1. Kouma nou bizin konsider lapriyer?

 KREATER lesiel ek later inn donn nou enn kado ki ena boukou valer: Lapriyer. Reflesi lor la: Nou kapav devid nou leker ar Zeova ninport kan ek dan ninport ki lang, ek nou pa bizin pran enn randevou pou fer sa. Ki nou dan lopital ouswa dan prizon, nou kapav priye nou Papa ek nou sir ki Li pou ekout nou. Nou vremem rekonesan pou sa kado ki Li’nn donn nou la.

2. Kouma Lerwa David ti montre ki li ti konsider lapriyer kouma enn gran privilez?

² Lerwa David ti konsider lapriyer kouma enn gran privilez. Dan enn sante li ti dir Zeova: “Ki mo lapriyer li prepare parey kouma lansan devan twa.” (Ps. 141:1, 2) Dan lepok David, lansan ti enn kitsoz ki ti sakre. Bann pret ti servi sa dan vre ladorasion ek sa lansan-la ti prepare avek boukou swin. (Ex. 30:34, 35) Kan David ti konpar so lapriyer ar lansan, li ti rod dir ki li ti anvi reflesi bien lor seki li ti pou dir Zeova. Nou osi, nou anvi fer parey kouma David, parski nou anvi ki nou bann lapriyer fer plezir Zeova.

3. Kouma nou bizin priye Zeova, ek kifer?

³ Kan nou priye Zeova, nou bizin fer sa avek boukou respe. Mazinn bann vizion extraordiner ki Izai, Ezekiel, Daniel ek Zan ti gagne. Sa bann vizion-la ti bien diferan,  me zot ti ena enn kitsoz an komin. Zot tou ti dekrir Zeova kouma enn Lerwa ki extraordiner. Izai “ti trouv Zeova pe asiz lor enn tronn bien ot.” (Iza. 6:1-3) Ezekiel ti trouv Zeova pe asiz lor enn kales dan lesiel ek o-tour sa kales-la ti ena “enn kitsoz ki ti pe briye . . . parey kouma enn larkansiel.” (Eze. 1:26-28) Daniel ti trouv “Ansien Bann Zour” lor So tronn. Li ti ena enn linz blan lor Li, ek dife ti pe sorti depi So tronn. (Dan. 7:9, 10) Zan ti trouv Zeova pe asiz lor enn tronn, ek o-tour sa tronn-la, ti ena enn kitsoz parey kouma enn zoli larkansiel kouler ver-emrod. (Rev. 4:2-4) Kan nou reflesi lor laglwar extraordiner ki Zeova ena, sa bizin rapel nou ki se enn gran privilez pou priye Li ek ki nou bizin fer sa avek respe. Me pou ki kitsoz nou bizin priye?

4. Ki nou aprann lor lapriyer ar seki Zezi ti dir dan Matie 6:9, 10?

⁴ Lir Matie 6:9, 10. Dan so Sermon lor Montagn, Zezi ti ansegn so bann disip kouma pou priye dan enn fason ki fer Bondie plezir. Apre ki li ti dir “gete kouma zot bizin priye,” Zezi ti koz lor bann kitsoz bien inportan ki ena enn lien avek proze Zeova. Li ti priye pou ki nom Bondie sanktifie, ek pou ki Rwayom Bondie vini. Se sa Rwayom-la ki pou detrir bann lennmi Bondie. Li ti koz osi lor bann bon kitsoz ki Bondie pou fer pou later ek pou bann dimounn dan lavenir. Kan nou koz lor sa bann kitsoz-la dan nou bann lapriyer, nou montre ki proze Bondie bien inportan pou nou.

5. Eski nou kapav priye pou bann kitsoz personel?

⁵ Apre sa, dan so lapriyer, Zezi ti koz lor bann kitsoz personel ki nou kapav demann Zeova. Nou kapav demann Zeova pou donn nou nou manze pou sak zour, pou pardonn nou bann pese, pou pa fer nou tom dan tantasion, ek pou protez nou kont Satan. (Mat. 6:11-13) Kan nou demann Zeova sa bann kitsoz-la, nou montre Li ki nou bizin so led ek ki nou anvi fer Li plezir.

6. Eski nou bizin priye zis pou bann kitsoz ki Zezi ti dir dan so lapriyer? Explike.

 ⁶ Zezi pa ti anvi ki so bann disip repet so lapriyer mo pou mo. Dan bann lezot lapriyer ki li ti fer, Zezi ti koz lor bann lezot kitsoz ki ti inportan pou li. (Mat. 26:39, 42; Zan 17:1-26) Dan mem fason, nou kapav priye pou ninport ki kitsoz ki inportan pou nou. Kan nou ena enn desizion pou pran, nou kapav priye pou gagn sazes ek lintelizans. (Ps. 119:33, 34) Kan nou bizin asim enn responsabilite ki difisil, nou kapav priye Zeova pou ki Li ed nou pou konpran kouma nou bizin fer travay-la. (Prov. 2:6) Bann paran kapav priye pou zot zanfan, ek bann zanfan kapav priye pou zot paran. Nou bizin osi priye pou bann dimounn ar ki nou prese ek pou nou bann etidian Labib. Biensir, fode pa nou priye Zeova zis pou bann kitsoz ki nou bizin.

7. Kifer nou bizin donn Zeova laglwar dan nou lapriyer?

⁷ Nou bizin osi donn Zeova laglwar dan nou bann lapriyer. Personn pa merit plis laglwar ki nou Bondie Zeova. Li “ranpli ar bonte ek pardon.” Konsernan Zeova, Labib dir osi: “To enn Bondie konpatisan e bienveyan, to ena gran pasians, to ranpli ar lamour infini ek fidelite.” (Ps. 86:5, 15) Wi, nou ena bann bon rezon pou donn Zeova laglwar pou bann zoli kalite ki Li ena ek pou tou seki Li’nn fer pou nou.

8. Pou ki kitsoz nou kapav remersie Zeova? (Psom 104:12-15, 24)

⁸ Anplis ki nou donn Zeova laglwar, nou bizin osi remersie Li pou bann zoli kitsoz ki Li’nn fer. Par exanp, nou kapav remersie Li pou bann zoli fler tou sort kouler, bann diferan kalite manze, ek bann bon kamarad ki nou ena. Nou Papa ki bien kontan nou finn donn nou tousala ek lezot kitsoz ankor, parski Li anvi ki nou ere. (Lir Psom 104:12-15, 24.) Me pli inportan, nou bizin remersie Zeova pou bann nouritir spiritiel ki Li donn nou ek pou zoli lesperans ki nou ena pou lavenir.

9. Ki kitsoz kapav ed nou pou nou pa bliye pou remersie Zeova? (1 Tesalonisien 5:17, 18)

 ⁹ Selman, bien vit nou kapav bliye remersie Zeova pou tou seki Li fer pou nou. Ki kitsoz kapav ed twa pou to pa bliye remersie Zeova? Par exanp, to kapav fer enn lalis bann diferan kitsoz pou ki to’nn priye, ek inpe letan apre, to kapav reget sa lalis-la ek gete kouma Zeova finn reponn to bann lapriyer. Apre sa, to kapav priye Zeova pou remersie Li parski Li’nn ed twa. (Lir 1 Tesalonisien 5:17, 18.) Nou bien kontan ek nou ere kan lezot montre zot rekonesan anver nou, pa vre? Dan mem fason, kan nou remersie Zeova parski Li’nn reponn nou bann lapriyer, sa fer so leker kontan. (Kol. 3:15) Anou get enn lot rezon inportan pou kifer nou bizin remersie Bondie?

10. Dapre 1 Pier 2:21, kifer nou bizin remersie Zeova ki Li’nn avoy Zezi lor later?

¹⁰ Lir 1 Pier 2:21. Nou bizin remersie Zeova parski Li’nn avoy so Garson lor later pou ansegn nou. Kan nou etidie lor lavi Zezi, nou aprann boukou kitsoz lor Zeova ek lor kouma nou kapav fer Li plezir. Si nou ena lafwa dan sakrifis Zezi, nou pou anpe avek Bondie ek nou pou ena enn bon lamitie avek Li.​—Rom. 5:1.

11. Kifer nou priye Zeova o-nom Zezi?

¹¹ Nou rekonesan anver Zeova parski nou kapav priye Li o-nom Zezi. Kan nou demann Zeova enn kitsoz, Li servi Zezi pou donn nou sa. Kan nou priye Zeova o-nom Zezi, Li ekout nou lapriyer ek Li reponn nou lapriyer. Zezi ti dir: “Tou seki zot demande lor mo nom, mo pou fer li pouki zot trouv laglwar mo Papa dan seki mo fer.”​—Zan 14:13, 14.

12. Sit enn lot rezon pou kifer nou kapav remersie Zeova ki Li’nn donn nou so Garson.

¹² Gras-a sakrifis Zezi, Zeova kapav pardonn nou bann pese. Labib dekrir Zezi kouma nou “gran pret ki pe asiz lor kote drwat tronn samazeste Bondie dan lesiel.” (Ebre 8:1) Zezi li nou “avoka kot Bondie Papa.” (1 Zan 2:1) Nou bien rekonesan ki Zeova inn donn nou enn Gran Pret ki konpran nou bann febles ek ki “intersed pou nou”! (Rom. 8:34; Ebre 4:15) Akoz nou inparfe, nou pa kapav priye Zeova san pas par Zezi. Alor, sirman nou pou dakor ki, zame nou pa pou kapav remersie Zeova ase pou sa zoli kado ki Li’nn donn nou la: lavi so Garson ki Li bien kontan!

13. Avan so lamor, kouma Zezi ti montre ki li ti kontan so bann disip?

¹³ Avan so lamor, Zezi ti fer enn long lapriyer pou so bann disip, ek li ti demann so Papa pou “protez zot kont lemal.” (Zan 17:15) Zezi ti vremem kontan so bann disip! Mem si li ti kone ki li ti pou bien soufer biento, Zezi ti ankor pe gagn traka so bann zapot.

14. Kouma nou montre ki nou kontan nou bann frer ek ser?

¹⁴ Parey kouma Zezi, nou pa pans zis noumem. Okontrer, nou priye regilierman pou nou bann frer ek ser. Kan nou fer sa, nou obeir lord ki Zezi inn donn nou pou kontan sakenn nou kamarad, ek nou montre Zeova ki kantite nou kontan nou bann konpagnon Kretien. (Zan 13:34) Nou ed nou bann frer ek ser kan nou priye pou zot, parski Labib dir ki “lapriyer enn dimoun ki zis, li ena enn pwisans e li efikas.”​—Zak 5:16.

15. Kifer nou bizin priye pou nou bann konpagnon Kretien?

 ¹⁵ Nou bann konpagnon Kretien bizin fer fas ar boukou difikilte. Akoz sa, zot bizin nou lapriyer. Nou kapav demann Zeova pou donn zot lafors pou andir bann maladi, bann katastrof, lager, persekision, ek bann lezot difikilte. Nou kapav osi priye pou nou bann frer ek ser ki pe fer bann gro zefor pou ed bann ki dan difikilte. Eski tomem to konn enn kikenn ki pe fer fas ar bann difikilte? To kapav mansionn so nom dan to lapriyer. Nou montre ki nou kontan nou bann frer ek ser kan nou demann Zeova pou ed zot pou andire.

16. Kifer nou bizin priye pou bann frer ki ena bann responsabilite dan lasanble?

¹⁶ Bann frer ki ena bann responsabilite dan lasanble vremem kontan kan nou pans zot dan nou bann lapriyer, ek sa vremem ed zot. Lapot Pol ti kone ki li ti bizin ki lezot priye pou li. Akoz sa, li ti demann zot: “Priye pou mwa osi, pou ki mo gagn fasilite laparol, pou ki mo koz ar lasirans pou revel mister Bonn Nouvel.” (Efe. 6:19) Azordi osi, nou ena boukou frer ki fer bann gran zefor pou asim zot bann responsabilite dan lasanble. Nou montre ki nou kontan zot kan nou demann Zeova pou ed zot.

17-18. Dan ki lokazion kitfwa enn kikenn pou bizin priye pou lezot, ek ki nou bizin rapel?

¹⁷ Parfwa, enn kikenn kapav demann nou pou priye pou lezot. Par exanp, enn ser ki pe fer enn letid Labib, kapav demann sa ser ki pe akonpagn li la pou fer enn lapriyer. Si ser-la pa tro konn sa etidian Labib la, kitfwa li pou prefer fer lapriyer alafin letid. Koumsa, li pou kone seki li kapav dir kan li pou priye pou sa etidian-la.

¹⁸ Enn frer kapav gagn privilez pou fer enn lapriyer pandan renion, ouswa pou enn renion predikasion. Bann frer ki gagn sa bann responsabilite-la bizin rapel pou kifer pe fer sa renion-la. Fode pa nou servi lapriyer pou donn bann konsey lasanble ouswa pou fer bann lanons. Pou laplipar renion, ena sink minit  pou sant kantik ek pou fer lapriyer. Alor, fode pa ki sa frer ki pe fer lapriyer-la koz boukou, sirtou pou lapriyer ki koumans bann renion.​—Mat. 6:7.

19. Ki nou bizin fer pou nou pre pou zour zizman Zeova?

¹⁹ Plis letan pase, plis nou bizin fer lapriyer vinn enn priorite dan nou lavi, parski zour zizman Zeova bien pre. Se pou sa rezon-la ki Zezi ti dir: “Gard zot lizie ouver, priye pouki zot gagn ase lafors pou sap dan bann maler ki pou arive.” (Lik 21:36) Si nou priye regilierman, nou lafwa pou vinn for, ek nou pou pre pou zour zizman Zeova.

20. Kouma nou kapav fer nou lapriyer vinn parey kouma enn lansan ki santi bon?

²⁰ Ki nou’nn examine dan sa lartik-la? Lapriyer bizin ena boukou valer pou nou. Bann kitsoz pli inportan pou ki nou bizin priye, se bann kitsoz ki ena enn lien ar proze Zeova. Nou bizin osi remersie Zeova pou so Garson ek pou so Rwayom, ek nou bizin priye pou nou bann frer ek ser. Biensir, Zeova anvi ki nou priye osi pou bann kitsoz ki nou bizin toulezour, ek osi pou nou kapav gard nou lafwa for. Kan nou reflesi bien lor seki nou dir dan nou bann lapriyer, nou montre ki lapriyer ena boukou valer pou nou. Lerla, Zeova pou konsider nou lapriyer kouma enn lansan ki santi bon, ek sa pou “fer Li plezir.”​—Prov. 15:8.