Mo papa ti enn paster dan Legliz Linite dan Kanada. Toule Dimans gramatin, mo ti ser ek mwa nou ti al Legliz pou al aprann katesis. Apre sa, nou ti al zwenn mo papa pou lames 11 er. Dan lapremidi, nou ti al Lasal ar mo mama. Se koumsa ki nou’nn kapav trouv diferans ki ti ena ant sa de relizion-la.

Mo mama ti partaz so bann krwayans ar so bann bon kamarad, Bob ek Marion Hutcheson. Avek letan, zot osi zot ti vinn dan laverite. An 1958, Bob ek Marion ti amenn mwa ek zot trwa garson pou asiste lasanble internasional ki ti ena dan lavil New York. Sa lasanble-la ti dir wit zour, ek so tem ti « La volonté divine ». Azordi, mo konpran bann sakrifis ki zot inn fer pou amenn mwa sa lasanble-la. Sa lasanble-la ti enn parmi bann meyer moman mo lavi.

Kan mo ti zenn, nou ti pe res dan enn laferm, ek mo ti bien kontan okip bann zanimo. Akoz sa, mo ti bien anvi vinn enn veteriner. Mo mama ti koz sa ar enn ansien. Ansien-la ti rapel mwa ki nou pe viv “bann dernie zour,” ek ki si mo al fer plizir lane dan liniversite, sa ti kapav gat mo lamitie ar Zeova. (2 Tim. 3:1) Lerla, mo ti desid pou pa al liniversite.

 Selman, mo ti pe demann momem seki mo ti pou fer apre ki mo fini kolez. Mem si mo ti pe prese toule wikenn, mo pa ti tro kontan prese, ek mo pa ti pe trouv mwa pe fer pionie. Mo papa ek mo tonton ti ankouraz mwa pou travay full-time pou enn gran konpagni lasirans dan Toronto. Mo tonton ti ena enn gran pos laba, alor mo ti desid pou al travay laba.

Selman, souvan mo ti pe fer overtime ek mo ti pe frekant bann dimounn ki pa Temwin. Akoz sa, mo ti pe rat mo bann renion ek predikasion. O-koumansman, mo ti pe res kot mo granper, ki pa ti enn Temwin. Me apre so lamor, mo ti bizin al rod enn lot plas pou al reste.

Bob ek Marion Hutcheson, ki ti amenn mwa lasanble an 1958, ti kouma bann paran pou mwa. Zot ti invit mwa pou vinn res kot zot, ek zot ti ed mwa pou vinn pli for lor plan spiritiel. Mo’nn pran batem an 1960, ansam ar zot garson John. John ti koumans fer pionie ek li ti ankouraz mwa pou fer plis dan predikasion. Bann ansien dan lasanble ti remark mo bann progre, ek avek letan mo ti vinn serviter Lekol Minister Teokratik. a

An 1966, mo’nn marye ar Randi Berge, enn pionie bien devwe ki ti anvi al servi kot bizin plis proklamater. Nou responsab sirkonskripsion ti bien kontan nou, ek kan li ti ankouraz nou pou al servi dan lasanble Orillia, dan Ontario, deswit nou ti ale.

Mo’nn koumans fer pionie deswit kouma nou’nn ariv Orillia. Parey kouma Randi, mo ti anvi ed bann dimounn aprann konn Zeova. Amezir ki mo ti pe fer zefor pou vinn enn bon pionie, mo’nn koumans kontan servi Labib pou ed bann dimounn. Mo ti bien kontan trouv bann dimounn aprann laverite lor Bondie. Dan Orillia, nou ti osi gagn lazwa pou ed enn koup pou fer bann sanzman dan zot lavi, pou zot vinn bann serviter Zeova.

Pandan ki nou ti pe vizit Toronto, mo ti zwenn Arnold MacNamara, ki ti enn parmi bann frer responsab dan Betel. Li ti demann mwa si nou ti anvi vinn pionie spesial. Deswit mo ti reponn li: “Biensir! Avoy nou ninport kotsa exsepte Québec!” Ti ena boukou problem dan Québec. Laba, bann dimounn ti koz Franse. Bann dimounn dan Kanada ki ti koz Angle, pa ti tro kontan bann ki koz Franse. Mo’si mo ti pans parey kouma zot. Sa lepok-la, bann dimounn ti pe fer manifestasion dan Québec parski zot ti anvi ki Québec gagn so lindepandans.

Arnold ti dir: “Pou linstan, Québec se sel plas kot Betel pe avoy bann pionie spesial.” Lerla, deswit mo ti aksepte pou ale. Mo ti kone osi ki Randi ti anvi al servi laba. Avek letan, mo’nn realize ki se enn parmi bann pli bon desizion ki nou’nn pran dan nou lavi.

Apre ki nou ti fer enn lekol pandan sink semenn pou aprann koz Franse, Randi ek mwa, avek enn lot koup, nou ti al Rimouski, ki trouv 540 kilomet dan nor-es Montréal. Nou ti ankor ena boukou pou aprann. Par exanp, enn fwa pandan enn renion, mo ti pe lir bann lanons konsernan bann lasanble ki nou ti pou gagne biento. Me olie ki mo dir ki parmi bann asistan ti pou ena boukou “Otrisien,” mo ti dir ki ti pou ena boukou “Otris.”

Kat ser selibater bien devwe, ek Frer ek Ser Huberdeau ek zot de tifi, ti vinn servi ansam ar nou dan Rimouski. Frer ek Ser Huberdeau ti lwe enn gran lakaz, ek tou bann pionie ki ti res laba ti ed zot pou pey lokasion. Nou ti apel lakaz-la La Maison Blanche, parski lakaz-la ti blan ek dan so lantre ti ena bann gran kolonn. Parfwa, ti ena 12 a 14 dimounn ki ti res laba. Akoz nou ti bann pionie spesial, Randi ek mwa ti prese gramatin, tanto, ek dan lasware. Nou ti bien kontan parski ti touletan ena bann dimounn pou akonpagn nou pou al prese, mem kan ti fer bien fre aswar dan liver.

Nou ti telman pros ar sa bann pionie-la ki zot ti vinn koumadir nou prop fami. Parfwa, nou ti asiz ansam otour enn dife, ouswa nou tou nou ti kwi manze ansam. Enn parmi bann frer ti konn zwe lamizik, alor bann Samdi aswar souvan nou ti sante ansam ek nou ti danse.

Dan Rimouski, bann dimounn ti bien interese ar laverite. Dan lespas sink an, nou’nn gagn lazwa trouv plizir etidian Labib progrese ek pran batem. Nou ti lasanble osi inn grandi ziska ki nou’nn gagn apepre 35 proklamater.

Predikasion dan Québec inn ed nou pou vinn bann pli bon proklamater. Nou’nn trouve kouma Zeova inn ed nou dan predikasion ek kouma Li’nn donn nou seki nou bizin pou viv. Anplis, nou’nn aprann kontan bann dimounn ki koz Franse. Nou’nn aprann kontan zot langaz ek zot kiltir, ek sa finn ed nou pou kontan bann lezot kiltir osi.​—2 Kor. 6:13.

San ki nou ti atann, Betel ti demann nou pou al servi dan lavil Tracadie, ki trouv lor lakot es Nouveau-Brunswick. Nou ti trouv sa inpe difisil, parski nou ti fek sign enn kontra pou lwe enn apartman ek mo ti pe travay kouma profeser dan enn lekol. Anplis, sertin parmi nou bann etidian ti fek vinn proklamater, ek nou ti pe osi konstrir nou Lasal Renion.

 Sa wikenn-la, nou ti bien priye Zeova. Nou ti osi al vizit Tracadie, ki ti bien diferan ar Rimouski. Me parski Zeova ti anvi ki nou al servi Tracadie, nou ti deside pou ale, ek nou ti trouve kouma Zeova ti tir nou bann difikilte enn deryer lot. (Mal. 3:10) Demenazman-la ti pli fasil osi pou fer parski Randi ti ena enn bon lamitie ar Zeova, li ti dispoze pou fer bann sakrifis, ek li ti bien pozitif.

Kan nou ti ariv dan nou nouvo lasanble, ti ena zis enn sel ansien laba. Robert Ross ek so madam Linda ti al servi kouma pionie laba, ek kan zot ti gagn zot premie zanfan, zot ti desid pou res laba mem. Mem si zot ti bizin okip enn zanfan, zot ti bien ankouraz Randi ek mwa parski zot ti touletan dan predikasion ek zot ti bien zenere.

Apre ki nou ti fer pionie pandan de-z-an dan Tracadie, nou ti gagn enn lot sirpriz ki nou pa ti atann: bann frer ti demann mwa pou al servi kouma responsab sirkonskripsion. Pandan set an, nou’nn servi dan sirkonskripsion Angle. Apre sa, nou’nn al servi dan sirkonskripsion Franse dan Québec. Nou sirveyan distrik dan Québec, Frer Léonce Crépeault, ti felisit mwa pou mo bann diskour. Selman apre, li ti touletan dir mwa: “Ki to kapav dir dan to bann diskour pou zot ed plis bann frer ek ser?” b Sa kestion-la ti ed mwa pou mo fer bann diskour ki pli sinp ek ki plis presi.

An 1978, ti ena lasanble internasional dan Montréal. So tem ti « La foi victorieuse ». Pou sa lasanble-la, mo ti gagn enn responsabilite ki zame mo pa pou bliye. Mo ti travay dan departman ki ti fourni manze. Sa lane-la, nou ti pe atann omwin 80,000 dimounn pou sa lasanble-la, ek ti pran bann nouvo dispozision konsernan manze. Tou ti sanze: nou bann lekipman, nou meni, ek mem fason ki nou ti bizin prepar manze. Nou ti ena apepre 20 gro frizider, me parfwa zot pa ti marse. Lavey lasanble, ti ena enn match dan stad kot ti pou fer lasanble, ek nou ti bizin atann ziska minwi pou nou kapav rant dan stad pou nou fer bann preparasion. Avan mem ki soley leve, nou ti bizin fini koumans prepar bann ti-dezene! Nou ti extra fatige, me mo ti aprann boukou ar lexanp bann lezot volonter. Zot ti travay bien dir, zot ti bien devwe, ek zot ti bien pozitif. Ziska ler, nou ankor bann bon  kamarad. Sa lasanble-la ti enn moman istorik dan Québec, parski ant bann lane 1940 ek 1960, nou ti pe gagn persekision dan sa lavil-la.

Mo’nn aprann boukou ar bann frer responsab pandan bann diferan lasanble ki ti ena dan Montréal. Enn lane, Frer David Splane, ki azordi enn manb Komite Santral, ti servi kouma kordinater komite lasanble. Pou enn lot lasanble, se mwa ki ti gagn sa responsabilite-la, ek David ti bien ed mwa.

An 2011, apre ki Randi ek mwa nou ti pas 36 an dan servis sirkonskripsion, mo ti gagn privilez pou servi kouma formater pou Lekol pou Bann Ansien. Pandan de-z-an, nou’nn dormi dan apepre 75 diferan lili. Sa ti enn gro sakrifis, me sa ti vremem vo lapenn! Alafin sak semenn, bann ansien ti bien rekonesan, parski zot ti trouve ki kantite Komite Santral ti anvi pran zot swin.

Apre sa, mo ti vinn enn formater pou Lekol pou Bann Evanzelizater Rwayom Bondie. Souvan, bann zelev ti bien fatige ek zot ti bien trakase parski zot ti ena enn program bien ranpli. Sak zour, zot ti gagn formasion dan enn klas pandan set-er-tan. Sak lapremidi, zot ti bizin fer devwar pandan trwa-z-er-tan. Ek sak semenn, zot ti ena kat ouswa sink size pou fer. Lot formater-la ek mwa nou ti explik zot ki zot pa ti pou kapav fer tousala san led Zeova. Selman, parski zot ti kont lor Zeova, bann zelev ti reisi fer tousala, ek zot ti fer boukou plis ki sa! Mo pou touletan rapel ki kantite zot ti etone kan zot ti rann zot kont ki zot ti reisi fer tousala.

Mo mama ti vremem interese ar lezot. Akoz sa, so bann etidian Labib ti progrese, ek mem mo papa ti sanz so lopinion lor laverite. Trwa zour avan ki mo mama mor, nou tou nou ti etone parski mo papa ti vinn asiste diskour Lasal, ek li’nn kontign asiste bann renion pandan 26 an. Mem si mo papa zame inn pran batem, bann ansien inn dir mwa ki li ti touletan premie pou ariv Lasal pou sak renion.

Mo mama ti osi enn bon lexanp pou mwa ek mo bann ser. Gras-a li, mo trwa ser ek zot mari pe servi Zeova ar fidelite. De parmi mo bann ser pe servi dan Betel, enn dan Portigal ek enn dan Aiti.

Azordi, Randi ek mwa nou pe servi kouma pionie spesial dan Hamilton, Ontario. Kan nou ti dan servis sirkonskripsion, nou ti kontan akonpagn bann frer ek ser pou fer bann vizit ek bann letid. Me aster-la, nou-mem nou ena nou bann letid Labib, ek nou bien kontan kan nou trouv nou bann etidian progrese. Plis nou fer kamarad ar bann frer ek ser dan lasanble, plis nou ankouraze kan nou trouve kouma Zeova pe soutenir zot.

Kan nou mazine kouma lezot ti vremem interese ar nou, nou leker ranpli ar rekonesans. An retour, nou osi nou’nn esey montre enn “lintere sinser” anver lezot. Nou’nn ankouraz zot pou fer zot maximum pou Zeova. (2 Kor. 7:6, 7) Par exanp, dan enn fami, mama-la ek zot de zanfan ti pe servi Zeova aplintan. Mo ti demann papa-la si li’nn deza pans pou fer pionie. Li ti reponn mwa ki li ti pe deza ed trwa pionie. Alor mo ti demann li: “Eski to kapav ed zot pli bien ki Zeova?” Mo ti osi ankouraz li pou gagn mem lazwa ki so fami ti pe gagne. Nou frer ti vinn pionie sis mwa apre.

Randi ek mwa, nou pou kontign “fer prosin zenerasion konn” “bann travay extraordiner” Zeova, ek nou espere ki zot pou kontan pou servi Li, parey kouma nou.​—Ps. 71:17, 18, NW.