Mo’nn ne dan St. Paul, Minnesota, Letazini, an 1954. Mo fami ti viv ase bien ek nou ti bann Katolik. Mo ti deziem parmi sink zanfan. Mo ti al enn lekol Katolik ek mo ti enn enfant de chœur. Me mo pa ti konn boukou kitsoz lor Labib. Mem si mo ti kone ki Bondie inn kree tou kitsoz, mo ti nepli ena konfians dan legliz.

Pandan mo premie lane dan William Mitchell College of Law, bann Temwin Zeova ti tap mo laport. Mo ti pe lav mo linz, alor koup-la ti aksepte pou pase dan enn lot moman. Kan zot ti retourne, mo ti poz zot de kestion: “Kifer bann bon dimounn pa arive dan sa lemond-la?” ek “Ki nou bizin fer pou ki nou ere?” Mo ti aksepte liv La vérité qui conduit à la vie éternelle ek Les Saintes Écritures — Traduction du monde nouveau, ki ti ena enn kouvertir ver bien atiran. Mo ti aksepte enn letid Labib osi. Sa letid-la ti ouver mo lizie. Mo ti bien kontan pou aprann ki Rwayom Bondie se gouvernman ki pou diriz later. Mo ti trouve ki lemond ti ranpli ar  soufrans ek linzistis, ek sa ti fer mwa konpran ki bann gouvernman imin zame pa ti pou reisi amenn enn sanzman.

Dan koumansman lane 1982, mo ti vwe mo lavi ar Zeova, ek mo ti pran batem plitar sa lane-la dan lasanble « La vérité du Royaume » ki ti fer dan St. Paul Civic Center. Semenn apre, mo ti retourn St. Paul Civic Center pou mo konpoz mo lexame pou vinn avoka. Dan koumansman Oktob, mo ti aprann ki mo ti pas mo lexame, ki vedir ki mo ti kapav koumans travay kouma avoka.

Dan lasanble « La vérité du Royaume », mo ti zwenn Mike Richardson, enn frer ki ti pe servi dan Betel Brooklyn. Li ti explik mwa ki Biro Mondial ti met anplas enn servis ziridik. Lerla, mo ti rapel bann parol ki sa ofisie Etiopien la ti dir dan Zistwar Bann Apot 8:36, ek mo ti demann momem, ‘Ki kitsoz anpes mwa pou al servi dan Servis Ziridik?’ Alor, mo ti ranpli enn form pou rant Betel.

Mo bann paran pa ti kontan ki mo ti vinn enn Temwin Zeova. Mo papa ti demann mwa si travay ki mo fer dan Betel ti pou bon pou mo karyer. Mo ti explik li ki mo ti pou travay kouma volonter ek ki mo ti pou gagn 75 dolar par mwa. Sa lepok-la, bann Betelit ti gagn sa som larzan la sak mwa.

Mo ti pe deza travay lakour, alor mo pa ti kapav al travay Betel deswit. Mo ti koumans mo servis dan Betel Brooklyn, New York, an 1984. Mo ti travay dan Servis Ziridik. Lexperyans ki mo ti gagne kan mo ti pe travay lakour ti ed mwa pou seki ti pou arive apre.

An Novam 1983, bann Temwin Zeova ti aste teat Stanley ki trouv dan Jersey City, New Jersey. Bann frer ti fer bann demars pou gagn bann permi ki bizin pou fer renovasion plonbri ek elektrik dan batiman-la. Zot ti explik bann reprezantan minisipalite ki zot ti pou servi teat Stanley kouma enn lasal lasanble. Me ti ena enn problem. Dapre bann lalwa Jersey City, bann batiman relizie ti bizin trouv zis dan bann kartie rezidansiel. Teat Stanley ti trouv dan enn kartie komersial. Akoz sa, bann reprezantan minisipalite ti refiz donn nou bann permi ki nou ti pe demande. Lerla, bann frer ti fer apel devan lakour, me lakour ti rezet zot apel.

 Pandan mo premie semenn dan Betel, lorganizasion ti amenn sa zizman-la devan lakour federal. Mo ti fek fini fer enn staz de-z-an dan lakour federal St. Paul, Minnesota, alor mo ti kone kouma pou okip bann case koumsa. Enn parmi nou bann avoka ti explike ki ti deza servi teat Stanley pou fer bann gran levennman piblik, kouma lasal sinema ouswa pou fer bann konser rok. Alor, kifer sa ti ilegal pou servi li pou fer bann rasanbleman relizie? Lakour federal ti deside ki Jersey City pa ti respekte nou liberte relizie. Li ti donn lord minisipalite pou donn nou bann permi ki nou ti bizin. Mo ti koumans trouve kouma Zeova ti pe beni servis ziridik so lorganizasion pou akonpli so travay. Mo ti bien kontan ki mo ti kapav partisip ladan.

Bann frer ti koumans enn gro travay renovasion dan teat Stanley. Mwins ki enn an apre, le 8 Septam 1985, ti servi teat-la pou fer 79^em Seremoni Diplom Lekol Galaad. Mo ti bien kontan pou fer sa travay-la pou Zeova. Sa ti rann mwa pli ere ki seki mo ti fer antan ki avoka avan ki mo ti rant Betel. Sa lepok-la, mo pa ti ankor kone ki Zeova ti pou servi mwa ankor plis.

Dan bann lane 1980, bann dokter ek bann lopital souvan pa ti respekte volonte bann pasian Temwin ki adilt, ki ti rod bann tretman kot pa servi disan. Souvan, bann ziz ti panse ki bann madam ansint pa ti gagn drwa refiz enn transfizion disan. Zot ti panse ki si mama-la pa ti aksepte enn transfizion, li ti riske mor ek lerla zanfan-la ti pou grandi san so mama.

Le 29 Desam 1988, Ser Denise Nicoleau ti perdi boukou disan kan li ti akouse. So disan ti bien ba, ek so dokter ti demann li si li ti dakor pou fer enn transfizion. Ser Nicoleau ti refize. Landemin gramatin, lopital ti fer enn demann ar enn ziz pou gagn permision pou fer enn transfizion ar Ser Nicoleau. Ziz-la ti aksepte demann-la, san ki Ser Nicoleau ek so mari kone ek san mem donn zot lokazion pou dir seki zot panse lor la.

Vandredi le 30 Desam, bann dokter ti fer enn transfizion disan ar Ser Nicoleau mem si so mari ek bann lezot manb so fami, ki ti avek li, pa ti dakor. Dan lasware, lapolis ti aret plizir manb fami Ser Nicoleau ek osi enn-de ansien parski zot ti pretann ki bannla ti pe anpes bann dokter fer transfizion. Landemin, bann radio, televizion, ek lagazet lavil New York ek Long Island ti koz lor sa bann arestasion-la.

 Lindi gramatin, mo ti al get Milton Mollen, enn ziz lakour siprem. Mo ti explik li sitiasion Ser Nicoleau, ek osi kouma sa ziz-la ti donn permision pou fer transfizion ar Ser Nicoleau san ki li kone. Ziz Mollen ti dir mwa pas get li dan so biro plitar pou nou examine seki lalwa dir dan sa sitiasion-la. Mo responsab servis, Frer Philip Brumley, ti akonpagn mwa pou sa randevou-la ek Ziz Mollen ti osi invit avoka lopital-la. Pandan sa randevou-la ti ena boukou tansion. Ariv enn moman, Frer Brumley ti mem ekrir enn ti mo lor so karne pou dir mwa ki mo bizin kalme mwa. Sa ti enn bon konsey, parski mo ti pe koumans bien ankoler kan mo ti pe rod montre ki avoka lopital la ti ena tor.

Apepre enn er-d-tan apre, Ziz Mollen ti dir nou ki sa case-la ti pou pas an premie demin gramatin. Kan nou ti pe kit so biro, Ziz Mollen ti dir nou ki avoka lopital-la ti pou pas enn move lazourne demin. Li ti pe rod dir ki avoka-la ti pou gagn boukou difikilte pou montre ki lopital ti ena drwa pou fors Ser Nicoleau pou fer enn transfizion. Se koumadir Zeova ti pe rasir mwa ek dir mwa ki nou ti ena boukou sans pou gagn sa case-la. Sa ti extraordiner pou trouve kouma Zeova ti pe servi nou pou akonpli so volonte.

Sa swar-la, nou ti travay ziska bien tar pou prepar seki nou ti pou dir landemin. Lakour pa ti tro lwin ar Betel Brooklyn, alor laplipar parmi nou ti marse pou al laba. Apre ki kat ziz ti ekout nou, zot ti deside ki transfizion Ser Nicoleau ti ilegal. Desizion lakour siprem ti an faver Ser Nicoleau. Anplis, lakour siprem ti dir ki se kont bann drwa imin pou pran enn desizion pou enn pasian, san ki pasian-la gagn lokazion pou explike seki li panse lor la.

Inpe letan apre sa, lakour siprem New York ti dir ki Ser Nicoleau ti gagn drwa refiz transfizion. Apre sa case-la, mo’nn gagn lokazion defann bann Temwin Zeova dan bann lakour siprem lor trwa case konsernan transfizion disan. (Get lankadre “ Bann Viktwar dan Bann Lakour Siprem.”) Dan Betel, mo’nn gagn lokazion travay ansam avek  lezot avoka lor bann case kouma divors, lagard bann zanfan, ek lor bann lalwa konsernan bann terin ek bann batiman.

Premie fwa ki mo ti zwenn Dawn, ki plitar ti vinn mo madam, li ti divorse ek li ti ena trwa zanfan. Li ti pe travay pou swagn so fami ek anmemtan li ti pe fer pionie. Mem si so lavi ti bien difisil, li ti determine pou servi Zeova, ek sa ti bien inpresionn mwa. An 1992, li ti dan Lasanble Distrik « Porteurs de lumière » dan New York, ek se laba ki mo ti demann li si li ti pou kontan ki nou frekante. Enn an plitar, nou ti marye. Zeova ti fer mwa enn zoli kado kan Li’nn donn mwa enn madam ki bien spiritiel ek ki kontan riye-badine. Dawn enn vre benediksion pou mwa!​—Prov. 31:12.

Kan nou ti marye, bann zanfan ti ena 11, 13, ek 16 an. Mo ti anvi vinn enn bon papa pou zot, alor mo ti fer bann resers dan bann piblikasion ek mo ti fer zefor pou aplik zot. O-koumansman, nou ti gagn sertin difikilte, me avek letan mo kontan ki bann zanfan inn aksepte mwa kouma zot kamarad ki zot kapav fer konfians ek kouma zot papa ki kontan zot. Dawn ek mwa nou ti bien kontan kan bann kamarad nou bann zanfan ti vinn kot nou, parski ti ena enn bon lanbians dan lakaz.

An 2013, Dawn ek mwa nou ti al res dan Wisconsin pou nou kapav okip nou bann paran ki ti aze. Mo ti bien etone parski mo ti kapav kontign mo servis pou Betel. Mo ti kontign ed servis ziridik nou lorganizasion kouma volonter tanporer.

An Septam 2018, mo ti remarke ki enn kitsoz pa ti normal ar mo lagorz. Nou ti al get nou dokter, me li pa ti kone ki mo ti pe gagne. Plitar, enn lot dokter ti dir mwa al get enn nerolog. An Zanvie 2019, enn lot dokter ti dir mwa ki kitfwa mo ti ena enn maladi bien rar ki, avek letan, ti pou afekte mo lekor an-antie.

Trwa zour plitar, pandan ki mo ti pe fer patinaz, mo’nn tonbe ek mo’nn kas mo pwagne drwat. Mo’nn fer patinaz toutlong mo lavi, ek mo ti extra bon dan sa spor-la. Alor, mo ti konpran ki mo ti pe koumans perdi mo kapasite pou fer bann mouvman. Mo leta ti anpire bien vit. Mo ti pe gagn deplizanpli difikilte pou koze, pou marse, ek mem pou avale.

Mo bien kontan ki mo’nn kapav servi mo metie avoka pou ed lorganizasion Zeova. Mo kontan osi ki mo’nn kapav ekrir plizir lartik dan bann magazinn ek ki boukou dokter, avoka, ek ziz finn lir zot. Mo finn osi fer bann konferans partou dan lemond pou defann drwa bann Temwin Zeova konsernan bann tretman ek bann loperasion kot pa servi transfizion disan. Kanmem sa, mo ena mem santiman ki seki ekrivin Lik ti dir dan Lik 17:10: ‘Mo enn sinp serviter, mo nek finn fer seki ti bizin fer.’