Zeova anvi ki de dimounn ki marye, zot ere ek zot ena enn zoli lavi maryaz ki dire pou touletan. (Mat. 19:4-6) Si to anvi marye, kouma to kapav gagn enn bon konzwin? Zeova Li nou Kreater, alor Li kone seki nou bizin fer pou ki nou gagn enn zoli lavi maryaz. Si nou aplik bann prinsip ki Li donn nou, nou pou vremem ere. Anou get sertin parmi sa bann prinsip-la.

Premierman, nou bizin konpran enn kitsoz bien inportan lor noumem. Labib dir: “Leker pli tret ki ninport ki lezot kitsoz ek li bien move.” (Zer. 17:9) Kan de dimounn ki anvi marye, zot zwenn ek zot koumans frekante, zot kapav devlop bann santiman bien for pou zot kamarad. Kan sa arive, sa kapav difisil pou zot pran bann bon desizion. Kan de dimounn desid pou marye, sirtou akoz bann santiman bien for ki zot ena pou zot kamarad, avek letan zot kapav gagn bann desepsion. (Prov. 28:26) Akoz sa, kan de dimounn koumans frekante, li pli bon ki zot pa koz lor bann santiman profon ki zot ena pou zot kamarad ek zot pa fer okenn promes, avan ki zot aprann konn zot kamarad pli bien.

Proverb 22:3 dir: “Enn dimounn ki ena bon zizman kasiet kan li trouv enn danze, me enn kikenn ki pena lexperyans kontign ale, ek li pey bann konsekans.” Ki danze ena kan nou servi bann sit Internet pou rod enn kikenn pou marye? Malerezman, sertin dimounn inn koumans frekante online avek bann dimounn ki zot pa ti kone, ek plitar zot inn realize ki sa bann dimounn-la ti pe zwe avek zot santiman. Ena osi bann dimounn malonet ki’nn kree bann fos kont lor Internet pou anbet bann dimounn ek kokin zot kas. Ek parfwa, sa bann dimounn malonet la fer zot pas pou bann Temwin Zeova.

Anou get enn lot danze ankor. Sertin sit Internet servi bann kalkil matematik pou gete si de dimounn al bien ansam. Me selman, pena okenn prev ki sa metod-la marse. Nou pou bien bet si nou panse ki enn program computer kapav pran enn desizion inportan kouma rod enn kikenn pou marye. Enn program computer zame pa pou kapav ranplas bann prinsip Labib.​—Prov. 1:7; 3:5-7.

Proverb 14:15 dir: “Enn dimounn naif krwar tou seki li tande, me enn dimounn ki  ena enn bon zizman, reflesi bien lor sak pa ki li fer.” Avan ki to deside si enn kikenn pou enn bon konzwin, to bizin aprann konn dimounn-la bien. Me li kapav bien difisil pou konn enn dimounn bien si to zis zwenn li lor Internet. Mem si to konn dimounn-la so profile ek ki to chat souvan avek li, eski sa vedir ki to vremem konn li? Sertin dimounn ti panse ki zot inn trouv zot lamwatie, me zot inn gagn sok kan zot inn zwenn sa dimounn-la an personn.

Enn ekrivin Psom ti dir: “Mo pa frekant bann dimounn ki malonet, ek mo al lwin ar bann dimounn ki kasiet seki zot ete.” (Ps. 26:4) Sertin dimounn panse ki li normal ki zot koz manti lor zot profile, ek zot fer sa pou atir bann dimounn. Kitfwa zot kasiet zot bann defo. Ouswa, kan zot avoy bann mesaz, nou pa trouve ki defo zot ena. Ena sertin ki dir ki zot bann Temwin Zeova, me eski vremem zot bann Kretien batize? Eski zot for lor plan spiritiel? Eski zot ena enn bon relasion avek Zeova? Eski bann frer ek ser dan lasanble respekte zot? Ouswa eski zot bann move lexanp ek bann “move frekantasion”? (1 Kor. 15:33, NW; 2 Tim. 2:20, 21, NW) Eski dapre Labib, zot lib pou marye? To bizin konn repons pou sa bann kestion-la. Me li kapav difisil pou to gagn repons pou sa bann kestion-la si to pa koz avek bann Temwin ki konn sa dimounn-la bien. (Prov. 15:22) Ek biensir, enn fidel serviter Zeova pa pou mem pans pou marye avek enn “non-krwayan.”​—2 Kor. 6:14; 1 Kor. 7:39.

Kouma nou’nn trouve, li danzere pou servi bann sit Internet pou rod enn kikenn pou marye. Me ena lezot fason ki nou kapav rod enn kikenn pou marye ek aprann konn sa dimounn-la bien. Kotsa to kapav trouv enn kikenn pou marye? Pandan bann rasanbleman, kouma bann renion ek bann lasanble, bann Temwin Zeova kapav zwenn ek aprann konn zot kamarad.

Me kan nou pa kapav zwenn ansam, kouma par exanp akoz pandemi COVID-19, nou servi bann aplikasion elektronik pou asiste bann renion. Pandan sa bann renion-la, to kapav aprann konn bann lezot Temwin ki selibater. Lerla, to pou kapav trouve kouma zot partisipe dan renion, ek to pou kapav ekout bann repons ki zot done. (1 Tim. 6:11, 12) Apre renion, to kapav koz avek enn selibater dan enn breakout room. Gras-a sa bann rasanbleman-la, to kapav kone kouma sa dimounn-la li azir anver lezot. Lerla, to pou kapav trouv bann kalite ki li ena. (1 Pier 3:4) Avek letan, kan zot pou konn zot kamarad pli bien, to pou kone si zot ena mem lobzektif, ek si zot pou adapte ar zot kamarad.

Kan enn selibater servi bann prinsip Labib pou rod enn konzwin, li pli sir ki li pou gagn enn zoli lavi maryaz, parey kouma sa proverb-la dir: “Enn dimounn ki gagn enn bon madam [ouswa enn bon misie], li’nn gagn enn trezor, ek li gagn faver Zeova.”​—Prov. 18:22.