp Pol  se: Fode pa ki nou kont lor nou prop lafors ouswa lor nou bann kapasite kan nou servi Zeova. Pol ti ena enn bon pozision ek boukou kapasite, ek akoz sa, bann dimounn ti pe admir li. Li ti kapav vinn enn dimounn ki fier ek ki kont lor limem. Pol ti grandi dan Tars, kapital enn provins Romin. Tars ti enn lavil bien ris ek ti ena enn gran liniversite laba. Pol ti enn kikenn ki ti bien edike. Gamaliel, enn parmi bann sef relizie ki ti bien respekte dan sa lepok-la, ti so profeser. (Zist. 5:34; 22:3) Anplis, Pol ti enn kikenn bien inportan dan so kominote. Li ti dir: “Mo ti pe fer pli gran progre dan relizion Zwif ki boukou parmi bann ki ti dan mo laz ek dan mo ras.” (Gal. 1:13, 14, NW; Zist. 26:4) Me Pol pa ti kont lor limem.

8. Dapre Filipien 3:8, kouma Pol ti konsider bann kitsoz ki li ti abandone, ek kifer li ti siport avek plezir so bann “febles”?

⁸ Pol ti bien kontan pou abandonn bann kitsoz ki ti kapav fer li pas pou enn kikenn ki inportan. An realite, li ti konsider sa bann kitsoz-la kouma “bann salte.” (Lir Filipien 3:8.) Pol ti gagn boukou difikilte parski li ti vinn Kretien. Bann Zwif ti ena laenn pou li. (Zist. 23:12-14) Pol ti osi enn sitwayen Romin, ek bann Romin ti bat li ek ti zet li dan prizon. (Zist. 16:19-24, 37) Anplis, Pol ti kone ki li inparfe, ek li ti gagn bann difikilte pou fer seki bon. (Rom. 7:21-25) Mem si Pol ti ena bann febles ek ki li ti pe gagn bann persekision, li pa ti aret servi Zeova. Li ti siport avek plezir so bann “febles.” Kifer? Parski se dan bann moman ki li ti feb ki li ti trouv pwisans Bondie.​—2 Kor. 4:7; 12:10.

9. Kouma nou bizin konsider bann dezavantaz ki nou panse nou ena?

⁹ Si nou anvi ki Zeova donn nou so pwisans, fode pa nou panse ki sa depann lor nou lafors fizik, nou ledikasion, lanvironnman kot nou sorti, ouswa lor nou bann dibien materyel. Se pa sa bann kitsoz-la ki fer nou ena valer devan  lizie Zeova. An realite, parmi bann serviter Zeova, pena boukou ki “pwisan,” ki ‘sorti dan bann gran fami inportan,’ ouswa ki “saz” dapre sa lemond-la. Okontrer, Zeova “finn swazir saki feb dan lemonn.” (1 Kor. 1:26, 27) Alor, fode pa to konsider bann dezavantaz ki to panse to ena, kouma bann kitsoz ki anpes twa servi Zeova. Okontrer, konsider sa bann dezavantaz-la kouma bann lokazion pou trouv pwisans Zeova azir lor twa. Par exanp, si to gagn per kan bann dimounn kritik to bann krwayans, priye Zeova pou donn twa kouraz pou defann to lafwa. (Efe. 6:19, 20) Si to lavi bien difisil akoz enn maladi fizik ouswa mantal, demann Zeova lafors ki to bizin pou to kapav kontign servi li otan ki to kapav. Sak fwa ki to pou trouv Zeova ed twa, to lafwa pou grandi ek to pou vinn pli for.

10. Kifer nou bizin etidie lexanp bann fidel serviter Zeova, kouma bann ki mansione dan Ebre 11:32-34?

¹⁰ Pol ti bien kontan etidie bann Lekritir. Li ti aprann boukou kitsoz ar lexanp bann serviter Zeova. Kan li ti ekrir bann Kretien Ebre, Pol ti demann zot pou reflesi lor lexanp bann fidel serviter Zeova dan lepase. (Lir Ebre 11:32-34.) Anou pran lexanp Lerwa David. Pa zis so bann lennmi ki ti persekit li. Parfwa, mem so bann kamarad ti opoze ar li. Anou gete kouma lexanp David kitfwa ti ed Pol ek osi kouma nou kapav imit lexanp Pol.

11. Kifer David ti paret feb? (Get zimaz lor kouvertir.)

¹¹ Goliat ti enn gerye bien pwisan ek li ti konsider David kouma enn nanye ditou. Kan Goliat ti trouv David, li ti “boufonn li ek mepriz li.” Goliat ti pli gran, pli bien ekipe, ek li ti antrene pou lager. David li, li ti zis enn garson ki pa ti ena lexperyans ek ki pa ti paret ekipe pou lager. Me seki ti paret enn dezavantaz pou David, ti vinn so lafors. Kouma? Li ti kont lor Zeova, ek Zeova ti donn li lafors pou gagn laviktwar lor Goliat.​—1 Sam. 17:41-45, 50.

12. Sit enn lot difikilte ki David ti gagne.

¹² David ti bizin fer fas ar enn lot difikilte, ki ti kapav fer li santi li feb. Sail ti lerwa ki Zeova ti swazir pou diriz Izrael ek David ti servi li avek fidelite. O-koumansman, Lerwa Sail ti ena respe pou David. Me apre, Sail ti vinn orgeye ek li ti koumans zalou David. Sail ti tret David dan enn move fason, ek li ti mem esey touy David.​—1 Sam. 18:6-9, 29; 19:9-11.

13. Ki David ti fer kan Lerwa Sail ti tret li dan enn move fason?

¹³ Kan Lerwa Sail ti tret David dan enn move fason, David ti kontign respekte li. (1 Sam. 24:6) Mem si se Zeova ki ti swazir Sail kouma lerwa, David pa ti panse ki Zeova ti responsab bann move kitsoz ki Sail ti fer. Okontrer, David ti kont lor Zeova pou donn li lafors pou andir sa difikilte-la.​—Ps. 18:1, dapre not ki ena lao.

14. Parey kouma David, ki sitiasion lapot Pol ti fer fas?

¹⁴ Lapot Pol ti fer fas ar enn sitiasion ki ti inpe parey kouma sitiasion David. Bann lennmi lapot Pol ti boukou pli for ki li. Boukou sef relizie bien inportan ti deteste li. Souvan zot ti bat li ek zet li dan prizon. Parey kouma David, Pol so  bann kamarad ti tret li dan enn move fason. Mem sertin Kretien dan lasanble ti opoze ar li. (2 Kor. 12:11; Fil. 3:18, NW) Me Pol ti reisi sirmont sa difikilte-la. Kouma? Li ti kontign prese malgre lopozision. Li ti res fidel anver so bann frer ek ser mem kan zot ti desevwar li. Me pli inportan, li ti res fidel anver Zeova ziska so lamor. (2 Tim. 4:8) Li ti sirmont bann gran difikilte, pa parski li ti for, me parski li ti kont lor Zeova.

15. Ki nou lobzektif, ek kouma nou pou reisi fer sa?

¹⁵ Eski to bann kamarad lekol, koleg travay, ouswa to bann fami ki pa Temwin, zot maltret twa ouswa persekit twa? Eski enn kikenn dan lasanble finn deza tret twa dan enn move fason? Si wi, rapel lexanp David ek Pol. To kapav kontign gagn “viktwar lor lemal par seki bien.” (Rom. 12:21) Kan bann dimounn opoz zot ar nou, nou pena pou lager parey kouma David ti lager ar Goliat. Okontrer, nou lobzektif se pou gagn laviktwar lor lemal kan nou esey ed sa bann dimounn-la pou aprann konn Zeova ek so Parol, Labib. Nou pou reisi fer sa kan nou servi Labib pou reponn bann kestion ki bann dimounn poz nou, kan nou ena respe ek nou zanti anver bann dimounn ki tret nou dan enn move fason, ek kan nou fer bann bon aksion anver tou dimounn, mem nou bann lennmi.​—Mat. 5:44; 1 Pier 3:15-17.

16-17. Ki kitsoz Pol zame ti bliye?

¹⁶ Avan ki lapot Pol vinn Kretien, li pa ti ena okenn respe pou bann disip Zezi ek li ti persekit zot. (Zist. 7:58; 1 Tim. 1:13) Sa lepok-la, se Zezi limem ki ti anpes Pol persekit bann Kretien. Depi lesiel, Zezi ti koz avek Pol ek ti fer li vinn aveg. Pou li retrouv kler, Pol ti bizin rod led ar bann dimounn ki li ti persekite avan. Avek limilite, Pol ti aksepte ki enn disip ki apel Ananias ed li pou retrouv kler.​—Zist. 9:3-9, 17, 18.

¹⁷ Avek letan, Pol ti vinn enn kikenn ki bien respekte dan lasanble Kretien. Me  zame li pa ti bliye leson ki Zezi ti ansegn li lor semin ki al Damas. Pol ti kontign ena limilite, ek li ti kontign aksepte ki so bann frer ek ser ed li. Li ti rekonet ki zot ti enn “konsolasion” pou li.​—Kol. 4:10, 11.

18. Kifer nou kapav trouv sa difisil pou aksepte ki lezot ed nou?

¹⁸ Ki nou kapav aprann ar lexanp lapot Pol? Kan nou ti fek konn laverite, kitfwa nou ti aksepte ki lezot ed nou, parski nou ti kone ki nou ti ena boukou pou aprann. (1 Kor. 3:1, 2) Me eski sa finn sanze azordi? Si sa fer plizir lane ki nou pe servi Zeova ek ki nou ena boukou lexperyans, kitfwa nou kapav trouv sa difisil pou aksepte ki lezot ed nou, sirtou si se enn kikenn ki pa osi lontan ki nou dan laverite. Selman, Zeova souvan servi nou bann frer ek ser pou fortifie nou. (Rom. 1:11, 12) Alor, si nou anvi ki Zeova donn nou so pwisans, nou bizin aksepte ki nou bann frer ek ser ed nou.

19. Kifer Pol ti reisi fer boukou kitsoz extraordiner?

¹⁹ Apre ki li ti vinn Kretien, Pol ti reisi fer boukou kitsoz extraordiner. Kifer? Parski li ti konpran ki seki pli inportan se pa lafors fizik, ledikasion, lanvironnman kot nou sorti, ouswa bann dibien materyel, me se ena limilite ek kont lor Zeova. Alor, anou kontign imit lexanp Pol kan nou (1) kont lor Zeova, (2) aprann ar bann lexanp Biblik, ek (3) aksepte ki nou bann frer ek ser ed nou. Lerla, mem si nou santi nou feb, Zeova pou fer nou vinn for!