1. Kifer li inportan ki nou prepar nou pou bann katastrof?

 KAN nou prepar nou, sa kapav sov nou lavi. Par exanp, kan ena enn katastrof, bann dimounn ki’nn fini prepar zot alavans, ena plis sans pou res an-vi, ek zot pou kapav osi ed lezot. Enn lorganizasion imaniter dan Lerop dir: “Kan bann dimounn prepar zot bien, sa kapav sov zot lavi.”

2. Kifer nou bizin prepar nou pou gran soufrans? (Matie 24:44)

² “Gran soufrans” pou arive enn kout koumsa! (Mat. 24:21) Me gran soufrans bien diferan ar bann lezot katastrof, parski nou kone ki li pe vini. Depi anviron 2,000 an, Zezi ti fini averti so bann disip ki zot bizin pare pou sa zour-la. (Lir Matie 24:44.) Si nou prepar nou, li pou pli fasil pou nou andir sa lepok difisil la, ek nou pou kapav ed lezot osi pou andire.​—Lik 21:36.

3. Kouma landirans, konpasion, ek lamour pou ed nou pou nou pare pou gran soufrans?

³ Pou nou prepar nou pou gran soufrans, nou bizin devlop trwa kalite bien inportan. Ki nou pou fer si demann nou pou pres enn mesaz zizman ek ki nou gagn persekision akoz sa? (Rev. 16:21) Nou pou bizin ena landirans pou obeir Zeova, ek nou pou bizin ena konfians ki Li pou protez nou. Ki nou pou fer si nou bann frer ek ser perdi zot bann dibien materyel? (Abak. 3:17, 18) Si nou ena konpasion, sa pou motiv nou pou ed zot. Kan Gog ki sorti pei Magog pou atak bann serviter Zeova, kitfwa pandan enn tan, nou pou bizin res kot nou bann frer ek ser. (Eze. 38:10-12) Dan sa moman-la, nou lamour pou zot pou ed nou pou fer fas ar sa lepok difisil la.

4. Kouma Labib montre ki nou bizin kontign devlop landirans, konpasion, ek lamour?

⁴ Labib ankouraz nou pou kontign devlop landirans, konpasion, ek lamour. Lik 21:19 dir: “Gras-a zot landirans zot pou sap zot lavi.” Kolosien 3:12 dir: “Abiy zotmem ar . . . konpasion.” Ek 1 Tesalonisien 4:9, 10 dir: “Zotmem zot finn  aprann ar Bondie pou kontan sakenn zot kamarad. . . . Me nou ankouraz zot, bann frer, pou kontign fer sa ankor plis.” Ti ekrir sa bann verse-la pou bann serviter Zeova ki ti deza ena landirans, konpasion, ek lamour. Selman, zot ti bizin kontign devlop sa bann kalite-la. Nou osi nou bizin fer parey! Pou ed nou fer sa, nou pou examinn bann sitiasion dan lavi bann Kretien dan premie siek, kot zot ti montre sa bann kalite-la. Apre sa, nou pou gete kouma nou kapav swiv zot lexanp, pou ki nou prepar nou pou gran soufrans.

5. Dan premie siek, kouma bann Kretien ti reisi andir zot bann difikilte?

⁵ Dan premie siek, bann Kretien ti bizin ena landirans. (Ebre 10:36) Anplis bann difikilte ki tou dimounn ena, zot ti osi gagn bann difikilte parski zot ti bann Kretien. Boukou parmi zot ti gagn persekision, pa zis ar bann sef relizie zwif ek ar gouvernman romin, me osi ar zot prop fami. (Mat. 10:21) Anplis, dan lasanble, parfwa zot ti bizin fer fas ar bann aposta ki ti pe fann bann fos lansegnman ek ki ti pe esey inflians zot. (Zist. 20:29, 30) Malgre sa bann sitiasion-la, sa bann Kretien-la ti kontign andire. (Rev. 2:3) Kouma zot ti fer sa? Zot ti reflesi lor lexanp bann serviter Zeova ki ti ena landirans, kouma par exanp, Zob. (Zak 5:10, 11) Zot ti priye Zeova pou Li donn zot lafors. (Zist. 4:29-31) Ek zot ti res konsantre lor bann benediksion ki zot ti pou gagne, si zot ti kontign andire.​—Zist. 5:41.

6. Ki nou kapav aprann ar lexanp Merita?

⁶ Nou osi nou pou ena plis landirans, si regilierman nou etidie ek reflesi lor lexanp bann serviter Zeova ki ti ena landirans. Merita, enn ser ki res Albani, ti fer sa, ek sa ti ed li pou andir lopozision so fami. Li dir: “Kan mo ti etidie lor lexanp Zob, sa ti bien ankouraz mwa. Zob ti bien soufer, ek li pa ti kone kisann-la ti pe fer li soufer. Kanmem sa, li ti dir: ‘Ziska mo mor, mo pou kontign res fidel ar Bondie!’ (Zob 27:5) Mo bann leprev bien tigit konpare ar bann leprev Zob. Anplis, konpare ar Zob, mwa mo kone kisann-la ki deryer sa.”

7. Mem si pou linstan nou pa pe fer fas ar enn gro difikilte, ki kitsoz nou bizin aprann fer depi aster-la mem?

⁷ Nou pou ena plis landirans osi si nou priye Zeova souvan ek nou dir Li tou seki pe trakas nou. (Fil. 4:6; 1 Tes. 5:17) Pou linstan, kitfwa to pa pe fer fas ar enn gro difikilte. Me eski to ena labitid pou priye Zeova ek pou demann Li so led kan to tris, to trakase, ouswa kan to pa kone seki to bizin fer? Si depi aster-la mem, to ena labitid pou rod led Zeova regilierman kan to gagn bann ti difikilte, to pa pou ezite pou rod so led kan to pou gagn bann pli gro difikilte dan lavenir. Kan to priye Zeova regilierman, to montre ki to ena konfians ki Zeova kone ki meyer moman pou ed twa ek kouma Li bizin ed twa.​—Ps. 27:1, 3.

8. Kouma lexanp Mira montre nou ki, kan nou andir bann difikilte azordi sa ed nou pou andir bann difikilte dan lavenir? (Zak 1:2-4) (Get zimaz osi.)

⁸ Kan nou andir bann difikilte ki nou gagne azordi, sa fer nou ena plis landirans, ek sa pou ed nou pou andir bann difikilte ki nou pou gagne pandan gran soufrans. (Rom. 5:3) Kifer nou dir sa? Boukou frer ek ser dir ki sak fwa ki zot andir enn leprev, sa donn zot lafors pou andir prosin leprev. Kan zot inn reisi andir enn leprev gras-a led Zeova, zot lafwa inn vinn pli for, ek sa lafwa-la inn ed zot pou andir prosin leprev ki zot inn gagne. (Lir Zak 1:2-4.) Mira, enn pionie ki res Albani, inn remarke ki li ena plis landirans azordi parski li’nn reisi andir  bann problem ki li ti gagne dan lepase. Parfwa, li ti ena linpresion ki li tousel ti ena sa kantite problem-la. Me apre, li ti rapel kouma Zeova ti soutenir li pandan sa 20 dernie lane-la, ek li ti dir ar limem: ‘To bizin res fidel. Apre tou sa bann lane ek tou sa bann difikilte ki Zeova inn ed twa sirmonte la, se pa aster-la ki to pou aret servi Li!’ Twa osi to kapav reflesi kouma Zeova inn ed twa pou andir to bann leprev. Sak fwa ki to andir enn leprev, Zeova trouve, ek to kapav sir ki Li pou rekonpans twa. (Mat. 5:10-12) Si depi aster-la mem, nou andir bann difikilte ki nou gagne, nou pou ena plis landirans. Lerla, kan gran soufrans pou koumanse, nou pou bien deside pou kontign andire.

9. Kouma bann frer ek ser dan lasanble Antios ti montre ki zot ti ena konpasion?

⁹ Anou gete seki ti arive kan ti ena enn gran lafaminn dan Zide. Kan bann frer ek ser dan lasanble Antios, ki trouv dan Siri, ti aprann ki ti ena lafaminn, zot ti resanti enn gran konpasion pou zot bann frer ek ser ki dan Zide. Ek sa konpasion-la ti pous zot pou azir. Zot “ti deside, sakenn dapre seki li kapav, pou avoy bann sekour pou bann frer ki ti res dan Zide.” (Zist. 11:27-30) Mem si zot bann frer ek ser dan Zide ti res bien lwin, bann Kretien dan Antios ti bien deside pou ed zot.​—1 Zan 3:17, 18.

10. Kouma nou kapav montre konpasion kan nou bann frer ek ser pe soufer akoz enn katastrof? (Get zimaz osi.)

¹⁰ Azordi, kan nou aprann ki nou bann frer ek ser pe soufer akoz enn katastrof, nou osi nou kapav montre konpasion. Par exanp, nou kapav demann bann ansien seki nou kapav fer pou ede, nou kapav fer bann kontribision pou nou laktivite, ouswa nou kapav priye pou bann ki afekte par sa katastrof-la. b (Prov. 17:17) An 2020, finn ena plis ki 950 Komite Sekour dan lemond antie ki’nn ed nou bann frer ek ser ki ti afekte par pandemi COVID-19. Nou vremem felisit nou bann frer ek ser ki dan sa bann komite sekour la. Parski zot ena konpasion, zot finn ed zot bann frer ek ser lor plan materyel, zot finn ed bann-la pou kontign servi Zeova, ek dan sertin landrwa, zot finn mem repar ek konstrir bann lakaz ek bann Lasal Renion.​—Konpar ar 2 Korintien 8:1-4.

11. Kan nou montre konpasion anver lezot, kouma sa donn laglwar nou Papa Zeova?

¹¹ Kan nou soutenir nou bann frer ek ser kan ena enn katastrof, lezot remark bann sakrifis ki nou fer. Par exanp, an 2019, siklonn Dorian ti kraz enn Lasal Renion dan Bahamas. Kan nou bann frer ti pe rekonstrir lasal-la, zot ti demann enn kontrakter ki pa Temwin pou donn zot enn kotasion pou sertin travay ki ti ena pou fer. Kontrakter-la ti dir zot: “Mo ti pou kontan fer enn donasion . . . donn zot bann lekipman, bann materyo, ek osi bann zouvriye pou fer travay-la. . . . Mo anvi fer sa pou zot lorganizasion. Sa vremem tous mwa kan mo trouv lamour ki zot ena pou zot kamarad.” Dan lemond, laplipar dimounn pa konn Zeova. Selman, boukou dimounn kone seki bann Temwin Zeova fer pou ed lezot. Nou bien kontan ki, kan nou montre konpasion anver lezot, sa kapav ankouraz bann dimounn pou aprann plis lor Zeova, nou Papa ki “ena boukou mizerikord”!​—Efe. 2:4.

12. Kan nou ena konpasion azordi, kouma sa prepar nou pou gran soufrans? (Revelasion 13:16, 17)

¹² Kifer nou pou bizin ena konpasion  pandan gran soufrans? Dapre Labib, ki li azordi ouswa pandan gran soufrans, bann ki pa soutenir bann gouvernman sa lemond-la pou gagn bann leprev. (Lir Revelasion 13:16, 17.) Nou bann frer ek ser kitfwa pou bizin nou led pou gagn bann kitsoz ki zot bizin pou viv. Kan nou Lerwa Zezi Kris, pou ziz bann dimounn, nou anvi ki li trouve ki nou ena konpasion. Lerla, li pou invit nou pou “erit Rwayom.”​—Mat. 25:34-40.

13. Dapre Romin 15:7, kouma bann Kretien dan premie siek ti montre ki zot ti vremem kontan zot kamarad?

¹³ Dan premie siek, bann Kretien ti vremem kontan zot kamarad. Me eski sa ti fasil pou zot montre lamour anver zot kamarad? Dan lasanble Rom, ti ena diferan kalite dimounn. Ti ena bann Zwif, ki avan ti pe swiv Lalwa Moiz, ek ti ena osi bann dimounn ki ti sorti dan diferan nasion, ek zot tou ti ena diferan koutim. Parmi sa bann Kretien-la, ti ena bann esklav, me ti ena osi bann dimounn ki ti lib, ek kitfwa sertin parmi zot ti mem bann proprieter esklav. Mem si sa bann Kretien-la ti bien diferan, kouma zot ti reisi montre lamour anver zot kamarad? Lapot Pol ti ankouraz zot pou “akeyir sakenn zot kamarad.” (Lir Romin 15:7.) Ki li ti pe rod dir? Mo “akeyir,” vedir resevwar enn kikenn avek bonte, ouswa montre lospitalite anver li, parey kouma nou ti pou invit enn kikenn kot nou, ouswa nou ti pou fer kamarad avek li. Par exanp, Pol ti dir Filemon kouma li ti bizin akeyir Onezim, enn esklav ki ti sove depi kot li. Pol ti dir: “Akeyir li bien.” (File. 17) Prisil ek Akila ti akeyir Apolos, ek zot ti ed li pou konpran pli bien bann lansegnman Zezi. Labib dir ki “zot ti amenn li ar zot.” (Zist. 18:26) Mem si zot ti bien diferan, sa bann Kretien-la pa ti les sa kree divizion ant zot. Okontrer, zot ti akeyir sakenn zot kamarad.

14. Kouma Anna ek so misie ti montre lamour anver lezot?

¹⁴ Nou osi nou kapav montre lamour anver nou bann frer ek ser, kan nou fer kamarad ar zot ek kan nou pas letan ar zot. Lerla, zot osi zot pou anvi fer parey ek montre lamour anver lezot. (2 Kor. 6:11-13) Anou get lexanp Anna ek so misie, enn koup misioner. Pandemi COVID-19 ti koumanse inpe apre ki zot ti al dan zot nouvo lafektasion dan Lwes Lafrik. Akoz pandemi, zot pa ti kapav zwenn zot bann frer ek ser fas-a-fas. Kouma sa koup-la ti montre lamour anver zot bann frer ek ser? Kan zot ti zwenn zot bann frer ek ser par video-konferans, zot ti dir bann-la ki kantite zot ti vremem anvi aprann konn zot. Sa ti bien tous bann frer ek ser, ek akoz sa, souvan bann-la ti telefonn zot ek avoy zot bann mesaz. Kifer sa koup-la ti fer zefor pou aprann konn pli bien zot bann frer ek ser? Anna dir: “Zame mo pou bliye bann frer ek ser ki’nn montre lamour anver mwa ek mo fami, ki li dan bann bon moman ek bann move moman. Zot lexanp inn motiv mwa pou montre lamour anver lezot.”

15. Ki nou kapav aprann ar lexanp Vanessa? (Get zimaz osi.)

¹⁵ Dan nou bann lasanble, boukou frer ek ser sorti dan diferan kiltir ek zot ena diferan personalite. Nou kapav ogmant nou lamour pou sakenn parmi zot kan nou konsantre nou lor zot bann zoli kalite. Enn ser ki apel Vanessa ek ki pe servi dan Nouvel-Zeland, dir ki o-koumansman li ti trouv sa difisil pou ena enn bon relasion avek sertin dan lasanble. Me olie ki li evit bann dimounn ki pa al dan li, li ti desid pou pas plis  letan avek zot. Kan li ti fer sa, Vanessa ti trouve seki Zeova kontan ar sa bann dimounn-la. Li dir: “Depi ki mo misie inn vinn responsab sirkonskripsion, nou frekant pli boukou frer ek ser ki ena diferan personalite, ek mo trouv sa pli fasil pou adapte ar zot. Sakenn parmi nou diferan, ek aster-la mo’nn aprann pou kontan sa. Zeova osi kontan sa, parski mem si nou diferan, Li’nn atir sakenn parmi nou pou nou servi Li.” Kan nou fer zefor pou trouv lezot parey kouma Zeova trouv zot, nou montre ki nou vremem kontan zot.​—2 Kor. 8:24.

16. Kifer li pou bien inportan ki nou kontan nou bann frer ek ser pandan gran soufrans? (Get zimaz osi.)

¹⁶ Pandan gran soufrans, li pou bien inportan ki nou kontan nou bann frer ek ser. Kouma Zeova pou protez nou kan gran soufrans pou koumanse? Anou gete seki Zeova ti demann so bann serviter pou fer kan bann Babilonien ti atak zot. Li ti dir: “Ale mo pep, rant dan to bann lasam ki trouv andan, ek ferm laport deryer twa. Kasiet pou enn ti moman ziska ki lakoler pase.” (Iza. 26:20) Pandan gran soufrans, kitfwa nou pou bizin swiv sa bann instriksion-la. “Bann lasam ki trouv andan,” kitfwa reprezant nou bann lasanble. Pandan gran soufrans, Zeova promet ki Li pou protez nou si nou kontign servi Li ansam ar nou bann frer ek ser. Alor, li bien inportan ki aster-la mem nou pa zis toler nou bann frer ek ser. Nou bizin fer zefor pou kontan zot. Nou lavi depann lor nou lamour pou nou bann frer ek ser!

17. Si nou prepar nou depi aster-la mem, ki kitsoz nou pou kapav fer pandan gran soufrans?

¹⁷ “Gran zour Zeova” pou enn moman bien difisil pou tou dimounn! (Sof. 1:14, 15) Bann serviter Zeova osi pou gagn bann difikilte sa lepok-la. Me si nou prepar nou depi aster-la mem, nou pou reisi gard nou kalm ek nou pou kapav ed lezot. Nou pou reisi andir ninport ki leprev ki nou gagne. Kan nou bann frer ek ser pou dan difikilte, nou pou fer nou maximum pou montre konpasion anver zot, nou pou soutenir, ek nou pou donn zot seki zot bizin. Nou pou osi res pros ar nou bann frer ek ser, parski depi aster-la mem nou pe fer zefor pou kontan zot. Lerla, Zeova pou rekonpans nou kan Li pou donn nou lavi eternel dan enn lemond kot pa pou ena okenn soufrans!​—Iza. 65:17.