1. Ki Zeova inn fer pou twa?

ESKI to rapel kouma to’nn vinn enn Temwin Zeova? Kitfwa to’nn tann koz lor “Bonn Nouvel” gras-a to bann paran, enn koleg travay, enn kamarad lekol, ouswa kan enn Temwin inn vinn tap to laport. (Mark 13:10) Apre sa, sirman enn kikenn inn pas boukou letan ek inn fer boukou zefor pou etidie Labib avek twa. Pandan to letid, to’nn aprann kontan Zeova ek to’nn aprann ki Li kontan twa. Zeova inn atir twa ver laverite, ek asterla to enn disip Zezi Kris ek to ena lespwar pou viv pou touletan. (Zan 6:44) Sirman to bien rekonesan anver Zeova, parski Li’nn servi enn kikenn pou ansegn twa laverite ek Li’nn aksepte twa kouma So serviter.

2. Ki nou pou examine dan sa lartik-la?

² Asterla ki nou konn laverite, nou ena privilez pou ed lezot pou mars ansam avek nou lor semin ki amenn ver lavi. Nou kapav trouv sa fasil pou pres avek bann dimounn, me kitfwa nou trouv sa difisil pou koumans ek kontign bann letid Labib. Si to dan sa sitiasion-la, bann sigzesion ki ena dan sa lartik-la kapav ed twa. Nou pou gete ki kitsoz bizin motiv nou pou fer bann disip. Ek si nou ezite pou fer bann letid Labib akoz sertin difikilte ki nou gagne, nou pou gete kouma nou kapav sirmont sa bann difikilte-la. Me pou koumanse, anou gete kifer nou bizin pres avek bann dimounn ek osi ansegn zot bonn nouvel.

3. Kifer nou prese?

³ Kan Zezi ti lor later, li ti donn so bann disip lord pou fer enn travay ki an de parti. Premierman, li ti dir zot pres bon nouvel lor Rwayom Bondie, ek li ti montre zot kouma pou fer sa. (Mat. 10:7; Lik 8:1) Par exanp, Zezi ti dir so bann disip seki zot ti bizin fer kan bann dimounn aksepte ouswa pa aksepte mesaz lor Rwayom Bondie. (Lik 9:2-5) Zezi ti explik so bann disip ki zot ti pou pres ar “tou bann nasion,” savedir ki zot ti pou pres ar boukou dimounn dan plizir landrwa. (Mat. 24:14; Zist. 1:8) Bann disip ti pou bizin kontign pres lor Rwayom Bondie ek dir bann dimounn seki sa Rwayom-la pou fer, mem si bann dimounn pa ti ekout zot.

4. Dapre Matie 28:18-20, anplis ki nou pres lor Rwayom Bondie, ki kitsoz ankor nou bizin fer?

⁴ Ki deziem kitsoz Zezi ti donn lord so bann disip pou fer? Zezi ti dir so bann disip ansegn bann dimounn pou obeir tou so bann komannman. Sertin dimounn kapav panse ki Zezi ti donn lord pou prese ek ansegne zis ar bann Kretien dan premie siek. Me eski sa li vre? Non. Zezi ti dir ki sa travay bien inportan la ti pou kontigne “ziska lafin-dimonn.” (Lir Matie 28:18-20.) Li posib ki Zezi ti donn sa lord-la kan li ti aparet ar plis ki 500 disip. (1 Kor. 15:6) Dan revelasion ki li ti donn Zan, Zezi ti dir ki li anvi ki tou so bann disip ed bann dimounn pou konn Zeova.​—Rev. 22:17.

5. Dan 1 Korintien 3:6-9, ki lexanp Pol servi pou montre lien ki ena ant prese ek ansegne?

⁵ Lapot Pol ti konpar travay predikasion ar travay enn planter dan enn karo. Li ti servi sa lexanp-la pou montre ki li pa ase ki nou zis plant bann lagrin. Li ti dir bann Kretien dan Korint: “Mo finn plant lagrin, Apolos finn aroze. . . . Zotmem plantasion Bondie.” (Lir 1 Korintien 3:6-9.) Nou bann travayer dan “plantasion Bondie.” Alor, fode pa nou zis plant bann lagrin, nou bizin osi aroz zot. Ek regilierman, nou bizin verifie si nou bann plant pe pous bien. (Zan 4:35) Me kanmem sa, nou kone ki se Bondie ki fer pouse, setadir se Bondie ki atir bann dimounn ver Li.

6. Kan nou ansegn bann dimounn, ki nou bizin ed zot pou fer?

⁶ Nou pe rod bann dimounn ki ena “enn bon kondision leker pou gagn lavi eternel.” (Zist. 13:48, NW) Pou ed sa bann dimounn-la pou vinn bann disip Zezi, nou bizin ed zot pou (1) konpran, (2) aksepte, ek (3) met an pratik seki zot pe aprann dan Labib. (Zan 17:3; Kol. 2:6, 7; 1 Tes. 2:13) Tou dimounn dan lasanble kapav ed bann etidian Labib. Kouma nou kapav fer sa? Nou fer sa kan nou montre zot ki nou kontan zot ek kan nou bien akeyir zot kan zot asiste bann renion. (Zan 13:35) Enn ansegnan kitfwa pou bizin pas boukou letan ek fer boukou zefor pou ed so etidian pou li rezet bann krwayans ek bann pratik ki “bien anrasine.”(2 Kor. 10:4, 5, NW) Sa kapav pran plizir mwa pou ed enn etidian pou li fer bann sanzman dan so lavi, pou ki li reisi pran batem. Me li vo lapenn ki etidian-la fer sa bann zefor-la!

7. Ki kitsoz bizin motiv nou pou prese ek ansegn bann dimounn?

⁷ Kifer nou prese ek ansegn bann dimounn? Premierman, parski nou kontan Zeova. Kan nou fer nou best pou obeir komannman ki Zezi inn done, setadir  pou prese ek ansegn bann dimounn, nou montre ki nou kontan Bondie. (1 Zan 5:3) Reflesi lor la: To prese parski to kontan Zeova. Eski sa komannman-la ti fasil pou obeir? Kitfwa non. Sirman to ti bien per kan to ti prese lakaz-lakaz pou premie fwa! Me to ti kone ki Zezi anvi ki to fer sa travay-la, ek to finn obeir sa komannman-la. Ek sirman, avek letan, sa ti vinn pli fasil pou to prese. Asterla, ki nou kapav dir lor bann letid Labib? Kitfwa to per pou fer bann letid Labib. Me si to demann Zeova pou ed twa pou sirmont to laper ek pou donn twa kouraz pou propoz enn letid Labib, Li pou donn lafors ek dezir pou to fer bann disip.

8. Dapre Mark 6:34, ki kitsoz ankor bizin motiv nou pou ansegn bann dimounn?

⁸ Deziemman, nou lamour pou bann dimounn motiv nou pou ansegn zot laverite. Enn zour, Zezi ek so bann disip ti bien fatige parski zot ti bien prese sa zour-la. Zot ti al rod enn plas pou zot repoze, me enn lafoul dimounn ti swiv zot. Zezi ti sagrin sa bann dimounn-la ek li ti koumans ansegn zot “boukou kiksoz.” (Lir Mark 6:34.) Mem si li ti extra fatige, Zezi ti fer zefor pou ansegn sa bann dimounn-la. Kifer li ti fer sa? Parski li ti kone seki sa bann dimounn-la ti resanti. Li ti anvi ed zot parski li ti trouve ki zot ti pe soufer ek ki zot ti bizin enn lespwar. Azordi, bann dimounn ena mem problem ek zot bizin enn lespwar, mem si zot paret ere dan zot lavi. Zot kouma bann mouton ki’nn perdi ek ki pena berze. Lapot Pol dekrir sa bann dimounn-la kouma bann dimounn ki pena Bondie ek ki pena lesperans. (Efe. 2:12) Zot lor semin ki “amenn ver destriksion”! (Mat. 7:13, NW) Kan nou reflesi kouma bann dimounn dan nou teritwar bizin konn Bondie, lamour ek konpasion pou motiv nou pou ed zot. Ek meyer fason ki nou kapav ed zot se kan nou etidie Labib avek zot.

9. Dapre Filipien 2:13, kouma Zeova kapav ed twa?

⁹ Kitfwa to ezite pou koumans enn letid Labib parski to kone ki sa pou pran boukou to letan. Si to dan sa sitiasion-la, dir Zeova seki to resanti. Demann Zeova pou ed twa pou devlop dezir pou al rod bann dimounn ek pou fer zot letid. (Lir Filipien 2:13, NW. *) Lapot Zan inn donn nou lasirans ki Bondie pou reponn bann lapriyer ki an-akor avek So volonte. (1 Zan 5:14, 15) Alor, to kapav sir ki Zeova pou ed twa pou ena dezir pou ansegn bann dimounn.

10-11. Ki kitsoz kapav fer nou ezite pou fer bann letid Labib?

¹⁰ Nou kone ki li bien inportan pou ansegn bann dimounn, me kitfwa nou trouv sa difisil pou fer, ek kitfwa nou anvi fer plis pou fer bann disip. Anou get sertin difikilte ki nou kapav gagne ek anou gete kouma nou kapav sirmont zot.

¹¹ Kitfwa nou pa reisi fer kantite ki nou anvi. Par exanp, sertin proklamater pa reisi fer kantite ki zot anvi pou ed bann dimounn, parski zot vie ouswa zot pena enn bon lasante. Eski to dan sa sitiasion-la? Si to dan sa sitiasion-la, ena enn leson ki nou’nn aprann ar pandemi COVID-19. Nou’nn aprann ki nou kapav servi nou telefonn ouswa bann lezot laparey elektronik pou fer bann letid Labib! Alor, to kapav koumans enn letid Labib depi kot  tomem, dan moman ki pli bon pou twa. Ek ena enn lot lavantaz osi. Sertin dimounn ti pou kontan gagn enn letid Labib, me kitfwa zot pa lib dan bann ler ki bann frer ek ser prese. Kitfwa zot lib boner gramatin ouswa tar aswar. Eski to kapav etidie Labib avek enn kikenn dan sa bann ler-la? Zezi ti ansegn Nikodem aswar, parski se sa ler-la ki Nikodem ti anvi ki Zezi ansegn li.​—Zan 3:1, 2.

12. Kifer nou kapav sir ki nou kapav vinn enn bon ansegnan?

¹² Kitfwa nou panse ki nou pena ase kapasite pou fer enn letid Labib. Kitfwa nou panse ki nou bizin ena plis konesans ouswa plis kapasite pou kapav koumans enn letid avek enn kikenn. Si to dan sa sitiasion-la, anou get trwa kitsoz ki kapav fer twa ena plis konfians an tomem. Premierman, Zeova kone ki to ena kapasite pou ansegn lezot. (2 Kor. 3:5) Deziemman, Zezi, ki ena “tou pouvwar dan lesiel ek lor later,” li kone ki to kapav ansegn lezot. (Mat. 28:18) Ek trwaziemman, to kapav kont lor lezot pou ed twa. Dan tou seki li ti fer, Zezi ti kont lor so Papa, ek twa osi to kapav fer parey. (Zan 8:28, NW; 12:49) Anplis, to kapav demann enn proklamater ouswa enn pionie ki ena lexperyans, ouswa to responsab group predikasion, pou ed twa pou fer enn letid Labib. To kapav vinn enn meyer ansegnan osi kan to akonpagn sa bann proklamater-la kan zot al fer letid.

13. Kifer nou bizin adapte nou pou ansegn dan diferan fason?

¹³ Kitfwa nou trouv sa difisil pou adapte ar bann nouvo metod ek bann nouvo zouti. Azordi, fason ki nou fer bann letid Labib inn sanze. Asterla, zouti prinsipal ki nou servi pou fer bann letid se liv Viv Ere pou Touletan!. Avek sa liv-la, fason ki nou prepar nou pou letid ek fason ki nou fer bann letid, nepli parey kouma avan. Nou lir pli tigit paragraf, ek letid vinn plis kouma enn konversasion avek nou etidian. Kan nou ansegne, nou servi pli boukou video ek bann zouti elektronik kouma JW Library^®. Si to pa kone kouma pou servi sa bann zouti-la, demann enn kikenn pou ed twa. Nou, bann imin, nou pa kontan sanz nou bann labitid. Nou kapav trouv sa difisil pou adapte ar bann nouvo metod. Me avek led Zeova ek led nou bann frer ek ser, nou pou kapav adapte pli fasilman. Lerla, nou pou gagn plis lazwa pou etidie avek bann dimounn. Konsernan sa nouvo metod pou ansegne la, enn pionie dir ki li pli “agreab pou etidian-la ek ansegnan-la toulede.”

14. Ki nou bizin rapel kan nou pres dan enn teritwar ki difisil, ek kouma 1 Korintien 3:6, 7 ankouraz nou?

¹⁴ Kitfwa nou res dan enn teritwar kot li difisil pou koumans bann letid Labib. Dan sertin teritwar, bann dimounn pa interese ouswa zot pa dakor ar nou mesaz. Ki kitsoz kapav ed nou pou res pozitif dan sa bann teritwar-la? Dan sa move lemond ki nou pe viv la, pa bliye ki sitiasion bann dimounn kapav sanze enn sel kout. Bann dimounn ki pa ti interese avan, avek letan kitfwa zot realize ki zot bizin Bondie dan zot lavi. (Mat. 5:3, NW) Sertin dimounn ki ti pe touletan refiz nou bann piblikasion, avek letan zot finn aksepte enn letid Labib. Pa bliye osi ki se Zeova ki ‘Met larekolt.’ (Mat. 9:38) Li anvi ki nou kontign plante ek aroze, me se Li ki ena responsabilite pou fer pouse. (1 Kor. 3:6, 7) Si to pena enn letid Labib pou linstan, pa bliye ki Zeova rekonpans twa pou to bann zefor,  pa pou to bann rezilta. Sa bien ankourazan, pa vre! *

15. Ki Zeova resanti kan enn kikenn aksepte enn letid Labib ek li met an pratik seki li pe aprann?

¹⁵ Zeova bien kontan kan enn kikenn aksepte bann verite ki ena dan Labib ek ki li partaz sa ar lezot. (Prov. 23:15, 16) Nou sir ki Zeova bien kontan kan Li trouv seki pe arive azordi! Malgre pandemi COVID-19, pandan lane servis 2020, nou finn fer 7,705,765 letid Labib, ek nou finn ed 241,994 dimounn pou vwe zot lavi ar Zeova ek pran batem. Ek sa bann nouvo disip-la, zot osi zot pou fer bann letid Labib ek zot pou fer bann lezot disip. (Lik 6:40) Nou sir ki Zeova bien kontan kan nou ansegn lezot pou vinn bann disip!

16. Ki lobzektif nou kapav fixe nou?

¹⁶ Sa demann boukou zefor pou fer bann disip. Me avek led Zeova, nou kapav ansegn bann nouvo ek ed zot pou kontan nou Papa ki dan lesiel. Eski nou kapav fixe lobzektif pou fer omwin enn letid Labib? Kitfwa nou pou etone si nou demann sak dimounn ki nou zwenn si li ti pou kontan etidie Labib! Nou sir ki Zeova pou beni nou bann zefor!

17. Ki nou pou resanti si nou reisi fer enn letid Labib?

¹⁷ Se enn gran privilez ki nou ena pou prese ek ansegn bann dimounn laverite! Sa travay-la rann nou bien zwaye! Lapot Pol ti gagn lazwa pou ed boukou dimounn dan Tesalonik pou vinn bann disip Zezi. Li ti dir: “An realite ki lesperans, ouswa ki lazwa, ouswa ki kouronn nou ena ki pou donn nou laglwar devan nou Segner Zezi pandan so prezans? Eski se pa zotmem? Wi zotmem nou laglwar ek nou lazwa.” (1 Tes. 2:19, 20, NW; Zist. 17:1-4) Azordi, boukou frer ek ser ena mem santiman. Stéphanie ek so misie, enn koup Temwin Zeova, inn ed boukou dimounn pou pran batem. Stéphanie dir: “Pena pli gran lazwa ki ed bann dimounn pou vwe zot lavi ar Zeova ek pran batem.”