1. Ki bann verite to’nn aprann kan to’nn koumans etidie Labib?

 ESKI to rapel bann kitsoz ki to ti aprann kan to ti koumans etidie Labib? Kitfwa to ti etone kan to ti aprann ki Bondie ena enn nom. Ouswa kitfwa to ti soulaze kan to ti aprann ki Bondie pa tortir bann dimounn dan lanfer. Sirman to ti bien kontan kan to ti aprann ki bann mor pou resisite, ek ki to pou kapav retrouv zot dan enn paradi ki pou lor later.

2. Apre ki to’nn aprann bann verite ki ena dan Labib, ki bann lezot progre to’nn fer? (Efezien 5:1, 2)

² Plis to’nn etidie Labib, plis to lamour pou Zeova inn grandi. Sa lamour-la inn motiv twa pou met an pratik seki to ti pe aprann. Gras-a bann prinsip Labib, to’nn pran bann pli bon desizion. To’nn sanz to fason panse ek to konportman, parski to ti anvi fer Zeova plezir. Parey kouma enn zanfan ki imit so bann paran parski li bien kontan zot, to’nn anvi imit to Papa Zeova parski to bien kontan Li.​—Lir Efezien 5:1, 2.

3. Ki kestion nou kapav poz nou-mem?

³ Demann tomem: ‘Eski mo lamour pou Zeova azordi, li pli for ki kan mo ti fek vinn enn Temwin? Depi ki mo’nn pran batem, eski mo pe plis reflesi ek azir kouma Zeova, sirtou kan sa konsern montre lamour anver mo bann frer ek ser?’ Si “lamour ki to ti ena dan koumansman” inn diminie, fode pa to dekouraze. Lamour bann Kretien dan premie siek osi ti diminie. Me Zezi pa ti abandonn zot, ek li pa pou abandonn twa osi. (Rev. 2:4, 7) Li kone ki nou kapav regagn lamour ki nou ti ena o-koumansman kan nou ti fek vinn dan laverite.

4. Ki nou pou examine dan sa lartik-la?

 ⁴ Dan sa lartik-la, nou pou gete kouma nou kapav kontign ogmant nou lamour pou Zeova ek pou lezot. Apre sa, nou pou get sertin bienfe ki nou tou nou gagne kan nou ogmant nou lamour pou Zeova ek pou nou bann frer ek ser.

5-6. Ki difikilte lapot Pol ti gagne dan so servis pou Zeova, me ki kitsoz ti motiv li pou kontign servi Zeova?

⁵ Lapot Pol ti ere dan so servis pou Zeova. Me parfwa, li ti gagn boukou difikilte. Pol souvan ti bizin vwayaz bann long distans, ek sa lepok-la sa ti bien difisil. Dan so bann vwayaz, parfwa li ti an “danze akoz bann larivier” ek an “danze akoz bann voler.” Parfwa, li ti osi gagn bate ar so bann lennmi. (2 Kor. 11:23-27) Anplis, bann frer ek ser pa ti touletan apresie bann zefor ki Pol ti fer pou ed zot.​—2 Kor. 10:10; Fil. 4:15.

⁶ Ki kitsoz ti ed Pol pou kontign servi Zeova? Pol ti aprann konn Zeova pli bien gras-a bann Lekritir ek gras-a bann sitiasion ki li’nn viv. Li ti sir ki Zeova ti kontan li. (Rom. 8:38, 39; Efe. 2:4, 5) Li ti osi aprann pou kontan Zeova. Pol ti montre ki li ti kontan Zeova kan li “finn servi bann ki sin ek ki [li’nn] kontign servi bann-la.”​—Ebre 6:10.

7. Sit enn fason kouma nou kapav ogmant nou lamour pou Zeova.

⁷ Nou kapav ogmant nou lamour pou Zeova kan nou etidie Labib an profonder. Kan to lir Labib, fer zefor pou konpran seki sa aprann twa lor Zeova. Demann tomem: ‘Kouma sa zistwar-la montre ki Zeova kontan mwa? Kouma sa kapav ed mwa pou kontan Zeova?’

8. Kouma lapriyer kapav ed nou pou ogmant nou lamour pou Zeova?

⁸ Enn lot fason nou kapav ogmant nou lamour pou Zeova, se kan nou ouver nou leker ar Li ek nou priye Li toulezour. (Ps. 25:4, 5) Zeova pou reponn nou bann lapriyer. (1 Zan 3:21, 22) Khanh, enn ser ki res Lazi, dir: “O-koumansman, mo ti kontan Zeova akoz bann kitsoz ki mo ti aprann lor li. Me kan mo’nn trouve kouma Li reponn mo bann lapriyer, sa finn ogmant mo lamour pou Li. Sa motiv mwa osi pou fer bann kitsoz ki fer Li plezir.” b

9. Kouma Timote ti montre ki li ti kontan so bann frer ek ser?

⁹ Plizir lane apre ki li ti vinn enn Kretien, Pol ti zwenn enn zenn ki ti apel Timote. Timote ti kontan Zeova, ek li ti kontan so bann frer ek ser. Pol ti dir bann Filipien: “Mo pena personn ki ena enn latitid kouma [Timote] ek ki vremem interese ar zot bien-et.” (Fil. 2:20) Dan sa verse-la, Pol pa koz lor bann kapasite ki Timote ti ena, kouma par exanp enn bon orater ouswa enn bon organizater. Pol ti inpresione par lamour ki Timote ti ena pou so bann frer ek ser. Nou sir ki bann lasanble ki Timote ti vizite, ti pe atann avek inpasians so prosin vizit.​—1 Kor. 4:17.

10. Kouma Anna ek so misie ti montre ki zot kontan zot bann frer ek ser?

¹⁰ Nou osi nou bizin rod bann fason pou nou ed nou bann frer ek ser. (Ebre 13:16) Anou get lexanp Anna, ki nou’nn mansione dan lartik avan. Apre enn siklonn, li ek so misie ti al kot enn fami  Temwin, ek zot ti trouve ki sa siklonn-la ti kraz twa lakaz sa fami-la. Sa fami-la pa ti ena okenn linz prop. Anna dir: “Nou ti pran zot linz, nou ti al lav zot, nou ti repas zot, nou ti pliy zot, ek nou ti retourn zot. Pou nou, sa pa ti enn bel zafer. Me akoz nou’nn fer sa, ziska zordi nou bann bon kamarad ar sa fami-la.” Anna ek so misie bien kontan zot bann frer ek ser, ek sa lamour-la ti pous zot pou donn enn koudme.​—1 Zan 3:17, 18.

11. (a) Kan nou montre lamour anver lezot, ki lefe sa kapav ena lor zot? (b) Dapre Proverb 19:17, ki Zeova fer kan nou montre lamour anver lezot?

¹¹ Kan nou bon ek nou montre lamour anver lezot, zot pou trouve ki nou pe fer zefor pou imit Zeova. Ek kitfwa, san mem ki nou kone, zot kapav bien rekonesan anver nou. Khanh, ki nou’nn mansione taler-la, rapel kouma bann ser ti bien ed li. Li dir: “Mo bien rekonesan anver tou bann ser ki ti ed mwa pou al prese. Zot ti pas pran mwa lakaz, zot ti invit mwa pou manze, ek apre zot ti retourn mwa kot mwa. Azordi, mo rann mwa kont ki kantite sakrifis zot inn fer, ek zot inn fer sa parski zot kontan mwa.” Biensir, pa tou dimounn ki pou montre rekonesans pou seki nou’nn fer pou zot. Khanh dir: “Si mo ti kapav retourn zot tou bann bon kitsoz ki zot inn fer pou mwa, mo ti pou fer li. Malerezman, mo pa kone kotsa zot reste. Me Zeova kone kot zot reste, ek mo priye Li pou Li rekonpans zot pou tou seki zot inn fer pou mwa.” Khanh ena rezon! Zeova remark tou bann ti kitsoz ki nou fer pou lezot. Pou Li, sa ena boukou valer, ek Li pou rekonpans nou.​—Lir Proverb 19:17.

12. Kouma bann frer kapav montre ki zot kontan zot bann frer ek ser? (Get zimaz osi.)

 ¹² Si to enn frer, kouma to kapav montre ki to kontan to bann frer ek ser, ek ki to anvi ed zot? Enn zenn frer ki apel Jordan, ti demann enn ansien seki li kapav fer pou ede dan lasanble. Ansien-la ti felisit li pou bann progre ki li ti fini fer, ek li ti donn li enn-de konsey. Par exanp, li ti dir Jordan ki li kapav vinn Lasal boner pou li kapav akeyir lezot. Li ti osi konsey Jordan pou reponn dan renion, pou prese regilierman ar so group predikasion, ek pou reflesi lor seki li kapav fer pou ed lezot. Kan Jordan inn swiv konsey sa ansien-la, li pa’nn zis devlop bann kapasite, me li’nn osi ogmant so lamour pou so bann frer ek ser. Jordan inn aprann ki se pa kan enn frer vinn enn serviter lasanble ki li koumans ed lezot. Li bizin ed lezot avan mem ki li nome, ek kan li fini nome, li bizin kontign ed lezot.​—1 Tim. 3:8-10, 13.

13. Kouma lamour ti motiv Christian pou revinn ansien?

¹³ Eski avan, to ti enn serviter lasanble ouswa enn ansien? Zeova rapel tou bann bon travay ki to’nn fer dan lepase ek lamour ki’nn motiv twa pou fer sa. (1 Kor. 15:58) Li osi trouv lamour ki to ena aster-la. Enn frer ki apel Christian, ti bien sagrin kan li ti perdi so privilez ansien. Selman, li dir: “Mem si mo ti perdi mo privilez, mo ti bien deside pou fer mo maximum pou Zeova parski mo kontan Li.” Avek letan, Christian ti revinn ansien. Li dir: “Mo ti inpe strese pou rekoumans servi kouma ansien. Me mo ti dir ar momem ki, si Zeova  dan so gran mizerikord pe reservi mwa kouma ansien, mo pou fer li parski mo kontan Li ek mo kontan mo bann frer ek ser.”

14. Ki nou kapav aprann ar lexanp Elena?

¹⁴ Bann serviter Zeova montre ki zot kontan zot prosin osi. (Mat. 22:37-39) Par exanp, Elena, enn ser ki res Zeorzi, dir: “O-koumansman, se zis mo lamour pou Zeova ki ti motiv mwa pou al prese. Me amezir ki mo lamour pou Zeova ti pe ogmante, mo lamour pou bann dimounn dan teritwar osi ti pe ogmante. Mo ti reflesi lor bann problem ki zot ti ena, ek lor bann size ki ti pou tous zot leker. Plis mo ti fer sa, plis mo ti anvi ed zot.”​—Rom. 10:13-15.

15-16. Parey kouma nou trouve lor zimaz, ki benediksion nou gagne kan nou montre lamour anver lezot?

¹⁵ Kan nou montre lamour anver nou bann frer ek ser, pa zis zot tousel ki gagn bann bienfe. Pandan pandemi COVID-19, Paolo ek so madam ti montre plizir ser aze kouma pou servi zot bann laparey elektronik pou prese. O-koumansman, enn ser ti trouv sa bien difisil. Me avek letan, li ti reisi, ek li ti invit so bann fami pou Komemorasion Lamor Zezi. Swasant manb so fami ti asiste Komemorasion par video-konferans! Gras-a zefor Paolo ek so madam, sa ser aze la ek so fami ti gagn bann bienfe. Plitar,  ser-la ti dir Paolo: “Mersi pou zot led. Zame mo pa pou bliye kouma Zeova gagn nou traka, ek kouma zot inn ed zot bann ser ki aze.”

¹⁶ Bann lexperyans koumsa inn ansegn Paolo enn leson bien inportan. Sa finn rapel li ki lamour boukou pli inportan ki nou konesans ouswa nou bann kapasite. Paolo dir: “Avan, mo ti enn responsab sirkonskripsion. Azordi, mo rann mwa kont ki, mem si kitfwa bann proklamater inn bliye mo bann diskour, zot ankor rapel bann kitsoz ki mo’nn fer pou zot.”

17. Kisann-la ankor gagn bann bienfe kan nou montre lamour anver lezot?

¹⁷ Kan nou montre lamour anver lezot, nou-mem nou gagn bann bienfe ki nou pa atann. Anou get lexanp Jonathan, enn frer ki res Nouvel-Zeland. Enn Samdi tanto ti fer bien so, ek Jonathan ti trouv enn pionie ki ti pe prese tousel. Lerla, li ti desid pou akonpagn sa pionie-la dan bann Samdi tanto. Sa lepok-la, Jonathan pa ti atann ki li ti pou gagn bann bienfe parski li ti montre li bon anver sa pionie-la. Li dir: “Sa lepok-la, mo pa ti kontan prese. Me kan mo’nn ekout fason ki sa pionie-la ti pe prese, ek kan mo’nn trouv bann rezilta ki li ti pe gagne, mo’nn koumans kontan predikasion. Sa frer-la inn osi vinn mo bon kamarad, ek li’nn ed mwa pou vinn pli for lor plan spiritiel, pou kontan predikasion, ek pou vinn pli pros ar Zeova.”

18. Ki kitsoz Zeova anvi nou fer?

¹⁸ Zeova anvi ki nou tou nou ogmant nou lamour pou Li ek pou nou bann frer ek ser. Kouma nou’nn trouve dan sa lartik-la, nou kapav ogmant nou lamour pou Zeova kan nou lir Labib, nou reflesi lor la, ek kan nou priye Li souvan. Nou kapav ogmant nou lamour pou nou bann frer ek ser kan nou rod bann fason pou ed zot. Plis nou lamour grandi, plis nou pou vinn pros ar Zeova ek ar nou bann frer ek ser. Ek sa bann lamitie-la pou dire pou touletan!