1-2. Kisann-la Zadok ti ete? (1 Kronik 12:22, 26-28)

 MAZINN sa senn-la. Enn lafoul plis ki 340,000 zom ti zwenn ansam pou fer David vinn lerwa lor Izrael an-antie. Pandan trwa zour sa bann zom-la ti res dan bann kolinn pre ar Ebron. Zot ti pe riye, koze, sant bann sante, ek loue Zeova. (1 Kro. 12:39) Parmi sa lafoul-la ena enn zenn garson ki ti apel Zadok. Selman, boukou dimounn pa ti remark Zadok. Me Zeova ti remark li ek Li ti anvi ki nou kone ki Zadok ti parmi sa lafoul-la. (Lir 1 Kronik 12:22, 26-28.) Me kisann-la Zadok ti ete?

² Zadok ti enn pret ki ti travay ansam avek Gran Pret Abiatar. Bondie ti donn Zadok sazes ek kapasite pou konpran so volonte. (2 Sam. 15:27) Akoz sa, boukou dimounn ti vinn rod konsey ar Zadok. Zadok ti osi enn zom ki ena boukou kouraz. Dan sa lartik-la nou pou aprann kouma Zadok ti montre kouraz.

3. (a) Kifer bann serviter Zeova bizin ena kouraz? (b) Ki nou pou gete dan sa lartik-la?

³ Pandan bann dernie zour, Satan pe plis atak bann serviter Zeova. (1 Pier 5:8) Akoz sa, nou bizin ankor plis kouraz pou andire, ziska ki Zeova detrir Satan ek sa move lemond-la net. (Ps. 31:24) Dan sa lartik-la nou pou get trwa fason kouma nou kapav imit kouraz Zadok.

SOUTENIR RWAYOM BONDIE

4. Kifer bann serviter Zeova bizin kouraz pou soutenir Rwayom Bondie? (Get zimaz osi.)

⁴ Antan ki bann serviter Zeova, nou anvi soutenir Rwayom Bondie avek tou nou leker. Me souvan, nou bizin  kouraz pou fer sa. (Mat. 6:33) Par exanp, dan lemond Satan nou bizin ena kouraz pou viv dapre bann prinsip Zeova ek pres bon nouvel lor Rwayom Bondie. (1 Tes. 2:2) Anplis, dan sa lemond-la, ena divizion akoz bann problem politik. Alor, nou bizin kouraz pou pa pran par dan sa bann deba-la. (Zan 18:36) Malerezman, boukou serviter Zeova inn gagn bann problem finans, inn gagn bate, ouswa inn al dan prizon parski zot pa partisip bann zafer politik, ouswa rant dan larme.

5. Kifer Zadok ti bizin kouraz pou soutenir David?

⁵ Zadok pa ti zis al Ebron pou al amize akoz David ti vinn lerwa. Me li ti pran so bann zarm avek li, ek li ti pare pou al lager. (1 Kro. 12:38) Li ti pre pou al lager ansam avek David ek defann Izrael kont so bann lennmi. Kitfwa Zadok pa ti ena boukou lexperyans pou lager kouma enn solda, me li ti enn zom ki ti ena boukou kouraz.

6. Kouma David finn les enn zoli lexanp kouraz pou Zadok? (Psom 138:3)

⁶ Kouma Zadok finn aprann pou ena sa kantite kouraz-la? Li ti antoure ar bann zom ki ti ena lafors ek kouraz. Nou sir ki li ti aprann boukou ar zot lexanp. Par exanp, bann Izraelit ti anvi fer David vinn lerwa parski avek boukou kouraz li ti “diriz Izrael dan so bann kanpagn militer.” (1 Kro. 11:1, 2) Selman, David ti touletan kont lor Zeova pou lager kont so bann lennmi. (Ps. 28:7; lir Psom 138:3.) Zadok ti osi aprann pou ena kouraz gras-a bann zom kouma Zoad ek so garson Benaya, ek osi 22 sef tribi ki ti soutenir David. (1 Kro. 11:22-25; 12:26-28) Tou sa bann zom-la ti bien deside pou fer David vinn lerwa ek pou protez li.

7. (a) Ki bann lexanp kouraz nou ena dan nou lepok? (b) Ki to kapav aprann ar lexanp Frer Nsilu dan sa video-la?

 ⁷ Nou gagn lafors ek kouraz kan nou reflesi lor lexanp bann dimounn ki’nn res fidel ar Zeova ek so Rwayom. Kan li ti lor later, Zezi ti bien deside pou pa pran par dan sistem politik sa lemond-la. (Mat. 4:8-11; Zan 6:14, 15) Zezi inn touletan kont lor Zeova pou donn li kouraz. Dan nou lepok, ena osi boukou lexanp bann zenn garson ki’nn refiz pou rant dan larme ouswa pou partisip dan bann laktivite politik. Kitfwa to kapav lir zot zistwar lor nou sit jw.org. a

ED TO BANN FRER EK SER

8. Kan eski bann ansien kitfwa pou bizin kouraz pou ed zot bann frer ek ser?

⁸ Bann serviter Zeova kontan pou ed sakenn zot kamarad. (2 Kor. 8:4) Selman, ena fwa zot bizin kouraz pou fer sa. Par exanp, kan enn lager eklate, kitfwa bann ansien konpran ki bann frer ek ser pou bizin soutien ek lankourazman. Ek osi, kitfwa zot pou bizin Labib, bann piblikasion, manze, linz, ek enn plas pou reste. Bann ansien bien kontan zot bann frer ek ser, akoz sa zot fer tou seki zot kapav pou ed bann-la mem si kitfwa sa kapav danzere. (Zan 15:12, 13) Kan zot fer sa, zot pe imit kouraz ki Zadok ti ena.

9. Dapre 2 Samiel 15:27-29, ki David ti demann Zadok pou fer? (Get zimaz osi.)

⁹ Anou gete kouma Zadok ti ed so bann frer dan bann moman difisil. David so garson Absalon, ti anvi touy David pou li vinn lerwa dan so plas. (2 Sam. 15:12, 13) Akoz sa, David ti bizin kit Zerizalem pli vit ki li kapav. Li ti apel so bann serviter ek ti dir: “Leve ek anou sove, parski personn parmi nou pa pou kapav sape ar Absalon!” (2 Sam. 15:14) Pandan  ki so bann serviter ti pe sove, David ti konpran ki enn kikenn ti bizin reste pou konn plis lor seki Absalon ti pe anvi fer. Alor li ti fer Zadok ek lezot pret retourn Zerizalem pou vinn so bann espion. (Lir 2 Samiel 15:27-29.) Selman, bann-la ti bizin fer bien atansion, parski seki David ti demann zot pou fer ti bien danzere. Absalon ti enn zom violan, egois, ek li ti trayir so papa. Mazine ki li ti pou fer Zadok ek bann lezot pret si li ti aprann ki bann-la ti bann espion ek ti pe protez David!

10. Kouma Zadok ek bann ki ti avek li ti protez David?

¹⁰ David ti demann Zadok ek enn lot bon kamarad, Oushay, pou ed li pou mont enn plan. (2 Sam. 15:32-37) Dapre plan David, Oushay ti bizin fer sanblan ki li pe soutenir Absalon. Li ti bizin donn Absalon konsey kouma pou atak David, ek lerla, sa ti pou donn David letan pou prepar enn latak. Apre sa, Oushay ti fer Zadok ek Abiatar kone ki Absalon ti pou fer. (2 Sam. 17:8-16) Lerla, sa de zom-la ti avoy David enn mesaz pou fer li kone ki plan Absalon ti ena. (2 Sam. 17:17) Gras-a led Zeova, Zadok ek bann lezot pret inn zwe enn rol inportan pou protez David.—2 Sam. 17:21, 22.

11. Kouma nou kapav imit kouraz Zadok kan nou pe ed nou bann frer ek ser?

¹¹ Kan nou bann frer ek ser an danze ek bizin led, kouma nou kapav montre kouraz parey kouma Zadok? (1) Swiv bann instriksion. Dan sa bann sitiasion-la, li bien inportan ki nou res ini. Alor, swiv bann instriksion ki biro nasional donn nou. (Ebre 13:17) Bann ansien bizin reget bann instriksion regilierman lor kouma pou prepar zot avan enn katastrof, ek seki zot bizin fer kan ena enn katastrof. (1 Kor. 14:33, 40) (2) Ena kouraz me fer atansion. (Prov. 22:3) Servi to bon  zizman. Pa pran bann risk initil. (3) Kont lor Zeova. Rapel ki Zeova anvi ki twa ek to bann frer ek ser zot an sekirite. Li pou ed twa pou ki to kapav ed to bann frer ek ser san ki to met to lavi an danze.

12-13. Ki to kapav aprann ar lexanp Viktor ek Vitalii? (Get zimaz osi.)

¹² Anou get lexanp Viktor ek Vitalii. Sa de ansien-la ti travay ansam pou al kit manze ek delo pou bann frer ek ser dan Ikrenn. Viktor dir: “Nou ti rod manze partou. Ti ena enn frer ki ti ena manze dan so stor, ek li ti donn sa bann manze-la bann frer ek ser. Gras-a sa donasion-la, bann proklamater inn gagn seki zot bizin pou sirviv pandan enn sertenn letan. Bien souvan nou ti pe tann bann dimounn tir kout bal. Enn zour, pandan ki nou ti pe ramas manze dan transpor, enn bom ti eklate preske 20 met ar nou. Toutlong larout mo ti sipliye Zeova pou donn mwa kouraz pou mo kapav kontign ed bann proklamater.”

¹³ Vitalii dir: “Nou ti bizin ena boukou kouraz. Mo premie vwayaz ti pran 12 er-tan. Toutlong vwayaz mo ti priye Zeova.” Vitalii ti enn frer ki ti ena boukou kouraz, me li ti osi fer atansion. Li dir: “Mo ti kontign demann Zeova pou donn mwa sazes ek ed mwa pou rekonet mo bann limit. Mo ti roul zis dan bann semin ki bann lotorite ti permet. Mo lafwa ti vinn pli for kan mo ti trouve kouma bann frer ek ser ti pe travay ansam. Bann frer ek ser ti tir tou bann kitsoz ki ti pe blok larout. Zot ti pran manze, linz, ek bann lezot kitsoz inportan ek zot ti met dan nou transport. Ek zot ti mem donn mwa ek Viktor manze ek enn plas pou repoze avan ki nou kontign nou larout.”

RES FIDEL AR ZEOVA

14. Kan enn kikenn ki nou kontan kit Zeova, kouma sa afekte nou?

¹⁴ Enn kitsoz ki kapav plis dekouraz nou, se kan enn manb nou fami ouswa enn bon kamarad kit Zeova. (Ps. 78:40; Prov. 24:10) Plis to kontan enn dimounn, plis sa pou difisil pou aksepte sa sitiasion-la. Si to’nn pas par sa sitiasion-la, Zadok so lexanp fidelite kapav donn twa lafors.

15. Kifer Zadok ti bizin kouraz pou res fidel ar Zeova? (1 Lerwa 1:5-8)

¹⁵ Zadok ti swazir pou res fidel ar Zeova, mem si so bon kamarad Abiatar ti swazir pou pa res fidel ar Zeova. Sa ti arive ver lafin regn Lerwa David. Kan David ti vinn vie ek ti pre pou mor, so garson Adoniya ti esey fer limem vinn lerwa, mem si Zeova ti deside ki se Salomon ki ti pou vinn lerwa. (1 Kro. 22:9, 10) Abiatar ti swazir pou soutenir Adoniya. (Lir 1 Lerwa 1:5-8.) Kan li’nn fer sa, Abiatar pa’nn zis trayir David, me li’nn osi trayir Zeova! Mazine ki kantite Zadok ti sagrin kan ti ariv sa. Pandan plis ki 40 an, li ek Abiatar ti travay ansam kouma pret. (2 Sam. 8:17) Anplis, zot ti okip “Lars vre Bondie” ansam. (2 Sam. 15:29) Dan koumansman, zot toule-de ti soutenir David kouma lerwa, ek zot ti fer boukou lezot kitsoz dan servis Zeova.—2 Sam. 19:11-14.

16. Ki ti ed Zadok pou res fidel?

¹⁶ Zadok ti res fidel ar Zeova mem si Abiatar ti swazir pou pa res fidel ar Zeova ek pou trayir David. David ti kone ki li kapav touletan fer konfians Zadok. Kan Adoniya so plan pa’nn marse, David ti swazir Zadok, Natan, ek Benaya pou fer Salomon vinn lerwa. (1 Ler. 1:32- 34) Sirman Zadok ti bien ankouraze par lexanp bann lezot serviter Zeova kouma Natan, ki ti fidel ar Zeova ek ki ti soutenir Lerwa David. (1 Ler. 1:38, 39) Ek kan Salomon ti vinn lerwa, li “ti fer Zadok vinn pret dan plas Abiatar.”—1 Ler. 2:35.

17. Kouma to kapav imit lexanp Zadok kan enn kikenn ki to kontan kit Zeova?

¹⁷ Kouma to kapav imit kouraz ki Zadok ti ena? Si enn kikenn ki to kontan swazir pou kit Zeova, montre Zeova ki to’nn swazir pou res fidel ar Li. (Zozwe 24:15) To kapav sir ki Zeova pou donn twa lafors ek kouraz pou to res fidel ar Li. Priye Zeova ek frekant bann kamarad ki fidel ar Zeova. To fidelite anver Zeova ena valer pou Li, ek to kapav sir ki Li pou rekonpans twa.—2 Sam. 22:26.

18. Ki nou kapav aprann ar lexanp Marco ek Sidse?

¹⁸ Anou get lexanp Marco ek so madam, Sidse. Zot de tifi ti desid pou aret servi Zeova. Marco dir: “Depi ki nou zanfan inn ne, nou kontan zot. Ek nou anvi fer tou seki nou kapav pou protez zot. Alor kan zot desid pou kit Zeova, sa vremem fer nou leker fermal. Selman, Zeova ti ed nou pou andire. Zeova ti fer sir ki nou kapav ankouraz sakenn nou kamarad. Kan mo ti santi mwa dekouraze akoz seki ti arive, mo madam ti rekonfort mwa ek ti ankouraz mwa pou fer seki bon. Ek kan li, li ti dekouraze mo ti fer parey pou li.” Sidse dir: “Nou pa ti pou kapav andir sa sitiasion-la si Zeova pa ti donn nou lafors. Mo ti santi mwa koupab akoz seki ti arive. Alor, mo ti dir Zeova seki mo ti resanti. Plitar, enn ser ki mo pa ti zwenn depi plizir lane ti vinn get mwa. Li ti poz so lame lor mo zepol, li ti get mwa dan mo lizie, ek li ti dir: ‘Sidse, rapel ki se pa to fot!’ Gras-a Zeova, mo’nn kapav kontign gard mo lazwa.”

19. Ki kitsoz to bien deside pou fer?

¹⁹ Zeova anvi ki tou so bann serviter ena kouraz parey kouma Zadok. (2 Tim. 1:7) Selman, Li pa anvi ki nou kont lor nou prop lafors. Li anvi ki nou kont lor Li. Alor, kan nou dan enn sitiasion kot nou bizin kouraz, demann Zeova so led. To kapav sir ki Li pou fer twa ena kouraz parey kouma Zadok!—1 Pier 5:10.