1-2. Kifer nou kapav konpar enn Kretien ar enn gran batiman? (1 Korintien 15:58)

 AN 1978, dan lavil Tokyo dan Zapon, ti aranz enn gran batiman 60 letaz. Bann dimounn ti pe demann zotmem si sa batman-la ti pou tini, parski souvan gagn bann tranbleman-de-ter dan zot pei. Ki bann inzenier ti fer pou ki sa batiman-la reziste kont bann tranbleman-de-ter? Zot ti fer an-sort ki batiman-la li solid ek anmemtan flexib. Lerla, li ti pou kapav reziste bann tranbleman-de-ter. Bann Kretien bizin kouma sa batiman-la. Dan ki fason?

² Enn Kretien bizin ekilibre, setadir li bizin solid ek flexib toule-de. Li bizin ferm ek solid, kan sa konsern bann lalwa ek bann prinsip Zeova. (Lir 1 Korintien 15:58.) Li bizin “dispoze pou obeir” bann lalwa Zeova, mem kan sa difisil. Me enn Kretien bizin flexib osi, setadir “rezonab” dan bann sitiasion kot pena okenn prinsip Labib ki inplike. (Zak 3:17) Enn Kretien ki ekilibre, li pa pou tro strik ek li pa pou tro mou. Dan sa lartik-la, nou pou gete kouma nou kapav res ferm ek solid. Nou pou get osi sink kitsoz ki Satan servi pou esey fer nou dezobeir Zeova ek kouma nou kapav lit kont sa.

3. Ki lalwa ena dan Zistwar Bann Zapot 15:28, 29?

³ Se Zeova ki ena drwa pou etabli bann lalwa, ek so bann lalwa fasil pou konpran. (Iza. 33:22) Par exanp dan premie siek, komite santral ti koz lor trwa domenn kot bann Kretien bizin res ferm: (1) rezet bann zidol ek ador zis Zeova, (2) obeir lalwa Zeova konsernan disan, ek (3) rezet limoralite sexiel. (Lir Zistwar Bann Zapot 15:28, 29.) Azordi, kouma bann Kretien kapav obeir Zeova dan sa trwa domenn-la?

4. Kouma nou montre ki nou ador zis Zeova tousel? (Revelasion 4:11)

 ⁴ Nou rezet bann zidol ek nou ador zis Zeova. Zeova ti donn bann Izraelit lord pou ador zis Li tousel. (Det. 5:6-10) Kan Satan ti tant Zezi, Zezi ti dir ki nou bizin ador zis Zeova tousel. (Mat. 4:8-10) Alor, fode pa nou ador bann zidol. Nou pa pou ador bann dimounn osi, kouma par exanp bann sef relizie, bann politisien, bann sportif, bann akter, ouswa bann mizisien. Nou pa pou tret zot koumadir zot bann bondie. Nou ador ek obeir zis Zeova tousel, Li ki “finn kree tou kitsoz.”​—Lir Revelasion 4:11.

5. Kifer nou bizin obeir lalwa Zeova konsernan disan?

⁵ Nou obeir lalwa Zeova konsernan disan. Kifer? Parski Zeova dir ki disan se lavi, enn kado ki Li’nn donn nou. (Lev. 17:14) Kan Zeova ti dir bann dimounn ki zot kapav manz laser bann zanimo, Li ti donn zot lord pou pa manz disan. (Zen. 9:4) Li ti redonn sa lord-la kan Li ti donn Lalwa bann Izraelit. (Lev. 17:10) Ek dan premie siek, Zeova ti servi komite santral pou fer tou bann Kretien konpran ki zot bizin “pa servi disan.” (Zist. 15:28, 29) Nou osi nou bizin obeir sa lalwa-la kan nou swazir nou bann tretman medikal. b

6. Ki nou bizin fer pou nou rezet limoralite sexiel?

⁶ Nou rezet limoralite sexiel. (Ebre 13:4) Lapot Pol servi enn lexpresion bien for pou explike ki nou bizin rezet bann move dezir. Li dir ki nou bizin “touy bann manb [nou] lekor.” Nou bizin pa get nanye ek pa fer nanye ki kapav fer nou tom dan limoralite sexiel. (Kol. 3:5; Zob 31:1) Kan enn tantasion vinn devan nou, nou bizin rezet deswit tou bann panse ek tou bann aksion ki kapav gat nou lamitie avek Zeova.

7. Ki nou bizin bien deside pou fer, ek kifer?

⁷ Zeova anvi ki nou ‘obeir Li ar tou nou leker.’ (Rom. 6:17) Nou pa kapav swazir ki lalwa Zeova nou anvi obeir. Tou seki Li demann nou pou fer, se pou nou prop dibien. (Iza. 48:17, 18; 1 Kor. 6:9, 10) Nou fer nou maximum pou fer Zeova plezir, ek nou pans parey kouma sa ekrivin Psom la, ki ti dir: “Mo pou kontinie obeyir to volonte pou touzour, ziska lafin net.” (Ps. 119:112) Selman, Satan pou esey fer tou pou nou dezobeir Zeova. Anou get bann metod ki li servi.

8. Kouma Satan servi persekision pou fer nou al lwin ar Zeova?

⁸ Persekision. Satan kapav met presion lor nou, ouswa servi laviolans, pou fer nou al lwin ar Zeova. So lobzektif se pou “devor” nou, setadir pou detrir nou lamitie avek Zeova. (1 Pier 5:8) Dan premie siek, bann Kretien ti gagn bann menas, zot ti gagn bate, ek ti mem touy zot parski zot ti bien deside pou res fidel ar Zeova. (Zist. 5:27, 28, 40; 7:54-60) Satan pe kontign servi persekision azordi. Nou trouv sa dan Larisi ek dan lezot pei, kot nou bann frer ek ser pe gagn boukou persekision. Inpe partou dan lemond, bann dimounn pe tret nou bann frer ek ser dan enn move fason.

9. Servi enn lexanp pou montre kifer nou bizin fer atansion ar bann taktik sournwa.

 ⁹ Bann taktik sournwa. Satan pa zis servi persekision, li osi servi “bann manigans” ki sournwa. (Efe. 6:11) Anou get lexanp Bob, enn frer ki ti bizin fer enn gro loperasion. Li ti dir so bann dokter ki zame li pou met disan. Dokter ki ti pou fer loperasion-la, ti dir ki li ti pou respekte so desizion. Selman, aswar avan so loperasion, kan so bann fami ti fini kit lopital, anestezis ti vinn get Bob. Li ti dir Bob ki bann dokter pa ti pou servi disan pou fer so loperasion, selman disan-la ti pou la tansion bizin li. Kitfwa dokter-la ti panse ki Bob ti pou sanz so desizion parski so fami pa ti la. Me Bob ti res ferm! Li ti dir ki li pa ti pou met disan ninport ki arive.

10. Kifer rezonnman bann dimounn ki pena respe pou lalwa Zeova li danzere? (1 Korintien 3:19, 20)

¹⁰ Rezonnman bann dimounn ki pena respe pou lalwa Zeova. Nou kapav koumans inior Zeova ek so bann prinsip, si nou pans parey kouma bann dimounn ki pena respe pou bann lalwa Zeova. (Lir 1 Korintien 3:19, 20.) Souvan, “sazes sa lemond-la” inflians bann dimounn pou dezobeir Bondie. Dan Pergam ek Tiatir, sertin Kretien ti les zot inflianse par bann dimounn ki ti imoral ek ki ti ador bann zidol. Zezi ti donn sa lasanble-la bann konsey bien for parski zot ti pe toler limoralite sexiel. (Rev. 2:14, 20) Azordi osi, bann dimounn kapav esey inflians nou pou aksepte bann fos rezonnman. Nou bann fami ek nou bann kamarad kapav esey konvink nou ki nou tro strik ek nou pa oblize swiv bann lalwa Zeova. Par exanp, zot kapav dir nou ki nou kapav fer seki nou anvi ek ki bann prinsip moral Zeova nepli lamod.

11. Ki kitsoz fode pa nou fer?

¹¹ Parfwa, nou kapav panse ki instriksion ki Zeova donn nou, zot pa ase kler. Ek akoz sa, nou kapav “al pli lwin ki seki finn ekrir.” (1 Kor. 4:6) Me sa se enn pese, ek bann sef relizie dan lepok Zezi ti fer sa pese-la. Zot ti pe azout zot prop lalwa ar bann lalwa Zeova. Ek akoz sa, bann dimounn ti pe gagn difikilte pou obeir Zeova. (Mat. 23:4) Zeova donn nou bann instriksion bien kler gras-a so Parol Labib ek gras-a so lorganizasion. Alor, nou pena okenn rezon pou azout bann lalwa ar bann instriksion ki Zeova donn nou. (Prov. 3:5-7) Fode pa nou “al pli lwin ki seki finn ekrir” dan Labib, setadir fode pa nou etabli bann reg pou nou bann frer ek ser.

12. Kouma Satan servi bann “tronpri ki san valer”?

¹² Bann rezonnman ki anbet bann dimounn. Satan servi bann “tronpri ki san valer” ek “bann kitsoz debaz ki lemond ansegne” pou anbet bann dimounn ek pou kree divizion. (Kol. 2:8) Dan premie siek, parmi sa bann kitsoz-la ti ena bann filozofi, bann lansegnman zwif ki pa dan Lalwa, ek lansegnman ki bann Kretien ti bizin swiv Lalwa Moiz. Sa bann lansegnman-la ti anbet bann dimounn, ek zot ti detourn bann dimounn ar Lasours vre sazes, setadir Zeova. Azordi, Satan servi bann media ek bann rezo sosial pou fann bann rimer ek bann fos linformasion. Ek bien souvan, se bann dirizan politik ki deryer sa. Par exanp, ti ena boukou fos linformasion pandan pandemi  COVID-19. c Bann dimounn ki ti pe ekout sa bann informasion-la ti bien trakase. Parkont, bann frer ek ser ki’nn ekout bann instriksion ki lorganizasion Zeova inn done dan sa ler-la, inn evit sa bann stres-la.​—Mat. 24:45.

13. Kifer nou bizin fer bien atansion ar bann kitsoz ki kapav detourn nou latansion?

¹³ Bann kitsoz ki kapav detourn nou latansion. Nou bizin res bien konsantre lor “bann kitsoz ki pli inportan.” (Fil. 1:9, 10) Sertin kitsoz kapav pran boukou nou letan ek nou lenerzi. Si nou les bann kitsoz ki nou fer toulezour kouma par exanp manze, bwar, amize, ek travay, vinn nou priorite, sa kapav detourn nou latansion ar bann kitsoz ki pli inportan. (Lik 21:34, 35) Anplis, toulezour dan linformasion, nou tann koz lor bann problem sosial ek politik. Nou bizin fer an-sort ki sa bann kitsoz-la pa detourn nou latansion. Parski si sa arive, nou kapav gagn difikilte pou gard nou netralite. Satan servi tou bann metod ki nou’nn mansione dan sa bann paragraf-la pou esey fer nou dezobeir Zeova. Anou gete kouma nou kapav reziste kont sa bann piez-la ek res ferm.

14. Ki kitsoz kapav ed nou pou res ferm?

¹⁴ Reflesi pou ki rezon to’nn donn to lavi Zeova ek to’nn pran batem. To’nn fer sa parski to ti anvi fer volonte Zeova. Rapel ki kitsoz inn konvink twa ki to’nn trouv laverite. To’nn aprann konn Zeova, ek to’nn koumans kontan ek respekte Li. To lafwa inn grandi ek sa finn motiv twa pou repanti. To’nn aret fer bann kitsoz ki Zeova deteste, ek to’nn koumans fer bann kitsoz ki fer Li plezir. To’nn vremem soulaze kan to’nn realize ki Bondie inn pardonn twa. (Ps. 32:1, 2) To’nn asiste bann renion, ek to’nn koumans partaz bann zoli kitsoz ki to ti pe aprann ar lezot. Aster-la ki to’nn donn to lavi Zeova ek to’nn pran  batem, to bien deside pou kontign mars lor semin lavi.​—Mat. 7:13, 14.

15. Ki bienfe nou gagne kan nou etidie ek reflesi lor Parol Bondie?

¹⁵ Etidie ek reflesi lor Parol Bondie. Enn pie pou tini dibout si so bann rasinn bien profon dan later. Dan mem fason, nou pou reisi tini ferm si nou bann rasinn bien profon dan Parol Bondie, setadir si nou ena enn lafwa for an Zeova. Amezir ki enn pie grandi, so bann rasinn al pli profon dan later. Kan nou etidie ek reflesi lor Parol Bondie, nou lafwa vinn pli for ek nou ena plis konfians dan bann prinsip Zeova. (Kol. 2:6, 7) Reflesi kouma Zeova inn gid so bann serviter dan lepase, kouma Li’nn donn zot bann instriksion, ek kouma Li’nn protez zot. Par exanp, kan Ezekiel ti gagn enn vizion, li ti res bien konsantre kan li ti trouv enn anz pe mezir tanp. Sa vizion-la ti donn lafors Ezekiel, ek li ansegn nou kouma nou kapav ador Zeova dan bon fason. d (Eze. 40:1-4; 43:10-12) Nou osi nou pou gagn bann bienfe kan nou pran letan pou etidie ek pou reflesi lor bann kitsoz profon ki ena dan Labib.

16. Kouma sa ti ed Bob kan li ti ena enn leker ferm? (Psom 112:7)

¹⁶ Devlop enn leker ferm. Dan enn sante, Lerwa David ti dir ki zame li pa pou aret kontan Zeova. Li ti dir: “Mo leker ferm, O Bondie.” (Ps. 57:7, NW) Nou osi nou kapav ena enn leker ferm, setadir ena foul konfians an Zeova. (Lir Psom 112:7.) Anou get lexanp Bob, ki nou ti mansione taler-la. Kan dokter-la ti dir Bob ki disan-la ti pou la tansion bizin li, Bob deswit ti reponn ki si zot pe pans pou met disan ar li, li pou kit lopital-la deswit. Plitar Bob ti dir: “Si ti bizin ale, vremem mo ti pou ale! Mo pa ti gagn traka ki ti pou arive apre.”

17. Ki nou kapav aprann ar lexanp Bob? (Get zimaz osi.)

¹⁷ Bob ti reisi res ferm parski avan mem ki li al lopital, li ti bien deside pou res fidel ar Zeova. Ki kitsoz ti pous  Bob pou pran sa desizion-la? Premierman, li ti anvi fer Zeova plezir. Deziemman, li ti etidie seki Labib ek bann piblikasion dir konsernan lavi ek disan. Ek trwaziemman, li ti sir ki li ti pou gagn bann bienfe si li ti swiv bann instriksion Zeova. Nou osi nou kapav ena enn leker ferm, ninport ki difikilte nou gagne.

18. Kouma lexanp Barak montre nou ki nou kapav fer Zeova konfians? (Get zimaz lor kouvertir.)

¹⁸ Fer Zeova konfians. Barak ti reisi gagn laviktwar parski li ti ena konfians an Zeova. Sa lepok-la, bann Izraelit pa ti antrene pou al lager. Zot pa ti ena okenn zarm. Pourtan, Zeova ti dir Barak al lager kont enn larme ki bien ekipe, larme bann Kananeen ek zot sef Sisera. (Ziz 5:8) Profetes Debora ti dir Barak desann dan enn laplenn pou al lager kont Sisera ek so 900 kales lager. Dan enn laplenn, sa ti pou bien difisil pou bann Izraelit lager kont bann kales. Me mem si Barak ti konn sa, li ti obeir. Pandan ki bann solda Izraelit ti pe desann Montagn Tabor, Zeova ti fer enn gro lapli tonbe. Bann kales Sisera ti tas dan labou, ek Zeova ti fer Barak gagn laviktwar. (Ziz 4:1-7, 10, 13-16) Dan mem fason, Zeova pou fer nou gagn laviktwar si nou ena konfians an Li ek si nou swiv bann instriksion ki Li donn nou par so lorganizasion.​—Det. 31:6.

19. Kifer to bizin bien deside pou res ferm?

¹⁹ Tanki nou viv dan sa move lemond-la, nou pou bizin fer boukou zefor pou nou res ferm ek solid. (1 Tim. 6:11, 12; 2 Pier 3:17) Alor, malgre persekision, bann taktik sournwa, rezonnman bann dimounn ki pena respe pou lalwa Zeova, bann rezonnman ki anbet bann dimounn, ek bann kitsoz ki kapav detourn nou latansion, anou bien deside pou res ferm. (Efe. 4:14) Anou kontign ogmant nou lamour pou Zeova, ek anou kontign obeir so bann komannman. Mem si nou bizin res ferm, nou bizin osi rezonab. Dan prosin lartik, nou pou gete kouma nou kapav vinn rezonab, parey kouma Zeova ek Zezi.