1. Ki Zeova ti fer apre ki Adan ek Ev ti fer pese? (Zenez 3:15)

 INPE apre ki Adan ek Ev ti fer pese, Zeova ti anons enn profesi extraordiner ki ti pou donn lespwar bann desandan Adan ek Ev. Nou trouv sa profesi-la dan Zenez 3:15.​—Lir.

2. Kifer sa profesi-la extraordiner?

² Nou trouv sa profesi-la dan premie liv Labib. Selman, dan enn sertenn fason, tou bann lezot profesi Labib ena enn lien ar sa profesi-la. Parey kouma tron enn pie tini tou bann brans ansam, profesi Zenez 3:15 rasanble tou bann liv Labib ansam dan enn sel mesaz: Enn kikenn pou vini pou liber nou ek pou detrir Lediab ek tou bann ki swiv li. * Sa pou vremem extraordiner pou tou bann ki kontan Zeova!

3. Ki nou pou examine dan sa lartik-la?

³ Dan sa lartik-la, nou pou reponn sa bann kestion-la konsernan profesi Zenez 3:15: Kisannla bann personaz sa profesi-la? Kouma sa profesi-la pe realize? Ek kouma nou gagn bann bienfe gras-a sa profesi-la?

4. Kisannla “serpan” ete, ek kouma nou konn sa?

⁴ Parmi bann personaz profesi Zenez 3:14, 15, ena enn “serpan,” “desandans” sa serpan-la, enn “fam,” ek  “desandans” sa fam-la. Labib ed nou pou kone kisannla zot reprezante. * Anou koumans par serpan-la. Enn vre serpan pa ti pou kapav konpran seki Zeova ti dir dan zardin Edenn. Alor, sa serpan-la ti bizin enn kreatir intelizan. Kisannla li ete? Revelasion 12:9 explike ki sa ‘vie serpan-la’ se Satan Lediab. Me kisannla desandans sa serpan-la?

5. Kisannla desandans sa serpan-la?

⁵ Parfwa, kan Labib servi mo “desandans,” se pou dekrir bann dimounn ki imit enn kikenn telman bien, ki kapav konsider zot kouma bann zanfan sa dimounn-la. Alor, desandans sa serpan-la reprezant bann anz ek bann imin ki, parey kouma Satan, pe opoz zot ar Zeova ek So pep. Parmi zot, ena bann anz ki ti rebel kont Zeova dan lepok Noe ek osi bann imin ki azir parey kouma zot papa, Satan Lediab.​—Zen. 6:1, 2; Zan 8:44; 1 Zan 5:19; Zid 6.

6. Kifer sa fam-la pa ti kapav Ev?

⁶ Asterla, anou gete kisannla sa fam-la reprezante. Sa fam-la pa kapav Ev. Kifer? Anou get enn rezon. Profesi Zenez 3:15 dir ki desandans sa fam-la ti pou “kraz” latet sa serpan-la. Kouma nou fek trouve, sa serpan-la se Satan, ek okenn imin ki inparfe, bann desandan Ev, pa ti pou ena kapasite pou kraz latet sa serpan-la. Alor, kouma eski ti pou detrir Satan?

7. Dapre Revelasion 12:1, 2, 5 ek 10, kisannla sa fam ki mansione dan Zenez 3:15 la?

⁷ Dernie liv Labib explik nou kisannla sa fam-la ete. (Lir Revelasion 12:1,  2, 5, 10.) Sa fam-la pa enn kikenn ki lor later! Li ena lalinn anba so lipie ek enn kouronn douz zetwal lor so latet. Li’nn gagn enn zanfan ki spesial: Rwayom Bondie. Rwayom-la dan lesiel, alor fam-la osi bizin dan lesiel. Fam-la reprezant parti lorganizasion Zeova ki dan lesiel, ek dan sa lorganizasion-la ena bann anz ki fidel.​—Gal. 4:26.

8. Kisannla personaz pli inportan dan desandans fam-la, ek kan eski li’nn gagn sa pozision-la? (Zenez 22:15-18)

⁸ Labib ed nou pou kone kisannla personaz pli inportan dan desandans sa fam-la. Labib ti predir ki li ti pou enn desandan Abraam. (Lir Zenez 22:15-18.) Zezi ti enn desandan Abraam, ek li ti akonpli sa profesi-la. (Lik 3:23, 34) Me sa desandan-la ti bizin pli pwisan ki enn imin, parski li ti pou bizin detrir Satan Lediab. Kan Zezi ti ena 30 an, lespri sin ti vinn lor li, ek lerla, li ti vinn personaz pli inportan dan desandans sa fam-la. (Gal. 3:16) Apre lamor ek rezireksion Zezi, Zeova ti “kouronn li avek boukou laglwar ek loner” ek ti donn “tou pouvwar dan lesiel ek lor later.” Zezi ti mem gagn pouvwar “pou detrir travay diab.”​—Ebre 2:7; Mat. 28:18; 1 Zan 3:8.

9-10. (a) Kisannla ankor form parti dan desandans sa fam-la, ek kan eski zot gagn sa pozision-la? (b) Ki nou pou examine asterla?

⁹ Apart Zezi, ti pou ena lezot dimounn ki ti pou form parti dan desandans sa fam-la. Lapot Pol ti koz lor zot kan li ti dir bann Kretien Zwif ek Non-Zwif ki ti ena lesperans pou al dan lesiel: “Si zot pou Kris, alor zot enn desandan Abraam, zot bann eritie dapre promes Bondie.” (Gal. 3:28, 29) Kan Zeova swazir enn kikenn pou al dan lesiel, sa dimounn-la form parti desandans sa fam-la. Alor, desandans sa fam-la se Zezi ek bann 144,000 ki pou regn ansam avek li. (Rev. 14:1) Zot tou fer zefor pou pans ek azir parey kouma zot Papa, Zeova.

¹⁰ Asterla ki nou’nn konn bann personaz profesi Zenez 3:15, anou gete seki Zeova inn fini fer pou realiz sa profesi-la, ek anou gete kouma nou gagn bann bienfe gras-a sa profesi-la.

11. Kouma desandans fam-la ti blese “dan so talon”?

¹¹ Dapre profesi Zenez 3:15, serpan-la ti pou bles desandans fam-la “dan so talon.” Sa ti realize kan Satan ti servi bann Zwif ek bann Romin pou touy Zezi, Garson Bondie. (Lik 23:13, 20-24, NW) Kan enn kikenn blese dan so talon, li pa kapav marse pandan enn sertenn letan. Dan mem fason, kan Zezi ti mor, pandan enn sertenn letan li pa ti kapav fer nanye.​—Mat. 16:21.

12. Kan ek kouma desandans fam-la pou kraz latet serpan-la?

¹² Pou ki profesi Zenez 3:15 realize, Zezi ti pou bizin resisite. Kifer? Parski dapre sa profesi-la, desandans fam-la ti pou bizin kraz latet serpan-la. Savedir ki Zezi so talon ti pou bizin geri. Ek samem ti arive! Trwa zour apre so lamor, Zezi ti resisite kouma enn kreatir spiritiel ki imortel. Dan moman ki Bondie inn fixe, Zezi pou  detrir Satan. (Ebre 2:14) Zezi ek bann 144,000 pou detrir tou bann lennmi Bondie, setadir desandans serpan-la.​—Rev. 17:14; 20:4, 10. *

13. Ki bienfe nou pe gagne gras-a sa profesi-la?

¹³ Si to enn serviter Zeova, to pe gagn bann bienfe gras-a sa profesi-la. Kan Zezi inn vinn lor later, li’nn imit bann kalite ki so Papa ena. (Zan 14:9) Alor, gras-a Zezi, nou’nn aprann konn Zeova ek nou’nn kontan Li. Nou pe gagn bann bienfe osi gras-a bann lansegnman Zezi ek ar fason ki li pe diriz lasanble azordi. Li’nn ansegn nou kouma nou kapav viv dan enn fason ki pou fer Zeova plezir. Ek nou’nn osi gagn bann bienfe kan Zezi so talon inn blese, setadir gras-a so lamor. Kan Zezi ti resisite, Zeova ti aksepte so sakrifis ki “lav tou nou pese.”​—1 Zan 1:7.

14. Kouma nou kone ki profesi ki Zeova ti anonse dan Zenez 3:15 ti pou pran inpe letan avan ki li realize? Explike.

¹⁴ Profesi ki Zeova ti anonse dan Zenez 3:15 ti pou pran inpe letan avan ki li realize. Sa ti pou pran inpe letan avan ki (1) fam-la gagn enn desandans, (2) Satan inflians bann dimounn, ek (3) laenn devlope ant desandans fam-la ek desandans serpan-la. Kan nou konpran sa profesi-la, sa ed nou pou konpran ki lemond, ki kontrole par Satan, pou ena laenn pou bann serviter Zeova. Anplis, Zezi ti fini dir so bann disip ki sa ti pou arive. (Mark 13:13; Zan 17:14) Sirman nou pou dakor ki nou pe trouv sa realize, sirtou depi sa 100 dernie lane-la!

15. Kifer bann dimounn ena deplizanpli laenn pou nou, ek kifer nou pena okenn rezon pou per Satan?

¹⁵ Inpe apre ki Zezi ti vinn Lerwa dan Rwayom Bondie an 1914, Satan ti gagn pouse depi lesiel. Azordi, li lor later, ek li pe atann so destriksion. (Rev. 12:9, 12) Selman, li pa pe res nanye a-fer. Satan bien ankoler ek li pe atak bann serviter Zeova. (Rev. 12:13, 17) Se pou sa rezon-la ki bann dimounn ena deplizanpli laenn pou bann serviter Zeova. Selman, nou pena okenn rezon pou per Satan ek bann dimounn ki opoz ar nou. Okontrer, nou ena mem lasirans ki lapot Pol, ki ti dir: “Si Bondie avek nou, ki sannla kapav kont nou?” (Rom. 8:31) Nou kapav ena full konfians an Zeova, parski kouma nou’nn trouve, enn bon parti profesi Zenez 3:15 inn fini realize.

16-18. Ki bienfe Curtis, Ursula, ek Jessica inn gagne kan zot inn konpran Zenez 3:15?

¹⁶ Promes Zeova ki trouv dan Zenez 3:15 kapav ed nou pou andir ninport ki difikilte. Curtis, enn misioner ki res Gwam, dir: “Parfwa, mo’nn gagn bann difikilte ek bann dekourazman ki’nn teste mo fidelite anver Zeova. Me kan mo’nn medit lor profesi Zenez 3:15, sa finn ed mwa pou kontign fer Zeova konfians.” Curtis pe atann avek inpasians zour kot Zeova pou tir tou nou bann difikilte!

¹⁷ Ursula, enn ser ki res Bavier, dir ki profesi Zenez 3:15 inn ed li pou konpran ki Labib inspire par Bondie. Kan li  ti trouve kouma tou lezot profesi ena enn lien ar sa profesi-la, sa ti vremem inpresionn li. Li dir: “Kan mo ti aprann ki Zeova deswit ti pran bann dispozision pou donn nou enn lespwar, mo ti kontan Li ankor plis.”

¹⁸ Jessica, enn ser ki res Mikronezi, dir: “Mo ankor rapel seki mo ti resanti kan mo ti realize ki mo ti dekouver laverite! Profesi Zenez 3:15 pe realize, ek sa inn ed mwa pou konpran ki bann difikilte ki nou pe gagne azordi, se pa sa ki Zeova ti anvi pou nou. Sa profesi-la inn osi ed mwa pou konpran ki, kan mo servi Zeova, mo pou ena enn pli bon lavi asterla ek osi dan lavenir.”

19. Kifer nou kapav sir ki dernie parti profesi Zenez 3:15 pou realize?

¹⁹ Dan sa lartik-la, nou’nn trouve ki profesi Zenez 3:15 pe realize. Nou kone kisannla desandans fam-la ek kisannla desandans serpan-la. Zezi, personaz pli inportan dan desandans fam-la, li nepli blese dan so talon. Azordi, li enn Lerwa ki bien pwisan ek ki imortel. Anplis, Zeova pre pou fini swazir tou bann ki pou regn ansam avek so Garson dan lesiel. Parski tousala finn realize dan sa profesi-la, nou kapav sir ki dernie parti profesi-la osi pou realize. Biento, desandans fam-la pou kraz latet serpan-la. Bann serviter Zeova pou bien zwaye kan pou detrir Satan! Me ziska ki sa zour-la arive, fode pa nou bes lebra. Anou kontign fer Zeova konfians. Biento, gras-a desandans sa fam-la, “tou bann nasion lor later” pou gagn boukou benediksion.​—Zen. 22:18.